ATÜTSAR 20
20
Abraham thi Abimelek
1Jüla nüh Abraham tü tse Negeb rüshu wuovü tewa, thi ma tü Kadesh thi Shur masü azhie vü pehtewa; jüti sanü ma tü tsotho pike Gerar vü peh. 2#Atü 12.13; 26.7. Thi Abraham nüh ma vüvüh Sara tü, “Ma thuoüji eh tsehvü,” ti küza. Thinü Gerar kajiwa Abimelek tü Sara sie ma vü ru. 3Thitü arüza vü Saküüwuowa tü amoh vünüh Abimelek vü rutaji, “Halie, noh tü aküsüri küsü, küpakenühnyunü nyimzawa noh nüh sieru küsawa tü nyi küsü avüvüh nü,” ti küza.
4Jüti küüza vü Abimelek tü Sara shenyi müwa nüh sanü, “Vüwa, noh tü zanyoküsü nga müküsa müküleh mükünyieri zothe nti ülo? 5Ma mpa nüh, ma thuoüji eh tsevü ta müküza ülo? Thi nyimzawa mpa nga nüh, Ma thuoüji eh prawa ta müküza ülo? Hi nüh eh luoveh kümtse vünüh thi eh ke müküleh mükünyie vünüh hama hi nüh samthuoh,” ti küza.
6Thinü Saküüwuowa nüh amoh vünüh ma vü, “Ah, noh nüh noh luoveh kümtse vünüh hama küsa hi nüh thsüveh, thi jüma tü hi mpa nüh noh hi vü müküükhiemuo nti khetem, jükenüh hi nüh noh tü ma müküüpa nüh sam. 7Tinü khinyi thuoüji anyiwa vüvüh tü küzemle luo; küpakenühnyunü ma tü setsaküthsüri küsü, thi ma tü noh kenüh kükhuo satsü naveh, jüta sanü noh tü rhora naveh. Thitü noh nüh ma müküze thuoüji, noh nga thi noh zhi aveh nga sü wie naveh ti küsa thsüluo,” ti küza.
8Thinü Abimelek tü rüne kümto sühra nü ma sieperi aveh jizhuh nü hamari aveh mari vü küza; jüti küsa vü mari aveh tü krü shehke. 9Jüti sanü Abimelek tü Abraham ji taji, “Noh tü hiri vü mowa samthuoh lo? Noh tü moti kükhiemuo küji viru nü hi vü thi eh kajipe vü thse nü hi tü noh vü küükhiemuomthuoh lo? Müküsalehwa noh tü hi vü thi eh kajipewa vü küüsamthuoh nü,” ti küza. 10Abimelek nüh Abraham vü küzale hü taji, “Noh tü mowa müshe nü hama sa lo?” ti küna.
11Thinü Abraham nüh, hi nüh hama küsa thuoüji küpakenühnyunü, thitü azhie hala tü Saküüwuowa kükrü pike nga münyie tünyie ti müshe, thi jüüta thuoüji hi tü eh vüvüh kenüh mari nüh hi zothe nanü ti müshe. 12Jüma nyiehvü nga azhütsa, ma tü eh tsehvü, ma tü eh pa atsa, ma tü eh zah tsa nyu, jüti sanü ma tü eh vüvüh sa ra. 13Saküüwuowa nüh eh pa zheh vünüh hi saküütsezhu vü hi nüh ma vü, “Noh münathetü müle nüh hakümjie hi vü saluo; hisü khiekhie vü nga waluo, ma tü eh prahwa nüh ti eh kenüh küza luo, ti hi nüh küzalie,” ti küza.
14Jüti küsa vü Abimelek nüh nyihzhü thi shüvotsa, tükha nyimpari nga thi nyimzari nga vi Abraham tsü, thi ma vüvüh Sara nga vi ma vü küzem le. 15Jüti sanü Abimelek nüh, “Halie, eh zhih tü noh tüvü pehveh, tinü khiela peh nthe nüh noh külo wuovü peh luo,” ti küza. 16Sara vü nga ma nüh, “Halie, hi nüh rakasa anyieh küsü vi noh prahwa tsüthuoh ünüh; thi jüma tü noh siekütseri aveh notha vü noh müküleh münyie ta küsa pohvü küsü; thi anyiri aveh atüvü nga noh tü müküleh münyie ta küsa zhünyo,” ti küza.
17Thinü Abraham nüh Saküüwuowa vü kükhuo sa, thi Saküüwuowa nüh Abimelek sakümhietsü, ma mpa nyu nü ma vüvüh thi ma tükhavühri nga sakümhietsü nü atsa küüngura satsü kheh, 18küpakenühnyunü Abraham vüvüh Sara kenüh Abimelek zhehlovü ashiekuo aveh khete kümtü kenüh.
Currently Selected:
ATÜTSAR 20: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
