Matayu 26

Ŋei Ŋetne Eŋe Yesu Qeu Seukeyakane Rakoi

1Yesu eŋe don iwa korop rawareki qoeki, dokoine edan rake. 2“Kaiwe etke, eya ŋine mo detmami, yewa qoekimo Aŋeloŋo Loloŋongi ŋara soep nemaŋkoi, eya wane taboŋ met met naso baŋ bomileyake, paki naso yewao Ŋei Wawainane Gipole eŋe baŋ ŋei eŋane mete eno birakau, kibeŋ qabego biriŋŋo rasukaikei.”

3Pakiso naso yewao, pris ŋetne so Yuda ŋei sele eŋe sari qeturage, Kaiyapas pris suwainane urumgo lewaŋgoi. 4Pakimo don pise more Yesu sanka ma lukkau paki, qeu seukeyakane don aukoi. 5Pakiso rakoi, “Ŋene Loloŋon Loloŋon peyada naso iwao misuk okanikene, me ŋene okanŋem, ŋei ŋerep eŋe kawali yau yaup baŋ qekei.”

Ŋerep Maneŋo Yesu Betani Matko Kelok Qoune Similerop Lewino Qakke

6Yesu eŋe, Saimon kuku sele ŋei sogine mo menaŋge, eŋane matko Betani yewao wa metke. 7Metkimo, ŋerep mane eŋe beloŋ mane kelok qoune simileteine, lewine suwaine eyaŋo qewat qewale, eya ma more Yesu wano sarike. Yesu eŋe ŋara ne metki, eyaka kelok eya qakki, lewino ket taukake. 8Dokoine eŋe eya kau paki, sotene osiki qesone rakoi, “Onoka wane eŋe kelok iwa korop matali maike? 9Kelok iwa yemo motŋem ari, wesi suwaine kiyatki sariki mo, ma more ŋei aboŋene midaine maine ebonŋem rap!”

10Yesu eŋe don rakoi, eya wane kine mo detke paki edane rake, “Ŋine ŋerep iwa onoka wane ra kitat okan kamami? Iwamo maine so kine kine weku mane, ŋerep eŋe na okannanmaike. 11Ŋei aboŋene midaine, eŋe yemo baŋ naso baŋem ŋinerop ge arikei, ŋo na yemo naso baŋem ŋinerop mi gekale. 12Ŋerep eŋe yale okane more, kelok qoune simileteine yewa solano qakike, yemo seukewe duk-nangei wane, ma ewek-nanike. 13Na welekatne iwa rawe detpi! Kepe baŋem don kisi iwa ra qelaŋane arikei rokop, ŋerep iwa okan nanmaike, eŋane weneŋ detsoroke more, don kisiine baŋ rau suwawi ariyake.”

Yudasiŋo Yesu Ŋaba Eŋane Meteeno Birakayakane Rake

14Naso yewao dokoine 12 enŋene keuweno ŋine mane eŋetine Yudas Iskariot, oŋo pris ŋetne eŋano arike. 15Paki edane rake, “Na Yesu ŋinane meto birakawe, ŋine lewine onokaka ninikei?” Eŋe wesi setne, silwa 30, yale dapore mangoi. 16Naso yewaoka Yudasŋo kiyeke Yesu ma wakon kayakane numaine dere mauluk okange.

Yesuŋo Aŋelo Loloŋon Loloŋon Nasoo Dokoine Eŋerop Ŋara Nekoi

17Kasap sap saune eya wane soda weku kaiwe mane yewao dokoine eŋe Yesu wano sari qesonka rakoi, “Ŋene detmaine, ŋo diyawao ari mere, Aŋeloŋo Loloŋonge eya wane Nasoo ŋara mauluke gingene?”

18Rau eŋe edane rake, “Ŋine mat suwaino ariu paki, ŋei mane maratkakei, paki iwa yale olasikei, ‘Kito ŋebo ŋebonŋo ramaike, naŋane nasone mo bomilemaike, wane naŋane dokone so na ŋene baŋ Aŋeloŋo Loloŋonge Naso eyao geŋane matko mere ŋara nekene.’ ”

19Dokoine eŋe Yesuŋo don edange, eya wane rokop okane more, Aŋeloŋo Loloŋonge Naso eya wane ŋara maulukkoi.

20Kepe rarap okangi Yesu eŋine so dokoine 12, eŋe zakeo ŋara nekeiwane pese metkoi. 21Ŋara ne mere, eyaka Yesuŋo rake, “Na welekatne ŋidanbe, ŋinane keuŋino ŋine ŋei maneŋo na baŋ ma wakon naniyake.”

22Dokoine eŋe wetene boriki, kiyeke weku weku qesonka rakoi, “Welekatne, Waom, ge naŋane ramainane?”

23Rau Yesuŋo mainge edange, “Ŋeiwa metine biraki narop lase wekuwo ketki kasapine ma neyake, oŋo na baŋ ma wakon naniyake. 24Ŋei Wawainane Gipole eŋe yemo Kaisale wane ekapŋo ramaike, yale baŋ seukeyake, ŋo Ŋei Wawainane Gipole ma wakonka yake, ŋei yewa eŋe yemo turuŋine, yai, zok manerop zinge maniyake! Ŋei yewa eŋe nabok kotinoŋine mi wakongirap, me eŋe siluŋ mi okangi mo eri weti me qei natne edo okanbi rap!”

25Yesu eŋe yale raki mo ma wakon kayake ŋei, Yudas, oŋo qesone rake, “Kito ŋebo ŋebon, ge naŋane ramainane?” Yesuŋo mainge olale rake, “Mo eya, goŋom ramaine.”

Yesuŋo Gege Ŋara Gumeonge

26Eŋe ŋara ne metpi, eyaka Yesu eŋe kasap ma more bakom kitoki paki, dokoine ebone rake, “Mau paki neu, iwa nae bikumne.”

27Pakiso, eŋe wain lase ma more, Kaisale bakomine kitoki paki, dokoine ebone rake, “Ŋine korop iwa neu, 28iwamo nae weŋemne, eya wane ra more, Kaisaleŋo ŋinerop baŋ tako rakot geyake. Naŋane weŋemne yemo, ŋei ŋerep korop ŋinane Borikineŋine saukeyakane qake kesiyake. 29Na ŋidanbe detpi, na baŋ koso ŋinerop wain iwa manerop mi nene, yaupka ge arimage, kaiwe naso yewao na wain musele, eya ŋinerop weneŋ Maganane gege togon kotino nekene.”

30Yale rakiso eŋe aŋelo loloŋon loloŋon wane eŋet mane kito so kisi maep auye detpi paki, matkoŋine ket more, Oliwa Bonagao arikoi.

Yesu Eŋe Petoroŋo Bisop Kayakane Olatke

31Pakiso, Yesu eŋe dokoine edane rake, “Ruwomde iwao, mali malipŋine korop baŋ pelekki, na qeliŋnane kaet ari warekei, onoka wane Kaisale wane ekapŋo iwa yale ramaike, ‘Na baŋ lama ware ware qewe paki, qe kuruŋ-onbe, lama magu koropŋo baŋ kakak nagu ket yeo yeo qiŋ qiririŋ ari warekei.’ 32Ŋo na seuseuwo ŋine wisikae wiyewe paki, na baŋ Galili kepeo alakane ŋibonikale.”

33Petoroŋo aŋage olale rake, “Natne eŋe korop geŋane detpi boriki biragane ari warekei, ŋo na yemo baŋ mi biragane arikale!”

34Raki, Yesuŋo Petoro girem don olale rake, “Na welekatne iwa golatpe detnom! Tiyak eŋe mi bokaki, ge ruwo yewao atak karewe bisopnane more raikene, ‘Na eŋe mi detkamaile.’ ”

35Petoro togole aŋaine mainge rake, “Na gerop weneŋ seukkaleo, na siluŋ geŋane mi bisopke raikale, na eŋe mi detkamaile!”

Pakiso dokoine korop eŋe qesiŋka don weku eyaka rawarekoi.

Yesuŋo Getsemane Saromatko Meŋe Meŋen Urata Make

36Pakiso, Yesu eŋe dokoine eŋerop rome saromat mane, eŋetine Getsemane, yewa ari more edane rake, “Ŋine iwa metpi, na eriwa ari meŋenkawe.” 37Eŋe, Petoro so Zebedi wane gipoletkine etke weneŋ ebuki arikoi. Ariu paki qomine umareki wikile suwaine detke. 38Paki edane rake, “Kotono umat zok kakapa suwaine wakonane more, eyaŋo ki pelek naniyakane okanmaike, eya waneŋine iwa narop weneŋ wet wisika mere, diyam maikei.”

39Yale edane more, eŋe eri ekeket biraone ariki paki, eŋe eŋineka meine ket kepo kito more iwa yale ra meŋen-kake, “Magane, ge detnom iwa maine okanmaikeo, yemo wikilane lase iwa oma nannom! ŋo siluŋ naŋane don mida, geŋane don togoleyake.”

40Yale ra meŋenkaki paki, zinge ari dokoine karewe metkoi, eŋe ongi kuluka pakoi, pakimo eŋe Petoro olale rake, “Ŋine ŋei karewe iwa daleo wane mi ewekeu paki, narop wan auwa diyam wet wisika mi gemami! 41Diyam tako rakot mau paki meŋenkau, ŋine yale okan mage, baŋ peleke more, liwe liwek borikino ket qekei. Asuŋineŋo yemo eweke more kine kine okaniyakane okanmaike, ŋo solaŋineŋo yemo umareki paki, zonomine midaine okanmaike.”

42Atak etke eŋe koso manerop zinge ari meŋenka rake, “Magane, wikilane lase iwa mi oma-nanikeneo, yemo na maine newe mo, geŋane don eya togoleyake.” 43Eŋe koso manerop zinge ari dokoine ongi kuluka pakoi, eŋe kepe solaene so wet dereret-enane de-ene wareka wet wisika mi metkoi.

44Yesu eŋe koso manerop qeliŋ-one ariki paki meŋenkaki atak karewe okange, don wekuka ra meŋenkake. 45Pakiso, koso dokoine eŋano zinge ariki paki rake, “Ŋine yeka kulu pau paki, zonom mamami me? Kau! Naso mo bomilemaike, wane Ŋei Wawainane Gipole mo ma more, ŋei borikine mama eŋane mete eno bira kakei. 46Wiyeu, ŋene ariŋem, kau, ŋeiwa ma wakon naniyake, mo iwa sarimaike!”

Ŋaba Edo Yesu Ma Lukkakoi

47Yesu eŋe don yale edane okoraki, dokoine 12 eŋane keuwo ŋine mane Yudas, eyaka lotkeke. Eŋerop weneŋ sarikoi, yemo ŋei magu suwaine, Pris ŋetne so Yuda ŋei sele edo taleonbi, kawali wane pilaŋ so soba weneŋ peike sarikoi. 48Isi bela ŋei, eya eŋe ŋei magu yewa kait masi iwa yale maki kau paki, Yesu makei wane edange, “Na ari ŋei yewa ka more, lulu zam zam maweso, ŋine kau paki, Yesu iwa raso malipka lukka arikei!”

49Yudas eŋe eyaka lotke more, Yesu wano koboine ari rake, “Peyamŋo gerop payake, kito ŋebo ŋebonze.” Yale raso, lulu zam zam make.

50Yesuŋo olale rake, “Kima, urata makenane wetke sarine, eya ikop manom!” Rakiso, eŋe osino sari more malipkau paki, metine wokom gekoi. 51Yesurop gekoi, eŋanoŋine maneŋo pilaŋ warage more, Pris Suwainane qelit medep qeki paki, ketne nat kito qokki ketke. 52Yale okangi Yesuŋo olatke, “Ge pilaŋŋone koso biranom, matno ketkep, onoka wane ŋei korop pilaŋ ma okanmami, eŋe pilaŋ yewaŋo enguki seuk okanmami. 53Ge mi detmaine, na Magane maine qesiŋ naniyakane olatpe eŋe kawali ŋei aŋelo magu suwaine 12 eya yuwanmaike, eŋe esatka taleongi sari qesiŋ nanbirap? 54Ŋo eŋe yale okanbimo, Kaisale wane ekapko numa yalewa oken wakoniyakane raraine, eya wane wele eyamo daleo wakongirap?”

55Naso yewaoka Yesu eŋe ŋei magu yewa edane rake, “Na kawali ŋei eya wane ŋine kawali wane buza so soba weneŋ mau paki, neukei wane sarimi me? Na kaiwe baŋem Bakom Urum koto pese mere, kisi maep don kito ŋidan okane gekole, pakimo, ŋine yewao mi neu luknangoi. 56Ŋo siluŋ masi iwa korop wakonmaike, yemo propet edo Kaisale wane ekapko don qekoi, eya wane wele wakoniyakane masi iwa wakonmaike.” Yale ra edangiso, dokoine korop eŋe qeliŋkau paki, biraka ariwarekoi.

Yesu Eŋe Suwaine Eŋane Kaitko Okorake

57Ŋeiwa Yesu ma lukkakoi, eŋe mau paki, Pris Suwaine Kaiyapas wane matko iwenka arikoi, yewao ra rokop don kito ebo ebon ŋei, so ŋei sele eŋe sari lewage metkoi. 58Petoro eŋe Yesu ŋadino mogare eri amaŋ. Pris Suwainane mat wane sen ŋadino arike. Eŋe ari sen koto waket more, tebe ŋei diyam gege eŋerop pese ket mere, tanik daleo okankaikei, eya wane one modatke. 59Pris Suwaine eŋe so ŋei wawaine korop, eŋe Yesu wane isi don maratkau paki, gube qesat don solaino kito more, qeu seukeyakane don aukoi. 60Ŋei loutneŋo sariu paki, isi don zok loutne solaino qe rawarekoi, ŋo siluŋ donene eyaŋo wele mi okange. Pakiso ŋei etke ere wakone saketkoik. 61Paki rakoi, “Ŋei iwaŋo iwa yale rake, ‘Na Kaisale wane Bakom Urum iwa kito ra barakewe, ariki kaiwe karewe yewaka koso maulukkale.’ ”

62Pris Suwaine eŋe wiye okoraki paki, Yesu olale rake, “Eŋe geŋane don ramami, eya wane turuŋine edanikenane mane ma okoramaine, me mida?” 63Yesu eŋe siluŋ meune qoeki okorake. Pris Suwaine eŋe koso manerop olale rake, “Kaisale gege togon welaine, eŋane kaitko qeson-ganbe, ge welekatne Mesiya, Kaisale wane gipole gemaineo, yemo ŋedannom.”

64Yesuŋo mainge rake, “Ge mo eya ramaine, ŋo na korop ŋidanbe detpi, naso iwao ŋine ge ari more, ŋine korop baŋ kau, Ŋei Wawainane Gipole, Kaisale zomine kakapa suwainane metine wonino metki paki, qeliwo kezoŋ kutno sariyake!”

65Yale raki, Pris Suwaine eŋe takotine ma barake more rake, “Eŋe Kaisale mabaik kamaike! Ŋene koso raŋem qesat ŋei eŋe sari, eŋane don mi rakei, yeine! Ŋine eŋane don qotkoine mo iwa raki detkamami! 66Ŋine daleo detmami?”

Eŋe mainge rakoi, “Eŋe sot korop, eya wane eŋe maine seukeyake.”

67Yale rau paki, kaitino sopotka more qekoi, paki ŋei natne qekoi, edo rakoi, 68“Mesiya ŋenane don saeŋine ranom! Detnom, maŋo gekumaike!”

Petoroŋo Yesu Bisopkake

69Petoro eŋe qeinat mat wane sen kotino metki, Pris Suwainane qelit ŋerep maneŋo eŋano sari more rake, “Ge yaleka Yesu Galili kepeo ŋine, eŋerop weneŋ gekone.”

70Ŋo eŋe korop eŋane kaiteno bisopke more rake, “Ge don ramaine, na eya mi detmaile.” 71Yale raki paki, eŋe mat wane sen eya wane madetko ari wakesiyakane okange, paki qelit ŋerep maneŋo kaki paki, ŋei yewa metkoi eŋe edane rake, “Ŋei iwa eŋe Yesu Nazaret matkoŋine, eŋerop geke.”

72Petoro eŋe koso eya bisopke more rake, “Welekatne ramaile, na ŋei yewa mi detkamaile!” 73Naso nigatne azoŋgi, eya wane ŋadino ŋei yewa okorakoi, eŋe Petoro wano sariu paki rakoi, “O welekatne, ge eŋane tego ŋine mane iwa. Ge don tanik ŋone ramaine, eyaŋo kine qe wakongi detmaine!”

74Rauso, Petoroŋo don togoleka bisopke more rake, “Welekatne, Kaisale wane kaitko ramaile, na don welekatne mi ŋidanmaileo, yemo Kaisaleŋo wikile niniyake, na ŋei yewa mi detkamaile!”

Rakiso, eyaka tiyak bokake. 75Pakiso Petoro eŋe Yesuŋo don iwa yale olatke, “Ge atak karewe, mi det kamaile, ra bisop nannom, tiyakŋo atak karewe bokayake.” Eya detsoroke more, saket ariki paki, wetine tabaeki zok arokke.

Currently Selected:

Matayu 26: onsNT

Highlight

Copy