LUKE 23
23
Pilate Tüvü nüh Jisu sie Shih Küsa
(Mat 27.1-2,11-14; Mrk 15.1-5; Jhn 18.28-38)
1Jüti sataji mari aveh süra tsie nü ma sie Pilate atüvü ru. 2Jütisanü mari tü ma phramüsü taji, “Hiri tü anyi hama nüh hiri akuoh müra nü mükünyu lekhuji vü küzemü na küsa thi akhrü vi Romri Kajiwa mütsütümü üta hiri kükhe, jü mpa mükünyu ma tü ma mpa Khrista Kajiwa ta sanü ngura,” ti küza.
3Thinü Pilate nüh ma vü, “Noh tü Judahri Kajiwa wiethuoh lo?” ti küna.
Thinü ma nüh, “Noh nüh künaküveh kümüjie wiethuoh,” ti rületsü.
4Thinü Pilate nüh levü küjiwa thi nyi shiejiri vü, “Nyi hamawa vü hi nü müküle küsü nga müngu,” ti küza.
5Jütiküsavü mari tü kümküsütsa zie taji, “Ma tü Judea azhih aveh vü thi Galilee azhih vünüh ru hala küjunyuri sosie nü küjakünyakhehmü wiethuoh,” ti küza.
Jisu Herod vü Küüze
6Pilate nüh hama küthsüra vü, “Nyi hamatü Galileeri ülo?” ti küna. 7Thinü ma tü Herod azhie vünüh ta küsa küthsüra vü ma Herod vü küzemü. Ma nga jüma tsothovü wa Jerusalem vü peküveh kenüh. 8Jütiküsavü Herod tü Jisu ngu ünü ma lozhe she. Küpakenühnyunü ma tü ma zhüku thsüra thi tsotho hothake vünüh ma no ngü teküru kenüh. Thinü ma nüh küngo thsoshi wuori sakütsanatü nti müshe. 9Jükenüh ma tü ma küüna hothakeza sa, thitü ma nüh zanyo küsü nga rülemütsü. 10Thi ma kütuovü küpe levü küjiri thi Khonyo küsosieritü mükütuowiethuoh nüh wurie ma phramüsü. 11Jütisanü Herod tü ma rienyiri sie nü ma tü moma küsa kümüjie sanü ma riesa thi thsümünyi kümühie vi mavü thse taji Pilate vü küzemü le. 12Herod thi Pilate masü tü hama atüvü thuoüji afü müsa, thitü hama tsotho vünüh masü afü satewa.
Jisu Zekemüluo üta Zhütsükümü
(Mat 27.15-26; Mrk 15.6-15; Jhn 18.39—19.16)
13Jütiküsavü Pilate nüh levü küjiri, sierhüri thi nyiri jizhuh taji, 14“Nohri nüh Nyi hamatü nyuri saküümüsüwa ta ma re nü hi vü viru, thitü hi nüh nohri atüvü nüh kümühieta ma künawie ketünga nohri nüh ma vü mükülethsüküveh kümüjie ma müküle mpharalie,” ti küza. 15Jümpa mükünyu Herod wie nga ma müküle müküpharakenüh hiri vü küze saveh, tinü halie, küsülekümühie küsü nga ma nüh samüsa, 16Jükenüh hi nüh kümnomna vi ma tsümü taji maküzemü le naveh nüh, ti küza. 17Tsekükari khu kürüzhu Pilate nüh küsi küsariküsü küüshu ma ke vü peveh.
18Thinü mari nüh, “Nyi hama sietewa nü Barabas tsüluo,” ti aveh kürü zie pehuo. 19Barabas hamatü nyuküjiwa vü kükhra küviri siemükünoluongü sa thi anyi küfetheri küsü.
20Jümasevü nga Pilate nüh Jisu küzemü nti küsü keri sale; 21thitü mari tü zie kürügi she taji, “Ma zekemü luo, mazekemü luo,” ti sa.
22Akücheawa ma nüh shele mari vü, “Mokenüh lo? Ma nüh müküle mowa samü lo? Hi nüh ma vü müküle aküsükümühie mphara, jükenüh hi nüh kümnomna vi matsü nü küzemü naveh nüh,” ti küza.
23Thitü mari tü wurie zie pehuo nü, “Ma tü müzekethuoüji mümühie,” ti sa. Jütisanü sekhevü thuoüji mari küzie jikhiwa nüh khrara. 24Jütisanü mari kükhuo mkümüjie vünüh Jisu tü küsümüluo üti Pilate nüh mari vü tsümü. 25Thi ma nüh kükhraküviri siemünoluongü nüh nyuriküfethe küsizhe lovü küpe mari nüh khuoküpewatsümü, thi Jisu thuoüji mari nüh kümüngu kümüjiesatsümü.
Jisu Khieluothso Rügivü Zekekümü
(Mat 27.32-44; Mrk 15.21-32; Jhn 19.17-27)
26Jütisanü arienyiri nüh Jisu sho taji kütsevü Simon ti küsa Sairenri nyi küsü anyu vünüh kütse ngu nü mari tü ma re taji khieluothsowa kükha nü Jisu ase nyikümüzhe.
27Jütiküsavü anyi shieji küsü thi nyimzari nüh Jisu nonü krie taji külu kütse kürefü küsü nga ma se nyitse. 28Thitü Jisu nüh süle mari no nü, “Jerusalemvühri, nohri eh kenüh mükrietümü, thitü nohri mpa nohri kenüh thi nohri tsari kenüh krie luo,” ti küza. 29Küpakenühnyunü halie, atsamükünyieri, thi atsamükümohtsahri, thi atünü müküünüsari kümüngatsahri ta küsa tsothori kütse kenüh! 30#Hos 10.8; Kkt 6.16. Jüma tsothovü tü mari nüh küzhiho kümüsieri vü, hiri nyia vü neh turu luo, thi küzhiho kürünyieri vü, hiri hiete luo ta küza naveh, 31Küpakenühnyunü mari nüh athso akürhowa vü nga hakümjie thuoüji aküsüwa vünü mowa sanathuoh lo?
32Wule küzokhuori anyi künyi nga ma sie zothe nti sie wa. 33Jütiküsavü mari tü azhie “Lürü” ti küsavü ru ju ünü ma zekemü, thi küzokhuo masü nyi küsünü ma zhie wuovü thi küpawa thuoüji azhu wuovü ti ma sienü zekemü. 34#Krh 22.18. Jütiküsavü Jisu nüh, “Eh Pa mari nüh saküvehwa thsünü samüveh tinü mari müküle nojatsüluo,” ti khuo.
Thinü mari tü aküze sanü ma thsümünyi küsuo ntisa. 35#Krh 22.7. Thi nyiri ma kütuo vü tsie küvehri nüh no peh, thitü Judahri sierhüri tü azhükümüsü phra nü ma riesa, “Ma tü Saküüwuowa Khrista thi ma tü kürükawa thuoüji anyi küpari tü küloletsüveh thuoüji ma mpa maküülole luo,” ti küza.
36 #
Krh 69.21. Thi arienyiri nga küsuoju viru ma tsü taji ma riesanü, 37“Noh tü Judahri Kajiwa thuoüji noh mpa no külole luo,” ti küza.
38Thi ma lü anyia thso rügivü nga lasikhu, “Hama tü Judahri Kajiwa,” ti rhükesa.
39Thinü wule küzokhuo künyi ma kütuo vü zeke küsa nyiküsü nüh ma vü, “Noh tü Khrista nyu ülo? Noh mpa nonga külole thi hisü nga külole luo,” ti küza.
40Thitü küpawa nüh, “Noh nga müshekümüsü zarike vü peküküveh, noh tü Saküüwuowa mükrü ülo ti ma phra. 41Hisü thuoüji hakümjie azhühkha küngu le, hisü thuoüji hisü kümülie jisuo nguveh, thitü Nyi hama thuoüji zanyoküsü nga müküle müsa,” ti küza. 42Jütisanü ma nüh Jisu vü, “Noh kaji saküruvü himüsheluo,” ti küza.
43Jütiküsavü Jisu nüh ma vü, “Hi nüh no vü küzatoke naveh, nosü noh tü hi sie kürüzi pe vü penathuoh,” ti küza.
Jisu Sükümü
(Mat 27.45-46; Mrk 15.33-41; Jhn 19.28-30)
44 #
Tse 26.31-33. Jütisaküveh tsothovü tü bafe türoa wathuoh, thi tsotho jüla nüh bafe tügu küju azhie aveh müwie nüh zomopho tewa. 45Rünyi nüh müwie nüh sateküwavü Kükhurüzhe vü athsü thuohküsawa nga kükri künyi satewa. 46#Krh 31.5. Jütisanü Jisu tü zie kümüsie she taji, “Eh Pa, hi nüh eh sietse no ke vü thse veh thuoh,” ti küza. Thi ma nüh jüküzakümü sevü ma rütho küsahwa asekhe samü.
47Jütiküsavü arienyiri müzake nyia nüh küjiwa tüjüma ngu taji Saküüwuowa siake nü, “Nyi hama tü kümtseri tsah lo,” ti sa.
48Thi anyi riekhuowa jüma no nti küruri aveh nga jümari aveh ngu nü mari küso fe taji lorü nü tewa khe. 49#Luk 8.2,3. Thi ma küthsüri aveh thi Galilee vünüh ma se nyiküru nyimzari kületsuoza vünüh hamari ngu kheh.
Jisu Küchowu
(Mat 27.57-61; Mrk 15.42-47; 16.1; Jhn 19.38-42)
50Jütiküsavü anyu kümühu vü sierhüri kümühie thi künyitsari Saküüwuowa Kükaji küru kühuori küsüma nyo Josef ti küsa Judahri anyu vü Arimathea ti küsariwie ketünga, 51ma tü mari kümüshe thi mari nüh küsari vü amüshemütsarü. 52Ma tü Pilate vü wa nü Jisu kümo khuo. 53Jütisanü ma tü ma kümo viwa nü alo külohzü nüh kütothsü vi ma küzhu taji aloh phieke nü rüku sa nta saküsa kümo küsü nga müjie küthsesa lovü thsemü. 54Thi jürü lo tü Phrusih, zanyo küüche rülo, thi Sabbath ti küji Judahri kümünyierülo nga jutetsethuoh.
55Jütiküsavü Galilee vünüh ma senyiküru nyimzari nga wanü rükuwa nga thi ma kümo nga mokümjie vünüh sahsaveh nüh mari nga ngu. 56#Tse 20.10; Kho 5.14. Jütisanü mari tü shele azhe vü ru zanyo arheküünguri thi avüjuri küche.
Sabbath ti küji Judahri kümünyierülo thuoüji Khonyo vünüh azhütsü küsa kümüjie müzhe taji münyie.
Currently Selected:
LUKE 23: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
