YUH 2
2
Kɔɲɔmalɔ tolon mɛn kɛra Kana so kɔndɔ
1Nba, a tele sawanan lon, kɔɲɔmalɔ kɛra Kana so kɔndɔ Kalile mara rɔ. Isa na tɛrɛ ye. 2Isa a ni a karandenilu fanan kilini tɛrɛ kɔɲɔmalɔ rɔ. 3A sera waati do ma rɛsɛnji banda fewu. Isa na ka a fɔ a yɛ ko: «Rɛsɛnji ra ban fewu.» 4Isa ka a jabi: «N na, nfen ye nde ni ile tɛma? N na waati ma se fɔlɔ.»
5A na ka a fɔ baaradenilu yɛ ko: «A ye mɛn fɔla ai yɛ, ai ye wo kɛ.» 6Jundaa kabalaman belebele ba wɔɔrɔ tɛrɛ ye ii bolo ye, mɔɔ ri se litiri biseyin haan litiri kɛmɛ ni a kɔ ɲɔɔn kɛla a kɔndɔ. Woilu ye ii bolo ka ii sɛninya mɛn bɛnni ii la namun ma. 7Isa ka a fɔ baaradenilu yɛ ko: «Ai ye jundaa lafa ji la.» Baaradenilu ka jundaa lafa haan a da la. 8Wo kɔ rɔ, Isa ka a fɔ ii yɛ ko: «Ii ye ji ɲin ta ka wa a ri dɔɔnninta ko ɲanabɔla kunnasiiba ma sisen.» Baaradenilu ka wo kɛ. 9Damununta ko ɲanabɔla kunnasiiba a ka ji wo nene, ji mɛn yɛlɛmanda ka kɛ rɛsɛnji ri. A ma a lɔn rɛsɛnji bɔni fan si, kɔni baaraden mɛnilu ka ji ta jundaa kɔndɔ, woilu ka a lɔn. A ka kɔɲɔcɛ kili, 10ka a fɔ a yɛ ko: «Mɔɔ wa kɛ rɛsɛnji ratalanna mɔɔilu la, a ye rɛsɛnji ɲumaɲuma fɔlɔ le ratalanna ii la. Ii ɲa wa laminin minin tuma mɛn na, a ri rɛsɛnji gbɛrɛ ratalan ii la, mɛn duman tɛ kosɛbɛ. Kɔni ile ra rɛsɛnji ɲumaɲuma lamara fɔɔ sisen!» 11Nba, Isa la tɔɔmasere kabannako fɔlɔ le wo ri, a ka mɛn kɛ Kana so kɔndɔ Kalile mara rɔ. Isa ka a la nɔɔrɔ yiraka tende. Wo kɛra sababu ri, a la karandenilu lara a la. 12Wo taminnin kɔrɔ, a wara Kapɛrinahumu so kɔndɔ, a ni a na a ni a dɔɔcɛilu a ni a la karandenilu. Ii tora ye ka tele dando kɛ ye.
Isa ka julailu gbɛn Allabatobonba la Jerusalɛmu
13Nba, Yahudiyailu la Taminkunna Sali tun da sudunya. Wo rɔ, Isa wara Jerusalɛmu. 14A donda Allabatobonba jin kɔndɔ ka julailu tɛrɛn ye, mɛnilu tɛrɛ ye nisiilu ni saailu ni sokɔndɔ kanbailu fɛrɛla. A ka wodifalonnailu siini tɛrɛn ii la tabaliilu kɔfɛ fanan. 15Nba, Isa ka fojulu kɛ bonsan di, ka mɔɔilu labɔ Allabatobonba jin kɔndɔ a ni ii la nisi ni ii la saa, ka wodifalonnailu la wodi gbanan dawuya duu ma, ka ii la tabali labe. 16A ka a fɔ kanba majiralailu fanan yɛ ko: «Ai ye kanbailu labɔ yan! Ai kana n Fa la bon kɛ julaya bon de.» 17Isa la karandenilu hankili bilara sɛbɛli kuma wo rɔ ko:
«I la bon na ko gbɛlɛman n ma a ɲa jɛrɛ jɛrɛ ma.»
18Nba, Yahudiyailu la ɲɛmɔɔilu ka Isa maɲininka ko: «I ra ko mɛnilu kɛ ɲin, i ri tɔɔmasere kabannakoma su ɲuman kɛ ka a yiraka an na ko ɲin kɛ saratii ye i bolo?» 19Isa ka ii jabi: «Ai ye Allabatobonba ɲin tiɲan, yani tele sawanan n di a lawuli.» 20Yahudiya ɲɛmɔɔilu ka a fɔ a yɛ ko: «An ka Allabatobonba lɔ san binaanin ni san wɔɔrɔ le kɔrɔ. I ri se a lɔla tele sawa kɔrɔ wa?» 21Kɔni Isa kan tɛrɛ ye Allabatobonba mɛn ma, a tɛrɛ ye wo fɔla a farikolo le ma. 22Wo le ka a kɛ, Isa ka i wuli sayabatɔilu tɛma, a la karandenilu hankili bilara a la kuma wo rɔ. Ii lara kuma fanan na mɛn sɛbɛni Alla la kitabu kɔndɔ, a ni ii lara Isa la kuma fannan na.
Isa ka a lɔn mɛn ye mɔɔ sɔnɔmɛ rɔ
23Isa ka Taminkunna Sali kɛ Jerusalɛmu so kɔndɔ. Mɔɔilu ka a la tɔɔmasere kabannakoilu yen, wo rɔ mɔɔ siyaman ba lara a la. 24Kɔni Isa ma la mɔɔ woilu la baa a ka adamaden bɛɛ lɔn. 25A mako ma kɛ mɔɔ la sereyala, baa a ka a lɔn mɛn ye adamaden sɔnɔmɛ rɔ.
Currently Selected:
YUH 2: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
