HAOKAPHOK 44
44
Shimān kahai Tengkot
1Chiwui thili awui kashina chili kasoi, “Athumwui phungshap kachichāwui khaoli pemda sangmilu, kala kachichāwui pheisā kachichāwui khaoli sangmiserhaolu, 2kala iwui tengkot, lupāsāwui tengkot chi paishowui khaoli, pheisāla, kala māngumla ngarumda sangmihaolu.” Kala ana Josephna kakaso chi tākam eina sai. 3Kazing thangkhaleoda athumwui gadhābing khuiphungda zatngasakhaowa. 4Athum keinungwui eina zatta mashāngnāranglakha, Josephna awui kashinapali hānga, “Ngakarthuilu, mibing chili kharomvālu; kala nana athumli akhangaphan tharān, hithāda hānglu, ‘Kaphā sākhamiwui vang nathumna khiwui vang kashi #44.4: kashi: hiwui kakhalatva makaphā lah zakkashi kajina. eina hankhamikhala? Khisāthuda iwui lupāsāwui tengkot leethui kahaikhala? 5Hi eina ishāmeina khamang maningmala, kala hi eina ana sāshap theishap kaji maningmala? Nathum yonlakhaira.’”
6Akhangaphan eina ana tui chi tākam eina ahānga. 7Athumna hānga, “Ameina khisāda hikathā tui hānghaokhala? Naraobingna hikathā ot sākida katāva̱li lei. 8Yanglu, ithumwui khaoli zangkasa lupā chi Canaan ngaleiwui eina khuirāmiluihaira, laga kathāda ithumna nashameiwui sinā lupā leepairakhala? 9Hi zangkasapa chi shaothathaoranu, ithumla ishameiwui raonao sāserra.” 10Ana hānga, “Nathumna kahāng chitharanu, kala khuiphungkasāpa chi iwui raonao sāra, kha kateibing khikha khayon maleimana.” 11Chieina kachichāna katotsisi khao ngareitai, kala kachichāwui khao pheiya. 12Kala ana kharara eina thuilaga paisho eina tangda phāyanga. Kala tengkot chi Benjaminwui khaoli zangsai. 13Chieina athumna kachon serkhākta kachichāwui gadhāli ot shaksākhuilaga keinungshong hanvai.
14Judah kala achinā ngarāna Josephwui shimli vākashung tharān, a pamsai, kala athumna ngaleili ngakhumzangda khayāshiya. 15Josephna athumli hānga, “Nathumna kasā hi khikhala? I kathā mina khanongkhuishapa da nathum matheimala?” 16Judahna hānga, “Ameili khi hāngrakhala? Ithumna khitui hāngra? Kala ithumna maninglakmana kaji kathāda hāngakha shitsangpairakhala? Naraobingwui khayon Varena phongmihaira; yangmilu, ara khuikaphungala, ithumla nawui raonao sāra.”
17Kha Josephna hānga, “Ina chitha khavai maleimana: khuiphungkasāpamāng iwui raonao sāra, kha nathum kateibinga chingri eina navāwuili ungulu.”
Judahna Benjaminwui vang Kahāng
18Chieina Judahna awuili kāda hānga, “O iwui amei, ina poli, narao ili tui akhamāng kahāng ngasakmilu; narao ithumli nawui malungkhavāt maza̱ngasakmilu; kaja na Pharaoh kathāna. 19Ameina naraobingli ‘Navā leila, lah nagatola leila?’ da ngahāna. 20Chieina ithumna ameili ‘Sarlak kahaiya ishāvā lei, kala asārlam kapharā igato paisho akha lei, akhapa thihaowa, ava̱va̱na kapharā himāng khaleiwui vang ishāvāna ali lumlaka’ da hānga. 21Chieina naraobingli nana ‘Ali ina yangkhui khavai thānrālu’ da hānga. 22Ithumna ameili ‘Nao chi ishāvāli mahorhaipaimana, kaja ana horhaiakha ishāvā thihaora’ da hānga. 23Kha nana naraobingli ‘Nagatoli mathānraakha ili masamphangpaimara’ ” da hānghaowa. 24“Ithumna narao ishāvāli hankhaung chitharān, ameiwui tui saikora ali hāngsera. 25Kala ishāvāna ‘Zāt aloluilu’ da kahāng eina, 26‘Ithum mavārarmara; kha igato paisho vaakha ithumla vāra, khikhalajila paisho mazangakha ithum awui azak matheirarmara da ngahānkai.’ 27Chieina narao ishāvāna ithumli hānga, ‘Ipreiva̱na iwui nao khani pharai kaji nathumna thei; 28akhapāna ili nothāhaira, kala mashoila ali serkazamhairara da ina hāngthang eina thuida matheiluilakthuwa. 29Akhapa hila iwui eina thānthuilaga kalākashi shokakha, asārlam nathumna iwuk khanangda Kazeiram vāngasakra.’ 30Chieina igato mazangla narao ina ishāvāwuili khaung tharān, awui ning ali shāptithaoda, 31a mazangkasā chi theilaga a mashoila thihaora; chieina kasara chili wukkakhanang eina naraobingna Kazeiramli vāngasakhaora. 32Kaja narao ina nao hiwui vang ishāvāli hānglaga nganingkhuihaidalei, chiya ‘Ina nao hi mathānungluiakha kaphen saikora chi iwui mirin peida ina phungra’ jikahaina. 33Chiwui vang eina nao hiwui mahut ili pamngasakta nawui rao sāngasakmihaolu, laga ale khangatei achinābingli ngasounghaoranu da kapona. 34Kaja nao hi mazangla kathāda ishāvāwui mangāli ina latungpairakhala? Ishāvāli kalākashi rāki kaji chi ina mayangrarmara.”
Currently Selected:
HAOKAPHOK 44: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
