Ibeb 17
17
Inyan̄a-ibot eyi ifieek-afi
1Mgbọ Eberam osobe akọp acha onaan̄ge mè onaan̄ge, Okumugwem onenichichini ọmọ, mè itumu inyi ibe, “Emi nre Awaji Ogwu Òkaan̄ Unye Geelek. Je me oniin̄ n̄a, mè luk ugwem ikakaan̄ge nrọ-nlọ geege me emen. 2Emi mânyan̄a ibot melek kwun̄, mè irọ inyi owu òmumana, mè òwa me otu ifuk enenen.”
3Eberam ogegele igwook, mè ikana isi ichit me ijọn̄. Awaji onenitumu inyi ọmọ ibe, 4“Eyi n̄a, inyan̄a-ibot n̄a melek kwun̄ ìre ikeyi: Owu môre ute inyi owuwa ido. 5Kpebeyaka ikigwen owu Eberam,#17:5 Eberam ìsibi ‘Ute òbebene.’ Erieen̄ kwun̄ ìboyaka inire Ebereyam,#17:5 Ebereyam ìsibi ‘Nte ogbogbo ene.’ mije emi nra irọ owu ute inyi ogbogbo ido. 6Mârọ inyi owu òmumana, mè òwa enenen. Owuwa ido mè owuwa ebi ubọọn̄ mênan̄a me owot iman kwun̄ isibi. 7Mârọ inyi inyan̄a-ibot n̄a nnyan̄abe melek kwun̄ mè bọn kwun̄ ikup ire mgbọ geelek. Emi mâre Awaji inyi owu, mè ire si Awaji inyi bọn kwun̄ mè bọn bọn kwun̄. 8Ijọn̄ ebi Kenan yi ere owu okigọọk igbaan̄ iluk kubọk ogwu ichen, m̀basasa inyi owu mè bọn owot iman kwun̄, kubọk ìrot òbokup ire ukot geelek. Emi mâre Awaji inyi bọn owot iman kwun̄.”
9Awaji onenitumu si inyi Ebereyam ibe, “Ire owu, mun̄ ibe ke owu osun̄ inyan̄a-ibot n̄a yi, owu mè otutuuk ebi owot iman kwun̄ me ukot me ukot. 10Inyan̄a-ibot n̄a melek kwun̄ mè bọn bọn kwun̄, eyi owu mè bọn owot iman kwun̄ ebekisun̄ ìre ikeyi: Enyi mêkifieek gwun̄ enerieen̄ kinyi geelek afi. 11Enyi otutuuk ebirieen̄ mêfieek afi. Eya obore inu ijejeen̄ eyi inyan̄a-ibot òkup inyi emi melek kinyi. 12Bene me mgbọ keyi re ukot geelek, gwun̄ enerieen̄ geelek emanbe, mêfieek afi me òso usen jeeta. Bene me lek ebi owot iman kwun̄ re lek ebi ofifi ife geelek owu osabe ikpoko ilep, òrere ebi kpenan̄a me owot iman kwun̄. 13Eya orọ, bọn owot iman kwun̄, mè otutuuk ebi osabe ikpoko ilep, kalọlọ ifefieek ema afi. Inyan̄a-ibot eyi ifefieek afi eyi emi nnyan̄abe melek kinyi ìre inu òbokup isi ire ukot geelek. 14Enerieen̄ geelek ekafieekge afi, ebesasan̄a ene ya isan̄a me otu ifuk ebi kiban̄, mije, îfiat inyan̄a-ibot n̄a.”
15Awaji onenitumu inyi Ebereyam ibe, “Serayi nwa kwun̄, owu òkpoyaka ikigwen ọmọ Serayi. Erieen̄ kan̄ ìboyaka inire Sera.#17:15 Sera ìsibi ‘Gwun̄ enenwaan̄ ogwu ubọọn̄.’ 16Mâgbana Sera enenen, mè irọ inyi iman gwun̄ enerieen̄ ge inyi owu. Mârọ inyi ikana uga inyi owuwa ido. Owuwa bọn kan̄ mêre ebi ubọọn̄.”
17Ebereyam inọnọ ikọ yi, ikakana isi ichit me ijọn̄, mè ichak, mè itumu me emen ejit kan̄ ibe, “Ìre enerieen̄ òsoso efit acha môyaka ikọt ibon gwun̄? Sà ìre Sera ogwu òsoso akọp acha onaan̄ge môyaka ikọt iman gwun̄ ni?” 18Ebereyam onenibe Awaji, “Jei, ìre owu òkpofat igbana Isimen ni?”
19Awaji ofọfọọk Ebereyam ibe, “Ire, Sera nwa kwun̄ môman gwun̄ enerieen̄ ge inyi owu. Owu môgwen gwun̄ ya Ajiki. Mârọ inyan̄a-ibot n̄a iso melek kè Ajiki mè bọn owot iman kan̄ ire ukot geelek. 20Nnọ ikọ owu otumube inyi emi ofolek kè Isimen. Kpọ, mwuuk lek igbana Isimen. Mârọ inyi imumana, mè iwa enenen me otu ifuk. Isimen môre ute inyi akọp mè ebi ibot mkpulu iba. Mârọ inyi bọn kan̄ ekana ikpele ido. 21Ire, îre me lek kè Ajiki ogwu Sera oboman inyi owu me ike mgbọ keyi me acha òkinu, ke mbarọ inyan̄a-ibot n̄a iso.” 22Mgbọ Awaji otumube ikọ chi inyi Ebereyam isan̄a, inanan̄a itele ọmọ, mè inene ifo inyọn̄.
23Me usen yaage, Ebereyam ogwegwen Isimen ogwu gwun̄, mè igwen otutuuk ebirieen̄ geelek ìkup me uwu kan̄, ebi ìnan̄a me owot iman kan̄, mè ebi usun̄ îsabe ikpoko ilep, ititiin̄, mè ifieek ema afi ike Awaji otumube inyi ọmọ. 24Ebereyam ìre akọp acha onaan̄ge mè onaan̄ge mgbọ îfieekbe afi, 25sà Isimen ogwu gwun̄ ore akọp mè acha ita mgbọ efieekbe ọmọ afi. 26Usen yaage ke Ebereyam mè ogwu gwun̄ Isimen egbaan̄ ifieek afi. 27Ikeya ke efieek otutuuk ebirieen̄ ìkup me uwu kè Ebereyam afi iso, bene me lek ebi emanbe me uwu kan̄, si re lek ebi usun̄ îsabe ikpoko ilep. Ema otutuuk melek kè Ebereyam egbaan̄ ifieek afi mgbọ yaage.
Currently Selected:
Ibeb 17: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
