JOHN 21

Jishuna Sākhangatha̱ Shinili Rākachithei

1Chiwui thili Jishuna sākhangatha̱bingli Tiberi-as shamadru ngalemli rachitheiluishita; kala a khalatta hithada rachithei. 2#Joh 11.16; 1.45; Lk 5.10. Chili Simon Peter, Ngashirra kaho Thomas, Galileewui Cana eina kharā Nathana-el, Zebedeewui naomayara khani kala Jishuwui sākhangatha̱ khangatei khani da kazipsai. 3#Lk 5.3-7. Simon Peterna athumli hānga, “I khaih aphaura.” Athumna ali hānga, “Ithumla nali ngasoda vara.” Chieina athumna marikhongli kātonga, kha ngayā pongda athum akhala makhuimana. 4#Joh 20.14; Lk 24.16. Ngathor zimik shoknanai Jishuna ngayipheili rānganinga, kha sākhangatha̱bingna chi Jishuna kaji matheimana. 5#Lk 24.41. Chieina Jishuna athumli hānga, “Inaongarā, nathum khaih kaphākhuila?” “Makhuimana,” da athumna ngahānkai. 6Jishuna athumli hānga, “Nathumwui khaihlan chi marikhongwui yāvāk horsanglu, chili kasamphangra.” Athumna khaihlan chi horkasang eina mangakhunshokrarthuwa, kaja khaih sorngasaida kāhaowa. 7#Joh 13.23; 19.26; 20.2; 21.20. Jishuna leikashia sākhangatha̱ china Peterli hānga, “Hi Proholaka!” Peterna chi Prohona kaji kashā eina phahon mangavaila leikasā chi awui phahon chi sangkhuilaga tara̱lungli yongzanghaowa. 8Sākhangatha̱ khangateibingna marikhong tongda khaihlanli khai pemting eina shimenshoka, kaja athum ngalei kathengwui eina lam hangphangā sha̱khamāng mataksai. 9Athumna ngalei kathengli kashok eina chili mei sāhailaga chiwuitungli khaih ruikasā kala khamui haikasā chi thei. 10Chieina Jishuna athumli hānga, “Arui phākakhui khaih kakhuirālu.” 11Simon Peterna khaihlan chi angakhunkashok eina khaih kahahak pemting eina shākha hangphangāda kathum zangsai; kala khaih chiyākha kālala khaihlan chi makākmana. 12Jishuna athumli “Rāphazālu” da hānga. Sākhangatha̱ khipānakha ali “Na khipākhala?” da mangahānlengmana, kaja a Prohona kaji athumna thei. 13Chieina Jishuna khamui chi akhuilaga athumli yaowa; khaihla chithada yaopapama. 14#Joh 20.19,26. Jishuna ringlui kahaiwui thili sākhangatha̱bingli rākachithei chi hina kakathumana.

Jishu kala Peter

15 # Joh 1.42; 13.37; Mk 14.29-31; Lk 12.32. Athum phazākup kahaiwui thili Jishuna Simon Peterli hānga, “Johnwui naomayara Simon, hibingli lāngmeida nana ili leishila?” Ana “Mha, Proho ina nali leishiya kaji nana thei” da ngahānkai. Jishuna ali hānga, “Iwui yaonaobingli phauilu,” 16#Mat 2.6; Ots 20.28; 1 Pet 5.2; Phon 7.17. Jishuna ali kakhaneli hāngluishita, “Johnwui naomayara Simon, na ili leishila?” Ana “Mha, Proho, ina nali leishiya kaji nana thei,” da ngahānkai.

Jishuna ali hānga, “Iwui yaobingli homlu.” 17Kakathumali Jishuna hānglui, “Johnwui naomayara Simon, na ili leishila?” Kakathumalila “Na ili leishila?” da khangahānwui vang Peter wukkhananghaowa; kala hithada ngahānkai, “Proho, nana saikora katheina; ina nali leishiya kaji nana thei.” Jishuna ali hānga, “Iwui yaobingli phāuilu.” 18“Kachangkhat ina nali kahāngna, nganuilakha na khalatta shānneira̱ neilaga nawui zatkhangangaili zata; kha ara rarkahai eina napāng khāngkāda nawui shānneira̱ mi khangateina neimilaga mavākhangaipamli thānzatra.” 19#2 Pet 1.14; Mk 1.17. (Jishuna kahāng hi Peterna kachikathā mithit eina Vareli tekmatei ngasakrakhala kaji kachitheina). Chiwui thili Jishuna ali hānga, “Ithi shurlu.”

Jishu eina Khangatei Sākhangatha̱bing

20 # Joh 13.25. Peterna kapeikhaung eina, Jishuna leikashia sākhangatha̱, phākachizāt atamli Jishuwuivāk shaivāda “Proho, nali khipāna yorzāra̱khala?” da khangahāna mipa chi shurkharā thei. 21Peterna ali kathei eina Jishuli hānga, “Proho, mipa hi kathārakhala?” 22#1 Cor 4.5; Jam 5.7; Phon 2.25; Mat 16.28. Jishuna ngahānkai, “I marāranglakha eina tangda ina ali leisa ngasakngai jilala, china nali khi saura? Ithi shurmalu.” 23Chieina sākhangatha̱pa hi mathimara da Jishuwui kashurabingwui ngachaili pao hi ngayaohaowa; thalala Jishuna chi kahāng maningmana; ana kahāngva, “I mararanglakha eina tangda ina ali ringsā ngasakngaiakha, nali china khi sara̱khala?” kajina.

24 # Joh 15.27; 19.35. Saikora hi shākhi khame kala chi kakape sākhangatha̱a chi ana kala ana kahāng chi mashunga da ithumna thei.

Tuikup

25 # Joh 20.30. Kha hili lāngda Jishuna sākahai ot kachungkha lei; saikora chi kapisersi kaja kapikahai lairikbing chi okathuili haikhavai apam maleisāmara da ina phaninga.

Currently Selected:

JOHN 21: TANGBSI

Highlight

Copy