LUKE 7
7
Jisu nüh Thopahiri Müzake nyia vü Küji Küsü Siepe Saküümühie
(Mat 8.5-13)
1Ma zhü hamari küzathuoh taji nyira khüna vü thseju kümü sevü ma tü Kapernaum vü tewa. 2Jüvü thopahiri müzake nyia nüh küjiri küsü tü ma küümze sheh siepe küsü peveh ünü na taji küsükümühie sateru. 3Thinü ma tü Jisu zhüku künara taji Judahri; sierhü wuori ma vü küze nü ru ma siepewa sakümühie tsü üti khuo. 4Thi mari Jisu vü wa nü wurie ma zhieke taji, “Noh hama kenüh sakütsüle wie lie, 5küpakenühnyunü ma tü hiri akuoh kümüze shemü, thi ma nüh künazizhe nga sa hiri tsü,” ti küza.
6Thinü Jisu nüh mari se nyiwa. Ma tse azhe shenyi tse ünü, thopahiri küjiwa tü ma füri ma vü küze taji, Vüwa, no ru münomüna müpetümü, hi tü no eh zhelovü turu üta küsa nga mütse nüh samü. 7Jükenüh hi tü no vü ru nta küsa nga mütse nüh samü, tinü no zhü tsü taji eh siepewa tü küümühieluo. 8Küpakenühnyunü e kükhuvü thopahiri peveh thi hi nga küjira kükhuvü küperi, thi hi nüh nyi küsü vü, “Waluo ta thuoüji wawati, thi küpawa vü, ra, ta thuoüji ruruti, thi eh siepewa vü hama saluo, ta thuoüji ma nüh jüma sasati,” ti küza.
9Jisu nüh azhü hama küthsüravü ma ngo sheh nü kürelema senyikütse anyi riekhuowa vü, “Hi nüh nohri vü küzanaveh, hi nüh Israel azhie vü nga kütsotü hakümjie müngu” ti küza. 10Thinü ma nüh küüzeri shele azhe vü ru ünü siepewatü mühie la nü ngu.
Jisu nüh Tünyivühri Tsa Vizawa Sakürhokütsü
11Jüti sataji müküzhikewiethuohnü ma tü tse Nain ti küsa nyuküji vü tewa, thinü ma sehnyiri thi anyi shieji küsüma vü nyiwa. 12Thi ma tü tse nyuküji jüma ashieku shenyi wa ünü, halie, tünyivühri tsa küsü sü taji kharu, aküsü jüma azah tü atsa jüma mpa, thi nyuküji jüla nüh nyiri khieloti nyimzawa se nyi ru. 13Jütisakütsevü Vüwa nüh nyimzawa ngu ma luoveh nanü ma vü, “Mükrietümü,” ti küza. 14Thinü ma tü ru nü kümoküthsekuwa pah ünü kümokhakütseri tü tsietewa. Thinü ma nüh, “Vizawa, hi nüh no vü küzaveh, süraluo,” ti küza. 15Jüti küüza vü aküsüwa tü süra shupe taji azhüphrate wa. Jütisanü ma nüh vi ma za tsümü.
16Thi mari krü sheke taji mari Saküüwuowa siake nü hiri azhie vü setsaküthsü küji küsü shuru pevehthuoh, thi Saküüwuowa nüh ma nyiri no vehthuoh, ti küza.
17Thinü ma zhülewa tü Judea azhih aveh vü thi jüma natonahuo aveh vü nyutewa.
Johan Baptist Sehnyiri Jisu vü Küüze
(Mat 11.2-19)
18Johan Baptist sehnyiri nüh zanyo hari aveh ma vü küza. 19Thinü Johan tü ma sehnyiri nyi künyi ma vü jike nüVüwa vü küze taji, “Noh tü ru nta küsawa thuohnü hiri tü küpa huo na lo?” ti küsawa küna üti küze.
20Thi nyi jümari Jisu vü ru taji mari nüh ma vü? “Johan Baptist nüh hiri no vü küüze thuoüji, noh tü ru nta küsawa thuoh ünü hiri tü küpa küühuo na lo? ta küsawa küna üta küzelie,” ti küza.
21Jütiküsa tsothovü ma tü aküna müküzüküzükünari thi küna kümüsü akürho thi sietsekümüsüri, thi nothaküüjuri aveh sakümühie tsü. 22#Isa 35.5,6; Isa 61.1.Thinü ma nüh mari vü, “Nohri nüh momowa ngu thuoh nüh wataji Johan vü küza luo: Nothaküüjuri zanyo nguramüthuoh, ajih kümüsüri letseramüthuoh, wupie künari mütseramüthuoh, khünakürüpori azhükünaramüthuoh, aküsüri rhosüra le müthuoh, kümükhuori vü Zhüthe Kümühie küüza vi mari zhi samüthuoh. 23Thi nyi küsüküsü nga hi mütsotü nüh müküsawanü kümüngatsahwa sanaveh,” ti küza.
24Thinü Johan zhüleküviri tewa ünü ma tü Johan zhüku anyi riekhuowa vü küza taji, nohri mowa no nti reza vü walo? Amürhü nüh amüshüh he küünga no nti wa ülo? 25Thinü nohri tü mowa no nti wa lo? Nyiri thsümünyiküüzhu küvü no nti wa ülo? Halie, thsümünyi jükümjie amekükhra küvüri thi nyirhieri thuoüji kajiri azhe vü peveh. 26Thinü nohri tü mowa no nti wa lo? Setsaküthsüri no nti wa ülo? Jüma ah ta küsa küzara naveh. Küpakenühnyunü hi nüh küza naveh, ma tü setsaküthsüri nyia vünüh küji küsü. 27#Mal 3.1.Zhüku hakümjie rhüsaveh: Halie, hi nüh noh tüvü ehzhüleküvü wa küzethuoh, ma nüh noh tüvü no lekhujiwa küche naveh. 28Hi nüh nohri vü küza naveh, “Nyimzari avo lovü nüh wuoküru nyi küsü nga Johan nyia vü müji; thitü Saküüwuowa kajipe lovü thuoüji küzatsawa nga ma nyia vü jiveh,” ti küza.
29 #
Mat 21.32; Luk 3.12. Jütiküsavü nyiri aveh nüh thi akhrü kükhrüri aveh nüh Saküüwuowa tü müshoveh ti küsa phrate, küpakenühnyunü mari tü Johan Baptistwa nüh vi baptis küsa kenüh, 30Thitü Farisiri thi Wule küsosieri nü ma vünüh baptis müküsa kenüh Saküüwuowa kümüshe kulemü.
31Thinü hi tü mowa vi khinyi kürho nyiri tü vikümüjie na lo? 32Mari thuoüji kürünguori asüküsapevü shupe taji küsünüh küsü ji küveh kümüjie, “Hiri nüh nohri vü pilechu khu thuoh, thitü nohri nüh mütsi, hiri nüh külukütsathuoh, thitü nohri nüh mükrie.” 33Küpakenühnyunü Johan Baptist tü ru nü lohse mütsa thi akha müzhu; thinü nohri nüh ma tü atsuore kümüsü sietse, ti phrate. 34Thi anyi Tsawa thuoüji ru nü tsa thi zhu ünü nohri nüh, matü, halie, amüwi küjiwa thi zhuke küpewa, thi atheküviri thi kükhiemuora füwa ta. 35Thitü thari nüh Saküüwuowa küthsüzhü tsotü müthuoh nüh mari nüh jüma tü zhütsa ta müshekümüshomüthuoh, ti küza.
Jisu nüh Simon Farisiwa Zheh vü Küwa
36Jüsevü Farisiri küsü nüh ma sietsazhu nti küjivü, ma tü Farisi wa zheh vü wa nü shiekütsape vü shupeh. 37#Mat 26.7; Mrk 14.3; Jhn 12.3.Thinü halie, Jisu tü Farisiwa zheh vünüh shietsa nti rupeveh ta küsa kükhiemuo vühri küsü nüh thsüra taji avüju mührü ku küsü vi Jisu vü ru. 38Thi ru nü ma se vü ajih kütuo vünüh krie taji marütshü ma jih vü kürütsuoke taji ma lüshe nüh vinemü nü ma mpha kümetsü, thi avüju nüh ma mphakünetsü. 39Jüti saküveh vü Farisiwa, Jisu sieru tsazhu küvehwa nüh ngu taji ma mpa ma jüle nü, “Anyi hama tü setsaküthsüri tüla nyimzawa tü mokümjie küsavühri thi kükhiemuori ta küsa thsü na nü,” ti sa.
40Thinü Jisu nüh ma vü, “Simon hi tü no vü zanyoküsü küza ngüveh lie,” ti küza. Simon nüh ma vü, “Mowa lo Küsosiewa?” ti küna.
41Thinü Jisu nüh, “Pesa küünari nyi küsü tü ma shewi küvü nyi künyi pe, nyi küsü thuoüji raka müza münga, thi küpawa thuoüji tünyieke ti vü. 42Thitü masü tü ma müthuohra nüh küsavü ma nüh masükhürü nojatsü, thinü masü thawa nüh maküümze khe na lo?” ti küna.
43Simon nüh, “Aküzhi noküjatüwa nüh küüzhi maküümze na tünü,” ti rüle tsü.
Thinü ma nüh ma vü, “Noh nüh khem ta küzatsüthuoh,” ti küza. 44Jütiküsavü ma tü nyimzawa vü küprüke taji Simon vü, noh tü nyimza hama ngu veh thuoh ünü? Hi tü no zhehvü ru thuoh, thitü noh tü eh jih kükhrü nga aju mütsü, thitü nyimzawa hama thuoüji ma rüthsü eh jih vü küürütsuoke nü ma sheh nüh vi netü. 45Noh tü eh jih nga mü küme, thitü ma thuoüji hi azhe ha lovü küturu te vünüh eh mpha müjie kümetuo wie. 46Noh nü avüju vi eh lü nga müjie künetüwie, thitü ma thuoüji avüju vi eh mpha küne tü. 47Jükenüh hi nüh no vü küza naveh, “Ma kükhiemuori aveh nojamütüthuoh, küpakenühnyunü hi kümüze shekekütsü kenüh, thitü nojazüla kütsüwa thuoüji kümüze züla,” ti küza.
48Jütiküsavü ma nüh nyimzawa vü, “Noh kükhiemuori nojamütüthuoh,” ti küza.
49Thinü ma sie kütsazhupe vü peküvehri nüh mari mpa jüle taji, “Nyira kükhiemuo nojatsü müthuoh ta küsa hatü thawa lo?” ti sa.
50Jütiküsavü ma nüh nyimzawa vü, “Noh kütsotü mpa nüh no külolethuoh, noluoveh rüzi nü waluo,” ti küza.
Currently Selected:
LUKE 7: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
