Matayu 27
27
Ŋei Eŋe Yesu Pailat Wano Ma Arikoi
1Kepe qaeki ruworopka, pris ŋetne korop so Yuda ŋei suwaine, eŋe Yesu qeu seukeyakane don aukoi. 2Eŋe mulap togoleŋo Yesu metine wokomge more mau paki, Roma ware ware suwaine Pailat wano ma ari birakakoi.
Yudas Eŋe Yesu Ware Ware Wano Ma Ariu Kaki Paki Ari Ebine Rapokke
3Yudas, siron qeqe ŋei, eŋe ongi Yesu mo seukeyakane ra togolekoi, yale kaki paki, wetne mainge more, wesi silwa 30 eya koso mazinge ari Pris ŋetne so Yuda ŋei suwaine ebonge. 4Paki rake, “Na sot korop okanbe paki, ŋei sotine midaine iwa ma wakonka seuseuwo birakamaile!”
Eŋe mainge rakoi, “Eya ŋenano onoka wane sari ramaine? Eyamo geŋone aboŋ!”
5Yudas eŋe wesi yewa biraki, Bakom Urumgo wakiso biraone ketke. Ket ari more so, oŋomka ebine rapokke.
6Pris ŋetne eŋe wesi yewa mau paki rakoi, “Wesi iwa yemo weŋem kiti kitine, eya wane ŋene ŋenze ra rokop donze yewa qe barake more, Bakom Urum wane wesi kiteo mi biraŋem kesiyake.” 7Eŋe don auye, dereret okan naguwi paki, eya wane ŋadino wesi yewa mau paki, kap gola mama wane kepe mane eya qolekoi, eyamo lobo ŋei abaran ŋine sari sarine, eŋane deŋesere mane okaniyakane. 8Eya wane eŋe kepe yewa eŋetne, “Weŋem wane kepe,” orakoi, wane naso iwao pamaike.
9Yale okanbi, propet Yeremaiyaŋo don mane iwa yale rake, eya wane wele wakonge, “Eŋe wesi silwa 30 eya makoi, Israel ŋei eŋe dereret okannagu more, wesi yewa ŋei eya qolekakei wane biŋek qekoi. 10Paki wesi yewaŋo ma more, kap mama wane kepe mane qolekoi, eyamo Waomŋo nolatke, eya wane rokopko.”
Pailatŋo Yesu Qesonkake
11Yesu eŋe Pailat wane kaitko okoraki, oŋo qesonka rake, “Ge Yuda ŋei eŋane ŋei waom me?”
Yesuŋo mainge rake, “Goŋom mo eya ramaine.” 12Eŋe pris ŋetne so ŋei suwaine edo gube qesat don solaino more rakoi, eya wane turuŋine mane mi mainge edange.
13Eso eya wane Pailatŋo olale rake, “Ge don iwa korop solaŋono qeu paki ramami, eya mi detmaine me?”
14Ŋo Yesuŋo don mide mane nigatne mi mainge olatke, eso eya wane Pailat eŋe zok manerop oŋaine qaeke.
Pailatŋo Yesu Kibego Qekei Wane Rakokke
15Aŋeloŋo Loloŋonge Naso, yewao Pailat eŋe ŋei ŋerep magu edo rauso, mulap ŋei mane siwotkaki, mulap urumgo ŋine saket okanmaŋke. 16Wane, naso yewao ŋei mane eŋetine Yesu Barabas, eŋe mulap urumgo metke. 17Eso eya wane ŋei ŋerep magu eŋe sari lewageu, Pailatŋo qeson one rake, “Ŋine ma ŋei siwotka ŋibonikalane wetkemami? Yesu Barabas me Yesu, Mesiya oramami?” 18Pailat eŋe kine mo detlukke, onoka wane eŋe Yesu wane det worik okanbi paki, ma ari eŋane meto birakakoi.
19Pailat eŋe wano wanok urumgoka metki, eŋine ŋanomineŋo don mane iwa yale motki arike, “Ge ŋei sotine midaine, eya kine kine mane misuk okankaikene, onoka wane na yatne ruwoo kulu kulu kawe paki, eŋane ra more wikile zok suwaine maratkele.”
20Pris ŋetne so ŋei suwaine eŋe ŋei ŋerep magu taleongoi, eŋe Pailat olatpi Barabas siwotka ebongi paki, Yesu birakaki qeu seukeyakane. 21Ŋo Pailatŋo yemo qeson one rake, “Ŋei etke iwa erano ŋine ŋei diyawa siwotka ŋibonikalane wetkemami?”
Eŋe rakoi. “Barabas!”
22Rau Pailatŋo qesonone rake, “Pakimo na Yesu, Mesiya oramami, eŋe daleo okankaikale!”
Eŋe rakoi. “Eŋe kibego rasu kanom!”
23Pailatŋo yemo qesonone rake, “Onoka sot okangane?”
Pakiso eŋe togoleka boka rakoi, “Eŋe kibego rasu kanom!”
24Pailat eŋe mo kake, eŋane don eyaŋo mi rokoponge, kawali suwaineka wakoniyakane okange, eya wane eŋe doku natne ma more, ŋei ŋerep magu eŋane kaiteno metine saukki paki rake, “Ŋei iwa seukeyake, yemo noŋo rawe mi seukeyake! Iwa yemo ŋinane aboŋ!”
25Ŋei ŋerep magu eŋe mainge rakoi, “Eŋane seuseuinane turuŋ yemo qeligenom, ŋene so doko ŋosakopze ŋenane kutzo pa wayake!”
26Pakiso, Pailat eŋe Barabas siwotka ebonge, ŋo Yesu yemo kumunamŋo qeki paki, kawali ŋei eŋane mete eno birakake, kibego rasukaikei wane.
Kawali Ŋei Eŋe Yesu Isibela Qebela Okankakoi
27Pailat wane kawali ŋei eŋe Yesu mau paki, ware ware wane urum koto ma waketkoi, pakiso kawali ŋei korop eŋe sari qeyatkakoi. 28Paki, eŋe eŋine takotine eya kito qoke more, takot weŋemka kiroine eya birakakoi. 29Pakiso, eŋe sitman wakelerop, eyaŋo ŋei waom marok mane mau paki, lewino birau ketkiso, kumunam mane metine wonino motkoi. Paki eŋe eŋane osino wawetene qeu paki, isi bela qebela okankau paki rakoi, “Yuda ŋei eŋane ŋei Waom, naso kiroroine ge ari arikene!” 30Eŋe sopotkau paki, kumunam oma ka more, lewino rasipokkoi. 31So eŋe isi bela qebela okankawareu qoeki, takot weŋemka kiroine eya kito qokkau paki, eŋine takotine eya koso mainge birakakoi. Pakiso eŋe kiruŋaŋo kibego rasu kakeiwane iwenka saket arikoi.
Yesu Kiruŋaŋo Kibego Rasukakoi
32Eŋe numao ariu paki, ŋei mane Sairini matko ŋine, eŋetine Saimon maratkau paki, qebin kau Yesu wane kibeŋ qabeŋ tewekki arikoi. 33Eŋe ari mage, kepe mane eŋetine Golgota, eya lotkekoi. Kepe eŋetine eya wane kine iwa yale, “Lewe Setne Kepe.” 34Yewa rau pakiso, eŋe wain wisi tabaine teine eyarop mauluk maulukine eya manbi, ne detki paki, waulukke.
35Pakiso, eŋe kiruŋaŋo kibeŋ qabego rasu kau paki, takot kine kineine eya wezu qe yuwanbi paki, mapoke amanagukoi. 36Eya wane ŋadino eŋe yewa eŋane diyam metkoi. 37Lewine kutno dere worik donene dapore det okanikeiwane, don iwa yale qekoi, “Iwa Yesu, Yuda ŋei eŋane Ŋei Waom.” 38Pakiso eŋe borikine mama etke Yesurop weneŋ kibeŋ qabego kiruŋaŋo rasu-otkoi, mane wonino, ŋo mane kanaino.
39Ŋei ŋerep osino kere pora okan lewetene kaliŋ qeliŋ kito ruzake, Yesu mawa maket kitou paki rakoi, 40“Ge Bakom Urum ra barakenom ketki, kaiwe karewe yewaoka koso maulukkenane rakone! Ge weleka Kaisale Gipole gemaineo, yemo ge goŋomka qesiŋ nagunom! Kibeŋ qabego ŋine qoe ketnom!”
41Numa weku yewaka pris ŋetne so ra rokop don kito ebo ebon so Yuda ŋei suwaine, eŋe isibela qebela okanka rakoi, 42“Eŋe ŋei ŋerep natne qesiŋonge, ŋo eŋine yemo mi qesiŋ nagumaike! Eŋe Israel eŋane Ŋei Waom me? Eya wane eŋe kibeŋ qabegoŋine baŋ qoe iwa kesiyakeo, yemo ŋene baŋ eŋe detlukka malip kaikene! 43Eŋe Kaisale detlukka malipkaki paki, na Kaisale wane Gipole ra okanmaike, eya yemo maine, ŋo Kaisaleŋo wetne eŋane pamaikeo, yemo ukude eŋe qesiŋkaki, ŋene kaŋem!”
44Borikine mama Yesurop weneŋ kibeŋ qabego etkukoi, ere yalewaka mabaik qebaik okankakoik.
Yesu Seukke
45Kepe oŋa bango 12 kilok, yewao kepe yewa korop ruwo suwaine kere panaman kito paki, sa 3 auwa okange. 46Naso 3 kilok okangi, Yesuŋo togoleka boka more rake, “Eli Eli lema sabaktani!” Don eya wane kine iwa yale. “Kaisalene, Kaisalene, ge onoka wane qeliŋ-nanmaine?”
47Ŋei natne yewa okorakoi, eŋe dere more, iwa yale rakoi, “Eŋe Elaiya wane bokamaike!” 48Eŋano ŋine ŋei mane eŋe ikopka biririke ari more, wain dokune tabainerop eyao lap lapŋo qe muruge more, kudupko piseki paki, Yesuŋo neyakane mange.
49Ŋo ŋei natne eŋe rakoi, “Ŋene tomaka more Elaiya eŋe qesiŋ kayakane sarimaikeo, yemo kaŋem!”
50Yesu eŋe koso manerop togogoleka bokakiso, yewaka asuine saket arike.
51Pakiso, laplap suwaine Bakom Urum koto mode ket okorake, eya keuwoka pun tuk wiri, weti kutno ŋine sariki, qela kino qoe, etke leleke. Kepe qiseki wesi suwaine korop din bun wiri, yeo yeo arikoi. 52Deŋesere poripke aŋaŋgi, so Kaisale wane ŋei magu loutne koboboine ge more seukkoi, eŋane pareŋene eya ma wirikongi, wisikae wiye warekoi. 53Eŋe wiye wareu, Yesu wisikae wiyeke eya wane ŋadino eŋe Mat Koboine Suwaino Yerusalem ariu, yewa ŋei ŋerep loutneŋo marat onwarekoi.
54Kawali ŋei eŋane ware ware ene, so kawali ŋei eŋerop weneŋ geu paki Yesu warekakoi, eŋe memeya make, eya so masi kine kine wakonge, eyakakoi, paki oŋaene qaeki rakoi, “Ŋei iwa eŋe welekatne Kaisale wane Gipole!”
55Ŋerep loutne eŋe yewa abaran okorau paki potpi arikikakoi, eŋe Yesu ŋadino mogatka Galiliŋine sarikoi paki, eŋe qesiŋkakoi. 56Eŋane keuwo yemo Mariya Magdalena, Mariya mane Yakop so Yosep erane nagaetne, eŋe Zebedi gipoletkine erane nagaetne.
Yesu Pareŋine Kem Koto Motkoi.
57Kepe ketki rarapko, ŋei mane aboŋine suwaine, Arimateya mat welaine mane, eŋane eŋetine Yosep, eŋe yaleka Yesu wane medep geke. 58Eŋe Pailat wane kaitko ari waketki paki, Yesu pareŋine ma ariyakane qesonkake. Pakiso, Pailat eŋe Yesu wane pareŋine Yosep manikei wane ra ebonge. 59Eso Yosep eŋe Yesu pareŋine eya maki paki, laplap musele maneŋo kawetkake. 60Pakiso eŋine deŋesere biŋek mane kem koto muse musen wesi aŋaine koto yaso maulukke, eyao motke. Motki paki wesi suwaine rodiŋgi ari eyaŋo deŋesereo wake waket aŋaine eya kito wonge metkiso, eŋe arike. 61Mariya Magdalena so Mariya mane ere yewa deŋesere ka mogare metkoik.
Kawali Ŋei Eŋe Deŋesereo Diyam Metkoi
62Kepe qaeki kaiwe maneo eyamo qezareko met met eya wane naso qoeke, pris ŋetne so Parisi eŋe korop Pailatrop lewaŋgoi. 63Paki olale rakoi, “Suwaine, ŋene detmaine, isi ŋei eya eŋe wisika geki paki, iwa yale rake, ‘Kaiwe karewe qoeki, eya wane ŋadino na baŋ wisikae wiyekale.’ 64Yale rake, eya wane ge ra edannom, eŋe deŋesere eya diyam seleleine ma warekau, kaiwe karewe eya qoeki, eso eŋine dokoine eŋe maine mi eweke more, ari pareŋine eya baŋ kobu makei, paki ŋei ŋerep mane mi edane raikei, ‘Eŋe mo seuseuwo ŋine wisikae wiyeke.’ Iwa ŋadino isi eyaŋo yemo zok qotkoine, alakan isi eya yuwankayake.”
65Rauso Pailatŋo edange, “Ŋine diyam ŋei mane mau paki, ari deŋesere eya mauluke maine warekakei.”
66Eso eŋe bira nagu ari, so wesi suwaine eya ekiŋo sikatine qe makatakeu metki, so kawali ŋei natne biraonbi diyam metkoi.
Currently Selected:
Matayu 27: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
