LUKE 21

Tünyivühwa Zanyoküthse

(Mat 12.41-44)

1Jütisanü ma tü toke nü no ünü, nyirhieri tü zanyovi zanyoküvizhuhku lovü küthsela ngu ra. 2Thi ma nüh tünyi küthotsavühri küsü pesa künyiküthse ngu. 3Thinü ma nüh, “Hi nüh nohri vü küzatoke naveh, küpari nyia vünüh tünyi küthotsavüh hama nüh küüzhithseveh,” ti küza. 4Küpakenühnyunü küpari thuoüji aküzhi aze vünüh viru thseveh, thitü tünyivüh hama thuoüji ma küthotsa aze vünüh makürho vü küpe aveh vi thse veh, ti küza.

Kükhurüzhe Zoriemüna küsa Jisu nüh Küphrate

(Mat 24.1-2; Mrk 13.1-2)

5Jüsevü aloh aküzü thi Saküüwuowa vü aküte sanü vi Kükhurüzhewa saküzü she küsa ma sehnyi wuori nüh haluo peveh ünü Jisu nüh, 6“Nohri nüh ngu küveh hamari tü müzorie nüh aloh küsü wienga khakeluo taji müküpeh tsotho küsü ru naveh,” ti küza.

Küüjakünya thi Kümnomna Ru na küsa

(Mat 24.3-14; Mrk 13.3-13)

7Thinü mari nüh ma vü, “Küsosiewa, hamari tü küsiesaru nathuoh lo? Thi hamari saru na küsavü thsoshi mokümjie ru naveh lo?” ti küna.

8Jüti küüna vü ma nüh mari vü, “Nohri mümüra nüh sana küsa kenüh azhüzhüluo, küpakenühnyunü nyiri hozake wie nga eh nyo vünüh ru naveh, hi thuoüji Khrista wiethuoh, thi tsotho thuoüji shenyi müthuoh, ta küzaru naveh, thitü mari ase münyi tümü. 9Thi nohri tü arieküsa thi küüjakünya künara naveh, thitü mükrütümü, küpakenühnyunü hamari nüh apo müsaji mümühie, thitü asekhe thuoüji küsükeri vünüh küsawa nyu,” ti küza.

10Jüsevü nga ma nüh mari vü, “Kuo küsü nüh kuoküsü sie saluo naveh, thi kaji küsü nüh kaji küsü münongü nüh sanaveh; 11khielota mükhrü küzhü naveh, thi azhie luo wie vü kümükhuoji thi asahna ru naveh, thi rügi vünüh küükrükükra hozake thi thsoshi küji ru naveh. 12Thitü zanyo hamari atüvü mari nüh nohri re taji kümnomna tsü naveh, jütisanü nohri re künazizheri thi küsizheri vü thse naveh, thi eh nyo kenüh nohri re kajiri thi atakrüri vü siewa naveh. 13Hamatü nohri kenüh apovü küsa tsotho küsü sanaveh. 14#Luk 12.11,12.Mowa rüle tsü naveh nüh ti küütü vünüh müshetsaza mütsetümü luo, thitü nohri luoveh tom ti sanü pehluo. 15Küpakenühnyunü hi nüh nohri mükünongüri aveh nüh nohri siemüküüproluora nyutü mükütsiera apo thi akütshü vi nohri tsü naveh. 16Jü mpanyunü azahpari mpa nga, noh jienü, thi no küshuküra thi no füri wie nga nüh nohri retsü wie naveh, thi mari nüh nohri wuori thuoüji nyuri nga nüh küüfethe naveh. 17Thi eh nyo kenüh nyiri hozake nüh nohri mürhü naveh. 18Thitü nohri ashe küsü wie nga küümiewa nyu. 19Nohri küüzhike vünüh nohri kürho akünyiawa ngu naveh.

Jerusalem Küzorie Zhüku Jisu nüh Küütüzhü vünüh küüza

(Mat 24.15-21; Mrk 13.14-19)

20“Thitü arieri ru nü Jerusalem mükieshe mü thuoüji ma zoriemü naküsa tsotho jumthuoh ti küsa thsüluo. 21Jütiküsavü Judea vü küperi tü zhü küzhiho vü tewaluo, thi thari nüh nyuküji jü lovü peh naveh nüh shutewaluo, thi thari nüh alievü peveh nüh alovü mükütu le tümü luo. 22#Hos 9.7. Küpakenühnyunü jümatü kümnomna rülo khanavü rhüküsari saju na küsawie thuoh. 23Jie jüma rülo vü atsakümori thi atsa künü küvehritü küzakele nga kho naveh nüh! Küpakenühnyunü azhih nyia vü lokürü ru naküveh kenüh thi anyi hamari nyia vü zhühkha ru naveh. 24Mari tü nyusuowa nüh rethe naveh, thi wuori thuoüji aküsi saakuo aveh vü wa naveh; thi mükütsotüri tsothowa müjieküju nü mükütsotüri ajih nüh Jerusalem nyitemünaveh,” ti küza.

Nyi Tsawa Sheleküru

(Mat 24.29-31; Mrk 13.24-27)

25 # Isa 13.10; Eze 32.7; Joe 2.31; Kkt 6.12,13. “Jümpa mükünyu rünyi, asah thi wutsiri vünüh thsoshisaru naveh, thi azhih vü akuoh aveh vü lokürü ru naveh, thi juküji akhi thi ma küüshü nüh nyiri saküüngothse naveh. 26Thi azhih hala kükrü thsoshi jüri ru na küsa müshe taji nyiri aveh krü nü mükümüshera sanaveh, küpakenühnyunü rügivü kükhrari küzhüjamüna küsa kenüh. 27#Dan 7.13; Kkt 1.7. Jütiküsavü nyi Tsawa tü kükhra vi kütholathovü küji sa akülu vünüh kütse mari nüh ngu naveh. 28Zanyo hamari saluo nta küsavü nohri alü toke taji rügivünoluo, Küpakenühnyunü jüvütü nohri küülole shenyi kümüthuoh kenüh,” ti küza.

Jichuorhu vünüh Küsosiezhü

(Mat 24.32-35; Mrk 13.28-31)

29Jüsevü ma nüh küüzhühiezhü küsü küza taji, “Jichuorhu thi athsorhu küpari aveh nga noluo; 30nyawa shiteru thuoüji küzhesa shenyimüthuoh ta küsa nohri mpa nüh ngu thi thsüraveh. 31Jükümjie hamari sateküru nohri ngu thuoüji Saküüwuowa kükaji shenyimüthuoh ta küsa thsüluo.

32“Hi nüh nohri vü küzatoke naveh, hamari müjie küsaju nü khinyi kürho hamari müpeh nüh küsawa nyu. 33Thajüwu thi azhih thuoüji ratewa naveh, thitü eh zhü thuoüji kürawa nyu.

Huo mpelaji Mükümühie

34“Thitü kütsosükürho thi kümüshe thi khinyi kürho kümünguri nüh nohri luoveh sakürüpomü taji apiehjü küsakhe kümüjie zhürüluo mükümüshe vünüh müküüru nüh sana küsa kenüh huo peh luo; 35küpakenühnyunü jümatü azhih nyia rhoküvehri aveh vü runaküveh kenüh. 36Thitü zanyo hamari aveh sana küsavü jümari kari na küsakükhra peh nü nyi Tsawa atüvü sie naküsa kenüh tsotho aveh vü huope thi kükhuo sa pe luo,” ti küza.

37 # Luk 19.47. Jütisanü Jisu tü rülo aveh Kükhurüzhe vünüh sosiepeh, thitü rüza vü thuoüji ma tü Olive Küzhiho vü tewapepeti. 38Thi rüne thomütho vünüh ma zhü küna nti nyiri aveh tü Kükhurüzhe vü ruru ti.

Currently Selected:

LUKE 21: POCHBSI

Highlight

Copy