Luka 19

Jezus shi Zakeu

1Jezus intrë tu Jeriko sh ma tërcja kala. 2Ako ara un om ku numa Zake. Ell ara di acej ci aduna xhelepja sh ara avut. 3Zakeu ma s'çukutja tas vëdja kaj ara Jezus, ma ara shkurt sh nu putja tas u vëdja kë ara mullc ômënj. 4Tiaca, ell tërku dininti, shi s'i alënë tu un hjik tas u vëdja, kë Jezus ma tërcja tu aca kali. 5Kënd Jezus axhumsi ako, skullë oqjë sh i'j xësi: “Zake, dëpunë ntrôrë, kë azë voj tas stau tu kasa a ta.” 6Zakeu dupunë ntrôrë shi s'hërësi, ci us ashtëptja Jezus lla kasa a lluj. 7Tuc acej ci u vëxurë aistë gjëji, ahurhjirë tas xhudëkë: “Ju us nagë ôspi, lla un om nkërkat ku amartii.” 8Zakeu ci stëtja pi çëçôri i'j xësi a Domnu: “Ja Domne, mini us ll'u dau acëllor ci nu ar, disa ali averi a mja, sh ma kë j'am llôtë a vërruj prax ku psemati, us j'u torr patur or ma mullt.” 9Dapoja Jezus i'j xësi: “Azë vini skëpara tu aistë kasë, kë shi aist esti hjij all Abraham. 10Hjiju a Omu ari vinitë tas i'j kaftë shi s'i'j skapë acej ci ara qëruc”.

Meselea ti xaci monedhëli

11Kënd ma o-vxa, Jezus ll'u spusi sh aistë meselei, pedhis kë ara aprôpja di Jerusalem, shi ej pistusja ci kratu a Dumëxë us vinia ntrôrë. 12Ell ll'u xësi: “Un domn nesi tu un bilok dëpërtos, tas s'i fëcja vësëjë sh dapoja us'i turra. 13Adunë xaci di ysmeqarjë a lluj, ll'u dedi xaci monedhi sh ll'u xësi: ‘Bëgacili pi lluk pën kënd s'mi torr mini!’ 14Ômënjjë a shtëlluj biloku nu u vra, shi i'j pëtërkurë dënëpoj ndoj di nësh tas xëcja: ‘Nu vrem ci aist om s'i fakë vësëjë ti noj.’” 15Kënd s'turrë, ara fapt vësëjë, sh këftë tas s'i'j aducja ysmeqarjë ci ll'ovja datë prax, tas vëdja kum l'avja bëgatë pi lluk. 16Vini prota un sh i'j xësi: “Domne përëllu a tëll ari date xaci allti.” 17Ell i'j xësi “Bravo, esht ysmeqar bun. Pedhis ci t'i spusesh ndrept ti tuti, us t'i fac mari tu xaci kasabai”. 18Dapoja vini allant shi i'j xësi: “Domne, përëllu a tell ari datë cinci allti.” 19Ell i'j xësi: “Sh tini us esht mari tu cinci kasabai!”

20Dapoja vini allant sh xësi: “Domne ja ju ôj përëllu a tëll. Mini o-vërtij tu unë shamei, 21kë avjam frikë di tini, kë esht mullt sert. Tini jaj aca ci nu ôj datë, sh adunj aca ci nu ôj sëmënatë”. 22Ell xësi: “Ysmeqar anapudh, mini us t'ja gudest ti zbôrrëli a tëli. Tini u shtjaj ci mini est sert, ci jau aca ci nu am datë, sh taj aca ci nu am sëmënatë? 23Dapoja, këce nu u bëgash tu bangë përëllu a njell, ci kënd s'mi turram s'u llôm ku tutë aca ci us'i avdëxa?”

24Tiaca, ll'u xësi acëllor ci ara ako: “Llôcëju përëllu sh dëdecëju acëlluj ci ari xaci!”

25Ej i'j xësërë: “Domne, ma ell ari xaci monedhi.” 26Ell ll'u turrë: “Mini us v'i xëk kë acëlluj ci ari, us i'j s'i da sh ma mullt, ma acëlluj ci nu ari, us i'j s'i ja sh aca ci ari.

27Sh acej ci nu m'i vra mini s'mi fëcjam vësëjë, aducecij sh vëtëmacij aô dininti a mja!”

Jezus intrë tinjisit tu Jerusalem

28Kara l'i xësi aisti Jezus nqisi ndrept tu Jerusalem. 29Kënd s'i apurqë tu Betfage sh tu Betani, tu biloku ci s'i akjëma “Muntili a Masënllu”, pëtërku doj di dishepujë 30sh llu xësi: “Fuxic tu hôra qandra, sh kënd s'intrac us afllac lëgat un ghumarr, ci nu ari nkëlëkatë vërr pi nës. Zdëlëgacu sh aducecu. 31Ma kë v'i ntrabë vërr ‘këce u zdëlëgac’ xëcecij ashë: ‘Domnu u vra’”. 32Acej ci pëtërku Jezus, nesërë sh o-fllarë ashë kum ll'ovja xësë Ell.

33Kënd ma u zdëlëga ghumarru, domësu i'j tërbë: “Këce ma u zdëlëgac ghumarru?” 34Ej i'j xësërë: “Domnu u vra.” 35Ej o-dusërë ghumarru lla Jezus, j'amënarë pësuprë stranjli a llor sh Ell nkëlëkë pi nës. 36Kala ju tërcja, ômënjjë ashtërra stranjli a llor. 37Kënd s'i apurqë tu kala ci dupuna dit Muntëli a Masënllu, tuc dishepujë ahurhjirë tas allavdë Dumëxë, ku hërau sh ku bôci analltë, ti tuti bunecli ci avja vëxutë.

38Ej xëcja: “Llunjinësit s'hjibë vësëjë ci jini pi numa a Domnëlu!

Irini tu cerl sh dhoksu Dumëxë anallt!”

39Ndoj di farisenjjë ci ara namësa di ômënj i'j xësërë a Jezus: “Mvëcëtor, xëllu a dishepujllu a tej tas këpsjastë.” 40Ma Jezus ll'u turrë: “Mini us v'i xëk ci, shi s'këpsjastë ej, shkëmbili us grastë.” 41Kënd s'i apurqë tu kasabai shi u vëxu, Jezus pllëmsi ti nës, 42sh xësi: “Ah, ma s'oduqesht sh tini azë di këtu jini irini! Ma aistë esti askumtë ti oqjë a tej. 43Ma jin xëlili kënd asmëjë a tëj us zhdikidë groq afigërra di tini, us t'ja vërrtjastë sh us t'i strringë di tuti përcli. 44Dapoja us t'i tindë mpadi acëja sh fumeja a ta, sh nu us allasë n'i amënatë pi tini shkëmbë pisti shkëmbë, kë tini nu o-duqish qërollu kënd Dumëxë vini tas t'i axhutë”.

Pëstrera a tempullu

45Kënd intrë tu tempull Jezus ahurhji s'i'j aurrë acej ci vindja ako. 46Sh ll'u xësi: “Sëmtili skërëturi xëk: Kasa a mja esti kasë ti fëceri duvai,

ma voj o-vec faptë bilok di fur.”

47Jezus mvëca ômënjjë kathi xuë tu tempull. Prefcjë, skribënjjë sh ma marjë a ômënjllu vra s'u vëtëma, 48ma nu shtja ci s'fëcja, kë tuc ômënjjë s'hërësja kënd o-skullta.

Currently Selected:

Luka 19: ARUM

Highlight

Copy