HAOKAPHOK 27
27
Jacobna Isaacwui Sokhami Samkaphang
1Isaac sārreihaida mik mamāchā kahai tharan, ana anaomayara kharara Esauli hokhuida hānga, “Inaomayara,” kaji eina “Avā, I hili leili” da ngahānkai. 2Ana hānga, “Yanglu, I sarhaira; katharan thinikhala matheimana. 3Chieina nawui khutlai kachākthing eina malākhong khuiphungda iwui vang sā arenglu, 4kala ina shaikhangai chi ngama̱ra̱ hangmilu; chi shaikhuida I mathiranglakha ina nali somira.”
5 #
Hao 12.3; Mis 24.9. Isaacna Esauli kahāng chi Rebekahna nganāsai. Chieina Esauna sā areng kahai tharan, 6Rebekahna anaomayara Jacobli hānga, “Navāna namei Esauli kahāng ina shāhaira. 7‘Sā arenglaga ili ngama̱ra̱ eina hangmilu, ina shaida I mathiranglakha Prohowui mangāli nali somira’ jihaira. 8Chieina inaomayara, ina nali kakaso thāda sālu. 9Seishimli zangda khamathā yaonao khani khuirāmilu ina navāwui ningkachāng hamhan sālaga ngama̱ra̱ eina hangmira; 10chi shaikhavai nana navāli khuivāmida a mathiranglakha nali somiranu.” 11Kha Jacobna ava̱va̱ Rebekahli hānga, “Yanglu, ishāmei Esau ahā zarshun kahai mina; kha iva tāngpathai. 12Ishāvāna ili khanamyangsi kaja kakapikna da theihaipai, kala sokhami maningla khonkashi ngasāhaipai.” 13Ava̱va̱na ali hānga, “Nali khonkashi iwuitungli tāranu, inaomayara; iwui tui nganāmalu, vāda akhuimimalu.” 14Chieina ana yaonao chi akhuida ava̱va̱li khuiungmi, kala avāva̱na ningkachāng hamhan sāda ngama̱ra̱ eina hangmi. 15Chiwui thili Esauwui mathāmeikap kaji kachon chi ava̱va̱ Rebekahna haisāda anaomayara Jacobli ngavaimi, 16kala mehui chi apāngli kala khanganaiya akahung pamli neimi; 17kala ngama̱ra̱ kahai han eina khamui chi anaomayara Jacobwui pāngli sangmi.
18Chieina ana avāva̱wuili zangda hānga, “Avā,” ana ngahānkai, “I hili leili, na khipakhala, inao?” 19Jacobna avāva̱li hānga, “I nawui naochizai Esauna. Nana ili kakaso athishurda ina ngarānhaira; ara thuipamda iwui sā hi shailaga ili somilu.” 20Kha Isaacna anaomayarali hānga, “Kathāda nana hiyākha thākta samphanghaokhala, inao?”
Ana ngahānkai, “Khikhalajila Proho nawui Varena ili thākta samphang ngasakhaowa.”
21Chieina Isaacna Jacobli hānga, “Rānganaimeilu, inao Esau kachangkhatkā maningmakhalada theikhavai ina mayutyangga.” 22Chieina Jacobna avāva̱ Isaacli vākhanganai eina mayutyanglaga hānga, “Akhona Jacobwui khona, kha pānga Esauwui pāngna.” 23Ama Esauwui pāng thāda ahā zārhaoda ali mamachukrarthuwa; chieina ali somihaowa. 24“Na inaomayara Esaulākla?” da ngahāna.
“Mha, I alāka” da ngahānkai. 25Chieina ana hānga, “Inaowui sā chi hili khuirālu kala ina shaida nali somira.” Chieina ali mida shai; kala drakhāra̱ khuirāmida manga. 26Chiwui thili avāva̱ Isaacna ali hānga, “Ili rānganaida maya̱khuilu, inao.” 27#Heb 11.20. Chieina ana vānganaida ali maya̱ya; kala Esauwui chonngai nganamlaga somida hānga,
“Yanglu, inaomayarawui angai,
Prohona somi kahai lui-nganamna!
28Varena kazingramwui ikra̱ nali tāmiranu,
kala ngaleiwui leithao mida heiun kala drakhāra̱ chungmeiranu.
29 #
Hao 12.3. Mibingna nali otram ngatharanu,
kala yurbingna nali khayāshiranu.
Nachinā ngarāwuitungli akhavā sālu,
kala nashava̱wui naomayara ngarāna nali khayāshiranu.
Nali khonkashibing chili khonkashi ngasāranu,
kala nali sokhamibing sokhami ngasāranu.”
Esauna Isaacwui Sokhami Kapo
30Isaacna Jacobli somicham kahai thili, kala Jacobna avāva̱ Isaacwui eina shokchamlaga, amei Esauna awui sā kharengwui eina ungrāsai. 31Anala khangama̱ kashakazā ngarānlaga avāva̱li khuivāmi. Kala ana avāva̱li hānga, “Ili somi khavai ishāvāna ngakarthuida nanao mayarawui sārensā shairanu.” 32Avāva̱ Isaacna ali hānga, “Na khipākhala?”
Ana ngahānkai, “I nanao mayara kharara Esauna.” 33Chieina Isaacna kathirkazamda hānga, “Thakha na maungranglakha ili sārensā khuirāmida chi shaiserlaga ina somi kahaipā chi khipākhala?—mha, sokhami awui sāthuihaira.” 34Esauna avāva̱wui tui chi kashā eina malungkangda panglāk eina chaplaga avāva̱li hānga, “Ilila kasomilu, O ishāva!” 35Kha avāva̱na hānga, “Nagatona minamda, nawui sokhami chi rākhuithuihaira.” 36#Hao 25.29-34. Esauna hānga, “Ali Jacob da mashungrik eina maphokmimala? Kaja ana ili khani shida kateizāhaira. Ana iwui khararpam khuithuihaira; kala yanglu, aruila iwui sokhami khuithuihaira.” Chiwui thili ana hānga, “Iwui vang sokhami akhala mataimihaimala?” 37Isaacna Esauli ngahānkai, “Yanglu, ina ali nawui akhavā sāngasakhaira, kala achinā ngarā saikora awui rao sākhavai mihaira, kala ali phaui khavai kashakazā eina drakhāra̱la ali miserhaira. Chithakha inao, nali ina khi sāmipairakhala?” 38#Heb 12.17. Esauna avāva̱li hānga, “Ishāvā, nawuili sokhami akhamāngla maleithurala? Ili kasomilu, ilila somiphalunglu, O avā.” Kala Esauna chapsasui panglāk eina chapa.
39 #
Heb 11.20. Chieina avāva̱ Isaacna ali hānga:
“Yanglu, na leithao khalei ngalei kala atungwui eina katā kazingramwui ikra̱wui eina lāchāda okthuira.
40Nawui raighai eina nana ringra,
kala nachināli nana otram ngatha̱ra;
kha nana khanganur tharan,
awui kashai chi nakahungwui eina hortāhaora.”
41Avāva̱na somi kahaiwui vang eina ara Esauna Jacobli ningkachaihaida akhalatta hānga, “Ishāvā thikida ara masāngmana, chiwui thili ina igato Jacobli sāthathaora.” 42Kha anaomayara kharara Esauwui tui chi Rebekahli hānghaowa; chieina anaomayara khangano Jacobli vahokhui ngasaka, kala ana hānga, “Yanglu, namei Esau nali shaothatra da khamachukna akachang sāda lei. 43Chiwui vang eina iwui kahāng nganālu, inaomayara; ngakarthuida Haranli khalei ipā Labanwuili yāmvāsālu, 44kala nameiwui malungkhavāt mavānranglakha eina tangda awuili pamsālu; 45nana ali khi sāhairakhala kaji malaihailaga awui malungkhavāt vānkahai tharān ina mi chihorāda nali chiwui eina houngra. Khiwui vang nani khanini thangkhali ina shimānthathuirakhala?”
Jacobli Haranli Chihokhavā
46Chieina Rebekahna Isaacli hānga, “Hit preiva̱bing hiwui vang eina I ning thenghaira. Jacobna ngalei hiwui hikatha Hit sha̱nao akhali ngakumsi kaja iwui mirinli kaphā khi leirakhala?”
Currently Selected:
HAOKAPHOK 27: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
