SHONGZĀ 9
9
Seimao Rākhangasak
1Chieina Prohona Mosesli hānga, “Pharaohli vāda hānglu, Hebrewwui Proho Varena kahāngna, ‘Ili otram ngatha̱ khavai iwui mibingli chiholu.’ 2Kaja nana mamayāmada athumli machihola haichingakha, 3Prohowui pāng eina zakkashi seimao rāda luili khalei siguibing, gadhābing, utbing, seibing, yaobing kala mebing saikorawuitungli tāra. 4Kha Prohona Israelwui sha̱kei eina Egyptwui sha̱kei ngatei ngasakra, chithāda sāda Israelwui akha eina tangda mathimara.” 5Kala Prohona atam akha kakta hānga, “Lam hili akhama Prohona otshotbing hi shokngasakra.”
6Kala akhama kathā Prohona hi shokngasakta Egyptwui sha̱kei katonga thingasakhaowa; kha Israelwui akhala mathimana. 7Pharaohna ayang ngasakta, Israelnaobingwui sha̱kei akhala mathisāmana, kha Pharaohwui wuklung marartithaida mibingli machihothuwa.
Moksā Shokkhangasak
(Khal 28.27)
8Kala Prohona Moses eina Aaronli hānga, “Meiphungwui eina hotla ngashumkha khuilu, kala Pharaohwui mangāli chi Mosesna kazingramli horkāranu. 9Chieina Egypt katongali khamanaka chifa thāda ngapuivāra kala chi moksā shokngasakta Egypt ngaleili khalalei mila sha̱keila ngatorserra.” 10#Phon 16.2. Chieina anina meiphungwui hotla khuida Pharaohwui mangāli anganinga, kala Mosesna kazingramshong horkakā eina moksā sathuihaida mila sha̱keila ngatorserhaowa. 11Mitrang kathemabing chi Moseswui mangāli manganingrarthuwa, kaja athumla, Egyptwui mi katongala moksā shokserhaowa. 12Kha Prohona Pharaohwui wuklung mararngasakhaowa, kala Prohona Mosesli hāngkahai thāda, aniwui tui makhuithuwa.
Thei Tākhangasak
13Chiwui thili Prohona Mosesli hānga, “Ngathorthakva̱ thuida Pharaohwui mangāli anganinglu” kala hithāda hānglu, Hebrewwui Prohona hānga, “Ili otram ngatha̱ khavai iwui mibingli chiholu. 14Ajawui hile I kathā okathuili maleimana kaji theikhavai, nali, nawui otshinabingli kala mi saikorawuitungli kachotkachāng rāngasakra. 15Kaja ina ipāng katingshokta nali kala nawui mibingli kazātkashi eina ngaphitta ara okathuiwui eina shimānhairara; 16#Rom 9.17. kha hiwui vang ina nathumli ringkhangasakna, iwui pangshap nathumli chitheida, okathui katongali iwui ming ngayaovāra. 17Arui eina tangda nakhalatta langsoda iwui mibingli sāshida lei, kala athumli machihomana. 18Yanglu, akhama hitharan Egypt leikaphok eina thuida aja rāshungda hithāda mashoklakrang kaji thei panglāk eina tāngasakra, 19Chiwui vang eina nathumwui sha̱kei kala luili khalei saikora ngayin khavaipamli haiserhaolu; khikhalajila shimli makhuikhaunga mi, sha̱kei kachiva̱ theina athumli tākrorda thiserhaora.” 20Chieina Prohowui tuili khangachee Pharaohwui mibing china athumwui raonaobing kala sha̱kei saikora shimli houngsera; 21Prohowui tui makhuikasangabingna athumwui raonaobing kala sha̱keibing luili haisera.
22Kala Prohona Mosesli hānga, “Napāng kazingramli katingkālu; chieina Egypt ngalei katongali, miwuitunglila, sha̱keitunglila kala luiyamwui thingnā-ra̱hātunglila, Egypt ngalei katongawuitungli thei tāranu.” 23Chieina Mosesna awui khāmshui singda kazingramli apāng katingkai; kala Prohona kazing khangashum eina thei, kala mei okathuili rotā ngasaka. Kala Prohona Egypt ngaleili thei rotā ngasaka; 24#Phon 8.7; 16.21. thei marda katā eina ngasoda mei phikphik ngasheivā ngasakta Egyptna yur akha khangasāwui eina thuida thei chiyakha katā maleilakrangsai. 25Egypt ngaleiwui luili khalei ot kachiva̱, mila, sha̱keila theina tākthatserhaowa; kala lui vāsang kahai theishirai kachiva̱, kala thingrong eina tangda tākkazammiserhaowa. 26Israelnaona pamkhavai Goshen ngalei apammāngli thei matāmana.
27Chieina Pharaohna Moses eina Aaronli ahokhui ngasakta hānga, “Ajawui hili ina morei sāhaira, Proho mashunga, ila iwui mibingla nguihaira. 28Prohowui kazing khangashum thei katā shaphaira, Proholi kahāngmilu; ina nathumli chihohaora; nathum hili mapamluimara.”
29Mosesna ali hānga, “Ina Keinungwui eina shokkhaleoda Proholi ipāng katingkāda kazing khangashum vānhaora, thei matāluimara, chieina okathui hi Prohowuina da nana theikhuira. 30Kha nala nawui raobingla Proho Vareli mangacheeranga kaji ina thei.”
31(Tawon eina yaoyi kānhaowa, kaja yaoyi akhor maraohairasai, tāwon wonphok hairasai. 32Kha kehu eina nāpai mashokrangsāda mashimānmana).
33Chieina Mosesna keinungwui eina kala Pharaohwui eina shokta Proholi apāng katingkakā eina kazing khangashumla, thei katāla vānhaowa, kala kazing maroluithuwa. 34Kha kazing khangashumla, thei katāla, zingrotla vānkahai chi theilaga Pharaohna morei sāluishita, ala, awui raobingla wuklung mararungluishita. 35Kala Mosesli Prohona hāngkahai thāda Pharaohwui wuklung marartithaida Israelnaobingli machiholuithuwa.
Currently Selected:
SHONGZĀ 9: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
