San Marcos 10
10
Kaxtnoꞌo Jesús ja ma vi xndendoo tnaꞌa teyii jin ñasiꞌi de
1Yun te ni ndee ya ñuu Capernaúm, te ni jino ya ñuu ja tnii Judea ja oo inka jioo yute Jordán. Te yun ni ka kututu tuku ñayiu nuu oo ya, te ni kaxtnoꞌo tuku ya nui, nagua ni kutuaꞌa maa ya saꞌa ya. 2Te ni ka jintnaꞌa ña sava tee ka kuu fariseo jin Jesús, ja vi koto tnuni ña de jin ya. Te ni ka jikan tnoꞌo ña de:
―¿A vatuka kuu nuu Ley ja vi xndendoo tnaꞌa in tee jin ñasiꞌi de? ―ka jiñaꞌa de.
3Yun te jiñaꞌa ya:
―¿Naxa ni tatnuni Moisés nuu ni?
4Te ka jiñaꞌa de:
―Moisés, chi ni jandetu de ja in tee kuu xndendoo de ñasiꞌi de, su kuñaꞌa de nuu ña in tutu nuu kaꞌan ja vi xndendoo tnaꞌa de, te ndoo ña ―ka jiñaꞌa de.
5Yun te jiñaꞌa Jesús:
―Vi ja inu ndee ini anu ni guaa ni tee Moisés tnoꞌo yaꞌa. 6Su ndee jaxtnañuꞌu, ni saꞌa ia Dios ndiꞌi ja oo ñuyiu, te “ni saꞌa ya teyii jin ñasiꞌi. 7Te yun guaa xndoo teyii tata de vi nana de, te kuaka tnaꞌa de jin ñasiꞌi de. 8Te nduu vi kokuu na kuinio invaa ni ka ñayiu”, kachi tutu ii. Saa te masu uu kai kuu, chi invaa ni ka ñayiu. 9Te yun guaa tu na tniuu in tee ja saꞌa siin de nagua ni xtnitnaꞌa ia Dios ―jiñaꞌa ya.
10Te nuu ja ka oo ya in veꞌe, te ni ka jikan tnoꞌo tuku ña tee ka skuaꞌa jin ya siki tnoꞌo yaꞌa. 11Te jiñaꞌa ya:
―Nani kuu tee ja xndoo de ñasiꞌi de, te ndakuaka tnaꞌa de jin inka ñasiꞌi, te skindee de ñaꞌa xtnañuꞌu. 12Te nuu ja in ñasiꞌi xndendoo ña yii ña, te ndakuaka tnaꞌa ña jin inka de, te suni skindee ña yii xtnañuꞌu ña ―jiñaꞌa ya.
Ni jikantaꞌu Jesús ja jaꞌa suchi kueli
13Yun te ni ka junsiaꞌa ñayiu suchi kueli nuu Jesús, nagua ja na sonee ya ndaꞌa ya siki, te na kakantaꞌu ya jaꞌi. Su ni ka kuxeen tee ka skuaꞌa jin ya nuu ñayiu ka junsiaꞌa suchi kueli yun. 14Te nuu ni jini Jesús, te ni kiti ini ya, te jiñaꞌa ya:
―Vi kuandetu ni na kikuei maa suchi kueli jian nuu san, te ma vi kasi niꞌnu ni ja kikuei, chi nuu tatnuni ia Dios kuu nuu vi koo ñayiu ka kuu na kuinio suchi kueli yaꞌa. 15Chi kaꞌan ndaa san ja na in ñayiu tu jantaꞌu ja tatnuni ia Dios nui nagua jantaꞌu in suchi luluu, te ma kiuu saꞌuin nuu tatnuni ya ―jiñaꞌa ya.
16Te ni kanundee ña ya vi ni sonee ya ndaꞌa ya siki, te ni jikantaꞌu ya ja jaꞌi.
Ka ndatnoꞌo in tee kuika jin Jesús
17Te nuu ni kiꞌin tuku ya ichi kuaꞌan ya, te ni kenta in tee jino de, te ni jinkuiin jiti de nuu ya, te ni jikan tnoꞌo ña de jin ya:
―Tee guaꞌa kuu ni, Mastru. ¿Nagua kuu jaguaꞌa saꞌa san ja niꞌi taꞌu san ja koteku san nikuii nikani? ―jiñaꞌa de.
18Te jiñaꞌa Jesús:
―¿Nau ja xnani ña ni tee guaꞌa? Te tu na tee guaꞌa oo, chi maintnoꞌo Dios kuu ia guaꞌa. 19Ja jini maa ni tnoꞌo tatnuni ia Dios nuu kaꞌan suaꞌa: “Ma koskindee tnaꞌa ron, ma kaꞌni ron ndiyi, ma suꞌu ron, ma kaꞌan tnoꞌo ron siki ñayiu, ma xndaꞌu ron ñayiu, te kuanyuꞌu kuandetu nuu yua nuu siꞌi ron”, kachi tutu ii ―jiñaꞌa ya.
20Yun te jiñaꞌa de:
―Mastru, ndiꞌi yaꞌa tavaꞌa san ndee lule san ―jiñaꞌa de.
21Yun te ni ndiaꞌa ña Jesús jin de, te ni kaꞌan too ña ya, te jiñaꞌa ya:
―Invaa ka ja jaꞌni ña jin ni nuu saa: kuaꞌan ni te xiko ndiꞌi ni ja nevaꞌa ni, te kuñaꞌa ni nuu ñayiu ka kundaꞌu, te konevaꞌa kuaꞌa ni ndee andivi. Yun te saa kii ni, te kondikin ña ni visi na tnaꞌa ni kuaꞌa tnundoꞌo ―jiñaꞌa ya.
22Te ni tnaꞌu ini de nuu ni onini de tnoꞌo yaꞌa, te kusuchi ndevaꞌa ini de kuaꞌan de, chi tee kuika ndevaꞌa kuu de.
23Yun te ni ndiaꞌa Jesús nii nuu ka oo ya, te jiñaꞌa ya nuu tee ka skuaꞌa jin ya:
―Nase ndeꞌe vijin kuu ja kuu kiukuei ñayiu kuika nuu tatnuni ia Dios ―jiñaꞌa ya.
24Te ni ka saꞌu kuii ini tee ka skuaꞌa jin ya ja siun kaꞌan ya. Su ni ndajiokuiin tuku Jesús jiñaꞌa ya:
―Ñani, nase ndeꞌe vijin kuu ja kuu kiukuei ñayiu ka kutoo xuꞌun nuu tatnuni ia Dios. 25Chi ñama ka kiuu in kameyu yau in yiki tiku saa ja kiuu in ñayiu kuika nuu tatnuni ia Dios ―jiñaꞌa ya.
26Te nuu ni ka onini de tnoꞌo yaꞌa, te viꞌi ka ni ka saꞌu kuii kuiti ini de, te ka jikan tnoꞌo tnaꞌa de:
―¿Na in kuu ja kaku niꞌnu nuu saa? ―ka kachi de.
27Yun te ni ndiaꞌa ña Jesús, te jiñaꞌa ya:
―Ja ñayiu ñuyiu, chi ma kuu vi saꞌi, su ja ia Dios, chi ndiꞌi ni ja kuu saꞌa ya ―jiñaꞌa ya.
28Yun te ni jinkondee Pedro jiñaꞌa de:
―Su sein, chi vi ni ka xndoo san ndiꞌi nagua ka nevaꞌa san, te ka ndikin ña san jin ni ―jiñaꞌa de.
29Te jiñaꞌa Jesús:
―Kaꞌan ndaa san ja nani kuu ñayiu ja ka xndoi veꞌe a ñani a kuaꞌi a tatai a nanai a seꞌi axi ñuꞌi ja jaꞌa sein vi ja jaꞌa tnoꞌo vaꞌa ia Dios, 30te ñayiu yun, chi vi ndaniꞌi in ciento jichi kuaꞌa ka vitna nuu ñuyiu yaꞌa: veꞌi vi ñani vi kuaꞌi vi nanai vi seꞌi vi ñuꞌi, visi ka sondikin ña ñayiu jin. Su inka ñuyiu ja vaji, te vi ndaniꞌi ja vi kotekui nikuii nikani. 31Su kuaꞌa ñayiu kuu naꞌnu vitna vi nduu lulei, te kuaꞌa ñayiu ka kuu lule vitna vi nduu naꞌnui ―jiñaꞌa ya.
Ni kaxtnoꞌo tuku Jesús inka jichi ja kuu ya te ndateku ya
32Te nuu ka ñuꞌu ichi de mandakuei de Jerusalén, te yoxnoꞌo Jesús nuu tee ka skuaꞌa jin ya kuaꞌankuei ya. Te vi ni ka saꞌu kuii ini de vi ka yuꞌu de ka ndikin ña de jin ya. Yun te ni keneꞌe siin ya ndi uxi uu tee ka skuaꞌa jin ya, te ni jinkondee ya kaꞌan tuku ya naxa kaa ja ndoꞌo ya. 33Te jiñaꞌa ya:
―Te vitna ja mandakueio Jerusalén, te vi xtuu ña ñayiu jin sein ja kuu san Seꞌe Teyii, nuu ndaꞌa tee ka kuu nijaꞌnu nuu sutu vi nuu tee ka kaxtnoꞌo Ley Moisés, te vi kaꞌan de ja na kuu san, te vi ndasiaꞌa ña de ndaꞌa tee inka ñuu, 34te vi saꞌa neꞌe vi saꞌa yichi ña de, te vi kani ña de vi vi tiusii de nuu san, te vi kaꞌni ña de. Su nuu uni kiuu, te ndateku san ―jiñaꞌa ya.
Ka jikan Jacobo jin Juan in jandiuxi nuu Jesús
35Yun te ni ka jintnaꞌa yatni ña Jacobo vi Juan, seꞌe Zebedeo, jin Jesús, te ka jiñaꞌa de:
―Mastru, ka kuini san ja saꞌa ña ni in jandiuxi ja vi kakan san nuu ni ―ka jiñaꞌa de.
36Te ni jikan tnoꞌo ña ya:
―¿Nagua ka kuini ni ja saꞌa san jin ni? ―jiñaꞌa ya.
37Te ka jiñaꞌa de:
―Kuandetu ni ja kiuu nduu kaꞌnu ndevaꞌa ni ja tatnuni ni, na vi jinkoo san xiin ni, in san ndaꞌa kuaꞌa ni, te inka san ndaꞌa satni ni ―ka jiñaꞌa de.
38Yun te jiñaꞌa Jesús:
―Tu ka jini ni nagua kuu ja ka jikan ni. ¿A kuu vi koꞌo ni nuu vasu ja koꞌo san ja kuu tnundoꞌo xeen ja tnaꞌa san? Te ¿a kuu vi kuandute ni jin tnundoꞌo kii siki san? ―jiñaꞌa ya.
39―Kuu ―ka jiñaꞌa de.
Te jiñaꞌa Jesús:
―Ja ndaa ja kuu vi koꞌo ni nuu vasu ja jiꞌi san, te vi yaꞌa ni nuu koto tnuni ña tnundoꞌo ja vi kuandute ni jin tnundoꞌo ja tnaꞌa san. 40Su ja vi jinkoo ni ndaꞌa kuaꞌa san vi ndaꞌa satni san, chi masu maa san kuu ja taa, chi ja ni saꞌa tuaꞌa maa Tata Dios ndee ñayiu ka kuu ja vi niꞌi ―jiñaꞌa ya.
41Te nuu ni ka jini uxi ka tee ka skuaꞌa jin ya tnoꞌo yaꞌa, te ni ka kiti ini de nuu Jacobo vi nuu Juan. 42Te ni ndakana ña Jesús, te jiñaꞌa ya:
―Ja ka jini maa ni ja tee ka tatnuni nuu sava ka ñuu, chi ka xtaku niꞌi de na kuinio ja vi maa de ka kuu jitoꞌo. Te tee ka kuu naꞌnu ka tatnuni xeen de jin tniuu ka nee de. 43Su neꞌu maa ni, chi masu saa kokuu, chi na in kaꞌan ja kokuu kaꞌnu neꞌu ni, te kuini ja kunukuechi nuu sava ka ni. 44Te na in kaꞌan ja kokuu ñayiu kukaꞌnu neꞌu ni, te kuini ja kunukuechi nuu ndiꞌi ni. 45Chi suni saa ni sein ja kuu san Seꞌe Teyii, chi masu vaji san ja vi kunukuechi ñayiu nuu san, chi vaji san ja kunukuechi san nuu ñayiu, te soko san maa san ja junkuꞌun yaꞌu, nagua ja kuaꞌa ñayiu ndatau san nuu jakueꞌe ―jiñaꞌa ya.
Ni ndasaꞌa Jesús nduchi nuu Bartimeo
46Yun te ni jinokuei ya ñuu Jericó. Te nuu ni ndekuei ya ñuu yun kuaꞌankuei ya jin tee ka skuaꞌa jin ya vi jin kuaꞌa ndevaꞌa ka ñayiu. Te yuꞌu ichi yun nukoo Bartimeo, in tee kuꞌu nduchi nuu, seꞌe Timeo, jikan de xuꞌun. 47Te nuu ni jini soꞌo de ja Jesús, tee ñuu Nazaret, kuu ia kuaꞌan yun, te ni jinkondee de kana jaa de, te jiñaꞌa de:
―Jesús, ndikin tata ndee rey David, kundaꞌu ini ña ni jin san ―jiñaꞌa de.
48Te kuaꞌa ñayiu ka kuxeen nuu de nagua ja na kasi yuꞌu de, su vi saa viꞌi ka kana jaa de:
―Ndikin tata ndee rey David, kundaꞌu ini ña ni jin san ―jiñaꞌa de.
49Yun te ni jinkuiin Jesús, te ni kaꞌan ya ja na vi kana ña jin de. Te ni ka kaꞌan ña jin tee kuꞌu nuu yun, te ka jiñaꞌa:
―Koo anu ni, te ndakoo ni neꞌe ni, chi kana ña de jin ni ―ka jiñaꞌa de.
50Yun te ni skana de soo suꞌnu de, te ni ndakoo de ni jintnaꞌa de Jesús. 51Yun te ni jikan tnoꞌo ña Jesús:
―¿Nagua kuini ni ja saꞌa san jin ni? ―jiñaꞌa ya.
Te jiñaꞌa tee kuꞌu yun:
―Mastru, kuini san ja ndanune nduchi nuu san ―jiñaꞌa de.
52Te jiñaꞌa Jesús:
―Kuaꞌan ni nuu saa, chi ja kandija ni, ndasaꞌa nduchi nuu ni, te ni nduvaꞌa ni ―jiñaꞌa ya.
Te vi ore saa ni ndanune nduchi nuu de, te ni jata ndikin ña de kuaꞌankuei de jin Jesús nuu ichi yun.
Currently Selected:
San Marcos 10: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
