SHONGZĀ 39
39
Pāngmonbingwui Sāri
1Katharapamli otram ngatha̱ khavai, khamaying, hungrisi, kala hungshi kahai eina manaktak kahaiya sāri sākhui; athumna kathara sāri chi Aaronwui vang sākhui; kala chi Prohona Mosesli kakaso athishurda sākhui.
2 #
Sho 28.6-12. Kala ana sinā khamaying, hungrisi, kala hungshi kahai kala manakta hākakhui kazaira̱ eina ephod sākhui. 3Khamayinga, hungrisi, hungshi kahai kala manakta hākakhui kazaira̱ eina kasā chili yeksang khavai sinā aphek shaokhanārlaga kazaira̱ thāda mathālak eina sākhui. 4Ephod chi yārtuili thāngkhavai khara̱ khani sākhui, kala khani chi ephodli pānkhui. 5Kala chi khalapshān khavai chonsā rakkakhui chila kala chiwui kasā themsak ngaraichāda sākhui, kaja sinā eina kasā khamaying, hungrisi, hungshi kahai kala manakta hākakhui kazaira̱ eina kasā chonsāna; chi Prohona Mosesli kaso kahai chithāda sākhui. 6Onyx ngalung sākhariklaga sinā eina rukshāna, kala khutopli rukkasang thāda Israelwui naomayarabingwui amingbing chili ruksangsera. 7Kala ana chi ephodwui yārtuiparli hai, kaja Prohona Mosesli kaso kahai athishurda Israel naomayarabingli phaningung khavaiwui ngalungna.
Thikhom
(Sho 28.15-30)
8 #
Sho 28.15-28. Ana thikhomla, sinā eina khamayinga, hungrisi, hungshi kahai kala manakta hākakhui kazaira̱ eina ephod kasā thāda sākhui. 9Chi asān-aret ngarithi, kala thikhom khanishi ngaphoda sākhui, ngaphohaiakha, asān pangmayākha, aret pangmayākha ji. 10Chiwuitungli apeng mati ruksanga. Khare apengli sardius, topaz, kala carbuncle; 11pengkakhaneli, emerald, sapphire, kala hirā; 12kakathuma apengli, jacinth, agate, kala amethyst; 13kala khamate apengli, beryl, onyx, jasper; saikora chi sinā eina rukshānsera. 14Ngalung tharāda khani chili Israelwui naomayarabingwui aming athishurda yeksangsera; mahor namkhavai khutop thāda yeksangsera. 15Kala thikhomwuitungli khara̱ kashirei hokkhui khamaron thāda sinā khamathinga eina sāsanga; 16kala rukshān khavai sinā apeng khani, akhui khani sākhuida akhui khani chi thikhomwui akhana khanili pānshāna; 17kala athumna thikhom mareiwui akhui khani chili sinā peng khani chi hokkhui. 18Amarei khani china sinā rukshān kahai chili pānkhui; chithāda sāda athumna ephodwui yārtuiparli mangāshong hokthānga. 19Chiwui thili athumna sinā akhui khani sākhuida thikhomwui achithek khaniwui alungshong ephod ngalemli sāshāna. 20Kala athumna sinākhui khani sākhuida yārtuiparwui azing mangāshong sāshānda thāngkhavai ephodwui themlāk eina rakkakhui chonsāwui atunglila sāshāna. 21Kala athumna thikhom akhui eina ephod akhui ngasun khavai khamayinga khara̱ eina khalapkhui, chithāda sāda ephodwuitungli napshānda thikhom mangacho khavai Prohona Mosesli kakaso chi tākam eina sai. 22#Sho 28.31-34. Ana ephodwui phahonla khamayingamāng eina rakkhui; 23kala chiwui sākaphut akhur chi makāk khavai phahonwui sākaphut thāda shangshung tāshungda katimsangsera. 24Katuma phahon amareili khamaying, hungrisi, hungshi kahai kala manakta hākakhui kazaira̱ yurwui chonsā eina kabothei yeksanga. 25Kala athumna sinā kachanga eina kantā semkhui, kala katuma phahon amarei kuimareida kabothei sāsang kahai chiwui angachai-chaili sinā kachanga eina kasā kantā ava̱va̱ hokthānga; 26kantā akha, kabothei akha, kantā akha, kabothei akha da, Prohona Mosesli kakaso chi tākam eina otram khangatha̱li ngavai khavai katumma phahon chili peida sāsanga. 27#Sho 28.39,40,42. Athumna Aaronwui kala anaomayarabingwui vangla khamanaka chonsā eina coat sāmi, 28kala kuiteila, kuihonla khamanaka chonsā eina sāmi, malaola, shanneira̱la; 29manakta hākakhui kazaira̱ kala khamayinga, hungrisi, hungshi kahai chonsā kala kapim eina aphor phorsanglaga, Prohona Mosesli kakaso tākam eina sāmi. 30#Sho 28.36,37. Kala athumna kathara kuihon sinā kachanga eina sai, kala khutopli rukkasang thāda, “Proholi Tharmathengranu” da kapisanga. 31Kala Prohona Mosesli kakaso athishurda chi kuiteili khalapshān khavai khamayinga khara̱ akha shipshāna.
Tabernacle Sākakup
(Sho 35.10-19)
32Chithāda sāda kazip khavai kachonshimwui tabernacle chi sākhuihaowa; kala Prohona Mosesli kakaso athishurda Israelnaobingna chi tākam eina sākhui. 33Kala athumna Mosesli tabernacle chi khuirāmi, kachonshim kala chiwui khorkhongbing, chiwui hokkhui khavaibing, chiwui akombing, chiwui khamakhara thingbing, chiwui pākra̱bingla, kala chiwui apheila, 34faror khavai mathen kahai yaohui, mehui, kala mairār chonrānla, 35ningkhami oko eina chiwui thingphānla, kala lukhamashan pamkhongla; 36#Sho 25.30; 40.23; Pāng 24.5-9. table eina chiwui khorkhongbing kala ngasokhamiwui khamuila; 37sinā kachanga eina kasā thaomeishong kala chiwui thaomeibing, kala chiwui khorkhongbing saikora; kala shārkhavai thaola; 38sinā eina kasā hanphut, neokhavai thao, kala nganamkaphā thao kala kachonshim khāmongli rānkhavai chonrānla; 39pithrai eina kasā hanphutla, chili sākasang pithraiwui yākrei thingphān, kala khorkhongbing saikora, khongsaila, kala chiwui apheila; 40yāngkhupli rānkhavai kachon, pākra̱bing kala apheibing, yāngkhup ngaveiwui chonrān, thingshunbing, kazip khavai kachonshim, kala tabernacleli shichinki kaji khorkhong saikora; 41katharapamli otram ngatha̱ khavai themlāk eina sākakhui pāngmon Aaronwui kathara sāribing, kala anaomayarabingwui sāribing. 42Prohona Mosesli kakaso saikora chi, Israelnaobingna katonga sākupa. 43Kala Mosesna ot saikora chi thei, kala yanglu, Prohona kakaso thāda athumna chi tākam eina sai. Athumna chithāda sākakhuiwui vang Mosesna athumli somi.
Currently Selected:
SHONGZĀ 39: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
