Paidáish 30
30
1Aur jab Ráḳhil ne dekhá, ki Ya‘qúb se us ke aulád nahíṉ hotí, to Ráḳhil ko apní bahin par rashk áyá: so wuh Ya‘qúb se kahne lagí, ki Mujhe bhí aulád de, nahíṉ to maiṉ mar jáúṉgí. 2Tab Ya‘qúb ká qahr Ráḳhil par bhaṛká, aur us ne kahá, Kyá maiṉ Ḳhudá kí jagah húṉ, jis ne tujh ko aulád se mahrúm rakkhá hai? 3Us ne kahá, Dekh, merí lauṉḍí Bilháh házir hai: us ke pás já, táki mere liye us se aulád ho, aur wuh aulád merí ṭhahre. 4Aur us ne apní lauṉḍí Bilháh ko use diyá, ki us kí bíwí bane, aur Ya‘qúb us ke pás gayá. 5Aur Bilháh hámila húí, aur Ya‘qúb se us ke beṭá húá. 6Tab Ráḳhil ne kahá, ki Ḳhudá ne merá insáf kiyá, aur merí faryád bhí suní, aur mujh ko beṭá baḳhshá. Is liye us ne us ká nám Dán rakkhá. 7Aur Ráḳhil kí lauṉḍí Bilháh phir hámila húí, aur Ya‘qúb se us ke dúsrá beṭá húá. 8Tab Ráḳhil ne kahá, Maiṉ apní bahin ke sáth niháyat zor már márkar kushtí laṛí aur maiṉ ne fath páí: so us ne us ká nám Naftálí rakkhá. 9Jab Leáh ne dekhá, ki wuh janne se rah gayí, to us ne apní lauṉḍí Zilfah ko lekar Ya‘qúb ko diyá, ki us kí bíwí bane. 10Aur Leáh kí lauṉḍí Zilfah ke bhí Ya‘qúb se ek beṭá húá. 11Tab Leáh ne kahá, Zahe qismat! so us ne us ká nám Jadd rakkhá. 12Leáh kí lauṉḍí Zilfah ke Ya‘qúb se phir ek beṭá húá. 13Tab Leáh ne kahá, Maiṉ ḳhushqismat húṉ; ‘aurateṉ mujhe ḳhushqismat kaheṉgí: aur us ne us ká nám Áshar rakkhá. 14Aur Rúbin gehúṉ káṭne ke mausim meṉ ghar se niklá, aur use khet meṉ mardum giyáh mil gaye, aur wuh apní máṉ Leáh ke pás le áyá. Tab Ráḳhil ne Leáh se kahá, ki Apne beṭe ke mardum giyáh meṉ se mujhe bhí kuchh de de. 15Us ne kahá, Kyá yih chhoṭí bát hai, ki tú ne mere shauhar ko le liyá, aur ab, kyá mere beṭe ke mardum giyáh bhí lená cháhtí hai? Ráḳhil ne kahá, Bas to, áj rát wuh tere beṭe ke mardum giyáh kí ḳhátir tere sáth soegá. 16Jab Ya‘qúb shám ko khet se á rahá thá, to Leáh áge se us se milne ko gayí, aur kahne lagí, ki Tujhe mere pás áná hogá, kyúṉki maiṉ ne apne beṭe ke mardum giyáh ke badle tujhe ujrat par liyá hai. So wuh us rát usí ke sáth soyá. 17Aur Ḳhudá ne Leáh kí suní, aur wuh hámila húí, aur Ya‘qúb se us ke páṉchwáṉ beṭá húá. 18Tab Leáh ne kahá, ki Ḳhudá ne merí ujrat mujhe dí, kyúṉki maiṉ ne apne shauhar ko apní lauṉḍí dí: aur us ne us ká nám Ishkár rakkhá. 19Aur Leáh phir hámila húí, aur Ya‘qúb se us ke chhaṭá beṭá húá. 20Tab Leáh ne kahá, ki Ḳhudá ne achchhá mahr mujhe baḳhshá; ab merá shauhar mere sáth rahegá, kyúṉki mere us se chha beṭe ho chuke haiṉ: so us ne us ká nám Zabúlún rakkhá. 21Is ke ba‘d us ke ek beṭí húí, aur us ne us ká nám Dínah rakkhá. 22Aur Ḳhudá ne Ráḳhil ko yád kiyá, aur Ḳhudá ne us kí sunkar us ke rihm ko kholá. 23Aur wuh hámila húí, aur us ke beṭá húá. Tab us ne kahá, ki Ḳhudá ne mujh se ruswáí dúr kí. 24Aur us ne us ká nám Yúsuf yih kahkar rakkhá, ki Ḳhudáwand mujh ko ek âur beṭá baḳhshe.
25Aur jab Ráḳhil se Yúsuf paidá húá, to Ya‘qúb ne Lában se kahá, Mujhe ruḳhsat kar, ki maiṉ apne ghar, aur apne watan ko jáúṉ. 26Merí bíwiyáṉ, aur mere bál bachche, jin kí ḳhátir maiṉ ne terí ḳhidmat kí hai, mere hawále kar, aur mujhe jáne de; kyúṉki tú áp jántá hai, ki maiṉ ne terí kaisí ḳhidmat kí hai. 27Tab Lában ne use kahá, Agar mujh par tere karam kí nazar hai, to yahíṉ rah, kyúṉki maiṉ ján gayá húṉ, ki Ḳhudáwand ne tere sabab se mujh ko barakat baḳhshí hai. 28Aur yih bhí kahá, ki Mujh se tú apní ujrat ṭhahrá le aur maiṉ tujhe diyá karúṉgá. 29Us ne use kahá, ki Tú áp jántá hai, ki maiṉ ne terí kaisí ḳhidmat kí, aur tere jánwar mere sáth kaise rahe. 30Kyúṉki mere áne se pahle yih thoṛe the, aur ab baṛhkar bahut se ho gaye haiṉ, aur Ḳhudáwand ne jaháṉ jaháṉ mere qadam paṛe tujhe barakat baḳhshí. Ab maiṉ apne ghar ká bandobast kab karúṉ? 31Us ne kahá, Tujhe maiṉ kyá dúṉ? Ya‘qúb ne kahá, Tú mujhe kuchh na dená, par agar tú mere liye ek kám kar de, to maiṉ terí bheṛ bakriyoṉ ko phir charáúṉgá, aur un kí nigahbání karúṉgá. 32Maiṉ áj terí sárí bheṛ bakriyoṉ meṉ chakkar lagáúṉgá, aur jitní bheṛeṉ chitlí aur ablaq aur kálí hoṉ, aur jitní bakriyáṉ ablaq aur chitlí hoṉ un sab ko alag ek taraf kar dúṉgá; in hí ko maiṉ apní ujrat ṭhahrátá húṉ. 33Aur áyanda jab kabhí merí ujrat ká hisáb tere sámne ho to merí sadáqat áp merí taraf se is tarah bol uṭhegí, ki jo bakriyáṉ chitlí aur ablaq nahíṉ, aur jo bheṛeṉ káli nahíṉ, agar wuh mere pás hoṉ to churáí húí samjhí jáeṉgí. 34Lában ne kahá, Maiṉ rází húṉ; jo tú kahe wuhí sahí. 35Aur us ne usí roz dhárídár aur ablaq bakriyoṉ ko aur sab chitlí aur ablaq bakriyoṉ ko jin meṉ kuchh safedí thí, aur tamám kálí bheṛoṉ ko alag karke un ko apne beṭoṉ ke hawále kiyá. 36Aur us ne apne aur Ya‘qúb ke darmiyán tín din ke safar ká fásila ṭhahráyá: aur Ya‘qúb Lában ke báqí rewaṛoṉ ko charáne lagá. 37Aur Ya‘qúb ne safeda, aur bádám, aur chanár kí harí harí chhaṛiyáṉ líṉ, aur un ko chhíl chhílkar is tarah ganḍídár baná liyá ki un chhaṛiyoṉ kí safedí dikháí dene lagí. 38Aur us ne wuh ganḍídár chhaṛiyáṉ bheṛ bakriyoṉ ke sámne hauzoṉ aur náliyoṉ meṉ jaháṉ wuh pání píne átí thíṉ khaṛí kar díṉ; aur jab wuh pání píne áíṉ aur gábhan ho gayíṉ. 39Aur un chhaṛiyoṉ ke áge gábhan hone kí wajh se unhoṉ ne dhárídár, chitle aur ablaq bachche diye. 40Aur Ya‘qúb ne bheṛ bakriyoṉ ke un bachchoṉ ko alag kiyá, aur Lában kí bheṛ bakriyoṉ ke muṉh dhárídár aur kále bachchoṉ kí taraf pher diye; aur us ne apne rewaṛoṉ ko judá kiyá, aur Lában kí bheṛ bakriyoṉ meṉ milne na diyá. 41Aur jab mazbút bheṛ bakriyáṉ gábhan hotí thíṉ, to Ya‘qúb chhaṛiyoṉ ko náliyoṉ meṉ un kí áṉkhoṉ ke sámne rakh detá thá, táki wuh un chhaṛiyoṉ ke áge gábhan hoṉ. 42Par jab bheṛ bakriyáṉ dublí hotíṉ, to wuh un ko waháṉ nahíṉ rakhtá thá. So dublí to Lában kí rahíṉ, aur mazbút Ya‘qúb kí ho gayíṉ. 43Chunáṉchi wuh niháyat baṛhtá gayá, aur us ke pás bahut se rewaṛ aur lauṉḍiyáṉ aur naukar chákar aur úṉṭ aur gadhe ho gaye.
Currently Selected:
Paidáish 30: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
