SHONGZĀ 34
34
Lungphek Kakhane
(Khal 10.1-5)
1 Prohona Mosesli hānga, “Lungphek khani kharewui tākam eina sākhuilu; kala nana sakhai kahai lungphekli kapi kahai tui chi ina kapimiluishitra. 2Ngathor ngarānhaisalu, kala ngathorshong Sinai Kaphungli kālu, kala phungreitonli ili kāsamphanglu. 3Mi khipākha nali mangasokāpaimara, kala phungrei chili khipākha maraaranu, seila, yaola chiwui ngalemli mahompamaranu.” 4Chieina Prohona kakaso athishurda Mosesna lungphek khani kharewui thāda sākhui, kala ngathorthāk ngakarthuida apāngli lungphek khani chi singphungda Sinai Kaphungli kai.
5Kala Prohona muiyālungli tai kala ali ngasoda chili rānganinga, kala Prohowui ming phongshoka. 6#Mis 14.18; Neh 9.17; Laa 86.15; 103.8; 145.8; Joh 4.2. Prohona awui mangāli rākāda, “Proho, Proho, lumashan leishikatha Vare, kala malungmavatkazāra, kala makhangachei leikashi eina ningkatongna pemting kahaia, 7phaningmida mi thingthingwui vang makhangachei leishikhame, morei, makaphā makhayā, khayonkhamāng pheokhamena; kha khayonkhamāngli avāva̱ ngarāwui moreiwui vāng naongarāwui naongarā, kakathuma kala khamate thot eina tangda tandi mi” da rāphongshoka.
8Kala Mosesna katotsisi ngaleili akui mashunzanga kala khoruma. 9Kala ana hānga, “Ara ili nana nawui mikyanli lumashanmiakha, O Proho, ina nali seihā sāli, ithumli khangasozatmilu, miyurbing hi hāngda makhuilala Prohona ithumwui khalāng morei pheomihaida nawui shimlui miki kaji chili kathānvāmilu.”
Tuingashit Mikhalui
(Sho 23.14-19; Khal 7.1-5; 16.1-17)
10Kala ana hānga, “Yanglu, ina tuingashit akha sai. Nawui mibing saikorawui mangāli yur akhawui alunglila, lah okathui huptawui alunglila masālākrang kaji matakhak kahai ot sāra; kala nana ngasopamda khalei mibing china Prohowui otsak chi theira; kaja ina nathumli sāki kaji hi khangachee khangachā otna. 11Ina aja kakaso hi yangkhuilu. Yanglu, Amornao, Canaannao, Hitnao, Periznao, Hivnao, kala Jebusnaobingli ina nathumwui miktāli kashamshokra. 12Nathum khalatta ningngasharlu, chi maningakha nathumna khavāvā pamli ngalei chili kapamabingli tuingashit akha sāda nathumwui alungli chi khalen kathā ngasāra. 13#Khal 16.21. Nathumna athumwui hanphutbing sākhaitālu, kala athumwui pākra̱bing sāteklu, kala athumwui Asherim sātekserhaolu.”
14 #
Sho 20.5; 34.7; Khal 4.24; 5.9. “Kaja nathumna vare khangateili makhorumpaimana, kaja mikpaishikatha Proho Vare awui ming Zikhamarena, 15maningakha nana apam chiwui mibingli tuingashit sāda kala athumna athumwui vareli pha̱phayāda khayorva̱wui otsak eina ngasoda athumwui varebingli kapha̱ chili nathumli khangahot eina kapha̱ sā chi shaihaipai, 16kala nana nawui naomayarabingwui vang aramwui naongalava̱bing khuimida athumwui varewui acham sāda khayorva̱wui otsak chili nanaomayarabing zangpaishina.”
17 #
Sho 20.4. “Nathumna khalattawui vang meoma̱ pāng eina maheikhuipaimana.”
18 #
Sho 12.15-20. “Khawok makazang khamui phanit nathumna mayonra. Ina kakaso thāda shinithang khawok makazang khamui shaira; hi hāngkahai thāda Abib kachāngwui atamli sāchingra; kaja Abib kachāng hili nathumna Egyptwui eina shoka.”
19 #
Sho 13.2,11-16. “Sha̱kei avā saikora seimuk eina yaonao; sha̱kei pharākhare saikora iwuisera, 20#Sho 13.13. gadhānao pharākhare chi yaonao eina ngatangkhuira; kalikhada nana mangatangkhuingaiakha anao chi akahung shireishatmihaolu. Nathumwui naochizai saikora ngatangkhuiphalungra.
“Kala iwui mangāli khipākha khamasai eina marāpaimana.”
21 #
Sho 20.8-10; 23.12; 31.12-17; 35.2; Khal 5.12-15. “Tharukthang nathumna ot sāra, kha kashinethang ngasāmkhuira; luisao nilala, māhā nilala ngasāmkhuira.”
22 #
Sho 23.14-17; Pāng 23.1-44; Khal 16.1-17. “Kala haptābingwui phanit nathumna mayonlu, kehu hātkakhui kala kumpei dharreo phanit hi mayonlu.”
23“Kumkhawui alungli nathumwui mayarnao saikora Israelwui Vare, Proho Varewui mangāli kathum shida rānganingphalungra. 24Khikhalajila ina miyurbing kashamhaida nathumwui thari haksangmira; nathumwui lam khipānakha mangapaimara, nathumna kumkhali Prohowui mangāli samphang khavai kathumshida kakā chitharan.”
25 #
Sho 23.18; Pāng 2.11; Sho 12.10. “Ili pha̱khavaiwui asheeli khawok sanglaga nathumna chigat shāra; makānkhami phanitwui pha̱kaphayā nilala akhamawui vang mataipaimana.” 26#Sho 23.19; Khal 14.21; 26.2-11. “Nawui ngaleiwui athei-arai matheikharewui khare chi nawui Proho Varewui shimli khuirāphalungra.”
“Nathumna yaonaosā ava̱wui na̱ eina mahangpaimana.”
27Kala Prohona Mosesli hānga, “Tuibing hi kapihailu; tui hiwui athishurda nali kala Israelli ina tuingashit sākahaina.” 28Kala ana Proholi ngasoda chili ngashun hangmati kala ngayā hangmatithang pama; kazāla mazāmana lah khamangla mamangmana. Kala ana lungphektungli tuingashitbing, ningkhami tharā chi kapisanga.
Mosesna Phungreiwui eina Katā
29 #
2 Cor 3.7-16. Mosesna ningkhamiwui lungphek khani chi apāng eina singlaga Sinai Kaphungwui eina katā chitharan, ana Proholi chān khangazekwui vang eina awui mai horchamri kahai chi ana matheisāmana. 30Aaron kala Israelnaobingna Mosesli kathei tharan, yanglu, awui mai horchāmri kahai chi kathei eina athumna awui ngalemli nganaikida ngacheehaowa. 31Kha Mosesna athumli kaho eina Aaron kala Israel ashangva̱wui kathānabingna ali hanungda Mosesna athumli ngasoda chān ngazeka. 32Kala chiwui thili Israelnao saikorana anganaiya; kala ana Sinai Kaphungli Prohona hāngkahai ningkhami saikora chi athumli mi. 33Kala Mosesna athumli ngazekkhui kahaiwui thili ana amaili mairār akha farora; 34kha Mosesna Proholi zangngazek kachida ana mahanshokranglakha eina tangda mairār khuishokhai; kala ana hankashok eina khi kasomameikhala kaji Israelnaobingli hānga. 35Israelwui mibingna Moseswui amai horra kaji theiya kala Mosesna ali mazang ngazekranglakha eina tangda amaili mairār farorpama.
Currently Selected:
SHONGZĀ 34: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
