Mareko 6
6
Nasaret Ŋei Ŋerep Edo Yesu Ŋadek Kakoi.
1Yesu eŋine so dokoine eŋe mat yewa qelige more eŋine matine Nasaret arikoi. 2Pakiso Qezarek Naso okangiso eŋe ari ŋei ŋerep Yuda eŋane kisi maep lewa lewaŋ urum kotino metkoi, yewa kito ebonge. Paki, magu suwaine metkoi, eŋe detka more dereretinane oŋaene qaeki rakoi, “Ei! Ŋei yewa eŋe don yewa diyao ŋine meke? Dereret yewa maŋo manike? Eŋe eŋine masi togole iwa dalino mamaike? 3Ŋei yewa eŋe matmama. Eŋe Mariya wane gipole. Eŋane ŋolekoune Yakop, Yosep, Yuda so Simon so qakoune iwa ŋenerop weneŋ gemami.” Eŋe yale ra more ŋadek kakoi.
4Eya wane Yesuŋo iwa yale edange. “Kaisale wane qelit ŋei, propet eŋe mat baŋem kisi maep urata ma ge arimami, edo eŋane eŋetene zok mawaon okanmami. Ŋo, matkopene so weŋem sotak so magak nabok wakon wakon matene kotino edo eŋane eŋetene maket bira-on okanmami.”
5Eso yalinane Yesu matkoune ŋei ŋerep eŋane mali malipene mi pake, eya wane Yesu eŋe pore ka more masi togogole eŋano zok mi make. Eŋe zoma ŋei ŋerep weku weku metine more ma menaŋonge. 6Pakiso, Yesu eŋe Nasaret mat qelige ari, mat natne yewao lolike ge more, Kaisale wane kisi maep ŋei ŋerep edange. Ŋo ŋei ŋerep eya eŋe wetŋo mi malipkakoi, eŋane yemo dere mezet okange.
Yesu Eŋe Dokoine 12 Uratao Biraonge
7Yesu eŋe dokoine 12 eya naso yewao qedugu-one more etkeka etkeka, matko matko biraonge. So eŋe kisi maep ra qelaŋanikei wane so ŋei ŋerep eŋano asu qotkoine esopongei wane zonom takotonge. 8Pakimo edange, “Ŋine qesiŋine maine qesiŋnagukei wane makei, eso kine kine natne weneŋ mi ma arikei, ŋara so kite gerep me wesi kite mane misuk ma arikei, eya yeine, 9Ŋine kiye kulit so takot suwaine weku bira arikei, takot etke eyamo yeine.” 10Eŋe koso edange, “Ŋo, ŋine mat maneo ari lotke more ŋei ŋerep qeson onbi edo raikei, maine iwa saket mere pa wiye okanbi, mat yewa wane kotinoka mere pa wiye okanikei. 11Ŋo mat mane edo ŋinane don mi dere more, ŋinerop mi mesikei wane rauso, ŋine mat yewa qelige more, kiye ŋino kepe nalek yewa sauke rakokeu ket metki, so eŋe masi eya ka more desikei, Kaisaleŋo ŋenerop ŋaba okanmaike.”
12Pakiso, dokoine eŋe matko matko ari more, mat louloutne eyao kisi maep iwa yale edangoi, “Ŋine masi tanik kine kine qotkoine eya korop qelige ŋadekka more wet mainge wareu!” 13Pakiso, eŋe asu qotkoine louloutne zok ŋei ŋerep eŋano ŋine osop one moreso ŋei ŋerep zomaenerop eya kelok tau-one more, korop ebu ma menaŋ ongoi.
Herotŋo Rake Yesu Eŋe Yohane Doku Tau Tau Me?
14Naso yewao kepe ware ware Herot eŋe Yesu wane don kisiŋo detki mo zok mat korop rokopkeke. Ŋei ŋerep natne eŋe rakoi, “Yohane doku tautauŋo mo deŋesereo ŋine wisikae wiyeke. Eya wane eŋe masi tanik zonominerop togogole iwa mamaike.”
15Ŋo ŋei natne eŋe rakoi, “Eŋe Elaiya!” Natne eŋe rakoi, “Eŋe Kaisale wane qelit ŋei propet mane, eŋe mo propet sogine gekoi, eŋe yaleka.”
16Kepe ware ware Herot eŋe eya dere more rake, “Yohane doku tautau eya mo noŋo sogino ebine kitatkole. Eŋe koso yewa mo wisikae wiye gemaike.” 17-18Mo sogino Yohane doku tau tau eŋe wisika ge more don togole Herot olale more rake, “Ge ŋonŋone Pilip wane ŋanomine, Herodiyas eya kobu makone.” Masi yewa mi kopkemaike. Eso Herot eŋe eya wane det worik okane more ŋeikoune bira-ongi ari Yohane malipka mulapŋo togole lukka more warage ari mulap urumgo bira-kakoi.
19Ŋo Herodiyas eŋe Yohane wane weneŋ dere worik okanka more qeki seukeyakane wetkeke so okange, ŋo Herot eŋe Yohane maine warekake. 20Herot eŋe Yohane ŋei koboine, Kaisaleŋo birakake, dere qeka okane more kaet-kaki mauluke warekake. Herot eŋe naso natneo Yohane wane aŋaino ŋine don natne dere more naso baŋem qisemaŋke.
21Paki so gemage, Herodiyas eŋe baŋ Yohane qeki seukeyakane numaine iwa yale marat-kake. Herot eŋe ŋara suwaine maki zeki eŋine wakon wakon nasoino more edoraki ŋei loutne sarikoi. Pakiso, eŋe gavaman kepe ware ware suwaine so kawali ŋei eŋane ware ware suwaine so Galili kotino mat suwaine mere arimaike, eya wane ŋei suwaine suwaine qeson onge. 22Herodiyas borasine eŋe sari eŋet kito ŋei eŋane kaitko oreke, eya wane Herot so ŋei ŋara nekoi, eŋe koropŋo eŋane kait masi so sola tanik eya ka more simin onge, eya wane Herot eŋe ŋerep natawen yewa qesonka rake, “Ge kine kine yewa me yewa wane ra more qeson nannom, na maine ginikale.” 23Eŋe atak loutne ra togoleke, “Na ra togolemaile. Kine kine yewa me yewa maine nolatnom ginikale. So naŋane kepe aboŋ suwaine eya ginikalane! Ranom na maine keuwoka mapoke more ginikale.”
24Pakiso, ŋerep natewen yewa eŋe ari nagaine iwa yale qesonkake, “Na Herot onoka wane qesonka rawe niniyake?”
Rakiso, Herodiyasŋo olatke, “Ge ari Yohane doku tau tau ebine kitasiyakane qesonkaikene!”
25Yale olatkiso, ŋerep yewa eŋe ikopka biririke Herot wano ari qesonka rake, “Naŋane similene iwa yale. Ge ukudeka Yohane doku tautau wane ebine kitare more peletko more naŋano ma sari ninnom!”
26Herot eŋe yewa dere more zok detki qomine umare lukke, ŋo mo ŋei suwaine eŋane deeno atak loutne takorakot ra togole okange, eya wane eŋe dalino koso dereretine maingeki rap, 27eya wane ikopka kawali ŋei mane birakaki ari mulap urum koto Yohane wane ebine kitare more, lewetine eya make. 28Pakiso, eŋe Yohane wane lewine eya pelet maneo more, so ma sari ŋerep natewen yewa mangi, so eŋe ma ari nagaine mange. 29Pakiso, eya wane ŋadino Yohane wane dokoine gekoi, eŋe dere so sari Yohane wane pareŋine eya ma ari deŋesereo dukkakoi.
Yesu Eŋe Ŋei Ŋerep Ŋara Gumeonge
30Eya wane, Yesu eŋe dokoine mo etkeka etkeka, matko matko ari warekoi. Eŋe zinge sari koso Yesu wano lewage more, don kisi urata kine kine makoi, so kisi maep magu edangoi, eya olatwarekoi. 31Pakiso, ŋei ŋerep louloutne Yesu wano ari sari okanbi, eya wane eŋe ŋara mire nene wane numaine mi wakonge. Eya wane Yesuŋo dokoine edane rake, “Wiyeu, kepe ŋeiine midaino, ari more ŋenzeka nigatne mere zonom maŋem.” 32Rakiso, eŋe kiyeke seki mane nigatne ma more wiye kepe mane ŋei midaino enŋeneka arikoi.
33Ŋo ŋei ŋerep korop eŋe mo onbi ariuso, eŋe ikopka detone more ŋadeeno mogatone taganka biririke qalakko yewa Yesu eŋine so dokoine arikoi, yewao alakane ari lotkekoi. Matne matne ŋei ŋerep korop yewa sarikoi. 34Yesu eŋe seki qeliŋka ket more ŋei ŋerep magu suwaine yewa one more qom borik suwaine eŋane okange, eŋe ongi maine mi metlukkoi. Eŋe medep nigatne nagamagaene seuseune, wanap yale metpi, Yesu eŋe kisi maep loutne kito ebonge. 35-36Kepe zinge kere qoeyakane okangiso dokoine eŋe Yesu wano sari rakoi, “Ge magu iwa edane bira onnom eŋe mat osop mere arimaike, yewao ari more ŋara maratkau, kepe iwa ŋei midaine so ruwo mo kereyakane okanmaike.”
37Pakiso, Yesuŋo iwa yale edange, “Ŋido ŋara ebonikei, eŋe rakoi, ‘Ŋei nau! Ŋene 500 wesi setne eyaŋo eŋane ŋara maine mi qolekene.’ ”
38Yesu eŋe koso qeson onge. “Ŋara darap ŋenzo metmaike? Ari ka more sari nolatpi!” Raki eŋe ari ka more sari olale rakoi, “Kasap nigatne mete mane so zawon etke.”
39Yale rauso, Yesuŋo dokoine edane rake, “Ŋine ŋei ŋerep maguine maguine mapoke bira onbi pese ket touk kutno metpi.” 40Rakiso, eŋe yale ŋei ŋerep mapok onbi magu mane 100, magu mane 50, yale mere arikoi. 41Metpiso, Yesuŋo kasap mete mane so zawon etke eya ma more malipka okora qeliwo potki waki mosopka more kasap so zawon eya mapoke more, dokoine ebongi, damo qe ŋei ŋerep magu yewa ebonwarekoi. 42Paki, ŋei ŋerep magu yewa eŋe korop neu ŋatene qeki rokop onwareke. 43Paki dokoine eŋe ŋara nekoi, eya wane tutule eya qedugu more rosa 12 yale rosakkoi. 44Ŋei ŋara yewa nekoi, eŋe 5,000 yaline.
Yesu Eŋe Doku Namuŋ Kutno Gesoke Arike
45Ikopka, Yesuŋo dokoine qebin ongi eŋe sekiwo wa more doku namuŋ nat parom Betsaida oken alakane arikoi. Ŋo eŋine yemo yewa mere ŋei ŋerep magu yewa biraongi mateno ariwarekoi. 46Yesu eŋe ŋei ŋerep bira ongi korop ariwareuso, eŋe bonaga mane nigatne eyao wa more meŋenka metke. 47Ŋo, ruwoo dokoine eŋe seki kutno doku namuŋ kebago metpi so, Yesu eŋineka tagalo metke. 48Yesu eŋe ruwo panaman koto dokoine ongi momoŋo qebinongi, eŋe urata suwaine zok pelekoi. Paki, kepe qae qae nasoo. Yesuŋo doku namuŋ kutnoka gesokma gesokma sari osoeno lotke more, yuwanoniyakane okange. 49Dokoine eŋe Yesu doku namuŋ kutno gesokma gesokma sariki ka more, kuroge aroke rakoi, “Ŋei seuseune eŋane oŋa-eneŋo sarimaike.” 50Eŋe enŋenarek ka more kaet suwaine okangoi, pakimo, Yesu eŋe yewaka done raki paki, edane rake,
“Ŋine togoleu iwa yemo noŋom sarimaile! Ŋine misuk kaet ŋuniyake!” 51Yale ra edane more seki kutno wa metkiso momo doŋ mangi dokoine eŋe eya ka more, oŋaene qaeki metkoi. 52Eŋe Yesu wane zonomine mi detlukkakoi. So Yesu eŋe ŋei ŋerep magu suwaine ŋara ebonge, eya wane eŋe dereretene mi qelaŋange, eŋe dereretene zok manerop siukki qelaŋ okangoi.
Yesu Eŋe Genesaret Kepeo Zoma Ŋei Loutne Ma Menaŋonge
53Yesu eŋine so dokoine, eŋe Galili doku namuŋ yuwane more, ari Genesaret lotkekoi. Galili doku namuŋ nat paromino kere kito more seki qalakko lukkakoi. 54Sekiwo ŋine qelige ketpi, so mat yewa wane ŋei ŋerep eŋe ikop mo Yesu ka more detkakoi. 55Eŋe Yesu wane donkisi dere more ikopka ket biririke matko matko ari zoma ŋei ŋerep zuwaŋone ebu sarikoi. Ŋo natne edom numa ari ari wane konap mi okangoiwo, eya teweo pise tewekone korop Yesu wano ebu sariwarekoi. 56Yesu eŋe korop mat nigatne kotino me mat suwaine ari lotkemaŋke, rokop eŋe zoma ŋei ŋerep ebu sari sobeŋ keuno biraone more Yesu meŋenka ramaŋkoi, “Zoma ŋei ŋerep iwa eŋe maine geŋane takotŋone eya uwakakei. Rau eŋe detongi, meteene takotino uwa ka more menaŋ-onmaŋke.”
Currently Selected:
Mareko 6: onsNT
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
