KÜÜRORI 7
7
Stefen nüh Zhüküphra
1Thinü Levü Kümüsiewa nüh, “Hatü zhütsa ülo?” ti küna. 2#Atü 12.1. Thinü Stefen nüh, eh füri thi eh pari, eh zhü künaluo. Abraham Haran vü müjie kürho vünüh ma Mesopotamia vü peküveh vünüh kütholathovü küsa Saküüwuowa ma vüru taji, 3noh zhih thi noh küshukürari vünüh tsezhu nü hi nüh azhie küjo kütsana küsa vü waluo, 4#Atü 11.31; Atü 12.4.Jüti sataji ma tü Khaldiari zhih jamü nü wa Haran vü rhotewa. Thi ma pa sükümü sevü Saküüwuowa nüh jüla nüh ma sie khinyi nohri nüh rhoküveh vü ru. 5#Atü 12.7; 13.15; 15.18; 17.8.Thitü Saküüwuowa nüh ma mpa ma zhi küüsana küsa küpekenüh azhih ampha rike nga kütuoke ma mütsü, thitü matü atsa münyie wie ketünga azhih hama ma nüh thi maküthsoküzhiri nüh küühuo nta phrateke saveh. 6#Atü 15.13,14.Jütisanü ma küthsoküzhiri tü wa nyuri azhih vü alienyiri vi siepe sa thi müküchie sataji mavi müzamüzü küürho naveh ta hama kenüh Saküüwuowa nüh phrate saveh. 7#Tse 3.12.Thitü Saküüwuowa nüh, akuoh thawa nüh mari vi siepe sanüh jümari hi nüh müshemüsü naveh, thi jüma sevü nüh mari tü ru nü azhie hala nüh hi khurü naveh. 8#Atü 17.10-14; Atü 21.2-4; Atü 25.26; Atü 29.31—35.18. Thi ma nüh ahukürhe kütsathuohwa tsü. Jüti sataji Abraham tü Isaac wuo nü rülo tüze rülo vü ma hu rhe; thi Isaac nüh Jacob wuo, thi Jacob vünüh eh nyi kürhokhuri türakünyi rhoshuru.
9 #
Atü 37.11; Atü 37.28; Atü 39.2,21. Thi anyi kürhokhu jümari tü Josef nokürüpa nü Egyptri vü zhumü; thitü Saküüwuowa tü ma sietse wie. 10#Atü 41.39-41.Thi kümnomna aveh vünüh ma külole, jütisanü Egypt kajiwa Faroah tüvü küümze thi kümahtsa pera nü Egypt aveh vü thi azhih aveh nyia vü kümükhrüwa sa. 11#Atü 42.1,2.Jütiküsavü Egypt thi Kanan azhih aveh vü kümükhuojih teru nü kümnomna hozake teru nü hiri apari tü kütsaküzhu müngura nüh sa. 12Thitü Egypt vü kütsaküzhu nguraveh ta küsa Jacob nüh küthsüra vü hiri apari jüla küzekhu. 13#Atü 45.1; Atü 45.16.Thi akünyiawa küwale vü thuoüji Josef nüh ma mpa ma jierivü küüthsü thi Josef tsapatharuori nga Faroah nüh thsütera. 14#Atü 45.9,10,17,18; Atü 46.27. Thi Josef nüh ma pa thi ma küshukütu nyi rürake nü münga aveh ji ma vü teru. 15#Atü 46.1-7; Atü 49.33.Jüti satajinü Jacob tü Egypt vü tejuo. Thi ma nga thi hiri apari nga jüla nüh sümü. 16#Atü 23.3-16; 33.19; 50.7-13; Jos 24.32. Thi mari kümo tü kha shelewa Shekhem, Abraham nüh Shekhemvü hamor atsari vünüh süküsa rüku vü chowumü.
17 #
Tse 1.7,8. Thitü Saküüwuowa nüh Abraham vü tsü nta phratekeküsa tsothowa shenyiru ünü, 18Josef müküthsü Egypt nyia kükaji küpa shuteru, thi haküju Israelri tü küzhiküzhi teru. 19#Tse 1.10,11; Tse 1.22.Kaji jümatü hiri alahnyiri vü khuke müsü she nü wuriemari tsari müküürho nta küsa kenüh alievü shozhu jamü. 20#Tse 2.2. Hati küsa tsotho vü Mosa tü wuo saveh, thi ma tü Saküüwuowa atüvü zü she. Thi ma pa azhe vünüh matü asah küche küje. 21#Tse 2.3-10. Thi ma tü viwa alievü saveh ünü Faroah atsavühwa nüh mampa ma tsa sa nti sieru küje. 22Thi Mosa tü Egyptri zanyoküthsü aveh vi taji ma sosie, thi ma tü ma zhü küphra vü nga satü ma küüro vü nga satü khra she.
23 #
Tse 2.11-15. Ma tü mavi zürake khruoteru ünü Israelri tsa, ma füri künongü ma luoveh lovü teru. 24Jütiküsavü mari nyi küsü müküle ngu nü Israelwa apo vi nü Egyptwa fethemü. 25Ma nüh kümüshe Saküüwuowa nüh ma ke nüh mari vizhutsü ti küsa ma füri tü thsüthuoh tünti sa, thitü mari tü müthsü nüh samü. 26Rülo künyiawa masü küraluo küpe vü masü azazhü saküka nti ru taji, “Halie, tumasü, nosü tü ajienü wie, nosü tü mokenüh küsü nüh küsü vü müküle saveh lo,” ti küza. 27Thitü ma füwa vü müküle saküvehwa nüh Mosa ji taji, “Thawa nüh no vi hiri nyia vü sierhü nyutü küjiküüsa lo? 28Noh luonyi Egyptwa küfethe kümüjie hi nga fethe hü nti ülo?” ti küza. 29#Tse 18.3,4. Jüma küthsüra vü Mosa tü zhü Midiari azhih vü tewanü zheküjari kümüjie sanü jüla rho, thi jüla nüh ma tü atsa nyimpari künyi ngura.
30 #
Tse 3.1-10. Jüti sataji mavi zürake jukümü sevü rügizhüleri küsü Sinai Küzhiho rügi reza vü athso küjepukeküsü vü anyihzhu vünüh ma kütsa. 31Mosa tü jü ngu taji ngo, ma tü jü no nti akütuovü wa, thinü Vüwa jikhi ma vü ru nü, 32“hi tü nohri pari Saküüwuowa, Abraham thi Isaac thi Jacob Saküüwuowa,” ti küza. Thinü Mosa tü khekheti küshü taji münora nüh satewa. 33Thinü Vüwa nüh ma vü, “Noh nüh vü küveh jihküükruvüh fomü luo, küpakenühnyunü azhie noh nüh kütsiepewa tü mütsemü. 34Egypt vü eh nyiri münomüna küveh hi nüh ngutomüthuoh, thi hi nüh mari lokürü jikhi nga künaramüthuoh, thi mari vizhu nti hi tü tse. Jükenüh raluo, hi nüh no Egypt vü küze naveh,” ti küza.
35 #
Tse 2.14. Mosa hamatü Israelri nüh kule kümüwa tü mari nüh, thawa nüh noh vi küji thi sierhü küüsa lo? ti küna. Saküüwuowa nüh athsoküjepuke vünüh anyih küüjunü rügizhülewa ma küütsawa ake vünüh ma thuoüji anyira nyia takrü küsa thi mari küüvizhu nta küze. 36#Tse 7.3; Tse 14.21; Nyi 14.33.Ma nüh mavi zürake mari sie reza vü kütsevü nga thi Kümüru Juküji vünüh nga thi Egypt vü küpevü nga küngoküüro thi küükrükrari sanü mari siezhu. 37#Kho 18.15,18.Mosa hama nüh Israelri vü, “Saküüwuowa nüh hi saküütsie kümüjie nohri ajienüri azhie vünüh setsaküthsüri küsü vizhu naveh,” ti küza. 38#Tse 19.1—20.17; Kho 5.1-33.Mosa hamatü khana reza vü ma nyiri sie sezhuh nü Sinai Küzhiho rügi vünüh sie küjülewa rügizhüwa thi hiri alahnyiri sie kütsewa wiethuoh, thi hiri tsü na küsakenüh kürho zhüwa nga ngura.
39Hiri lahnyiri nüh ma zhümüküna nta ma chijamü nü mari tü mari luoveh vünüh Egypt vü shele teru taji, 40#Tse 32.1.Aron vü, “Hiri atüvü lekhuji küüjo naküsa kenüh kükhurü nyiazari sa hiri tsüluo, küpakenühnyunü Egypt vünüh hiri küvizhuwa Mosa thuoüji mowa samüthuoh nüh hiri tü müthsüthuoh,” ti küza. 41Jütisanü mieshüzah küsü sanü zanyo viru nü tsorhejüma khurü taji mari akesie jüma vü külozhe sa. 42Thi Saküüwuowa nüh mari jamü nü rügivü wutsiri küükhurümü, jümatü setsaküthsüri lasi lovü rhüsaveh:
“Halie Israel zhelori,
nohri tü mavi zürake reza vü küpe vü samüwa fethe thi kükhurü sanü hi tsü ülo?
43Jütanyunü nohri nüh khurü nta küsa nohri ake nüh küsa
Molek nazizheh thi Refan wutsi kükhurü nyiaza viwa,
thitü hi nüh nohri zhe Babilon kari küze nü nohri tü zheküjari küsamü naveh,”
ta rhüsa veh.
44 #
Tse 25.9,40. Hiri lahnyiri thuoüji reza vünüh povü Juhthsüwa peh, thi jümatü Mosa vü mokümjie sa üta küjotsü nüh thi ma nüh atsowa ngu nü jü vünüh sa. 45#Jos 3.14-17. Hiri lahnyiri tü mari pari vünüh juhthsüzheh jüma nguranü mari tü Joshua sie küwa vü jüma khawa taji akuoh Saküüwuowa nüh zhejakümü azhih jüla küru vünüh David tsotho küju peru. 46#2 Sam 7.1-16; 1 Kkz 17.1-14.David tü Saküüwuowa atü vü küümze pera taji Jacob Saküüwuowa ape küsü küüpha üti khuo. 47#1 Kaj 6.1-38; 2 Kkz 3.1-17.Thitü Solomon nüh ma kenüh azhe küsü sa.
48“Thitü setsaküthsüwa nüh küüza kümüjie; Saküüwuowa Kümüsie Tsahwa thuoüji ake nüh küsa azhe vü müpe;
49 #
Isa 66.1,2. “Thajüwu tü eh kajipe,
thi azhih thuoüji eh jinyipe,
tinü noh tü mowa azhe eh kenüh sa nti lo?
nyutü eh kenüh kümünyiepe mowa lo? ti Vüwa nüh küza.
50Hi mpa nüh eh kenüh zanyo hamari aveh müsa ülo?”
ta rhüsaveh.
51 #
Isa 63.10. “Nohri luoveh kükhori, nohri luoveh nga thi akhüna nga ahu mükürheri, nohri tü tsotho aveh Kümtse Sietse kulepehuomü. Nohri lahnyiri kümüjie nohri nga Kümtse Sietse kule pehuomü. 52Nohri lahnyiri tü setsaküthsüri thawa samükümnomnalo? Küzhütsawa nohri nüh zhutsa thi fethekümü runa küsawa küütü vünüh küzaküruri fethekhehmü. 53Rügizhüleri nüh Saküüwuowa wule viru nohri vü tsüthuoh, thitü nohri nüh müvi nüh kulemü,” ti küza.
Aloh nüh Stefen Küveh
54Mari nüh azhü hamari küthsüra vü khieloti mari rüshunü mari ha tsürü taji peh. 55Thitü Stefen tü Kümtse Sietse nüh pro taji thajüwu no ünü Saküüwuowa küthola thi Jisu tü Saküüwuowa zhie wuovü tsieküveh ngu. 56Thinü ma nüh, “Halie, thajüwu saphie küsa thi Tsawa Saküüwuowa zhie wuovü tsie küveh hi nüh nguvehthuoh,” ti küza.
57Thitü mari tü zie kürügi she nü mari khüna küwute taji mari tü zhüru kürü küsükeri vünüh ma vü vehke, 58Jütisanü mari nüh ma nyuküji alievü zhezhujamü nü aloh vi ma veh, thi ma vü müküle kütsüri athsü phrenü Saul ti küsa vizari küsü ajih vü sa. 59Mari nüh aloh vi ma veh küvehvü ma tü kükhuo sataji, “Vüwa Jisu, eh sietse sie luo,” ti khuo. 60Jütisanü ma tü khotsü taji krie kürügi she, “Vüwa, müküle hama vi mari alü vü müthsetümü luo,” ti küza. Thi ma nüh azhü hama küzakümü sevü ma tü sütewa. Thi Saul wie nga ma küüsü ma kümüshe.
Currently Selected:
KÜÜRORI 7: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
