Luk 16
16
Urọk ijo ogwu ibot ikwaan̄ òkakaan̄ ujọn̄ọ ifuk-ibot
1Jisọs onenito urọk ge inyi ebi udun̄ kan̄ ibe, “Îkaan̄ ogwu ubọọn̄ ge òkakaan̄ inu enenen, mè ikaan̄ ogwu ibot ikwaan̄ òkikpọ chieen̄ me lek otutuuk inu îkaan̄be. Usen ge ogwu ubọọn̄ yi oneninọ ibe ke ogwu ibot ikwaan̄ kan̄ ya ìkpọkpọ ikijijaka inu ọmọ otapbe ogwugwu me ubọk. 2Eya orọ, ogwu ubọọn̄ yi ogwegwen ogwu ibot ikwaan̄ kan̄ ya, mè ido ibe, ‘Ìre keke ke nkinọ ikeyi ofolek kwun̄? Mgbọ keyi, na rọ ifuk nyi emi ubọk osabe ikpọ chieen̄ me lek otutuuk inu geelek ntapbe owu me ubọk, mije, owu òkpoyaka ire ogwu ibot ikwaan̄ inyi emi igak ikeya.’
3“Ogwu ibot ikwaan̄ ya onenikup me lek kan̄, mè ibe, ‘Jei, ìre m̀barọrọ mgbọ keyi? Nte uwu n̄a mônibọkọ ikwaan̄ yi isan̄a emi me ubọk. Emi ǹkakaan̄ efuuk isasa ikisi ikwaan̄ uko. Ofifi kan̄, esip ìkpochieek ibe emi ǹkengọọk ǹkana ere m̀beek inu. 4Nriọọn̄ inu mbarọ inyi ebi ene ebọkọ emi etap me uwu kiban̄ mgbọ nte uwu n̄a isilap emi isan̄a me lek ikwaan̄ me ere keyi.’
5“Ineniria ikwaan̄, me nlelet, igwen ebi geelek ìkakaan̄ nte uwu kan̄ urieek, me ge me ge, mè ido ogwu adasi ibe, ‘Ìre kpasi urieek ke okaan̄ nte uwu n̄a?’
6“Ogwu urieek keya ofọfọọk ibe ke ọmọ ìkaan̄ urieek efit ogbokot aran̄ olifu jeeta.
“Itutumu inyi ogwu urieek ya ibe, ‘Kayaka ìfiat mgbọ, bọkọ ikpa urieek kwun̄, siki kweek, mè ge ibe ke îre efit ogbokot ini.’
7“Igwegwen ogwu òso iba, mè ido ibe, ‘Ìre kpasi urieek ke okaan̄ nte uwu n̄a?’
“Ogwu urieek keya ofọfọọk ibe ke ọmọ ìkaan̄ urieek obop#16:7 Me usem Giris, îre efit otitọ. Otitọ ge ìre akọp akpa. Eya onenisibi obop akpa. Ikeya si, efit akpa jeeta ìre akọp otitọ jeeta me usem Giris. akpa akpa wit ge.
“Ibebe ogwugwa, ‘Bọkọ ikpa urieek kwun̄, mè ge tap ibe ke îre efit akpa jeeta.’
8“Mgbọ ogwu ubọọn̄ ya onọbe inu ya ogwu ikwaan̄ kan̄ ya orọbe, itọtọn̄ ijo ogwu ibot ikwaan̄ ya enenen mije ujọn̄ọ ifuk-ibot îkaan̄be inyi lek kan̄.” Jisọs onenitumu ibe, “Me atikọ, ebi ìkigọọk inu linyọn̄ keyi mîkisa ifuk-ibot igọọk ebi melek kiban̄ irọ inu igak ike ebi ìkup me emen utoon̄ eyi Awaji ekirọ. 9Ikeya si, m̀be enyi: Ìsa inu ubọọn̄ kinyi me linyọn̄ keyi ìtet unene ìnyi lek kinyi. Kperiọọn̄, ikaan̄ mgbọ inu ubọọn̄ cha isiraka, enyi mêre ebi ebebọkọ itap me uwu eyi òbokup ire mgbọ ikakaan̄ge itata.
10“Mije, ene geelek ekọtbe itoon̄ ejit me lek me lek sọntiik inu, mêkọt itoon̄ ejit me lek si me lek ilile inu. Ubọk yaage si, ene geelek ekakọtge ìtoon̄ ejit me lek me lek sọntiik inu, kpebekọt itoon̄ ene ya ejit me lek si me lek ilile inu. 11Eya orọ, ire kpekọt itoon̄ enyi ejit me lek me ubọk enyi ekisa ikpọ chieen̄ me lek inu ubọọn̄ eyi linyọn̄ keyi, ìre ekene obokana atata inu ubọọn̄ eyi emen inyọn̄ itap enyi me ubọk? 12Ofifi si, ire enyi kpekọt ikpọ chieen̄ me lek inu ofifi ene òkup enyi me ubọk, ìsibi ibe, ire inyi enyi eyi kinyi gaalek, ke enyi kpebekọt ikpọ chieen̄ me lek si. Eya orọ, kpebenyi enyi inu eyi kinyi.
13“Kpunu gwun̄ uwu geege òbokọt ikisi ikwaan̄ inyi nte uwu iba me mgbọ yaage. Ire ìkama ene ge, mè ìcha ogwulọ, môsa otutuuk ejit kan̄ isi ikwaan̄ inyi ene ge, mè ikpọ ogwulọ chieen̄ isiki. Ikeya si, enyi kpebekọt igọọk Awaji, mè ikigọọk si ikpoko.”
14Mgbọ ebi Farisi enọbe ikọ cha, ema ebebene ikichak Jisọs, mije, ema mîma ikpoko enenen.
15Jisọs obebene ikitumu inyi ema ibe, “Enyi kechi! Me isi ebi ene, enyi ekirọ kubọk enyi ìre ebi ata ife. Ire, Awaji îriọọn̄ inu òkup me emen ejit kinyi isan̄a kpai. Ìriọọn̄ ibe ke inu òmimin enenen me isi ebilene, ìre mbuban inu me isi Awaji.
Ijejeen̄ ofolek Ikan kè Mosis, mè iyayaak olom mè nwa
16“Ikan kè Mosis melek inu ebi nriran ukot ikaan̄ egebe ìkup me uyọt bene me ukot ikaan̄ na re ukot kè Jọn ògwook mun̄. Ire, bene me ukot kè Jọn fo isi, ijejeen̄ eyi ata etip eyi Awaji îyaka inibọkọ irek. Mgbọ keyi, owuwa ene mêkibọkọ ata etip yi itap, mè ikije itibi uga ufialek, mè ikiraka inin̄ emen mkpulu ya. 17Ire, ike geelek, Ikan kè Mosis ìbokpọkpọ ikeke inye. Inyọn̄ mè ijọn̄ ichechep îfet igak inu òsisip ichit me emen Ikan cha ififiin̄ unye kan̄.
18“Ene geelek òjijit ogwu nwa, mè isi ido ofifi enenwaan̄ îrọn̄ ikan ugan-nwa. Enerieen̄ geelek òdodo ogwu enenwaan̄ ogwu ogwu olom ojitbe îrọn̄ si ikan ugan-nwa.”
Urọk kè Lajọrọs mè ogwu ubọọn̄
19Jisọs onenito urọk ge inyi ema ibe, “Îkaan̄ ogwu enerieen̄ ge òbọbọọn̄ ubọọn̄ enenen, mè ikitap ujuja unye otu ewe ofọnti ebi ubọọn̄, echi irio irio mè echi okuket, mè ikirie utop otu, mè ikiluk ubene ugwem usen geelek. 20Îkaan̄ si ogwu mbeek ge ekiben iniyik me otunchit uwu ogwu ubọọn̄ yi egwe geelek, inyi ikikweek ibeek inu. Erieen̄ ogwu mbeek yi ìre Lajọrọs. Otutuuk lek kan̄ ìre inya inya. 21Lajọrọs yi ìkikup me ere ya ikibeek ngigen̄e inorie òkinan̄a me inyọn̄ ikasi ogwu ubọọn̄ ya irọn̄ọ igwook me ijọn̄. Ògak ge, usini mgbọ, ibo îra ikifan̄a inu inilaka chieen̄ inya kan̄ cha.
22“Ogwu mbeek ya îbeek inu me ere ya ikeya ire usen mkpa kan̄. Usen îkwube, ebi osat Awaji ebeben ọmọ isi iyik me agba lek kè Ebereyam me irek ijọk me emen inyọn̄. Ogwu ubọọn̄ ya si okwukwu, ebeben ọmọ ifuun̄, ifofo ama ekwukwu. 23Me ama ekwukwu ya, îmun̄ ogbogbo ufialek me emen ukan̄. Inenikup me ere ya ibene chieen̄ imun̄ Ebereyam me ujọn̄ọ ere, mè imun̄ si Lajọrọs okupbe me agba lek kan̄. 24Itataan̄ ukpo igwen Ebereyam, mè iriaak ibe, ‘Ogwu nte Ebereyam, soso kaan̄ ejit nsan me lek n̄a. Ria Lajọrọs ibe ijiin̄ ibot otubọk kan̄ ge me emen mun̄, mè isa inirọn̄ọ itoon̄ emi me otu alọm inyi ǹsa ǹsuuk ebek, mije, emi gwa ǹkimun̄ ujaralek enenen me emen ukan̄ yi nkupbe.’
25“Ire, Ebereyam ofọfọọk ọmọ ibe, ‘Gwun̄ n̄a, kawuuk ibe ke mgbọ owu okupbe me ògat ugwem, ke owu obọkọ otutuuk ata inu òkukup inyi owu, me mgbọ Lajọrọs okibọkọ ijo inu. Ire, me mgbọ keyi, Lajọrọs ìkup me emen unwọọn̄ me ere keyi, sà owu oyaka inikup me emen ujaralek. 26Ògak ge, ikpele udọn̄ ge ọmọ òwa okupbe me etete kiji ebi ìkup me agan̄ keyi, melek kinyi ebi ìkup me agan̄ keya. Mije keya, ogwu iweek inanan̄a me agan̄ keyi isaba inu agan̄ kinyi, ìkpokọt. Ogwu ikup me agan̄ keya si, mè iweek isasaba inu agan̄ keyi, ìkpokọt isaba.’
27“Ogwu ubọọn̄ ya onenitumu inyi Ebereyam ibe, ‘Ire ikeya, soso ogwu nte, ria Lajọrọs si uwu nte n̄a me linyọn̄, 28mije, nkaan̄ ibot ngwan̄ ebirieen̄ go. Soso be Lajọrọs isi itaba ebi ngwan̄ n̄a cha ubọk me utọn̄, inyi ema ekanu ìninin̄ si me emen ujaralek yi nkupbe.’
29“Ebereyam ofọfọọk ọmọ ibe, ‘Ebi ngwan̄ kwun̄ mîkaan̄ Ikan kè Mosis, mè ikaan̄ si ijejeen̄ ebi Nriran ukot ikaan̄ egebe. Tele mè ema egban̄ utọn̄ me lek ijejeen̄ iba chi.’
30“Ogwu ubọọn̄ ya obebe, ‘In̄-in̄, Ebereyam nte n̄a, ire ogwu òkwukwu inan̄a me ekwukwu isi itumu ikọ inyi ema, ema mênọ, mè igwu ikom.’
31“Ebereyam ofọfọọk ọmọ ibe, ‘Ire ebi ngwan̄ kwun̄ kpegban̄ utọn̄ inyi Ikan kè Mosis mè ijejeen̄ ebi Nriran ukot ikaan̄, ìrere ogwu òkwukwu ojomo me mkpa, mè isi itumu ikọ inyi ema, ema kpebechieek si ikọ ene ya.’ ”
Currently Selected:
Luk 16: ANNa
Highlight
Share
Copy
Want to have your highlights saved across all your devices? Sign up or sign in
© The Nigeria Bible Translation Trust, 2013
