PĀNGMONSHI 5
5
Tuingaphunbingwui Suihamchigat
1Kachikathā mi akhana moreikasa theilaga maningakha shālaga chi shākhi sākhavai yaruina kasolaga masāthurakha chiwui khayonkhamāng ana phungra.
2Lha kachikathā akhana makathara ot, makathara ramsāwui angunranu, sha̱keiwui angunranu, ngawokazat yurwui angunranu saza̱hailaga, chi ana thumhaiakha, a matharthura, kala a yonhaira.
3Lha ali makhao ngasakkapai mikumowui makathara otli saza̱hailaga chi ana thumhaiakha, ana chi kathei tharan a khayona ngasāra.
4Kachikathā akhana kashilapai, kaphālapai sāra da tuingashit sāphāphahailaga, mina sāphāphā kaji tuingashit akhalala, akhalala chi awui eina thumhaiakha, naoda rākathei tharan apong hibing hili a nguihaira.
5Hāngkahaibing hili mi akhana yonkahai tharan awui morei sākahai chiwui vang ana hāngphatra. 6Kala Prohowui mangāli awui sayon kahai chiwui vang suihamchigat sākhavai yaoshangwui eina yao nilala, me maningakha yaonao alānao akha khuirāra, chieina pāngmon china awui moreiwui vang pheomi khavai sāra.
7Kha ana yaonao mashokrarakha, awui suihamchigatwui Proholi kachigat sāda, kaja awui morei sākahai chiwui vang khana̱nao khani khuirāra, akhana suihamchigat sākhavai, akhapāna rikkatā kachigat sakhavaina. 8Ana pāngmonli khuikharā eina khare china suihamchigat sāra; akahung shireitekra, kha asāwui eina akui mangatei ngasakmara, 9kala ashee ngayarda khuida chi hanphutwui ayarli yikrorra, katei kataibing chi hanphutpheili ngayiror ngasakra, hi suihamchigat kasāna. 10Chiwui thili ana kakhanepā chi sharphahorwui athishurda rikkatā kachigat sālaga, pāngmon china awui moreiwui vang pheomi khavai sāra, kala ali pheomihaora.
11Kha ana kha̱na̱nao khani, lah nāsha̱nao khani machigatrarakha awui morei sākahai chiwui vang, manaktak kahai mathir epha tharāwui akhum akha khuirāra; chili thaola frankincensela masangmara, kaja hi suihamchigatna, theishirai kachigat maningmana. 12Ana pāngmonli khuivāmida, ana phaningung khavai panghomkha khuilaga Prohowui mangāli mei eina kachigat hanphutli riktāra; hi suihamchigat kasāna. 13Hithāda ana morei sākahaiwui vang pāngmon china awui moreiwui vang pha̱phayāmida ali pheomira. Kala katai saikora chi tharāzāt kachigatwui thāda pāngmonwui yar sāra.
Runkakā Kachigatbing
14 Prohona Mosesli hānga, 15Prohowui kathara otli kachikathāna yonda sānguihaiakha, awui suihamchigat sākhavai Proholi achuk kapei yaoshangwui eina yaovā akha chigatra, chiwui aman shekel lupāsā, kathara shimwui shekel athishurda nana khuilu; hi khayonchigatna. 16Chili lāngda ana kathara ot sashimānmi kahai chi ana runphalungra, chiwuitungli sharuk phangāwui akha mataida pāngmonli mira; kala pāngmon china suihamchigat yaovā chieina ngasoda ali pheomi khavai sāra, kala ali pheomihaora.
17 Prohona masālu da kaso kahai chi sāda kachikathāna morei sahaiakha matheimada sahailala a yona, kala khayonwui vang ana morei phungra. 18Ana achuk kapei yaoshangwui eina yaovā akha pāngmonli khuirāra, kala suihamchigatwui thāda nana aman chākkhuilu, chieina pāngmon china awui khayon chiwui vang pheomi khavai sāra, kala ali pheomihaora. 19Prohowui mangāli mi china yonkahaiwui vang hi suihamchigat kasāna.
Currently Selected:
PĀNGMONSHI 5: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.