Юхан 8

Ороспулыкъ вакътында якъалангъан къадын

1Иса Зейтюн дагъына кетти. 2Саба эрте О, кене Сарай азбарына къайтып кельди. Онынъ алдына бутюн халкъ кельди. Иса отурып, адамларны огретмеге башлады. 3Шу арада Къанун оджаларынен фериселер Исанынъ янына бир къадынны кетирдилер. Оны ороспулыкъ япкъан вакъытта якъалагъанлар. Къадынны ортагъа чыкъарып:

4– Оджа! – дедилер. – Бу апай аиле садыкълыгъыны бозгъан вакъытта якъаланды. 5#Лев 20.10; Текр 22.22-24; Ехез 16.38Муса Къанунымызда бойле къадынларны ташнен урып ольдюрмеге буюргъан. Я Сен бунъа не айтарсынъ?

6 # Лк 11.54; 20.20 Бу суальни Исагъа илишмек ве къабаатламакъ ичюн бердилер. Иса эгилип, пармагъынен ерде бир шейлер язып башлады. 7#Текр 17.7; Рим 2.1, 22Олар бу акъта сорай бергенлери ичюн, Иса башыны котерип:

– Аранъызда ким гунасыз олса, о, къадынгъа биринджи олып, таш атсын, – деди. 8Сонъ кене эгилип, ерге язмакъны девам этти.

9Олар бу лафны эшитип, бирер-бирер чыкъып кеттилер. Биринджи кеткенлер энъ къарт сойлары эди. Ахыр-сонъу Исанен ялынъыз ортада тургъан къадын къалды. 10Иса башыны котерди де, къадындан башкъа ич кимсени корьмейип:

– Эй, къадын! – деди. – Олар къайда? Сени ич кимсе къабаатламадымы?

11 # Юх 5.14 – Ич кимсе, эфендим! – деп джевап берди къадын.

– Мен де сени къабаатламайым, – деди Иса. – Бар да, бундан сонъ даа гуна япма.#8.11 Бу парча 7.53–8.11 энъ къадимий ве нуфузлы эльязмаларда ёкъ.

Иса – дюньянынъ ярыгъы

12 # Еш 42.6; 49.6; Лк 2.30; Юх 1.4, 9; 12.35 Иса кене халкънен лаф этип:

– Мен дюньянынъ ярыгъы олам. Ким Меним пешимден кетсе, къаранлыкъта юрмез, лякин онен аят ярыгъы оладжакъ, – деди.

13 # Юх 5.31 Фериселер бунъа къаршы:

– Сен Озюнъ Озюнъе шаатлыкъ япасынъ. Сенинъ шаатлыгъынъ акъикъий дегиль, – дедилер. 14#Юх 7.27; 13.3; 16.28Иса бойле джевап берди:

– Мен Озюме Озюм шаатлыкъ япсам да, меним шаатлыгъым акъикъийдир, чюнки Мен къайдан кельгенимни ве къайда кетеяткъанымны билем. Сиз исе Меним къайдан кельгенимни ве къайда кетеяткъанымны бильмейсиз. 15#Юх 3.17; 7.24; 12.47Сиз тышкъы корюнишке бакъып суд этесиз; Мен исе ич кимсени суд этмейим. 16#Юх 5.30; 16.32Эгер Мен суд этсем де, адалетли суд этем, чюнки Мен ялынъыз дегилим, Мени ёллагъан Бабам Меннен. 17#Сай 35.30; Текр 17.6; 19.15Сизинъ Къанунынъызда язылгъан ки, эки адамнынъ шаатлыгъы акъикъийдир. 18#Юх 5.36; 1 Юх 5.9Мен Озюм Озюме шаатлыкъ этем, Мени ёллагъан Бабам да Манъа шаатлыкъ эте.

19 # Мт 11.27; Юх 16.3 – Сенинъ Бабанъ къаерде? – деп сорадылар Исадан. О, джевап берип:

– Сиз не Мени, не Бабамны таныйсыз. Эгер Мени таныгъан олсанъыз, Бабамны да таныр эдинъиз, – деди.

20 # Мк 14.41; Юх 2.4; 7.6; 13.1 Бу сёзлерни Иса Алланынъ Сарайы азбарында адамларны огреткен вакъытта, садакъа сандыгъы янында турып айтты. Оны ич кимсе якъаламады, чюнки Онынъ вакъты даа кельмеген эди.

«Мен бараджакъ ерге сиз барып оламайджакъсыз»

21 # Ехез 3.18; 33.8; Юх 7.34-35; 13.33 Иса оларгъа кене:

– Мен якъында кетеджем. Сиз Мени къыдыраджакъсыз, амма гуналы олып оледжексиз. Мен бараджакъ ерге сиз барып оламайджакъсыз, – деди.

22– Бельки О, Озюни ольдюрмеге истейми? «Мен бараджакъ ерге сиз барып оламайджакъсыз», – дей де, – деди озьара еудийлер. 23#1 Юх 4.5; Юх 17.14Иса оларгъа шойле деди:

– Сиз ашагъыдансыз, Мен исе юкъарыданым. Сиз бу дюньядансыз, Мен исе бу дюньядан дегилим. 24Шунынъ ичюн: «Сиз гуналы олып оледжексиз», – дедим сизге. Мен – Одырым. Эгер бунъа инанмасанъыз, гуналы олып оледжексиз.

25– Я Сен кимсинъ? – деп сорадылар Исадан. Иса шойле деди:

– Башындан сизге не айткъан олсам, айны О олам. 26#Юх 3.33; 15.15Сизинъ акъкъынъызда айтмагъа ве суд этмеге чокъ шейим бар. Амма Мени Ёллагъан – акъикъийдир. Мен Ондан не эшиткен олсам, шуны дюньягъа бильдирем.

27Олар Иса Озь Бабасы акъкъында айткъаныны анъламадылар. 28#Сай 21.9; Юх 3.14; 5.30; 7.16; 12.32Иса Озь сёзюни девам этти:

– Инсан Огълуны юкъарыгъа котергенинъизде, биледжексиз ки, Мен – Барым ве Озь-Озюмден ич бир шей япмайым. Аксине, Бабам Манъа не огреткен олса, ойле де айтам. 29#Юх 4.34; 6.38Мени Ёллагъан Озюмнен. О, Мени ялынъыз къалдырмагъан, чюнки Мен эр вакъыт О бегенген ишлерни япам.

30 # Юх 7.31 Иса бу сёзлерни айткъанда, Онъа чокъ адам иман этти.

Азат адамлар ве къуллар

31Онъа иман эткен еудийлерге Иса шай деди:

– Меним сёзюмнен яшай берсенъиз, сиз акъикъий шегиртлерсинъиз. 32#Якъ 2.12; 1 Пётр 2.16; Рим 6.18; 1 Кор 7.22; 2 Кор 3.17; Гал 5.1Акъикъатны биледжексиз, ве акъикъат сизни азат этеджек.

33 # Мт 3.9 – Биз Ибраимнинъ эвлятларымыз, – деп джевап берди олар. – Ич бир вакъыт ич кимсеге къул олмадыкъ. «Азат оладжакъсыз», – деп насыл айта билесинъ?

34 # 2 Пётр 2.19; Рим 6.16-20; Тит 3.3 – Сизге керчектен догърусыны айтам, – деди Иса. – Гуна япаяткъан эр бир адам гунанынъ къулудыр. 35#Баш 21.10; Гал 4.30Къул эвде омюр бою яшамай, огъул исе эр вакъыт яшай. 36Шунынъ ичюн, эгер Огъул сизни азат этсе, акъикъатен азат олурсыз. 37#Юх 5.18; 7.1; 11.53Ибраимнинъ эвлятлары олгъанынъызны билем. Амма Мени ольдюрмеге чаресини къыдырасыз, чюнки сиз Меним сёзюмни анълап оламайсыз. 38Мен Бабанен олгъан вакъытта нени корьген олсам, оны да айтам. Сиз исе озь бабанъыздан эшиткенлеринъизни беджересиз.

39 # Лк 19.9 Олар Исагъа джевап берип:

– Бизим бабамыз – Ибраимдир, – дедилер.

– Эгер сиз Ибраимнинъ балалары олса эдинъиз, Ибраимнинъ япкъан ишлерини япар эдинъиз, – деди Иса оларгъа. 40– Мен сизге Алладан эшиткен акъикъатны айтып берем, сиз исе шимди Мени ольдюрмеге чаресини къыдырасынъыз. Ибраим бойле шейлер япмай эди! 41#Текр 32.6; Еш 63.16; 64.8Сиз озь бабанъызнынъ ишлерини япасыз!

– Биз ороспулыкътан догъмадыкъ да, бизим бир Бабамыз бар. О – Алладыр, – деп джевап бердилер Исагъа. О, оларгъа шойле деди:

42– Эгер Бабанъыз Алла олса эди, Мени север эдинъиз. Мен Алладан чыкъып кельдим, Озь-Озюмден кельмедим, Мени О, ёллады. 43#Йрм 6.10Айткъанларымны не ичюн анъламайсыз? Чюнки Меним сёзюмни эшитип оламайсыз. 44#Баш 3.4; 1 Юх 3.8, 10, 12; 2 Кор 11.3; Сыр 12.9Сизинъ бабанъыз – Шейтандыр. Сиз озь бабанъызнынъ бутюн истеклерини беджермеге истейсиз. Шейтан башындан адам ольдюриджиси эди. О, акъикъатта яшамай, чюнки онда акъикъат ёкъ. Ялан айткъанда, озюне ярашкъан шей айта. О, яланджыдыр, яланнынъ бабасыдыр.

45Мен акъикъатны айткъаным ичюн, Манъа инанмайсыз. 46Къайсы биринъиз Мени бир гунада къабаатлап олур? Мен акъикъатны айтсам, не ичюн Манъа инанмайсыз? 47Ким Алладан олса, Алланынъ сёзлерини эшите. Сиз исе Алладан олмагъанынъыз ичюн, эшитмейсиз.

Иса Ибраим акъкъында

48 # Мк 3.22; Юх 7.20 Бунъа джевап берип, еудийлер:

– Биз догърусыны айтамыз: Сен – самариелисинъ, ве Сени джин ургъан! – дедилер.

49 # Юх 5.23 – Мени джин урмады, – деди Иса. – Мен Бабамны урьмет этем. Сиз исе Мени урьмет этмейсиз. 50#Юх 5.41; 7.18Мен Озь шуретимни къыдырмайым. Лякин Башкъасы бар, О шуретини къыдыра ве суд эте. 51#Юх 5.24; 11.26Сизге керчектен догърусыны айтам: ким Меним сёзюмни тутса, о, ич бир вакъыт олюмни корьмейджек.

52– Энди биз билемиз ки, Сени джин ургъан! – деди еудийлер Онъа. – Ибраим ве пейгъамберлернинъ эписи ольдилер, Сен исе: «Ким Меним сёзюмни тутса, ич бир вакъыт олюмни сынап бакъмайджакъ», – дейсинъ! 53Я Сен бабамыз Ибраимден буюк оласынъмы? О, ольген, пейгъамберлер де ольгенлер! Сен Озюнъни ким деп саясынъ?

54 # Юх 17.1; Фаал 3.13; 2 Пётр 1.17; Еуд 5.5 Иса джевап берди:

– Эгер Мен Озюмни Озюм шуретлесем, Меним шуретим боштыр. Мени Бабамнынъ Озю шуретлей. Сиз онъа «Алламыз» дейсиз. 55#Юх 7.28-29Амма Оны ич бир вакъыт бильмединъиз. Мен исе Оны билем. Эгер «Оны бильмейим», – десем, сизге ошагъан яланджы олур эдим. Амма Мен Оны билем ве Онынъ Сёзюни тутам. 56#Мт 13.17; Лк 17.22Бабанъыз Ибраим Меним кунюмни кореджегини билип, пек къувангъан эди. Оны корип, севинген.

57– Сен даа элли яшына биле кирмединъ де! Ибраимни насыл этип корьдинъ? – деди еудийлер Онъа. 58Иса оларгъа:

– Сизге керчектен догърусыны айтам: Ибраим даа олмаздан эвель, Мен Барым, – деди.

59 # Юх 10.31 О вакъыт олар, Исагъа атмакъ ичюн къолларына таш алдылар. Лякин Иса гизленип, Сарайдан чыкъты.

Currently Selected:

Юхан 8: CTB

Highlight

Copy