Lík 22
22
Huhaanaahu hata élambaayi li hulob mata jamuk Yéesu
(Máciya 26:1-5; Maak 14:1-2; Saŋ 11:45-53)
1Muñeˈe kagaanaku kata kúmbuuluwaku kabajutumuu élebiil, kaaneyimuu Faak li kúkoojul. 2Huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis, li kulako huŋes bútin min kumuk Yéesu. Bale li kúkoli ésukayi.
Sudaas li aan éehe’ min abet Yéesu li kuŋen kunahaanaku kata ésukayi
(Máciya 26:14-16; Maak 14:10-11)
3Muñeˈe Sayitaane li enoken Sudaas an koonemuu Isikaaliyot, alakomuu akee li kúgoomaku kuŋen li kúl̥uba kata Yéesu. 4Sudaas li ajow kujamoo li huhaanaahu hata élambaayi li kunahaanaku kata kafooyemuu eluufayi yata Ateemit, buu laanomuu li abet Yéesu li kuŋeniil eeno. 5Li súum kunahaanabuku ŋáa’, min koon fan kusen Sudaas sídalam. 6Mal̥egen Sudaas li aan éehe’, min alako huŋes bútin bajake boot min abet Yéesu li kuŋeniil, ésukayi bahaasut.
Yéesu li akaan kagaanaku kata Faakayi li kúgoomaku koola ló
(Máciya 26:17-25; Maak 14:12-21; Saŋ 13:21-30)
7Muñeˈe hunakahu hata kagaanaku kata kúmbuuluwaku kakaanutimuu élebiil li húliiŋ, nan bukanabuku kommuu li kumuk kúgalalaanaku boot li sinaaŋasu sata Faakayi. 8Yéesu li aboñ Fiyeel li Saŋ aaniil:
— Jijow jilak sinaaŋasu sata Faakayi.
9Fiyeel li Saŋ li kugel̥l̥en Yéesu koonool:
— Bay lufañe min jijow jilak sinaaŋasu?
10Yéesu li aaniil:
— Nan jommuu li jinoken li ésukayi, fan jifam li ánayine atebe káyijum kata mal. Jinab li okila boot li eluufayi dán ammuu li anoken. 11Jíliiŋ dómuu, li joon ata eluufayi: «Anahaanawu lagel̥l̥eni: Káfitaku dán ínje li kúgoomaku kúmbaam jommuu li jitiñ sinaaŋasu sata Faakayi, kunkay?» 12Jiloboolumuu loon muñaˈa, fan áhiisuul haatiya eluufayi, káfit káamak kabaje síbahumasu san éetimuu jokolaal li so. Li káfitaku unku jommuu jilak sinaaŋasu.
13Mal̥egen kúgoomaku li kujow kúliiŋ, li kujuk wahawu feh loon Yéesu akitteniil womuu, min kulak sinaaŋasu sata Faakayi.
Húmbuulu li ejunk boot kawayil̥en
(Máciya 26:26-30; Maak 14:22-26; 1 Koolentiyeŋ 11:23-25)
14Muñeˈe nan taŋayi éliiŋumuu, Yéesu li abah li kufootalaku ló boot hutiñ.
15Nan kubahumuu, Yéesu li aaniil:
— Lifañeene ŋáa’ min itiñ sinaaŋasu unse sata Faakayi li bukuluul ló, tówum ílaam. 16Mata, fan ilobuul, let ilaañen itiñ so boot yok hunakahu nan wahawu feh wan Faakayi elobumuu, wommuu li ubaj li Jáyiiyaju jata Ateemit.
17Muñeˈe Yéesu li aŋa’ ejunk yata ébiiñ, min asal Ateemit aban li aan:
— Jiŋa’ ejunkayi inye jihoboo. 18Mata fan ilobuul, jókum tó muñeˈe, let imit ilaañen ihob ébiiñ boot yok nan Jáyiiyaju jata Ateemit jommuu li jibil.
19Fúlum tó, Yéesu li aŋa’ húmbuulu, min asal Ateemit aban, li amuncul ho asen kúgoomaku koola aban li aan:
— Laale eniilayi yúmbaam yasenimuu boot li bukuluul. Jinaak jikaan mo min jiwayil̥owom.
20Manolamu, Yéesu li aŋa’ ejunkayi aseniil buko batiñe kuban, min aan:
— Ejunkayi inye, yo yommuu húfaalumahu huwunkulahu hata Ateemit, hájokumimuu li húsimahu húmbaam, háyuwimuu boot li bukuluul. 21Fan jijuke! Anawu ammuu li abetom li kuŋen bukan, ummu taate li hutiñ lí ínje. 22Li mal̥egenamu, Añool-An fan aket loon Ateemit anongumuu. Bale katek kujow kulako li anawu ammuu li abetool li kuŋen bukan.
23Muñeˈe kúgoomaku li kulako kagel̥l̥enoo ayi li buko aate akaan wahawu unwu.
Ayi ahaŋumuu maluukeni?
24Kúgoomaku li kulako búwonnoo báamak boot mata min kuhaas ayi li buko ahaŋumuu feh. 25Yéesu li aaniil:
— Kúyiiyaku kata bukanabuku kákaanumutumuu li Ateemit balewool, kúgootenegooten bukanabuku kooliil, kabajumuu kayile li bukanabuku li koon ésukayi ehooñiil «Kukaanamajake». 26Bale bukuluul jakum jikaanoo mo. Bale anawu ahaŋumuu li bukuluul, fan akaan loon okila ahaŋumuu mañiilo li bukuluul. Anahaanawu ooluul, li akaan loon okila ammuu alokaawu ooluul. 27Kama ayimaa ahaŋumuu li umbuke, mantee anawu ammuu li hutiñahu, mantee anawu akaanewuulumuu jitiñ? Inti anawu aanomuu li hutiñahu? Bale ínje leenoseeno li bukuluul loon anawu akaanewuulumuu jitiñ. 28Bukuluul jibetutom búsol li sílaamasu súmbaam. 29Mó mújimuu, loon Atuubawom akatommuu Jáyiiyaju, mo foof léemimuu li ikatuul jo. 30Fan jitiñ li jihob li buyinjaayabu búmbaam li Jáyiiyaju júmbaam, ban li jibah li sifenjeŋ sata kúyii min jitiib utoŋawu kuŋen li úl̥ubaawu wata Isilayeel.
Yéesu li alob aan Fiyeel fan aceeŋ aan lahaasoohaas
(Máciya 26:31-35; Maak 14:27-31; Saŋ 13:36-38)
31Muñeˈe Yéesu li aan:
— Simoŋ, Simoŋ, Sayitaane lal̥awul̥aw mantee li aheefenuul foofuul feh loon an aheefenemuu emaano min áfulen bakakelabu jata bo li búhulabu jata bo. 32Bale lil̥awul̥aw boot li awu jakum bil ukat káyinen lí ínje. Bale nan ommuu úlaañul búmba, uliten káyinenaku kata kutuyi.
33Muñeˈe Fiyeel li aanool:
— Anahaan, tan emmee li síngene min kukul̥oolom li awu, ban foof li iketoo li awu ló.
34Yéesu li aanool:
— Fiyeel, fan ilobi, síyaat káyin let kul̥ok, awu baceeŋut ñoono ñahaaji oon luhaasonhaas.
Yéesu li aan kúgoomaku koola kúkaanum
35Fúlum tó, Yéesu li aan kúgoomaku koola:
— Nan iboñuulumuu baŋalut kal̥aac kata sídalam, li kaboote, li sidalla, mantee babbaj wah wan jibajut?
Kúgoomaku li koonool:
— Bajut!
36Yéesu li aaniil:
— Bale muñeˈe an áakimuu kal̥aac kata sídalam, li aŋa’ ko. An áakimuu foof kaboote li aŋa’ ko. Li bil nokoo loon an abajut ékundu, li ájula hújufowool min ánoomul ékundu. 37Mata boot min ilobuul, hulimahu unhe hakiicimuu huya lí ínje hoote hubaj: «Lacoboolicoboo li kúkaanikoola#Esay 53:12.» Mata, wahawu wakiicimuu múmbaam woote ubaj.
38Kúgoomaku li koonool:
— Anahaan, síkundu síl̥uba sunse.
Yéesu li aaniil:
— Fite!
Yéesu li alako kal̥aw li huyuuyahu hata unuunukenawu wan koonemuu Olíibiye
(Máciya 26:36-46; Maak 14:32-42)
39Yéesu li áfulul ajow loon akaanemuu, boot bata huyuuyahu han koonemuu Huyuuyahu hata Olíibiye. Kúgoomaku koola li kunab li okila. 40Nan áliiŋ tomuu, li aaniil:
— Jil̥aw, jakum bil jilo li jabunt.
41Fúlum tó, Yéesu li ayinno lóyi jatit, li ajow ákuntuŋ min al̥aw 42aan:
— Faafa, ufañumuu, úloyiyen téetiwom ejunkayi inyu yata sílaamasu#22:42 Ejunkayi inyu yata sílaamasu: yo yommuu sílaamasu san Kilisita ammuu li álaam. Bale jakum húnongumahu húmbaam hubaj, huya hujow hubaj.
[ 43Muñeˈe amalaka abilumulo li emitayi li áfu’ Yéesu min alitenool. 44Kásabali li kujokool, li ahaŋ mahanken min al̥aw. Egeenayi yoola li enokoo loon kusot kata húsim kálowule teetaam#22:43-44 Síliibal sakee li sihaanasu sibajut kulimaku unku.]
45Nan Yéesu al̥awumuu aban, li ayitowul álaañul boot bata kúgoomaku koola. Nan áŋejul tómuu, li atookiil mámooliye mata jokiijok. 46Yéesu li aaniil:
— Wáa újiye li joono li kámooli? Jiyito jil̥aw jakum bil jilo li jabunt.
Kunahaanaku kata Kusuwifaku li kujok Yéesu
(Máciya 26:47-56; Maak 14:43-50; Saŋ 18:3-11)
47Nan Yéesu alakomuu elobayi, búsuk li búfulul. Sudaas alakomuu akee li kúgoomaku kuŋen li kúl̥ubaaku, li áyabul hákil búsukabu. Li abil áliiŋul, li álohul Yéesu boot káfoonool. 48Bale Yéesu li aanool:
— Sudaas, li kúfoon lóotummuu ubet Añool-An li kuŋen bukan!
49Nan kunaboolaaku kata Yéesu kujukumuu wahawu waanomuu li ubaj, li kugel̥l̥enool koonool:
— Anahaan, jiyilo jítekumiil li síkunduwasu sóololi?
50Akee li buko li atek alokaawu ata anahaanawu ata élambaayi afalen kanuu káli. 51Bale Yéesu li aan:
— Jikat!
Li ago’ kanuuwaku kata alokaawu min afakenool. 52Fúlum tó, Yéesu li aan huhaanaahu hata élambaayi, li kunahaanaku kata kafooyemuu eluufayi yata Ateemit, li kunahaanaku kabilumuu jajokaju joola:
— Waa, jibil li síkundu li sigol ló boot búmba loon eenimuu ínje ákuu? 53Li bukuluul lilakomuu kunakaku feh li eluufayi yata Ateemit, ban jiŋesut kajokom. Bale ewaatuwayi inye yooluul li yata foof sembaasu sata ehukaayi.
Fiyeel li aceeŋ aan lahaase Yéesu
(Máciya 26:57-58, 69-75; Maak 14:53-54, 66-72; Saŋ 18:12-18, 25-27)
54Muñeˈe li kujok Yéesu ban li kújowetumool boot li eluufayi yata anahaanawu ata élambaayi. Fiyeel li alako lóyi min anaak ánabul li buko. 55Li kuyaben sambun li tut ekaakayi, Fiyeel li ajow abah tin kabahumuu kúwooñen so kulakomuu. 56Muñeˈe agoloola akee li ajuk Fiyeel mabahe tin sambunasu, li ajukelool jow fit, li aan:
— Anáyinaawu ummu foof lanaanaak anaboo li Yéesu.
57Bale Fiyeel li aceeŋ min aan anaalaawu:
— Ihaasutool.
58Fiyowut, akee foof li ajuk Fiyeel, li aanool:
— Awu foof akee li buko.
Bale Fiyeel li aanool:
— Ayíne, let mal̥egen!
59Li fiyo jakee, jow yili baj ewaatu, akee li amit aan Fiyeel li mal̥egenool:
— Kabane, ánayinaawu ummu lanaanaak anaboo li Yéesu, mata okila an ata etaamayi yata Gálile.
60Bale Fiyeel li aan:
— Ihaasut awu waa lufañe ulob.
Nan alakomuu elobayi, káyin li kuyaan kul̥ok. 61Amaaŋenawu li átiiwowul ajuke Fiyeel súy. Fiyeel li awayil̥o hulimahu han Amaaŋenawu aloboolumuu aanool: «Fan uceeŋ oon luhaasonhaas ñoono ñáhaaji, tówum káyinaku kul̥ok síyaat.» 62Nan Fiyeel áfululumuu tíyaŋ, li alako bo min al̥ok mal̥ok.
Li kugel Yéesu ban li kutekool
(Máciya 26:67-68; Maak 14:65)
63Bukanabuku kalakomuu kafooyaku kata Yéesu li kunaak kulekenool ban li kutekool. 64Li kunaak kúmib kúkilaku koola ban li kugel̥l̥enool koonool:
— Ayi atekimuu? Uhéboli!
65Ban li kulobool foof kulim kameeŋe kata kúgel.
Yéesu hákil Huhaanaahu hata Kusuwifaku
(Máciya 26:59-66; Maak 14:55-64; Saŋ 18:19-24)
66Nan tikatenumuu, kunahaanaku kata Kusuwifaku, huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis li kujojoo, min kúŋalul Yéesu abil átuul hujojahu háamakahu hata Kusuwifaku. 67Li kugel̥l̥en Yéesu koonool:
— Ulóboli, awu ommuu Afakenaawu?
Yéesu li aaniil:
— Eenuulumuu ínje emmuu Afakenaawu, let jíyinenom. 68Ban igel̥l̥enuulumuu hulim, let jibagom. 69Bale kítum muñeˈe, Añool-An fan ajow abah kaŋen káli Ateemit ata sembe.
70Bukanabuku feh li koon Yéesu:
— Kama, awu ommuu Añool Ateemit?
Yéesu li aaniil:
— Jilobulo mo bukuluul humumuul, ínjemuu.
71Muñeˈe bukanabuku li koon:
— Laañenut jokolaal min akee alobolaal kulim aya li okila! Ololaal humumolaal lujamaale li butumool waa lalobumuu.
Currently Selected:
Lík 22: cskDBL
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
