ATÜTSAR 15
15
Saküüwuowa nüh Abram Sie Kütsathuozhü
1Hama sevü Abram kümohtsa vünüh Saküüwuowa zhü ma vü ru nü, “Mükrütüm luo, Abram, hi tü noh johuowa wiethuoh ünüh, noh jisuo tü ji sheh wie nathuoh ünüh,” ti küza.
2Thitü Abram nüh, “O Vüwa Saküüwuowa, noh tü mowa vi hi tsü naveh lo, hi tü atsa münyie nüh sapehuom, thi eh ka küviwa tü Damaska vü Eliezer wie,” 3Thinü Abram nüh küüza, “Halie, noh tü atsa küsü nga hi mütsü, thi tükha küsü eh zheh vünüh küwuowa nüh eh ka küviwa sana thuohnü,” ti küza.
4Thi halie, Vüwa zhü ma vü ru le nü, “Anyi hamatü noh ka küviwa nyu, thitü noh mpa noh tsanüh noh ka küviwa sanaveh,” ti küza. 5#Rom 4.18; Ebr 11.12. Jüti sanü Vüwa nüh ma sie alievü wa taji, “Noh tü Thajüwu vü noküze luo, thi awutsiri chienoluo, noh tü jümari chiekhehra naveh ünü nyu nüh,” ti küza. Thi ma nüh ma vü, “Noh küshuküra nga jüzake naveh,” ti küza.
6 #
Rom 4.3; Gal 3.6; Jos 2.23. Thinü ma tü Vüwa tsotüra, thi Vüwa nüh ma tü künyitsari ti ma vü chieke.
7Thi Vüwa nüh ma vü, “Hi tü Vüwa, Khaldeari Ur vünüh noh siezhuru nü azhie hama noh tsü nü noh küüvi nti küsawa,” ti küza.
8Thitü Abram nüh, “O Vüwa Saküüwuowa, azhih hama vi eh zhi sanaveh ta küsa hi tü khiela nüh thsüra naveh lo?” ti küza.
9Thitü Vüwa nüh ma vü, “Mieshüzah mahvi küche kükhruo küsü nyihsü awie mahvi küche kükhruo küsü thi nyihzhü küjiwa mahvi küche kükhruo küsü, ato mükhrietü küsü thi azheh mükhrietü kürünyi küsü ti hi vü viru luo,” ti küza. 10Jüti küüza vü Abram nüh hamari aveh vi ma vü ru nü kütethuo künyinyi sanü kütethuo küsüsü vi nü küwiejieluo sa, thitü amüwa künyi thuoüji mütethuo. 11Thi asa rekütsari tü asa tsa nta prüturu, thitü Abram nüh jümari zhejam.
12 #
Job 4.13,14. Rünyi kuotetu ünü küzehngü shehke Abram vü teru, thinü halie, akükrü küji küsü thi aküzo küji küsü ma vü ru. 13#Tse 1.1-14; Krr 7.6. Thinü ma nüh Abram vü, noh küshukürari tü mari azhih mükünyu vü küzehri sanü jüla atükhari sanü mahvi müzamzü kümnomna ngu naveh ta küsa thsü toh luo, 14#Tse 12.40,41; Krr 7.7. Thitü mari vi tükha küsari vü hi nüh kümnomna tsü naveh, thitü jüma sevü thuoüji mari tü künyirhie khielota vi nü tsezhuru naveh. 15Thi noh thuoüji kürüzi pe noh pari vü tewa naveh, noh tü kükhruo shehke sevü nüh chohwu naveh. 16Thi mari tü awuhle müzüawa vünüh shele hala ru naveh; küpakenühnyunü Amorra khuke künakhie tü müjie küju kenüh.
17Jüti küsa vü rünyi tetu nü tsohzoteru ünü halie, zhürüluo anyikhu kükrü anyihküfü küsü thi anyihküjuzhu küsü asa tehthuo küsari azhievü kariwa. 18#Krr 7.5. Jüma rülo vü Vüwa nüh Abram sie kütsathuozhü sanü, “Noh küshukürari vü hi nüh azhih hama tsü naveh, Egypt rühgu vünüh rühgu küjiwa Eufrates küju, 19thi Kenra zhih, Kenizra zhih thi Kadmonra zhih, 20Hitra zhih, Perizra zhih, Refaim zhih, 21Amorra zhih, Kananra zhih, Girgashra zhih thi Jebusra zhih aveh tsümthuoh,” ti küza.
Currently Selected:
ATÜTSAR 15: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
