Matayu 25

Ŋerep Natawen Ten (10) Eŋano More Don Naŋengo Rake

1Yesu eŋe koso iwa yale rake, “Baŋ naso maneo, qeli ewe zonom so gege togon wane numa eyamo, ŋerep natewen ten edo lamene weneŋ mau paki, ari ŋerep mane wane ŋaune zokit muse musen mayakane, sariki, marat-kaikei wane ari tomakakoi, eya wane rokop wakoniyake. 2Ŋerep 5 eŋe qelaŋine, ŋo 5 eŋe dereretenerop. 3Ŋerep 5 eya qelaŋ, eŋe lamene setneka makoi, ŋo dokuene mane maune weneŋ mi makoi. 4Ŋo ŋerep 5, eya dereretenerop, eŋe lamene setno dokune wat watko qeu ketki so doku beloŋ mane maune weneŋ ma arikoi. 5Ŋerep ŋaune muse musen zokit mayake, eŋe esatka mi sari lotkeki, eŋe tomaka metpi, setene pelekki, umi turuk qe wete sa met mage, ket kulu seuseune yale pakoi.

6“Pamageu, ruwo banine okangi mo boka woka mane iwa yale sarike, ‘Ŋerep ŋaune muse musen zokit mayakane eŋe mo iwa! Sariu paki maratkau!’ 7Ŋerep ten eŋe mo kiŋ ziŋ kaŋ zaŋ wiyeu paki lamene maulukkoi. 8Pakiso, ŋerep 5, qelaŋine eŋe dereretenerop eya edane rakoi, ‘Ŋinano ŋine dokune natne ŋene ŋebonbi, onoka wane ŋenane lam mo koma waremaike.’ 9Rau, ŋerep 5, dereretenerop eŋe mainge rakoi, ‘Midaka iwaŋo ŋine so ŋene weneŋ maine mi rokop-ŋoniyake, eya wane ŋine mere wao ariu paki, ŋine ŋidom dokune ŋine qoleu.’ 10Eso ŋerep qelaŋine eŋe mo eya mere wao dokune natne qolekeiwane arikoi. Ariu ariu so, eyaka ŋerep ŋaune zokit musele mayakane eŋe sari lotkemaike, pakiso ŋerep dereretenerop 5, eŋe eweke metkoi wane, eŋerop weneŋ maratkau, ŋara soep ze paki ŋerep zokit maki nekei wane eya arikoi. Ari mat kotino waketpi ŋei eŋe madet mo eya kitokoi.

11“Ŋado ŋerep qelaŋine 5 eŋe lotke more boka rakoi, ‘Suwaine suwaine! Madet lalage ŋebonnom uŋem!’ 12Ŋo ŋerep ŋaune eŋe doneene eya mainge edane rake, ‘Na welekakatne ŋidanmaile, naŋine mi detŋunbe paki, zok ŋaŋae ŋunmaile.’ ”

13Pakiso Yesuŋo edane rake, “Eya waneŋine wetŋineŋo diyam seleleine mau paki gekei, onoka wane, ŋine eŋe ma kaiweo me ma nasoo suwaine ŋine eŋe sari lotkeyake, eya ŋine zok mi detmami wane siluŋ eŋane dereret so wet lot korop gekene.”

Urata Ŋei Karewe Eŋane Kine

14“Ŋei Wawainan Ŋe Gipole sariyakane nasoo, rokop iwa yale wakoniyake. Ŋei maneŋo mat maneo ariyakane okangi paki, urata ŋeikoune edoraki sariu, kine kineine warekei wane ra matoke kuteno motke. 15Eŋe urata ŋei karewe dereretene so zonom enane rokopko detone more wesi ebonge, ŋei mane eŋe wesi 5 tausen kina (K5,000) mange, ŋo mane eŋe tu tausen kina (K2,000) mange, ŋo mane eŋe wan tausen kina (K1,000) mange. Pakiso, eŋe mo eya biraone more numa arike. 16Urata ŋeiwa K5,000 make eŋe ariki paki, ikopka wesiine eya urata mangi, eyaŋo kiyatki koso K5,000 magu mane wakonge. 17Numa weku yewaka urata ŋeiwa K2,000 make, eŋe wesiine urata mangi, eyaŋo kiyatki koso K2, magu mane wakonge. 18Ŋo urata ŋeiwa K1,000 make, oŋo yemo ariki paki, kepeo lom maki pakiso, suwainane wesi eya lomgo dukke.

19“Naso kiroroine gemageki qoeki, eya wane ŋadino urata ŋei yewa eŋane suwaine ene eŋe koso zinge sarike paki, eŋerop wesi eya wane don mauluke aukei wane qeturaŋ onge. 20Urata ŋeiwa K5,000 make, eŋe koso K5,000 magu mane eyarop masariki paki more rake, ‘Suwaine, ge K5,000 ningone. Kanom! Na koso urataine mawe K5,000 magu mane iwa wakonge.’ 21Olatki, suwaineineŋo rake, ‘Ge urata mauluke makone, ge urata ŋei mayakakatne, so aŋa tewe tewek korop! Ge kine kine nigatne eya wane urataine mayakakatne mauluke makone, eso eya wane noŋo baŋ kine kine suwaine eya wane ware wareine biraganikale. Ge sari saketnom paki, narop wet pese detnom!’

22“Pakiso, urata ŋeiwa K2,000 mange oŋo sari saketki paki olale rake, ‘Suwaine, goŋo K2,000 ningone. Kanom! Noŋo urataine mawe K2,000 magu mane koso iwa wakonge.’ 23Raki ware wareineŋo olale rake, ‘Ge urata mauluke makone, ge urata ŋei mayakakatne, so aŋa tewetewek korop! Ge kine kine nigatne eya wane urataine mayakakatne mauluke makone, eso eya wane noŋo baŋ kine kine suwaine, eya wane ware wareine biraganikale. Sari saketnom paki, narop wet pese detnom!’

24“Pakiso urata ŋeiwa K1,000 make, oŋo sari saketki paki olale rake, ‘Suwaine, na geŋane kine detmaile, ge ŋei togogole, ge goŋom ŋara metnom paki eyaŋine mi lokak okanmaine, so goŋom wit woune yasonom paki, eyaŋine mi ma sari maguk okanmaine. 25Na kaet-nange, eso eya wane na ariwe paki, geŋane wesi eya kepo dukewe pake. Kanom! Geŋane wesiŋone mo iwa manom.’

26“Yale olatki, suwaineineŋo iwa yale olatke, ‘Ge urata ŋei borikine so taboŋ gege! Ge iwa yale detkone, na noŋom ŋara metpe paki, eyaŋine mi lokak okanmaile, me na noŋom wit woune yasowe paki, eyaŋine mi ma maguk okanmaile, yale me? 27Eya maine, ge naŋane yale detnom paki, naŋane wesi eya wesi urumgo motnom rap, pakimo edo mau suwa leule okangi, na zinge sariwe paki, eya koropka sisine weneŋ mawe rap. 28Wesi iwa omakkau paki, ŋeiwa ten tausen kina (K10,000) magemaike, eŋe manbi. 29Ŋei mane eŋe kine kine mangoi, eya mageki ma leule mangi, eŋe baŋ moriyan manerop wakonka mangi mageyake, ŋo mane eŋe kine kine mangoi, eya mi ma leule more, siluŋ nigagatnemde mageyake, eya baŋ omaka ariu, eŋe yaup geyake. 30Urata ŋei bau wawaine yaline yemo ma birakau, ŋadino panaman koto kesiyake, yewao eŋe baŋ aroke more, ŋetneŋo warik warik ki geyake.’ ”

Ŋei Wawainane Gipole, Ma Wakon Ma Wakon Nasoine

31“Ŋei Wawainane Gipole, eŋe ŋei Waom yale okane sariyake, naso yewao, eŋe so aŋelo magukoune korop eŋerop weneŋ sarikei, paki eŋe baŋ ŋei Waom met metine qeli ewe zonom gorop eya wane kutno pese mesiyake. 32Metkimo, kepe baŋem ŋei ŋerep korop eŋe baŋ eŋane kaitko sari lewaŋgei, paki mo eŋe baŋ mapokongi, magu etke okangei, lama ware wareŋo lama noniŋ eŋane koruwoŋine mapokonmaike, eya wane rokop mapokoniyake. 33Mapokone more, lama eŋine wonino biraoniyake, ŋo noniŋ yemo kanaino biraoniyake. 34Pakimo ŋei waomŋo baŋ ŋei ŋereppa wonin-oken okorakei, eya iwa yale edaniyake, ‘Ŋine naŋane Maganeŋo mosop-ŋunge, sariu paki, qeli gege togon welaine okanbi, eyamo mokaka qeli so kepe ma wakon ore more, ŋinane biŋek mauluke motke. 35Na ŋara wane seukewe, ŋine ŋara gume nangoi, doku wane qomne sererekki, ŋine doku ninbi nekole, na ŋei kune ŋine yale sariwe, ŋine neu matŋine kotino bira-nangoi. 36Na lawam gewe, ŋine takot laplap ramu-nangoi, na zoma nangi, ŋine warenangoi, na mulap urumgo metpe, ŋine qelipkenan okangoi.’

37“Ŋei koboboine eŋe baŋ iwa yale mainge rakei ‘Waom, ŋene dango ganŋem, ge ŋara wane seukenom, ŋene ŋara gumegangone, me doku wane qomŋone sererekki, doku ginŋem nekone! 38Naso dango ŋene ganŋem, ge ŋei kuneŋine yale sarinom, geu matze kotino biragangone, me lawam sarinom, takot laplap ramu gangone! 39Naso dango ŋene gaŋem, ge zomagangi ware gangone, me mulap urumgo metnom, ŋene qelipke gan okangone!’ 40Ŋei waomŋo baŋ mainge edane rayake, ‘Na welekatne ŋidanbe, kimakopne ketkele eŋane keuwo ŋine, ŋei wekumane kima mauluk okankakoiwo, yemo ŋine na okannangoi yale okanmaike!’

41“Pakimo, eŋe baŋ ŋei ŋereppa kanaino okorakei, eŋe iwa yale edaniyake, ‘Kaisaleŋo soakŋongep, ŋine naŋane kaitko ŋine ariwareu! Ari more, Magakŋo Ŋei Borikine so aŋelokoune eŋane gerep togogole dubukki zeki mauluke biraonge, yewao ket more gekei! 42Na ŋara wane seukkole, ŋo ŋine siluŋ ŋara mane mi ningoi, doku wane qomne sererekki, ŋine doku mi ningoi. 43Na ŋei kune ŋine yale sariwe, ŋine neu more matŋine kotino mi biranangoi, lawam gewe, ŋine takot laplap mane mi ramu nangoi, na zoma nange so mulap urumgo metpe, ŋine warenane more qelipke nan mi okangoi.’

44“Yale raki, eŋe baŋ iwa yale olasikei, ‘Waom, ŋene naso dango ganŋem ŋara wane seukkone, me doku wane qomŋone sererekke, me ŋei kuneŋine yale sarikone, me lawam gekone, me zoma gange, me mulap urumgo metnom, gane qewoloŋ okan gane more mi qesiŋgangone!’ 45Rau, ŋei waomŋo baŋ iwa yale mainge edaniyake, ‘Na welekatne ŋidanbe, kimakopne ketkele gemami, eŋane keuwo ŋine ŋeimde wekumane kima mauluk okankakei wane bauŋine waki walukkakoi, yemo naŋane bauŋine waki, na waluk nangoi okanmaike.’ 46Pakimo ŋei iwa yaline, eŋe eya wane turuŋine baŋ wikile papa togon eya marat kaikei, ŋo ŋei koboboine eŋe baŋ qeli gege togon matko arikei.”

Currently Selected:

Matayu 25: onsNT

Highlight

Copy