Ibeb 18
18
Ebi ichen ita
1Me ejit ikarek usen ge, mgbọ ere oyokbe enenen, Okumugwem okakana isibi me isi kè Ebereyam. Me ike mgbọ ya, Ebereyam ìsisiki ikweek irek me isotu uwu ọfọ kan̄ me agba lek ilip mbuban me Mamire. 2Ebereyam obebene chieen̄, mè imun̄ ebirieen̄ ita ekekebe me isi oyet uwu kan̄, mè inan̄a ikeke, mè ilibi isi ikweek ema, mè itọbọ ibot inyi ema, 3mè ibe, “Ogwukaan̄ n̄a, ire owu oma emi ogwu usun̄ kwun̄, soso kaje ìraka uwu n̄a. 4Nye lek kweek mè enyi enyi sọntiik mun̄ esa egwọk ukot, mè ìsiki ìkweek ìtap efuuk sọnja me irak uti. 5Ìnye lek ìkweek, mè ǹsi ǹsa sọntiik inorie ǹnu, mè enyi esa etet owot, mgbọ enyi emama emi ogwu usun̄ kinyi, mè ije igba ere uwu n̄a. Enyi isitap efuuk isan̄a, enyi mêkọt ibene ije ije kinyi.”
Ebi ife cha efọfọọk ọmọ ibe, “Înwọn ma, si rọ ubọk owu otumube.”
6Ebereyam onanan̄a ikeke jîp, mè inin̄ igọọk Sera me uwu ọfọ, mè itumu inyi ibe, “Gwat lek tọ alala akpa ekọkọk ita eyi ekọkbe iriọk, mè wọlọ sa rọ fituru.”
7Itutumu isan̄a, ililibi isi ere isun̄-anam kan̄, mè isi itet atalek gwun̄ eriembuuk ge egwookbe, inyi imin ufuk, isa inyi ogwu usun̄ kan̄ ge ibe ikpan̄, mè ibala, mè item ugwat ugwat. 8Mgbọ etembe inorie ya isan̄a, Ebereyam obeben inorie ya melek mun̄ ebe eyi atata mè eyi njijìn isa isi iyik inyi ife cha me irak uti ya, mè ikeke ikikpọ ema. Ema ererie.
9Ife cha enenido Ebereyam ibe, “Sà Sera nwa kwun̄ ye?”
Ebereyam ofọfọọk ibe ke ọmọ òwa me uwu ọfọ.
10Ene ge me lek kiban̄ otutumu inyi Ebereyam ibe, “Me ike mgbọ keyi ofifi acha, m̀kpalọlọ iyayaka ikpọk inu. Sera nwa kwun̄ môman gwun̄ enerieen̄ ge.”
Sera okukup me isotu uwu ọfọ ya, me udun̄ kè Ebereyam, ikigban̄ ikọ ema ekitumu. 11Me ike mgbọ yi, Ebereyam mè Sera ogwu nwa mîkan enenen. Ògak ge, Sera îkan iraka irek ebibaan̄. 12Eya orọ, Sera ochachak, mè itumu me emen ejit kan̄ ibe, “Eyi emi nkanbe ikpukpọkọ isan̄a ikeyi, ìre ilaak olom mè nwa môyaka ikaan̄ utop me lek? Ògak ge, nlom n̄a si îkan!”
13Okumugwem ododo Ebereyam ibe, “Ìre keke orọ mè Sera ichak imọm, mè itumu ibe mè ìre ọmọ môkọt iman gwun̄ me eyi ọmọ okanbe isan̄a ikeyi? 14Ìre îkaan̄ inu òyọyọt igak Okumugwem irọrọ? Me ike mgbọ keyi me ofifi acha, mâgwu ikom inu. Mgbọ ya, Sera môman gwun̄ enerieen̄.”
15Ukpook otetet Sera. Sera ofafiaan̄ itumu ibe ke ọmọ ìkachak imọm geege.
Ire, Okumugwem otutumu ibe, “Ataak, owu ochak imọm.”
Ebereyam îbeek mbeek me ibot ebi Sodọm
16Ebi ichen kè Ebereyam cha eneninan̄a ikeke, mè ikije ifo agan̄ Sodọm. Ebereyam ogọgọọk ema ije, ibosa ema iban. 17Okumugwem onenitumu me ejit kan̄ ibe, “Ìkanwọn ibe emi ǹlet Ebereyam inu geege eyi mbarọ, 18mije, owot iman kè Ebereyam ìkpolọlọ ikakana ido òmimin mè ikaan̄ unye. Îre nan̄a me lek kè Ebereyam ke otutuuk ido geelek òkup me linyọn̄ ebekaan̄ ugbana, 19mije îre Ebereyam ke emi ngobo isibi, inyi ikikpukpo ebi bọn mè otutuuk ebi îkaan̄be, mè ekeje etat me oniin̄ Okumugwem, mè ekerọ inu òtatat mè inen. Sa me ikeya, emi Okumugwem mârọ otutuuk use geelek nchieekbe Ebereyam iso.”
20Mije keya, Okumugwem onenitumu inyi Ebereyam ibe, “Mun̄ ito ònan̄a me lek inu ikpak ebi Sodọm mè Gomora ekirọ îwa enenen. Ijo inu kiban̄ si îmin enenen. 21Eya orọ, emi m̀baje isi ama cha isi ikpọ mè ìre inu nnọbe ìre ikeya. Ire ìkayaka ìre ikeya, mâriọọn̄.”
22Ene iba me lek ife cha enanan̄a ikije ifo agan̄ Sodọm. Ire, Ebereyam okpọkpọ ikeke me isi Okumugwem. 23Ebereyam onenije iriaak me lek Okumugwem, mè ido ibe, “Ìre owu môkpan̄ ebi ata irọrọ igbaalek ebi ijo irọrọ ni? 24Ire akọp ene go ebi ata irọrọ ikup me emen ama ya, ìre owu môchep si ama ya, sà ìre owu môtele ama ya mije akọp ene go ebi ata irọrọ cha? 25Lei! Ìkare owu obokirọ ojelek inu òkup ikeya! Ìre owu môfat igbaan̄ ebi ijo irọrọ mè ebi ata irọrọ ikpan̄ isan̄a me ukot yaage, mè imọnọ ebi ata ife kubọk ema eyaka ire ebi ijo ife ni? Sà ìre owu ogwu ibot oyerebet otutuuk linyọn̄ môfat itele unen oyerebet, mè isi ifieek nlilọ oyerebet ni? Eya ìkpokọt irọ!”
26Okumugwem ofọfọọk ibe, “Ire mmun̄ akọp ene go ebi ata irọrọ me emen ama Sodọm, mâtele ama ya mije ebi ata irọrọ cha, m̀kpachep ama ya.”
27Ebereyam onenibe Okumugwem, “Emi ìre achiaan̄ mè ntọn̄ ikike. Soso Okaan̄-ene, kanaan̄ ejit me lek ikọ chi nkitumu melek kwun̄. 28Mgbọ yi, ire otu ifuk ebi ata irọrọ ìkup me emen ama ya iyaka igele inire akọp ene ini mè go gaalek, ìre owu môchep ama ya mije kpunube ene go me otu ifuk ya ni?”
Okumugwem ofọfọọk ibe, “Ire mmun̄ akọp ene ini mè go ebi ata irọrọ me emen ama ya, m̀kpachep ama ya.”
29Ebereyam oyayaka ido si Okumugwem ibe, “Ire omun̄ akọp ene ini ebi ata irọrọ me ama ya ye?”
Okumugwem ofọfọọk ibe, “M̀kpachep ama ya, ire mmun̄ akọp ene ini ebi ata irọrọ me emen.”
30Ebereyam okpọkpọk iriaak Okumugwem ibe, “Soso Okaan̄-ene, kanaan̄ ejit, tele mè ǹdo owu nu. Ire omun̄ akọp ene ita ebi ata irọrọ me emen ama ya ye?”
Okumugwem ofọfọọk ibe, “M̀kpachep ama ya, ire mmun̄ akọp ene ita ebi ata irọrọ me emen.”
31Ebereyam onenitumu inyi Okumugwem ibe, “Mgbọ keyi si Okaan̄-ene, soso tele mè ǹtumu ikọ me isi kwun̄. Ire omun̄ akọp ene iba ebi ata irọrọ me emen ama ya ye?”
Okumugwem obebe, “Ire mmun̄ akọp ene iba me emen ama ya, mâtele ama ya mije kiban̄.”
32Ebereyam oyayaka itumu inyi Okumugwem ibe, “Soso Okaan̄-ene, kanaan̄ ejit si. Tele mè m̀kpọk ǹtumu ikọ mgbọ ge gaalek. Ire omun̄ akọp ene ebi ata irọrọ me emen ama ya ye?”
Okumugwem ofọfọọk ibe, “Ire mmun̄ akọp ene ebi ata irọrọ, mâtele ama ya mije kiban̄, m̀kpachep ama ya.”
33Mgbọ Okumugwem otumube ikọ isan̄a melek kè Ebereyam, inanan̄a itele Ebereyam. Ebereyam ogwugwu ikom ifo ere kan̄.
Currently Selected:
Ibeb 18: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
