PĀNGMONSHI 10
10
Nadab eina Abihuwui Morei
1Chiwui thili Aaronwui naomayara Nadab eina Abihuna meishārkhong akharip mei machonlaga nganamkaphā thao heisangda Prohowui mangāli ana salu da makakaso makathara mei sai. 2Kala Proho khaleipamwui eina mei shokta anili chuithathaowa, ani khanini Prohowui mangāli thihaowa. 3Chieina Mosesna Aaronli hānga, “Prohona hithāda kahāngna ‘Ili rākhanganaibingli ina iwui kathar chitheida mibing saikorawui mangāli ili tekmatei ngasakra.’ ” Chieina Aaron kasaikha pamhaowa.
4Mosesna Aaronwui avāgato Uzzielwui naomayara Misha-el eina Elzaphanli hokhuida hānga, “Rāmeilu, kathara rāmrah pamwui eina nachinā khanili ayarshong khuishokhaolu.” 5Mosesna kahāng athishurda anina zangda achinā khanili kachichāwui kachon ngavaimida rāmrahwui ayarli khuishokhaowa.
6Kala Mosesna Aaron eina anaomayara khani Eleazar eina Ithamarli hānga, “Nathumwui kuisam makhalaalu; kachonla maserkhakalu, nathum thihaipaishina, mibingwuitungli malungkhavāt rāpaishina, kha Prohona chuingasakta chuikathat hiwui vang nachinā ngarā Israel shimkhur katongana sifaranu. 7Nathum kazip khavai kachonshimwui khāmong makānshokalu, nathum thipaishina, kaja Prohowui thao neokhami chi nathumwuitungli lei.” Chieina athumna Moseswui kahāng athishurda sai.
Pāngmonbingwui Ainbing
8Kala Prohona Aaronli hithāda hānga, 9“Nathumna kazip khavai kachonshimli khavā tharan; naranu, nanaomayararanu, drakhāra̱ lah zamshei mamangalu, thipaishina; nawui naothot peichaoda hi makashimāna shiyan-chikanna. 10Nathumna Varewui kathar eina mikumowui makathar kala kathar eina khamakhaowui khangatei theiphalungra. 11Kala Prohona Moseswui pāng eina khami shiyan-chikan saikora chi nathumna Israelnao saikorali tamchitheira.”
12 #
Pāng 6.14-18. Mosesna Aaronli kala ringda khalei nao khani Eleazar eina Ithamarli hānga, “Mei eina riktāda hanphutli tharāzāt kachigat katai chi khuilaga khawok mazangla hanphut ngalemli shailu, kaja hi tharmathengmeikap kaji otna. 13Nathumna hi katharapamli shaiki kajina, kaja hi na kala nanaomayara ngarāwui yarna, mei eina riktāda Proholi hanphut kasāwui eina nathumna samphangkhangayina da ili kaso kahaina. 14#Pāng 7.30-34. Kha pha̱phayāda chigat kahai asuk eina akhaishāng chiya katharpam akhali shaipai, nala nanaomayarala, kala sha̱naola shaipai; kaja Israelnaobingwui ningyatchigatwui eina hi nawui vang nanaomayara ngarāwui vang yar sakahaina. 15Chigat kahai aphei kala khayitchigat kahai asuk chi athumna riktāda kachigat athao chieina ngasoda Prohowui mangāli khayitta kachigatwui vang khayitra, kala chi Prohona kaso kahai athishurda nawui vang kala nanaomayara ngarāwui yar mashimānda leichingra.”
16Kala suihamchigat mewui pongli Mosesna ningsangda khangathing eina, yanglu, chi chuihairasai! Chieina ana Aaronwui katai naomayara khani Eleazar eina Ithamarli malungvātta hithāda hānga, 17#Pāng 6.24-26. “Nathumna khisāda suihamchigat sā chi katharapamli mashaimakhala, tharmathengmeikap kaji ot hi nathumli mikahaina kaja yarui ashangva̱wui morei phungmida Prohowui mangāli athumwui khayonwui vang pheomi khavai maningmala? 18Yanglu, nathumna chiwui ashee chi katharapamli makhuizangmana kala ina kahāng thāda nathumna katharapamli shaihaoki kajina.”
19Chieina Aaronna Mosesli hānga, “Yanglu, aja athumna Prohowui mangāli athumwui suihamchigatla, rikkatā chigatla chigathaira, laga iwuitungli hikathā rāshokhaira! Ina aja suihamchigat sā shaihaisāsi kaja, Prohowui miktāli khuisangpairala?” 20Kala Mosesna chi shālaga, mashungada khui.
Currently Selected:
PĀNGMONSHI 10: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.