Лука 18
18
Тул къадын ве яман къады акъкъында кинаели икяе
1 #
Лк 21.36; Рим 12.12; Эф 6.18; Кол 4.2; 1 Тес 5.17 Бир кунь Иса шегиртлерине, эр вакъыт дува окъуп умют джоймамакъ кереклиги акъкъында бойле кинаели икяени айтып берди:
2– Бир шеэрде не Алладан къоркъкъан, не адамлардан утангъан бир къады бар экен. 3Шу шеэрде бир тул къадын да яшай экен. О, къадынынъ алдына бара берип: «Давамны адалетли чез, мени къабаатлагъан адамдан мени къорчала», – деп ялвара экен. 4Къады чокъ вакъыт буны япмагъа истемеген. Сонъундан о озь-озюне: «Мен Алладан къоркъмайым, адамлардан да утанмайым. 5Лякин бу тул къадын мени раатсыз эткени ичюн, онынъ давасыны адалетнен чезерим, ёкъса о, келе берип джанымны якъар», – деген.
6– Эшиттинъизми, адалетсиз къады не айткъан? – деп сорады Рабби. 7#Збр 21.3; 87.2; Мк 13.20; Рим 8.33; Кол 3.12; Тит 1.1; Сыр 6.10– Аджеба Алла да Озю сайлагъан ве Онъа гедже-куньдюз ялварып отургъанларны къорчаламазмы? Оларны чокъ беклеттиреджекми? 8#Еуд 10.37Сизге айтам: О, оларны тез къорчалайджакъ. Амма Инсан Огълу кельгенинде, ер юзюнде иман тапар экенми?
Ферисе ве салым топлайыджы акъкъында кинаели икяе
9 #
Лк 16.15
Озюнинъ инсафлыгъыны юкъары сайып, башкъаларына юксектен бакъкъан базы адамларгъа Иса бойле бир кинаели икяени айтып берди:
10 #
Фаал 3.1
– Бириси ферисе, башкъасы салым топлайыджы олгъан эки адам, дува окъумакъ ичюн, Алланынъ Сарайына киргенлер. 11#Мт 6.5Ферисе озюнджесине бойле дува окъуп башлагъан: «Алла! Мен башкъа адамлар: айдутлар, имансызлар, бозукъ ве мына бу салым топлайыджы киби олмагъаным ичюн Санъа чокъ шукюр! 12#Лк 5.33; 11.42Афтада эки кере аштан-сувдан вазгечем. Бутюн къазангъанымнынъ ондан бир пайыны айырам». 13#Збр 78.9; Дан 9.19Салым топлайыджы исе узакъта турып, козьлерини кокке котермеге биле къоркъып, кокрегине ура-ура: «Алла! Мен гуналым, лякин манъа мераметли ол!» – деген.
14 #
Мт 23.12; Лк 14.11 Сизге айтам: бу адам, фериседен зияде акъланып, эвине къайтты. Озюни юксельткен эр бир адам алчакъта оладжакъ, озюни алчакъ туткъан исе юксельтиледжек.
Иса ве балалар
15 #
Мт 19.13-15; Мк 10.13-16 Исанынъ огюне, хайыр дувасыны окъусын деп, оларгъа къолуны тийдирсин деп, сабийлерни кетирдилер. Шегиртлер буны корип, кетиргенлерге ёл бермеди. 16Иса исе балаларны янына чагъырып, шойле деди:
– Балаларгъа Манъа кельмеге ёл ачынъыз, оларны токътатманъыз. Алланынъ Падишалыгъы оларнынъкидир. 17#Мт 18.3Сизлерге догърусыны айтам: ким Алланынъ Падишалыгъыны бала киби къабул этмесе, анда киралмайджакъ.
Иса ве зенгин адам
18 #
Мт 19.16-30; Мк 10.17-31 #Лк 10.25Башлыкълардан бири Исадан сорады:
– Яхшы Оджам! Эбедий аяткъа насип олмакъ ичюн, манъа не япмакъ керек?
19 #
Збр 105.1; 118.68 Иса онъа:
– Сен Манъа не ичюн «яхшы» дейсинъ? Бир Алладан башкъа ич кимсе яхшы дегиль. 20#Чыкъ 20.12-16Сен Онынъ эмирлерини билесинъ: аиле садыкълыгъыны бозма, адамнынъ джаныны алма, хырсызлама, ялан шаатлыкъ этме, ана-бабанъны урьмет эт, – деди.
21 #
Флп 3.6
– Буларнынъ эписини яшлыгъымдан берли япып келем, – деди о Исагъа. 22#Лк 12.33Буны эшитип, Иса:
– Санъа даа бир шей етишмей: бутюн мал-мулькюнъни сатып, акъчасыны фукъарелерге болип бер. О вакъыт зенгинлигинъ кокте олур. Сонъ келип, Меним артымдан юр, – деди.
23Башлыкъ бу сёзлерни эшитип, пек къайгъырды. О пек зенгин эди де. 24#Збр 48.7-8Иса онынъ къайгъыргъаныны корип:
– Зенгин адамларгъа Алла Падишалыгъына кирмек не къадар агъырдыр! 25Зенгин адамнынъ Алла Падишалыгъына киргенинден девенинъ ине тешигинден кечкени къолайдыр, – деди. 26Буны эшиткенлер исе:
– Ойле олса, ким къуртарыладжакъ экен? – деп сорадылар.
27 #
Баш 18.14; Эюп 42.2; Йрм 32.17; Мк 14.36 – Адамлар япып оламагъан шей Алланынъ ярдымынен олмакъ мумкюн, – деди Иса.
28 #
Лк 5.11
– Мына, биз мал-мулькюмизни къалдырып, Сенинъ артынъдан кельдик! – деди Пётр. 29#Лк 14.26Иса шегиртлерине:
– Сизге догърусыны айтам: Алла Падишалыгъы ичюн эвини, ана-бабасыны, агъа-къардашыны, тата-къызкъардашыны я да апайыны ве балаларыны къалдырып кеткен эр бир адам 30бу заманда къат-къат яхшылыкълар тападжакъ, келеджек заманда исе эбедий аяткъа киреджек.
Иса учюнджи кере Озь олюми ве тириледжеги акъкъында айта
31 #
Мт 20.17-19; Мк 10.32-34 Иса, он эки шегиртини четке чагъырып, оларгъа:
– Биз энди Ерусалимге кетемиз. Анда пейгъамберлернинъ Инсан Огълу акъкъында язгъанлары ерине келеджек. 32Оны Алланы бильмеген адамларнынъ къолуна береджеклер, мыскъыллап акъаретлейджеклер, Онынъ бетине тюкюреджеклер, 33#Лк 9.22; 24.7; Юх 2.19Оны къамчылап ольдюреджеклер. Амма учюнджи куню О тириледжек, – деди.
34 #
Лк 2.50; 9.45 Шегиртлер бу сёзлерден бир шей анъламадылар. Бу сёзлернинъ манасы олардан гизли эди, Исанынъ айткъанларына оларнынъ акъылы етмеди.
Иса кёр фукъарени тедавийлей
35 #
Мт 20.29-34; Мк 10.46-52 #Ехо 6.1; 3 Пад 16.34Иса Ерихон шеэрине келеяткъанда, бир кёр адам ёл кенарында отурып садакъа сорай эди. 36Онынъ алдындан халкъ кечип кеткенини эшитип:
– Не олды? – деп сорады.
37– Назаретли Иса келе, – деп онъа джевап бердилер.
38 #
2 Пад 7.12-16; Мт 22.42; Лк 1.32 Кёр адам:
– Эй, Давут Огълу Иса, манъа мерамет эт! – деп къычырды. 39Огде кеткенлер оны сусмагъа меджбур эттилер. Лякин о даа зияде къычырып:
– Эй, Давут Огълу, манъа мерамет эт! – деди.
40Иса токътап, кёрны Онынъ янына кетиргенлерини буюрды. Кёр кельген сонъ, 41Иса ондан:
– Сен не япкъанымны истейсинъ? – деп сорады.
– Рабби, козьлерим корьсюн! – деди о. 42#Лк 7.50; Эф 2.8Иса онъа:
– Козьлеринъ ачылсын! Сени иманынъ къуртарды, – деди.
43Шу ань кёрнынъ козьлери коре башлады. О, Алланы алгъышлап, Исанынъ пешинден кетти. Буны корьген бутюн халкъ Аллагъа шукюрлер этти.
Currently Selected:
Лука 18: CTB
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2016
Free Reading Plans and Devotionals related to Лука 18
Deeper Into Scripture: Luke
Luke: Bible Audio Guide
The JESUS Film 24 Day Challenge
