HAOKAPHOK 14
14
Lotli Narkahai Kala Abramna Ngatangkakhui
1Shinarwui awunga Amraphel, Ellasarwui awunga Arioch, Elamwui awunga Ched-or-laomer kala Goiimwui awunga Tidal, athumwui thotli, 2athumna Sodomwui awunga Birsha, Admahwui awunga Shinab, Zeboiimwui awunga Shemeber kala Bela (kaja Zoar)wui awunga athumli rai ngarara. 3Athum saikorawui khangaruma raimi, Siddim Leiwuk (chiya, Salt Sea) li vākazipsera. 4Zingkum tharāda khani athumna Ched-or-laomerwui azingli pamsai, kha tharāda kakathuma kum ali rai sāphokhaowa. 5Tharada khamate kum Ched-or-laomerna kala awui ngasotnao wungnaobingli thānda Ashteroth-karnaimli khalei Rephaimnaoli, Hamli khalei Zuzimnaoli, Shaveh-kiriathaimli khalei, 6kala El-paran lamhāngwui amarei vāshungda khalei Seir Kaphungwui Horbingli rai yuihaowa; 7chiwui thili athumna hanungda Enmishpat (chiya, Kadesh), kala Amalekbingwui ngalei saikora, kala Hazazon-tamarli khalei Amorbinglila yuiserhaowa. 8Chiwui thili Sodomwui awunga, Gomorrahwui awunga, Admahwui awunga, Zeboiimwui awunga, kala Bela, (chiya, Zoar)wui awunga athum phangā ngarumda Siddimwui tampākli, 9Elemwui awunga Ched-or-laomer, Goiimwui awunga Tidal, Shinarwui awunga Amraphel, kala Ellasarwui awunga Arioch athum matili rai sai. 10Chitharān Siddimwui Tampāk hiya bitumen khewui chomna pemsai. Chieina Sodom eina Gomorrahwui awunga khani china khayām chitharān mi kaikha chili tāzanghaowa; kataibing chiya phungreili yāmkāhaowa. 11Chithāda yangkashibingna Sodom eina Gomorrahwui ot saikora ngaponkhuida unghaowa; 12Abramwui agatowui naomayara Lotla chili pamsāhaoda awui lan eina ngasoda ali khuithuirumhaowa. 13Mi akha yāmshokta Hebrewpā Abramli pao unghānga, ana Eshcol eina Anerwui achinā Amorwui Mamrewui shirimthing ngalemli pamsai, athum hi Abramli khavak sāda leisai. 14Abramna awui theisāli tukthuihaira da kashā eina awui shimkhurli pharākasang ana tamchitheikazak kahai mi shākathum tharāda chishat thānlaga Dan shangshungda kharomvai. 15Kala ana ngayāshong awui raimibing ngayarlaga, a eina awui raobingna kasham-khayānglaga Damascuswui atungshong khalei Hobahli kharomshanga. 16Chithāda awui theisā Lot, awui lan, sha̱naobing kala mi saikorala akhuiluishita.
Melchizedekna Abramli Sokhami
17 #
Heb 7.1-10. Ched-or-laomer kala ali khangaso awungabingli yuihaida Abramna latkhaung chitharān, Sodomwui awungana Shaveh Leiwuk (chiya Awungawui Leiwuk)li angaroka. 18Kala Salemwui awunga Reikhamataia Varewui pāngmon Melchizedekna khamui eina drakhāra̱ khuivāngaroka; 19kala ana somida hānga,
“Kazing ngalei kasā Juikhamataia Varena
Abramli somiranu;
20kala nali yangkasheli nawui pāngli sangkhame Juikhamataia Vare chili sochikatranu!”
Kala Abramna ot kachiva̱ khum tharāwui akha chi ali mi. 21Kala Sodomwui awungana Abramli hānga, “Mibing hiya ili milu, kha otbing chiya na jihaolu.”
22Kha Abramna Sodomwui awungali hānga, “Reimeikap kaje kazingram eina okathui kasāa Proho Vareli ina shākhi sāhaira, 23kaja kazaira̱nao akha eina tangda kala pheihop khara̱nao eina tangda, nawui ot akhala makhuimara, kaja nana ‘Abramli ina shāngkhangasakna’ jipaishina. 24I khikha makhuimara, kha iwui mibingna zākahai kala ili khangasobingwui yar milu; Aner, Eshcol, kala Mamre athumna athumwui yar khuiranu.”
Currently Selected:
HAOKAPHOK 14: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
