SHONGZĀ 7
7
1 Prohona Mosesli hānga, “Yanglu, ina nali Pharaohwui Vare kathā sāngasakhaira, kala nachinā Aaronna nawui marān sāra. 2Ina nali kakaso saikora nana hāngra, kala nachinā Aaronna Pharaohli ngalei hiwui eina Israelnaobingli chiho khavai hāngra. 3#Ots 7.36. Kha ina Pharaohwui wuklung mararmihaora, kala ina iwui machut kala matakhak kahai khudam Egypt ngaleili mataisangra, 4Pharaohna nali makhuikasang tharan; Egyptwuitungli ipāng parra kala iwui mibing Israelwui naobingli Egypt ngaleiwui eina hakkhamahā mashun bichar eina thānshokra. 5Ipāng katingda Egyptwui eina Israelnaobingli thānkashok tharan athumna I Varena kaji theikhuira.” 6Moses eina Aaronna chithāda sai; Prohona kakaso chi horzakta sai. 7Anina Pharaohli akhangazek atamli Moses zingkum hangchishat kāhairasai kala Aaron hangchishatta kathumhairasai.
Aaronwui Khāmshui
(Sho 4.1-5)
8 Prohona Moses eina Aaronli hānga, 9“Pharaohna nanili, ‘Matakkhak kahai ot eina sachitheilu’ jiakha, nana Aaronli hānglu, ‘Nawui khāmshui chi phara̱ onkhavai Pharaohwui mangāli hortālu.’” 10Chieina Prohona kakaso athishurda anina Pharaohwui mangāli vāsai; Pharaoh eina awui raobingwui mangāli Aaronna khāmshui chi hortāda phara̱ onngasaka. 11Chieina Pharaohna awui kathemabing kala Egyptwui mitrang sākatheibingli hokhuida, athumnala athumwui khangathum mitrang eina chi tākam eina sai. 12Kaja athum ava̱va̱na horkatā khāmshui chi phara̱ sāthuiserhaowa. Kha Aaronwui khāmshuina athumwui khāmshui saikora mayuitāserhaowa. 13Chithālala Pharaohwui wuklung mararshaphai, kala Prohona kahāng athishurda aniwui tui makhuisangthuwa.
Tara̱ Ashee Khaon
14Chieina Prohona Mosesli hānga, “Pharaohwui wuklung marar ngasakhaida, ana Israelnaobingli mathui ngasakmana. 15Ngathorshong kongpheili ali vangaraisālu, Pharaohna tara̱pamli rārāsāra; kala phara̱ onkahaia khāmshui chi khuiphunglu. 16Kala hithāda hānglu, Proho Hebrewnaobingwui Varena nali hi hāngkhavai ili kachihona, ‘Iwui mibingli chihohaolu, chithāda sāda athumna ili lamhāngli khorumra; kha nana arui rāshungda manganāsangmana. 17#Phon 16. Hithāda Prohona hānga, “Hi eina I Prohona kaji nana theira.” Yanglu, ipāngli kasing khāmshui hi eina ina Nile kongwui tara̱li ngaphitra, kala chi ashee sāthuihaora, 18Nile kongwui khai thihaida nganamshira, chieina Egyptnaobingna Nile kongwui tara̱ mamangpaimara.’”
19Kala Prohona Mosesli hānga, “Aaronli hānglu, ‘Nawui khāmshui khuida ashee onkhavai Egyptwui tara̱tungli, kongli, ra̱shongli, ra̱khongli, tara̱ khonkahai chili napāng katinglu; chieina Egypt ngalei saikorali khalei ngalung hamla, thingwui khorkhong saikorawuila tara̱ ashee onserhaora.’”
20 Prohona kakaso athishurda Moses eina Aaronna sai; Pharaoh kala araobingwui miktāli khāmshui chi khāngkāda Nile kongwui tara̱li ngaphita, kala Nilewui tara̱ katonga ashee sāthuihaowa. 21Kongwui khai thiserhaowa kala Nile kong nganamshihaowa, Egyptnaobingna Nilewui tara̱ chi mamangpaithumana, kala Egypt ngalei hupta asheemānghaowa. 22Kha Egyptwui mitrang kathembing chinala, athumwui khangathum mitrang eina chithāda sai, chiwui vang eina Pharaohwui wuklung marar ngasakshona, kala Prohona hāngkahai thāda aniwui tui chi makhuisangthuwa. 23Pharaohna awui shimli latungda ningli shik majilakmana. 24Kala mangkhavai tara̱wui vang Egyptnaobingna Nile kong ngalengda ra̱khong khonkhui; kaja kongwui tara̱ chi mamangpaithuwa.
25Nile kongli Prohona ngaphitta shinithang kāshunghaowa.
Currently Selected:
SHONGZĀ 7: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
