SHONGZĀ 19
19
Sinai Kaphungli Kapam
1Israelnaobingna Egypt ngaleiwui eina shokta chāngwok kakathumawui kharethang athumna Sinai kaphungli vāshunga. 2Athumna Rephidimwui eina zatta Sinai lamhāngli vākashung eina, athumna lamhāngli angasāma, phungreiwui mangāshong Israelnaobingna angasāma. 3Kala Mosesna Vareli samphang khavai kai,
kala Prohona phungreiwui eina ali hoda hānga, “Nana Jacob shimkhurli kala Israelnaobingli hithāda hāngra: 4Egyptnaobingli ina kasā, kaja khalāngwui angachāng eina ina nathumli kathāda phungzat kala kathāda iwuili khuirākhala kaji chi nathumna theihaira. 5#Khal 7.6; 14.2,21; 26.19; Tit 2.14; 1 Pet 2.9; Phon 1.6; 5.10. Chiwui vang eina ara iwui tui nganāda iwui tuingashit mayonakha, miyur saikorawui ngachaili nathum iwui mi sāra, kaja okathui hi iwuisera, 6kala iwui vang nathum pāngmonwui wungram kala kathara yur sāra. Israelnaobingli nana hāngki kaji tui chi hina.” 7Chieina Mosesna rāda ararbingli hokhuilaga, Prohona ali kahāng tui saikora chi athumli hāngchithei. 8Kala mibing saikorana khokkha sāda ngahānkāda hānga, “Prohona hāngkahai tui saikora ithumna sāra.” Kala Mosesna mibingwui tui chi Proholi hānga.
9Chiwui thili Prohona Mosesli hānga, “Yanglu ina nali khangazek chi mibingna shākhavai kala mirin peida nali shitsang khavai ina muiyā kashā akhawui alungli rāra.”
Chieina Mosesna mibingwui tui chi Proholi vāhānga. 10Kala Prohona Mosesli hānga, “Mibingwuili vāda aja eina akhama tharchigat ngasaklu; athumwui kashankachon ngasa̱ ngasaklu; 11kala kakathumathangwui vang khangarān saserranu, kaja kakathumathang mi saikorana theikhavai Prohona Sinai Kaphungli tāra. 12#Heb 12.18-20. Kala nana mibingwui vang kuimareida leirin akha khānhailaga hānglu, ‘Ningngasharlu, phungreili makāpaimara, lah leiretlila masāza̱paimara; phungreili sakaza̱a mi chili chithitra; 13#Heb 12.18-20. ali pāng masāza̱paimara, kha ngalung eina horthatra lah malā eina kapthatra; miranu, sāranu, maring ngasakmara.’ Talla̱khon panglāk eina kakhong tharan mibingna phungreili kāpaira.” 14Chieina Mosesna phungreiwui eina tāda mibingli tharchigata; kala athumna athumwui kashankachon ngasa̱sera. 15Kala ana mibingli hānga, “Kakathumathang chi khangarān sāserlu, sha̱nao ngalemli mavālu.”
16 #
Phon 4.5. Kakathumathangwui ngathor kazing ngashumda rikhān ngasheiya, kala muiyā kashā akha phungreitungli ngapuirora, kala talla̱khon panglāk eina khongda rāmrahli khalei mibing saikora kathirhaowa. 17Chiwui thili Vareli samphang khavai Mosesna mibingli rāmrahwui eina thānvai, kala athumna phungreipheili anganinga. 18Kala Sinai Kaphungli meikhutna ngapuiphinhaowa; kaja Prohona chiwuitungli mei eina tai; kala chiwui meikhut shālui kachui thāda kai, kala phungrei katonga nganuka. 19#Khal 4.11-12. Talla̱khon chi pangmamān kaji eina Mosesna matuiphoka kala Varena khangashumkhon eina ngahānkai. 20Prohona Sinai Kaphungli tai, phungreitonli tāda Mosesli phungreitonli kāluda hoi, kala Mosesna kai. 21Kala Prohona Mosesli hānga, “Proholi yangkida athumna manamzang khavai zanghāngmachinlu, chi maningakha mi kachungkha thihaipaishina. 22Kala Prohowui ngalemli rāki kaje pāngmonbing china athum khalatta tharchigatranu; chi maningakha Prohona tandi mira.”
23Kala Mosesna Proholi hānga, “Mibinga Sinai Kaphungli makāpaimara, kaja nakhalattana ‘Phungrei kuimareida leirin khānhaida tharchigatlu’ da hānghai dalei.”
24 Prohona hānga, “Aaronli zanghokhuida kālu, kha khangatei pāngmonlapai kala mibing khipākha Proholi kākhavai manamkāpaimana; Prohona athumli tandi mipaishina.” 25Chieina Mosesna tālaga mibingli zanghānga.
Currently Selected:
SHONGZĀ 19: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
