Bakaanelabu 21

Fool li ajow boot Yeelusalem

1Nan jikatoomuu jiban li buko, li jíjowum li ébato jicool boot li étebelemukayi yata Kos. Li líiŋ hunak hukaten, li jiŋej Lood, ban li jíjowum tó boot Fatala. 2Li jitook to ébato yáami li ejow boot li etaamayi yata Feniisi. Muñeˈe li jíjufo li yo min jijow. 3Li jijow jikooj étebelemukayi yan koonemuu Ciif, yan ommuu li ulako li ébato li uŋanden yo. Li jíjowum Kúñum étebelemukayi inyu li ébatowayi, jihaaŋ boot li etaamayi yata Siili. Muñeˈe li jijow jiya li kásikaku kata Tiil, tan ébatowayi yóotimuu ewalen wahawu wan etebumuu. 4Nan jíliiŋumuu li ésukayi inyu yata Tiil, li jitook to bukan káyinene li Yéesu, min jilako li buko kunak hutok li kúl̥uba. Buyinumabu Banabaabu li bulobiil, min koon Fool jakum ajow boot Yeelusalem. 5Bale nan jikaan tomuu kunakaku unku hutok li kúl̥uba jiban, li jilaañ jinab li bútinabu bóololi bata kañaahoolaku. Li kútiŋenoli foofiil feh buko li kuseekiil boot li bañooliil ló jijow jífu’ li ésukayi. Jíliiŋ bó, lí jíkuntuŋ li katantaku kata halahu min jil̥aw. 6Ban nan jisaafoomuu kasaafoo kata kakatoo jiban, óloli li jíjufo li ébatowayi, buko li kulaañ kúbalo.

7Kañaahoolaku kóololi li halahu li kuban nan jíjowummuu Tiil boot Futolemayis. Li jisaaf to kútuyoli li káyinenaku, ban li jilako li buko etihunaka feh. 8Li líiŋ hunak hukaten, li jilaañen jijow boot Sesaale. To untu, li jinoken li eluufayi yata Fílib ammuu awaaleya ata Hulimahu Hásuumaahu, min jilako boola. Fílib buko kommuu bukanabuku hutok li kúl̥ubaaku kan kul̥usumuu Yeelusalem. 9Li abaj básungute bubakii bahaasut kánayine, ban Ateemit anaake álobum li buko. 10Li jilako to kunak, afulofet akee an koone Agábus, abilumulo Súde li áliiŋul. 11Muñeˈe li abil átookuloli tó, min aŋa’ kanaalaku kata Fool, min akok kootaku li kuŋenaku koola aban li aan:

— Wahawu unwe Buyinumabu Banabaabu bulobe: «Anáyinaawu akilumuu kanaalaku unke, Kusuwifaku fan kujenkool Yeelusalem loon muñeˈe, ban li kubetool li kuŋen kata bukanabuku kákaanumutumuu li Ateemit balewool.»

12Nan jijamumuu kulimaku unku, áloli húmumoli li káyinenumuu kata Sesaale li jiyaakoo Fool jakum bil ajow boot Yeelusalem. 13Bale Fool li aan:

— Wáa újiye li joono li jíl̥ok min jóomi li huŋes kakaanom íyeko? Injé lísingene inti mata min ijenki bale, bale foof min iket Yeelusalem humum hata kajawaku kata Amaaŋenawu Yéesu.

14Emmuu jiyilaat jikaanool akat bo kayinoolaku kan abajumuu, li jikat kayaakoolaku koola min joon:

— Húnongumahu hata Amaaŋenawu hujow hubaj!

15Nan jikaan tomuu kunakaku unku jiban, li jifale min jijow boot Yeelusalem. 16Kúgoom kata Yéesu káfulumulo Sesaale li kútiŋenoli. Lí kújowetumoli boot bata ánayine akee ata Ciif an koone Munaasoŋ ban jóotimuu jiwalen. Munaasoŋ lakankaan ágoom áyinene li Yéesu nan fiyowe.

Fool li ajow ajuk Saak

17Nan jiŋejumuu Yeelusalem kútuyoli li káyinenaku, li kúyaboli li ésuumahukow ló. 18Li líiŋ hunak hukaten, li jijow áloli li Fool boot bata Saak, ban kunahaanaku kata ejanguwayi feh kuwoogumuu. 19Fool li asaafiil aban, li akitteniil jak wahawu feh wan Ateemit ákaanummuu li bulokabu boola, hákil bukanabuku kákaanumutumuu li Ateemit balewool. 20Nan kunahaanabuku kata ejanguwayi kujantenoolumuu min alob aban, li kusal Ateemit. Ban li koon Fool:

— Atúyoli, lujuke Kusuwif koono sínjunne seem kúyinenumuu, ban buko foofiil feh kútuutuk Eluwaayi yata Móyiis jak. 21Kulobiilob mooli kaanaku luliikeneliiken Kusuwifaku feh kakinumuu li bukanabuku kákaanumutumuu li Ateemit balewool, ooniil kuhoy banab li eluwaayi bañiilabu booliil, ban foof jakum kumit kunab li bakaanelabu bata Kusuwifaku. 22Kama muñowu boot min ukaanaal buu? Mata manooman fan kujam kaanaku lubile. 23Muñeˈe kama ukaan wahawu wan jommuu li jilobi. Jibaje taate kánayine kubakii kalobe hákil Ateemit wah wan kufañe min kukaan. 24Uŋa’ kánayinaabuku umbuku újowetum, min kúgiileni li mano li buko, ban li ucaam wahawu wan kooteenumuu kucaam to, min kuyili kúmiito kumulunduŋ. Muñowu ésukayi yóotummuu ehaas kaanaku wahawu feh wan kulobumuu kuya li awu let mal̥egen, bale awu humumi lulolloŋ loon eluwaayi yata Móyiis elobumuu. 25Bale bukanabuku kákaanumutumuu li Ateemit balewool káyinenumuu muñeˈe li Yéesu, jikiiciikiic min jilobiil wahawu wan jijokumuu. Jooniisoon jakum kutokoñ eliw yata sínuukuleŋ sasilayi kuteemit kalet mal̥egen, jakum kutiñ húsim, jakum kutokoñ eliw yata sínuukuleŋ sakuumi min siket, ban jakum an áfulo an an kuyabowut.

26Muñeˈe Fool li áŋalul kánayinaabuku umbuku kubakiilaku, min líiŋ hunak hukaten, li kúgiilenool li mano li buko. Fúlum tó, li ajow anoken li eluufayi yata Ateemit, min alob nay kunakaku kata kágiilenaku kommuu li kuban, yo yommuu nay kasilaaku kommuu li kukaani boot li anoowan li buko.

Li kujok Fool li eluufayi yata Ateemit

27Nan kunakaku hutok li kúl̥uba kulakomuu li kuban, Kusuwif kata etaamayi yata Aasi li kujuk Fool li eluufayi yata Ateemit. Li kúkiŋul búsukabu feh min bujok Fool. 28Li kunaak kulob butiya koon:

— Isilayeel, jíwaakenul jílambenoli! Ayínaawu umme awaaleˈemuu tanootan bukanabuku feh majakut aya li ésukayi yata Isilayeel, li eluwaayi yata Móyiis, li eluufayi inye yata Ateemit! Ban muñeˈe lamite akaan bukan kata Gilees kúnokenul li eluufayi yata Ateemit, min kusik eluufayi inye yáñeyimuu!

29(Kusuwifaku kulollob loon muñaˈa mata min kujukumuu Tolofim ata Efées buko li Fool li ésukayi. Li kunaak kuyin li koon Fool lakaanookaan anoken li eluufayi yata Ateemit.)

30Esúkayi feh li éguul̥oo, min bukanabuku kunaak kúteyumul banooban. Li kujok Fool kúfuletum tíyaŋ eluufayi yata Ateemit, ban li kuyaan kusommen kubab wámbiilawu. 31Nan kulakomuu huŋesahu boot min kumuk Fool, bukan li kujow kulob anahaanawu ata kayooŋaku kata esollaaliyayi yata kata Lom koonool ésukayi yata Yeelusalem éguul̥oole feh. 32Anahaanawu li ayaan aŋa’ esollaali li kunahaan kata esollaali téemeel, min kutey boot bata búsukabu. Nan búsukabu bujukumuu anahaanawu li esollaaliyayi, li kukat kútekaku kata Fool. 33Muñeˈe anahaanawu li ajow akooj Fool, min ajokool ban li alob min kuŋa’ useel úl̥uba min kukokool. Ban li agel̥l̥en bukanabuku Fool ammuu ayi, li waa lakaane. 34Bale li búsukabu, kukee fan kulob butiya maame, kaabuku li kulob maama. Emmuu húcuhahu hújiji anahaanawu ata esollaaliyayi ayilaat ajam to wah wata mal̥egen, li alob min kújowetum Fool boot li hukinahu hata esollaaliyayi. 35Nan Fool aŋejumuu tin sikabilikabasu#21:35 Sikabilikab: wah wakaani loon bukankit haj li eluuf yata etaah, min újowum dó boot haatiya (escaliers), kusollaaliyaku li kukomen kutebool mata búsukabu bunaanaak butuntuññenul li sembe. 36Mata ésukayi feh énabuunabul li akila, ban li enaak elob butiya yoon:

— Laate aket!

Fool li acahenoolo

37Nan kulakomuu li kukaan Fool anoken li hukinahu hata esollaaliyayi, li agel̥l̥en anahaanawu ata esollaaliyayi aanool:

— Mantee liyilo ilobi hulim?

Anahaanawu ata esollaaliyayi li agel̥l̥enool aan:

— Kama lujame kugilekaay? 38Kama inti awu ommuu anawu ata Ejíf ájimuu ésukayi li éguul̥oo kunakaku unke, ban li aŋa’ bukan koono sínjunne sibakii kamuke bukan, ájowetum li kayiinaayaku?

39Fool li aanool:

— Injé li mal̥egen asuwif leem. Li ésukayi yata Taalus libuki, yammuu li etaamayi yata Silisi. Esúkayi yúmbaam inti ésuk yatit. Liyaaki, ubonket ukatom min ilob li búsukabu.

40Mal̥egen anahaanawu ata esollaaliyayi li akatool min alob. Muñeˈe Fool li ayito li sikabilikabasu, min ateb kaŋenool áyiit búsukabu. Nan kulumuu, li alob li buko li elobayi yata Kusuwifaku aaniil:

Currently Selected:

Bakaanelabu 21: cskDBL

Highlight

Copy