KÜÜRORI 9

Saul Luoveh Kükhaphrü

(Krr 22.6-16; 26.12-18)

1Thitü Saul thuoüji jüma tsothovü nga Vüwa sehnyiri vü anyia kümüshümüwuoti sanü mari fethe nti sakükrü nü Levü Kümüsiewa vü wa nü, 2Vüwa Lekhuji kümüzheri thuoüji nyi küsüküsü nga nyimpari nga thi nyimzari nga satü künguri thuoüji re nü phete taji sie Jerusalem vü wa nti küsa kenüh jüma küsara kümühie lasi rhü taji Damaska vü künazizhe aveh vü tsü üti ma vü khuo. 3Jüti sataji Saul tü tse Damaska shenyiru ünü, zhürüluo rügi vünüh aküwie küsü turu ma wie mükieletemü. 4Thinü ma tü azhih vü küluzeteküwavü jikhi küsü ma vü ru taji, “Saul, Saul, noh tü mokenüh hi sakümnomnaveh lo?” ti küza. 5Thinü ma nüh, “Vüwa, noh tü thawa lo?” ti küna. Thinü ma nüh, “Hi thuoüji Jisu, noh nüh kümnomna tsüküvehwa. 6Thitü noh süra nü nyuküjiwa vü tu luo, jütathuoüji noh mowa küsale ünü vi noh vü küza naveh,” ti küza. 7Anyi ma siekütseri tü azhü küsü nga müphrarathuoh nüh toke peh, küpakenühnyunü mari tü jikhi nü künaraveh thitü nyi küsü nga müküngu kenüh. 8Saul tü azhih vünüh süra nü ma notha ko taji no ünü zanyoküsü nga müngu nüh samü, jükenüh mari nüh ake nüh ma sho nü ma sie Damaska vü ru. 9Thi ma tü rülo küche zanyo müngu nüh sa, jümpa mükünyu ashie kütsaküzhu nga müsa. 10Jütiküsavü ma nyo Anania ti küsa Khristanyiri küsü Damaska vü peh. Thinü Vüwa nüh kümohtsa vünüh ma vü, “Anania,” ti ji. Thinü ma nüh, “Vüwa hi hala peveh,” ti rüle. 11Thinü Vüwa nüh ma vü, “Süra taji tse Kümüsho ti küji lekhuji vü wa nü Judas azhe vü Tarsusri nyo Saul ti küjiwa zhüku künaluo; küpakenühnyunü halie, ma tü kükhuo sa peveh,” ti küza. 12Thi ma tü Anania ti küsa anyi küsü ma zanyo küüngu le naküsa kenüh azhelovü turu ma ke thsuo ma vü küthse kümohtsa vünüh ngu. 13Thitü Anania nüh, “Vüwa, anyi hamatü Jerusalem vü no kütsotüri vü kümüsü hozake küsa hi nüh anyi hozake vünüh thsüra. 14Thi ma tü khinyi wienga levü küjiri vünüh kükhra vi nü noh nyo ji nü kükhurüri aveh thuoüji re üta küsa azhü vitse nü,” ti rüle küza. 15Thitü Vüwa nüh ma vü, “Waluo, küpakenühnyunü hi nüh ma tü eh tsokrü küsü kümüjie rüka samüthuoh, thi ma nüh eh nyo vi Judahmükünyuri vü thi Israel tsari vü wa naveh. 16Thi ma eh nyo kenüh küzake mümünomünaji mümühie nüh hi nüh küjo ma kütsanaveh,” ti küza. 17Jüsevü Anania tü tsezhu wa nü azhe lovü tu. Thi ma nüh ma pah taji, “Eh nü Saul, no hala kütsevü lekhuji vünüh noh küünguwa nüh noh notha küüngule naküsa kenüh thi Kümtse Sietse nüh noh küüpro naküsa kenüh hi küzeveh,” ti küza. 18Thinü müküzhikewiethuoh nüh angazhe kümüjie küsa ma notha vünüh tsuotsatewa taji ma notha tü zanyo ngulera. Jüti sataji ma tü süra nü baptis sa. 19Jütisanü ma tü ashietsa taji jüsevü nüh müzhora.

Damaska vü Saul Zhüküüza

Jüsevü ma tü Damaska vü rülo hozake kütsotüri siepe. 20Thinü külesho künazizhe vü wa nü Jisu zhüku phrate taji, “Ma thuoüji Saküüwuowa Tsa wiethuoh,” ti küza. 21Thinü ma zhü küünarari aveh tü ngo taji, “Anyi hamatü Jerusalem vü Jisu ta küsawa khurü kütseri küzothewa nyu ülo? Thi ma tü nyiri re nü sie levü küjiri atüvü wa na küsa kenüh hala küru nyu ülo?” ti küza. 22Thitü Saul tü ma zhü küzhitsawa khra müzho she le taji Jisu tü Messiah wiethuoh ta küsa phrate kümtse nü Judahri Jerusalem vü kürhori vü küza. 23#2 Kor 11.32,33. Thinü rülo hothake jüti satekütsevü Judahri nüh ma fethe nta lekhuji phah. 24Thitü mari nüh lekhuji phaküvehwa tü Saul nüh thsütera. Mari tü ma fethe nti rülovü nga thi rüza vü nga nyuküji kheriri vü huo. 25Thitü ma sehnyiri nüh ma tü ashukhuo lovü thse nü arüza vünüh ashieku alievü khawa samü.

Saul Jerusalem vü Küwa

26Jütiküsanü ma tü Jerusalem vü wa ünü sehnyiri vü nyirefü nti müshe, thitü mari aveh nga ma krütewa, küpakenühnyunü mari nüh ma tü sehnyiri küsüthuoh ta küsa mükütsotü kenüh. 27Thitü Barnabas nüh ma sie nü sehnyiri vü ru tajinü ma lekhuji vünüh Vüwa küngu thi ma nüh ma sie küürüchie thi Damaska vü ma nüh luoveh müzho she nü Jisu zhüku küüza vi mari vü küzatsü. 28Thi ma tü mari azhie vü nyitse taji Jerusalem vü kütsuokükhru sa. 29Thi luoveh ji she nü Vüwa nyo vi küza. Ma tü azhü phra taji Greekri zhü küphra Judahri sieküproluo pehuo; thi mari tü ma fethe nti phapehuo. 30Jütiküsavü ma füri nüh jüma thsüra nü ma sie Kaisaria vü tetsuo nü Tarsus vü küzemü. 31Jütiküsavü Judea thi Galilee thi Samaria Nazizheh aveh vü loküzhe peh nü küzhake tewa; thi Vüwa küsiake vünüh rho thi Kümtse Sietse nüh mari alosaküzhe nü küzhiküzhia wa.

Pitor nüh Lida thi Joppa vü Küwa

32Jütiküsavü Pitor tü kütsuokükhru sanü azhie aveh vü wa nü rülo küsü Lidda vü kütsotüri no nti ru. 33Ma tü jüla anyi Aeneas ti küjiwa siemütu, anyi hamatü mavi tüze aze vü naze nü wiechusümü. 34Thinü Pitor nüh ma vü, “Aeneas, Jisu Khrista nüh noh sakümühietsü navehthuoh, süra nü noh ze küche luo,” ti küza. Thinü müküzhike wiethuoh nüh ma tü tesüra. 35Thinü Lidda thi Sharon vü kürhori aveh ma ngu nü luoveh khaphrü nü Vüwa vü teru. 36Jütiküsavü Joppa vü sehnyivühri küsü Tabitha, Greekri zhü vünüh Dorkas, mazhünyo thuoüji amüsü ti küsa küsü peh. Nyimza hamatü küüro kümühie hozake sa thi nyuri vü kütsüküsuo küsa müke hozake sa. 37Jüma tsothovü ma tü na nü sümü; thinü mari nüh ma ajuh saküüzümü taji viwa azhe küjüke rügivü küze saveh, 38Lidda tü Joppa kütuovü peküveh kenüh Pitor tü jüla peveh ta küsa sehnyiri nüh thsüra taji mari tü nyi künyi ma vü küze nü wurie ma ji taji, “Münathetü no müküzhike nüh shiti hiri vü ru luo,” ti thoküze. 39Thinü Pitor tü süra taji masü sie nü tewa. Thi ma ruju ünü mari tü ma sie taji azhe jüke küsa rügivü kuo. Jütiküsavü tünyivühri aveh tü ma kütuovü tsie nü krie thi Dorkas rhoküveh vü ma nüh satsaküüzhuvüh thi thsümünyi kütori aveh vizhu kütsa. 40Thinü Pitor tü mari aveh alievü küzemü taji khotsü nü kükhuo sa, thi akümo#9.40 Akümo: Samwa nyutü anyiri kürholi teküwa sevü asatsa mpa küpeh. vü süleru taji, “Tabitha, süraluo,” ti küza. Thinü ma tü notha koteru nü ma tü Pitor ngu ünü süra shupe. 41Thinü Pitor tü ma ke thsuo küze nü ma sike kütsie. Jüti sataji ma nüh kümtseri thi tünyivühri jiteru taji akürho mari kütsa. 42Thi küüro hamatü Joppa aveh vü thsütewa thi nyiri hozake Vüwa tsotüra. 43Jüti sataji ma tü Joppa vü Simon sahu küüro küsawa sie nü rülo hothake petewa.

Currently Selected:

KÜÜRORI 9: POCHBSI

Highlight

Copy