SHONGZĀ 14
14
Red Sea Kakān
1Chiwui thili Prohona Mosesli hānga, 2“Israelnaobingli latungda, Pi-ha-hirothwui mangāli, Migdol eina ngayiwui ngachai Baal-zephon mangāli, ngasām khavai hānglu; nathumna chili kāroda ngayipheili ungngasāmra. 3Kaja Pharaohna Israelnaobingwui pongli, ‘Lamhāngli apong maphākhuimada Israelnaobing ma̱zatta lei’ da hāngra. 4Kala ina Pharaohwui wuklung mararmihaida, athumli kharomvāluira, kala Pharaohli kala awui mibingli iwui tekhamatei theingasakra, kala Egyptnaobingna I Prohona kaji theikhuira.” Kala athumna chithāda sai.
5Mibing yāmhaira kaji kashā eina Egyptwui awunga Pharaohla, awui raobingla ning ngacheida hānga, “Ithumli otram khangatha̱wui eina Israelnaobingli chiho kahai hi ithumna khi kasākhala?” 6Chieina ana siguigari khangarān sālaga raimi thānthuwa, 7kala siguigari shātharuk kapangkhuida kala Egyptli khalei siguigari eina chiwui otva̱bingli ngasoda vāhaowa. 8#Ots 13.17. Kala Varena Egyptwui awunga Pharaohwui wuklung mararmihaida Israelnaobingna pinglak eina zatkahai chiwui thi kharomvai. 9Pharaohwui siguibing, siguigari, sigui katongabing, raimi zangda kharomvai, kala Baal-zephon mangāli khalei Pi-ha-hiroth ngayipheili angaphankhuihaowa.
10Pharaohna akhanganai tharan, Israelnaobingna ngashānungda Egyptnaobing rākharā chi thei, kala athum ngacheelakhaowa, kala Israelnaobingna Proholi ngakaowa, 11kala athumna Mosesli hānga, “Egyptli chikhur maleithuda lamhāngli thikhavai nana ithumli thānkashokla? Nana ithumli Egyptwui eina thānkashok hi khiwui kakhalatkhala? 12#Sho 16.3; 17.3. Egyptli leilakha, ithumna nali ‘Chimathālu, ithum Egyptli rao satha̱ra’ da kahāng chi hi maningmala? Kachiwui vangkhala kaja lamhāngli thiki kajiwui vanga Egyptnaobingli otram ngatha̱khamina phāmeiki kajina.”
13Kha Mosesna mibingli hānga, “Mangacheealu, nganingshinglu, laga aja Prohona nathumli kanmiki kaji chi yanglu; kaja aja nathumna kathei Egyptnaobing hi nathum matheiluilakmara. 14Prohona nathumwui vang ngararmira, nathum kasaikha pammalu.”
15 Prohona Mosesli hānga, “Khisāda nathumna ili ngakaokhala? Israelnaobingli mangāshong zatvā ngasaklu. 16Kha nawui khāmshui khāngkāda ngayitungli katingvālaga ngayi chi ngayarkhaihaolu, chieina Israelnaobingna ngayilungli ngalei kathengli zatvāpaira. 17Kala ina Egyptnaobingwui wuklung mararmihaida athumna shurzangra, chitharan Pharaoh kala awui raimi katonga, awui siguigari, kala sigui katongbing saikorawuitungli iwui tekhamatei chitheira. 18Ina Pharaoh eina awui siguigaribing kala siguigari kathaobingwuitungli tekhamatei chithei kahai tharan Egyptnaobingna Proho chi ina kaji theikhuira.”
19Chiwui thili Varewui kazingrao, Israelnao raimibingwui mangāli kazata china athumwui khanukshong unghaowa; kala muiyāwui pākra̱ china kaseiungda athumwui khanukli ungnganinghaowa, 20china Egyptnaobingwui raimi eina Israelnaobingwui raimi ngachaili nganinghaoda lākhashong muiyāna tangmanghaowa, lākhashong horngasakta ngayā pongda akhashila akhashili mavā ngarokmana.
21Chieina Mosesna ngayivāk apāng katingvai; kala ngayā pongda Prohona kapanga zingshoshongwui masi phanngasaka, kala tara̱ chi lānmihaida ngayi thengngasaka, kala tara̱ chi ngayarkhaimihaowa. 22#1 Cor 10.1-2; Heb 11.29. Tara̱ china athumwui uishong yāshong phaklāng thāda sāmi, kala Israelwui mibingna ngayilungwui katheng chili zatvai. 23Egyptnaobing, Pharaohwui siguibing, siguigaribing kala katongabing saikorana athumli shamadrulungli kharomzanga. 24Ngathor kazing kathang eina muiyāwui kala meiwui pākra̱ eina Prohona Egypt katongali yangtai, kala Egypt raimi katongali pa̱ngapā ngasaka. 25Sigui gariphei ngaphumda ritnahaida mazatthukthuwa; chieina Egyptnaobingna hānga, Israelnaobingwui eina yāmusa kaja Prohona athumwui vang Egyptnaobingli ngararmida lei.
26Chiwui thili Prohona Mosesli hānga, “Egyptnaobing, athumwui siguigari, katongabing chiwuitungli tara̱ latung khavai ngayili napāng katingvālu.” 27Chieina Mosesna ngayitungli apāng katingvai, kala kazing kathang eina tara̱ chi khangachāwui thāda longunghaowa; kala Egyptnaobingna chili yāmsangda Prohona ngayilungli ngaphumthat ngasakserhaowa. 28Tara̱ hanungda siguigarila, sigui katong mila, Pharaohwui shipai ngayilungli shurkazanga katonga ngaphumhaowa, akha eina tangda mashokmana. 29Kha Israelnaobingwui vang tara̱na uishong yāshong phaklāng sāmida ngayilungli katheng eina zata.
30Chithāda sāda chithang, Egyptnaobingwui pāng eina Prohona Israelnaobingli kanmi; kala Israelnaobingna ngayipheili Egyptnaobing kathi chi thei. 31Egyptnaobingwuitungli Prohona hakkhamahā ot kasā chi Israelnaobingna theilaga Proholi ngachee, kala Proho eina awui rao Mosesli shitsanga.
Currently Selected:
SHONGZĀ 14: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
