LUKE 10
10
Hangshinili Kachiho
1 #
Lk 9.1-2,51-52; 7.13. Chiwui thili Jishuna khangatei hangshinili kapangkhuida ana vāki kaji keinung kachiva̱li mi khanini eina ali rida chihovai. 2#Mat 9.37-38; Joh 4.35. Kala hithada hānga “Hātkhavai mā kachungkhaya, kha kahāta mi kateokhamānga; chiwui vang eina awui mā kahātli kahāta mi chungmeida shirāt khavai seihā sālu. 3#Mat 10.7-16; Mk 6.8-11; Lk 9.2-5; 22.35-36. Nathumna vāki kaji chili vaulu; yanglu, ina nathumli kharangwui alungli yaonao chihokhavā thada kachihona. 4Lupākhaola, paidula, pheihopla makhuiphungalu; kala shongfali khipālikha chānjam masānganaohaialu. 5#1 Sam 25.6. Nathumna vākazangzang shim chili ‘Shim hili chingrihairanu’ da hāngrikaplu. 6Chili chingri kahai mi leisaakha, nathumwui chingri kahai awuitungli leira, maningakha chi nathumwuili latungra. 7#1 Cor 10.27; 9.14; 1 Tim 5.18; Khal 24.15. Nathum shim chili thada pamalu, athumna khamimi chi khuishak khuizālu, kaja ot kasā mi china awui ngalangman samkaphang khangachāna. Shim shimli mazangzatalu. 8Nathumna keinung akhali akazang tharan athumna nathumli zang ngasakakha, athumna khamimi chi zālu; 9chili kakazā khaleibingli raimilaga, athumli ‘Vare wungram chi nathumli ranganailakhaira’ da hānglu. 10Kha nathumna keinung akhali vākazang tharan athumna mazang ngasakngaiakha chānreili shokta hānglu, 11#Ots 13.51. ‘Nathumwui makhamayāwui vang ithumwui pheili kakā nathumwui keinungwui chifa eina tangda kathangkatāna. Kha hi theilu kaja Vare wungram chi nganailakhaira.’ 12#Mat 11.24; Hao 19.24-28; Jud 7. Ina nathumli kahāngna, chithanghon, keinung chiliva Sodomna khāngpaimeira.
Mashitkasang Keinungbing
(Mat 11.20-24)
13 #
Mat 11.21-23; Lk 6.24-26. “Chorazin! Nali kakhanang ringkashi ngasāranu! Bethsaida! nali kakhanang ringkashi ngasāranu, kaja nathumwui alungli hakkhamahā ot sākahai chi Tyre eina Sidonli sāsāsi kaja athumna borāshi ngavaida kala hotlātungli ngaleoda achā ning ngateihairara. 14Kha Bichar sāthanghon nathumliva Tyre eina Sidonli bichar kasāna paimeira. 15Kala Capernaum, naliva kazing kāzokta masot mimaraolā? Nali kazeiram tāshungda khuitāra.
16 #
Mat 10.40; 18.5; Mk 9.37; Lk 9.48; Joh 13.20; 12.48. “Nathumli khanganā mi chi ili khanganāna, kala nathumli makhamayā chi ili makhamayāna, ili makhamayā chi ili kashirātali makhamayāna,” da Jishuna sākhangatha̱bingli hānga.
Hangshini Chi Latkhaung
17Hangshini china mathānthathup hanungda hānga, “Proho, nawui ming singda kakaso tharan kameo eina tangda ithumwui kahāng nganai!” 18#Phon 12.9; Joh 12.31. Chieina athumli hānga, “Ina kazingramwui eina rikhān khangashei thada Satan tākatung thei. 19Yanglu, nathumli phara̱ eina seithattungli naizatshap khavai kala yangkashewui pangshapli yuishap khavai ina sāshap pangshap mihaira; khinakhala nathumli khamā mazararmara. 20#Sho 32.32; Laa 69.28; Dan 12.1; Phil 4.3; Heb 12.23; Phon 3.5; 13.8; 21.27. Chitha-ilala nathumna kameobingli yuihaowa kajiwui vang mamathānhailu, kha nathumwui ming kazingramli kapihaili kajiwui vang mathānlu.”
Jishuna Khamathān
(Mat 11.25-27; 13.16-17)
21 #
Mat 11.25-27. #1 Cor 1.26-29. Pung chichangli ana Manglā Katharawui mangā eina khamathān samphangda hānga, “He Avā, kazingram eina okathuiwui Proho, ina nali masotchikatli kaja nana otbing hi thangkhamabing eina theishingkakhuibingwui eina ngathumihailaga angangnaobingli chitheimihaowa; mha, Avā, hikathā hi nawui lukhamashanwui kaphaningna. 22#Mat 28.18; Joh 3.35; 13.3; 10.15; 17.25. “Ot saikora iwui Avāna ili horsangmihaira, kala Anaomayara hi khipākhala da Avā maningla khipānakha matheimana; kala Avāva̱ hi khipākhala da Anaomayara maningla khipānakha matheimana, kala Anaomayarana kachikathāli kapangkhuida chitheikhami maningla khipānakha matheimana.”
23 #
Mat 13.16-17; Joh 8.56; Heb 11.13; 1 Pet 1.10-12. Chiwui thili sākhangatha̱bingli ngareivāda ngathumsāda hānga, “Nathumna kathei chi kathei ka̱lā mahai! 24Ina nathumli kahāngna, marān kala awunga kachungkhana nathumna theida khalei hi theingailaksai, kha matheimana; kala nathumna shāda khalei hi shāngailaksai, kha mashākhuimana.”
Kaphā Samarianaowui Chānjam
25 #
Mat 22.34-39; Mk 12.28-31. #Mk 10.17; Mat 19.16; Lk 18.18. Yanglu, ain kathema akhana Jishuli chāng tamyangkida nganingkāda hānga, “Ojā, ina makashimān mirin mathunkhui khavai khi sarakhala?” 26Jishuna ali hānga, “Ain lairikli khi kapihaida leikhala? Nana chi kathada pākhuikhala?” 27Chieina ana ngahānkai, “Nawui Proho Vareli nawuklung tongda, manglā tongda, napangshap tongda kala naning tongda leishiphalungra; kala nawui khongnainaoli na khalattali leikashi thada leishiphalungra.” 28#Lk 20.39; Pāng 18.25. Jishuna ali hānga, “Nana mashunglak eina ngahānkāhaira; chi sālu, na ringra.”
29Kha khalatta mashungkhuikhangaiwui vang Jishuli ngahānluishita, “Chithākha iwui khongnainao chi khipākhala?” 30Jishuna ngahānkai, “Mi akha Jerusalemwui eina Jericholi tākida zatlakha phama̱kashaobingwui pāngli zanghaoda athumna awui kashankachon ngaponkhui kala kashaola shaomida kathi mayuk eina haimihailaga zatthuihaowa. 31Khaleilaga shongfa chili pāngmon akha rāchamrāsai. Ana ali kathei eina shongfa lākhavāk theithuihaowa. 32Chi tākam eina Levi akhala chili vāshungda ali ayanga kala shongfa lākhavāk eina thuihaowa. 33#Lk 9.51-56; 17.11-19; Joh 4.4-42. Kha Samarianao akha kha̱ram vākida zatta leilakha mipā china khalei apam chili vāshunga, kala ali kathei eina lumashanlakhaowa. 34Ana awui ngalemli vālaga thao eina drakhāra̱ neomi kala khamā saikora rommihai. Chiwui thili gadhātungli ali chipamhailaga shimzun akhali khuivai kala ali mathālak eina ngahāmi. 35Akhama kathā ana denarii khani khuishoklaga shimva̱a chili mida hānga, ‘Ali mathālak eina ngahāmilu, hili lāngda zangkahai saikora I hankhaungli minaora.’” 36Athum kathumwui ngachaili pha̱ma̱ shaomikahaipāwui khongnainao chi kachipāna da nana phaningkhala?” 37Ana ngahānkai, “Lukhamashan kachitheipā china.” Chieina Jishuna ali hānga, “Ungulu kala chithada sālu.”
Martha eina Maryli Khavā
38 #
Joh 12.1-3; 11.1-45. Chiwui thili athumna vāmamānda zatlakha kha̱ akhali ashoka kala Martha kaho sha̱nao akhana ali awui shimli zunngasaka. 39Kala agatuiva̱ Mary kaho akhala leisai, ana Jishuwui pheizingli pamda awui tamkachithei chi nganāpama. 40Kha Marthana sheba kasāwui vang khananghaoda awui ngalemli vālaga hānga, “Proho, igatuiva̱na imangli otram ngatha̱ khangasak hili nana khikha maphaningmimaralā? Ili ngachon khavai ali kahāngmilu.” 41#Lk 7.13. Jishuna ngahānkai, “Martha, Martha, nana tarākhawui vang khanangda malungringhaira, 42kha khavāt akha lei, Maryna awui eina makhuithuiki kaji chi kapangkhuihaira.”
Currently Selected:
LUKE 10: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
