LUKE 3

Johan Baptist nüh Küsosie

(Mat 3.1-12; Mrk 1.1-8; Jhn 1.19-28)

1Tiberius Kaisar nüh takrü küsa mavi türa müngaawa, Pontius Pilate tü Judea azhih vü kümükhrüwa sapeh veh, Herod nüh Galilee vü takrüwa saveh, thi ma nü Filip nüh Eturia natonahuo vü thi Trakhoniti vü takrü saveh, Lisania nüh Abilene nüh takrü saveh, 2thi Annas ri Kaifa masü nüh levü kümüsie sa veh. Jütiküsa tsothovü Saküüwuowa zhü Johan Zekharia atsareza vü peküvehwa vü ru. 3Jütiküsavü Johan tü Jordan rügu natonahuo vü wanü, kükhiemuo noküja luoveh kükhaphrü ajuküvü vi nyuri sosie. 4Setsaküthsüwa Isaya lasi lovü rhüküsa kümüjie,

Reza vü nyi küsü zia wie taji,

Vüwa lekhuji küche luo,

ma lerari sakümüsho luo,

5Azhih kürünyie aveh vü kükato luo,

thi küzhiho kümüsieri nga thi kürünyieri nga sakükatoluo,

thi küükhori nga sakümüsho luo,

thi lekhuji küünyikürüri nga saküücho luo,

6thi nyiri aveh Saküüwuowa küülole ngu naveh.

7 # Mat 12.34; 23.33. Jükenüh ma nüh ajuvü nta ma vü küru anyi riakhuowavü, nohri arehji kuori, nohri thawa nüh arüküshu ru na saküvehwa vünüh te üta küza lo? 8Luoveh kükhaphrüwa avi peh luo. Thi nohri mpa nohri müshevünüh hiri nga Abraham tü hiri pa kümüjie wiethuoh ti müphrate tümü, küpakenühnyunü hi nüh nohri vü küza naveh, Saküüwuowa tü aloh hamari vünüh nga Abraham atsari satsüra naveh. 9#Mat 7.19.Khinyi wienga amüvüwa tü athso totso vü sawieveh, jükenüh athso küsüküsü nga avi kümühie müküperi thuoüji zathuoh nü anyih lovü thsemü naveh. 10Jütiküsavü anyi riekhuowa nüh ma vü, “Thinü hiri tü mowa müsaji mümühie lo?” ti küna.

11Thinü ma nüh mari vü, “Thawa nüh satsaküüzhuvüh künyi peveh nüh küsü nga mükünyiewa sie küsuo luo, thawa nüh ashie peveh nüh mükünyiewa sie küsuotsaluo,” ti küza.

12 # Luk 7.29. Akhrüküviri nga ajuvü nta ma vü ru nü, “Küsosiewa, hiri tü moti sana lo?” ti küna.

13Thinü ma nüh mari vü, akhrü nohri vü vi üta küzaküsa anyia vü müvi tümü ti küza.

14Thopahiri nga ma küna taji, “Thinü hiri tü moti sana lo?” ti küna.

Thinü ma nüh mari vü, “Nohri nyuri sakükrü nü nyurazhi müvitümü, nyutü rie nü nyuri phrate müsünü nyura zhi müvi tümü, jütanyunü nohri keme wienga wale ti müsheluo,” ti rületsü.

15Nyiri tü Khrista ru na ta küsa tsotüküveh kümüjie, mari mpa mari zhie vünüh künaluo taji, “Johan hama tü Khrista thuoh ünüh,” ti sa. 16Johan nüh mari aveh vü rüle taji, “Hi thuoüji aju vünüh nohri baptis sa veh, thitü eh nyia vünüh küji küsü tse, hi thuoüji ma jiküükruvüh li nga mületse, ma thuoüji Kümtse Sietse vünüh thi anyih vünüh nohri baptis sanaveh. 17Ma rahewa tü ma ke vü peveh. Ma tsuo he kümtse naküsa kenüh, thi amütha atsahri tü vüwa ma luo lovü thse naveh, thitü aguri thuoüji viwa mükünera anyih lovü nüh tsomünaveh,” ti küza.

18Jükümjie küüthozhü hozake vi taji ma nüh Zhühthe Kümühiewa vi nyiri vü küza. 19#Mat 14.3,4; Mrk 6.17,18.Thitü Johan nüh Herod kajiwa tü ma nü vüvüh Herodia küza kenüh nga thi Herod nüh zanyokümüsü küsari kenüh nga ti ma saküzükrütsü. 20Zanyokümüsü küsa jümari mpa mükünyu Johan nga renü küsizhe lovü thsemü.

Jisu Baptis Küsa

(Mat 3.13-17; Mrk 1.9-11)

21Jisu thi nyiri aveh baptis samü taji kükhuo saveh ünü, thajüwu tü sarie tsü. 22#Atü 22.2; Krh 2.7; Isa 42.1; Mat 3.17; Mrk 1.11; Luk 9.35.Thi Kümtse Sietse tü mükhrietü kümüjie satsa vü taji ma rügi vü turu, thi rügi vünüh azhü phraturu taji, “Noh thuoüji eh Tsa küümze tsahwa wiethuoh, hi nüh novü eh loküzhetsawa wiethuoh,” ti küza.

Jisu Lahnyiri

(Mat 1.1-17)

23Jisu tü ma küüro küsate vü ma mahvi cherake thuoh, nyiriwuo vünüh thuoüji ma tü Josef tsa, jümatü Heli atsa, 24Mathat tsa, Levi tsa, Melkhi tsa, Janai tsa, Josef tsa, 25Matathia tsa, Amos tsa, Nahum tsa, Esli tsa, Nagai tsa, 26Mat tsa, Matathia tsa, Semein tsa, Josek tsa, Joda tsa, 27Joanan tsa, Rhesa tsa, Zerubbabel tsa, Shealtiel tsa, Neri tsa, 28Melkhi tsa, Addi tsa, Kosam tsa, Elmadam tsa, Er tsa, 29Joshua tsa, Eliezer tsa, Jorim tsa, Mathat tsa, Levi tsa, 30Simon tsa, Judah tsa, Josef tsa, Jonam tsa, Eliakim tsa, 31Milia tsa, Mena tsa, Matatha tsa, Natham tsa, David tsa, 32Jesse tsa, Obed tsa, Boaz tsa, Salmon tsa, Nashon tsa, 33Aminadab tsa, Admi tsa, Arni tsa, Hezron tsa, Perez tsa, Judah tsa, 34Jacob tsa, Isaac tsa, Abraham tsa, Tera tsa, Nahor tsa, 35Serug tsa, Reu tsa, Peleg tsa, Eber tsa, Shela tsa, 36Kainan, Arphaxad tsa, Shem tsa, Noah tsa, Lamek tsa, 37Methusela tsa, Enok tsa, Jared tsa, Mahalalil tsa, Kenan tsa, 38Enosh tsa, Seth tsa, Adam tsa, Saküüwuowa tsa.

Currently Selected:

LUKE 3: POCHBSI

Highlight

Copy