Saŋ 12

Mali li aŋa’ eheeñ áki’ kootaku kata Yéesu

(Máciya 26:6-13; Maak 14:3-9)

1Muñeˈe nan kagaanaku kata Faakayi yata Kusuwifaku kusaŋenumuu kunak hutok li hano, Yéesu li ajow boot Betani ban Laasaal an ayitenulumuu li eketayi akinumuu. 2Li kulakool to min Maaluta akaanool atiñ. Laasaal to lalakowe li kabahumuu min kutiñ li Yéesu. 3Muñeˈe Mali li aŋa’ ateefaay ata eheeñ yata mal̥egen yata bunoom báamak, áki’ kootaku kata Yéesu ban li aŋa’ walawu woola min átil̥ kó. Eheeñayi inyu anuunuken an koone naal kúkaanum yó. Eluufayi dán kulakomuu li eciiŋo feh. 4Akee li kúgoomaku kata Yéesu an koone Sudaas Isikaaliyot, ammuu li abil abet Yéesu li kuŋen bukan, li aan:

5— Kama wáa újiye eheeñayi inyu let éjulayi sídalam sáamak, min siŋali sen esukateenayi? 6Min Sudaas Isikaaliyot alobumuu loon muñaˈa, inti eeniseen mantee okila ayinoole mata bukanabuku kagayimuu, bale mata lakankaan ákuu. Akila anaake aaken abootaawu ata sídalamasu, ban li anaak aŋa’ wahawu wan kunaake kukaan dómuu. 7Bale Yéesu li aan:

— Ukatool! Lakankaan loon muñaˈa boot bil li hunakahu nan emmuu li ihoki. 8Fan jibaj nanoonan esukateen li bukuluul, bale ínje ilet ilako li bukuluul nanoonan.

Huhaanaahu hata élambaayi li húsingen boot jamuk Laasaal

9Búsuk báamak bata Kusuwif li bujam kaanaku Yéesu ummu Betani, bukanabuku li kujow boot bo. Inti mata Yéesu bale áji, bale foof boot bajuk Laasaal an Yéesu ayitenumulumuu li eketayi. 10Huhaanaahu hata élambaayi li húsingen boot jamuk Laasaal foof, 11mata okila ájimuu Kusuwif kameeŋe li kúfu’ li buko min kúyinen li Yéesu.

Yéesu li ajow anoken Yeelusalem loon áyii

(Máciya 21:1-11; Maak 11:1-11; Lík 19:28-40)

12Li líiŋ hunak hukaten, búsuk báamak babilumuu boot kagaanaku kata Faakayi. 13Li kúbajul ékunt, min kujow kufam li akila. Li kunaak kúwoolen butiya koon:

«Hosanna! Usalaal Ateemit!

Ateemit ajow ásooniyen anawu abilummuu li kajawaku kata Amaaŋenawu!

Ateemit ajow ásooniyen áyiiyawu ata Isilayeel#Ukijenawu 118:25-26!»

14Yéesu li ajuk to asum añiilowe, li alemboo li akila loon Bakiicelabu bulobumuu:

15«Sákoluul, bukuluul jata Siyoŋ!

Ujuke, áyiiyawu ooli ummu li ebil,

Malemboole li hubuk hata asum aale#Esay 62:11; Sakali 9:9; Máciya 21:5.»

16No unnu, kúgoomaku koola kufaneenut kúnaanum wahawu wabajumuu. Bale nan Yéesu ajowumuu boot li emitayi li máyiineniyamu moola ló, li kuwayil̥o koon Bakiicelabu bulollob mata wahawu unwu buya li akila, ban kukankaan wahawu wan bulobumuu boot li okila.

17Bukanabuku feh kalako tomuu nan Yéesu ahooñumuu Laasaal áfulul li huyaakahu min ayitenulool li eketayi, kukittenkitten wahawu wan kujukumuu. 18Mó mújimuu, búsukabu li bubil bufam li akila, mata kujanjam koon Yéesu lakankaan búhiisenum bájaahaleniye. 19Muñeˈe Kufaaliisiyeŋaku li kunaak koonoo:

— Inti jijuke, uyilaataal to wahoowah. Esúkayi feh ejowe enab li akila!

Bukan kata Gilees li kulako huŋes Yéesu

20Muñeˈe li baj bukan kata Gilees li bukanabuku kabilumuu Yeelusalem kamanenaku kata Ateemit li hunakahu hata kagaanaku. 21Li kujow kukooj Fílib (ammuu an ata Betisayida li etaamayi yata Gálile) min koonool:

— Anahaan, jifañe min jijuk Yéesu.

22Fílib li ajow alob mo Andele, min kujow buko kúl̥uba kujow kulob mo Yéesu. 23Yéesu li aaniil:

— Muñeˈe waatuwayi éliiŋulo nan Añool-An ammuu li ábinkeni. 24Li mal̥egenamu fan ilobuul: hukool hata edenfeteŋ hulowutumuu li etaam min hukajen, fan hulako to bale ho. Bale hukajenumuu min hul̥iilahu hata ho húyawul, fan hubukoo kukool kameeŋe. 25An afañumuu buloŋabu boola, let abaj buloŋabu bábaneliitumuu. Bale an aluukenutumuu buloŋabu boola li adunaayi inye, fan aaken bo boot yok li buloŋabu bábaneliitumuu. 26An afañumuu min alok boot lí ínje, anawu ummu laate ánabul lí ínje, bájum tan emmuu li ilako, alokaawu úmbaam foof li alako to. An alokumuu boot lí ínje, fan abaj kasal hákil Atuubawom.

Yéesu li alob mata eketayi yoola

27Yéesu li afamen aan:

— Muñeˈe yaalom eteke ŋáa’. Waa liyilo ilob? Een fíle: Faafa ufakenom li sílaamasu sammuu li sibajom li ewaatuwayi inye? Bale sílaamasu unsu sata ewaatuwayi inye síjimuu li ibil. 28Faafa, úhiis máyiineniyamu mata kajawaku kooli!

Muñeˈe hulim li hujami li emitayi haane:

— Líhihhiis máyiineniyamu mata ko, ban fan ilaañen íhiis máyiineniyamu mata ko.

29Búsukabu balako tomuu ban li bujam hulimahu, li boon:

— Laalu kawel hufalajaj!

Kaabuku li koon:

— Amalaka alobe li akila!

30Bale Yéesu li aaniil:

— Hulimahu unhu hulobuti boot lí ínje, bale boot li bukuluul. 31Muñeˈe emmuu taŋayi nan Ateemit ammuu li atiib adunaayi inye. Muñeˈe Sayitaane ammuu anahaanawu ata adunaayi boot min akesooli áfu’ tíyaŋ. 32Injé nan emmuu li íl̥aalumuli li etaam, fan íñakul bukanabuku feh boot lí ínje.

33(Li kulimaku unku Yéesu áhiisummuu buu láami li aket eeno.) 34Búsukabu li boonool:

— Jijanjam wahawu walobimuu li éliibalayi yata eluwaayi laate ál̥aalumuli li etaam? Kama Añool-An ummu akila ammuu ayi?

35Yéesu li aaniil:

— Mawuŋaamu muloŋe li moono li bukuluul. Bale let mulako li bukuluul fiyo. Jinab li bútinabu booluul muñeˈe nan jiloŋumuu li jibaj mawuŋaamu, jakum bil élimayi egoobuul. Mata an ájowume li élim, ahaasut bay lajeˈe boot. 36Jíyinen li anawu ammuu mawuŋaamu muñeˈe nan jiloŋumuu li jibaj mo, mantee li jilako bukan kata mawuŋe.

Kusuwifaku kúyinenut li Yéesu

Nan Yéesu alobumuu loon muñaˈa aban, li ajow ayolo lóyiyiil. 37Maayeet min Yéesu akaanumuu úhiisenum wameeŋe wájaahaleniye hákiliil, Kusuwifaku kúyinenut li akila, 38bájum hulimahu han Esay alobumuu, ammuu afulofet li hubaj. Esay lansaan:

«Amaaŋen, ayi áyinene li bawaaleyelabu?

Ayi Amaaŋenawu áhiisumuu sembaasu soola#Esay 53:1?»

39Wahawu unwu újimuu kuyilaat kúyinen. Ban Esay li amit alaañen alob wahawu wájimuu bukanabuku umbuku kuyilaat kúyinen, aan:

40«Ateemit lámibiimíb kúkil,

ban li akaaniil kul̥aal̥ uyinum,

bájum li kújukaati li kúkiliil,

li kúnaanumaati li uyinumiil,

jakum bil kútiiwowul kúlaañul boot búmbaam,

min ifakeniil#Esay 6:9-10.»

41Esay lalollob loon muñaˈa, mata lajuujuk máyiineniyamu mata Yéesu, ban li alob moola.

42Bale li baj li kunahaanaku kata Kusuwifaku humumiil kameeŋe li buko kúyinene li Yéesu. Bale Kufaaliisiyeŋaku, 43mata kufanfañ kasalaku kan bukanabuku kusaleyiilumuu, haŋ kata Ateemit.

Bukanabuku fan kutiibumi li Hulimahu hata Yéesu

44Yéesu li alob butiya aan:

— An áyinenumuu lí ínje, inti lí ínje bale láyinene, bale láyinenyinen foof li Anawu áboñulommuu. 45An ajukommuu, Anawu áboñulommuu foof lajuke. 46Injé ammuu mawuŋaamu libiibil li adunaayi, bájum an áyinenumuu lí ínje, let alako li élim. 47An ajamumuu kulimaku kúmbaam, ban anabut li ko, inti ínje emmuu li itiibool, mata ínje ibilut boot katiib adunaayi, bale boot kafaken yo. 48An ahoyommuu ban li ahoy bayab kulimaku kúmbaam, labaje atiiba: hulimahu han iloboolumuu, ho hommuu hubil hutiibool li hunakahu húbanumahu. 49Mata kulimaku kan ilobumuu kubilumuloot lí ínje, bale li Atuubaawu áboñulommuu kubilumulo. Lalobonlob okila humumool wahawu wan éetimuu ilob, li wan éetimuu iliiken bukanabuku. 50Ban lihaase een hulimahu han alobemuu kakaan, husenesen bukanabuku buloŋ babaneliit. Mo emmuu wahawu feh wan ilobemuu, lilobelob wo loon Atuubaawu aanommuu ilob wo.

Currently Selected:

Saŋ 12: cskDBL

Highlight

Copy