Ibeb 15
15
Awaji înyan̄a ibot melek kè Eberam
1Mgbọ inu chi otutuuk orakabe, Okumugwem onenitumu inyi Eberam me emen ilaak ọkpọchieen̄ ibe,
“Eberam, katet ukpook.
Emi me lek n̄a nre agbọ kwun̄;
mkpukpe kwun̄ îwa enenen.”
2Eberam ofọfọọk ibe, “Jei, Ogwukaan̄-ene Okumugwem, ìre keke ke obonyi emi? Kpọ, emi ǹkakaan̄ gwun̄. Îre ogwu usun̄ n̄a Elieja ogwu Damasikọs obokaan̄ uwu n̄a. 3Mije, owu Okumugwem òkanyi emi gwun̄ geege, îre ogwu usun̄ òkikpọ chieen̄ me lek uwu n̄a oborie ìrot n̄a.”
4Okumugwem otutumu inyi Eberam ibe, “Ìkare ogwu usun̄ yi oborie ìrot kwun̄. Îre gwun̄ òbonan̄a me akpalek kwun̄ isibi oborie ìrot kwun̄.” 5Okumugwem onenisa Eberam isibi oyet, mè initumu inyi ibe, “Bene chieen̄ kpọ akpa isinyọn̄, mè fuk-nu ntoronyan̄ òkup me akpa isinyọn̄ kpọ-nu, mè ìre owu môkọt ifuk iriọọn̄ otu ifuk kiban̄! Îre ikeya ke bọn owot iman kwun̄ ebewa ikup.”
6Eberam ochechieek ikọ ya Okumugwem otumube. Okumugwem onenisa me lek ichechieek ya ifuk Eberam kubọk ogwu ata irọrọ.
7Okumugwem otutumu inyi Eberam ibe, “Emi nre Okumugwem, ogwu ògwegwen owu isibi me ama Uru me ido Kalidia, inyi ǹnensa inyọn̄ ijọn̄ yi ǹnyi owu me ìrot.”
8Eberam onenido Okumugwem ibe, “Ogwukaan̄-ene Okumugwem, ìre keke ke emi mbasa iriọọn̄ ibe ke mâkaan̄ inyọn̄ ijọn̄ yi me ìrot?”
9Okumugwem ofọfọọk Eberam ibe, “Tet uman eriembuuk ge òsoso acha ita, mè ebot ge òsoso acha ita, mè orie arọọn̄ ge òsoso acha ita, mè ekerekwukwu ge, mè elesia ge, mè sa jet emi.”
10Eberam otititen̄e otutuuk inu cha isa ijet Okumugwem, mè ibak anam cha mbubak iba iba, mè ito mbubak ge iyaka isi ijeen̄ eyi òje melek kan̄. Ire, ìkabak unọn cha geege. 11Ebi kè unọn òtaka nkwukwu inu enenisusọn me ere ya. Ire, Eberam olililaba ema isan̄a.
12Mgbọ ura okinim, uga ilaak okekeme Eberam. Ikpele udun òkup urimi urimi okakana ichit ọmọ ke bùk. 13Okumugwem onenitumu inyi Eberam ibe, “Riọọn̄ me atikọ, ibe ke bọn owot iman kwun̄ mêre ebi ichen me ofifi ido, mè ikana usun̄ inyi ebi ido ya. Ebi ido ya mêtutuku ema efit acha ini. 14Ire, emi me lek n̄a mâsulu ebi ido ya ema mênin̄be usun̄ inyi osusut. Osusut ya isiraka, bọn owot iman kwun̄ mêsa owuwa inu ubọọn̄ inan̄a me ido ya isibi. 15Ire, owu môluk ugwem, mè ikan ijaan̄ lek enenen sabum owu obonikwu igọọk ebi nte nte kwun̄ me esuuk. 16Mgbọ bọn owot iman kwun̄ mêmumanabe iso ukot ini me ido usun̄ kiban̄, ema mêyaka igwu ikom ika inu me inyọn̄ ijọn̄ keyi. Mije, îre mgbọ ya ke ijo inu ebi Amọ ebi ìluk me inyọn̄ ijọn̄ yi ekirọ oboso ifuk. Mgbọ keyi, ijo inu kiban̄ ìkasoso-nu ifuk.”
17Mgbọ ura onimbe, nga ekpuk udun okakana ichit ere, Eberam omumun̄ otin̄ ibat ge oduku okibumu isibi me emen, melek ukan̄ nlak ge, okiraka me agbagba anam cha îbakbe igwook mbubak iba iba. 18Usen ya ke Okumugwem onyan̄a ibot melek Eberam, mè itumu inyi ibe, “Îre bọn owot iman kwun̄ ke nsa ijọn̄ yi inyi, bene me okwaan̄ Ijipiti si re lek ikpele okwaan̄ Yuferetis. 19Ijọn̄ yi ìre ijọn̄ ebi Keyin, mè ebi Kenaji, mè ebi Kadimọn, 20mè ebi Et, mè ebi Pereji, mè ebi Refa, 21mè ebi Amọ, mè ebi Kenan, mè ebi Girigas, mè ebi Jebus.”
Currently Selected:
Ibeb 15: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
