Ibeb 31
31
Jekọp îlibi inan̄a me lek kè Leban
1Usen ge, Jekọp onọnọ ibe ke bọn ebirieen̄ kè Leban ekitumu ibe ke ọmọ ìkpulu otutuuk inu nte kiban̄ okaan̄be isa irọ eyi kan̄, ke otutuuk inu ọmọ osabe ibọọn̄ ubọọn̄ ìre echi kè nte kiban̄. 2Jekọp îmun̄ si ibe ke Leban ìkayaka ìbele ejit me lek kan̄ kubọk adasi mgbọ.
3Okumugwem onenitumu inyi Jekọp ibe, “Gwu kom fo ido kè nte kwun̄, mè ama iman kwun̄, ke mâkup melek kwun̄.”
4Usen ge, Jekọp okukup me ere îkikpukpo anam kan̄ ilook etip igwen Rechen mè Lia ebi nwa ibe esibi enu me ere ya ọmọ okupbe. 5Inenitumu inyi ema ibe, “Mgbọ keyi, mmun̄ ibe ke irọrọ nte kinyi me lek n̄a ìkayaka ìkup kubọk îkupbe me adasi mgbọ. Ire, Awaji kè nte n̄a îkeke inyi emi. 6Enyi mîriọọn̄ ibe ke nsa otutuuk efuuk n̄a isi ikwaan̄ inyi nte kinyi. 7Ire, nte kinyi ofefeen̄ emi, mè inwunween̄ mkpukpe îchieekbe ikpekpe emi akọp mgbọ. Ire, Awaji ìkachieek ibe isak emi unan geege me lek. 8Ìkire, nte kinyi isichieek ibe ke ebot echi nyen̄enyen̄e lek obore mkpukpe n̄a, otutuuk ebot cha mîra imaan̄ bọn nyen̄enyen̄e lek. Ire iyaka itumu ibe ke echi ngwugwat lek obore mkpukpe n̄a, otutuuk ebot cha mîra imaan̄ bọn ngwugwat lek. 9Ikeya ke Awaji osa ibọkọ anam nte kinyi okaan̄be iyaka isa inyi emi.
10“Mmumun̄ ilaak ge me ibot mgbọ orie anam okitoon̄ echi uman. Me emen ilaak ya, mmun̄ ike otutuuk orie ebot geelek òkitoon̄ echi uman orebe echi ngwugwat lek, mè echi nyen̄enyen̄e lek, mè echi ntọọk ntọọk lek. 11Ogwu osat Okumugwem ogwegwen emi me emen ilaak ya, ‘Jekọp!’ Nchechieek. 12Inenitumu inyi emi ibe, ‘Kpọ, otutuuk orie ebot òkitoon̄ echi uman ìre echi ngwugwat lek, mè echi nyen̄enyen̄e lek, mè echi ntọọk ntọọk lek. Îre ikeya, mije, emi mmun̄ otutuuk inu cha geelek Leban okirọ owu. 13Emi ìre Awaji ogwu òchichichini owu me Beten, ere owu obenebe ewuuk igwuun̄, mè itọkọ aran̄ igwook me lek, mè inyan̄a ibot inyi emi. Mgbọ keyi, nan̄a me ere yi, mè gwu kom je fo ama iman kwun̄.’ ”
14Rechen mè Lia efọfọọk ibe, “Ìre keke ke eji eyaka ikaan̄ me uwu nte kiji? 15Nte kiji ìyaka ikimọnọ eji kubọk ebi ichen. Îra inyam eji isibi, mè ibọkọ ikpoko ibot kiji irie isan̄a kpai. 16Me atikọ, otutuuk inu ubọọn̄ Awaji obọkọbe me ubọk nte kiji isa ikana inyi owu ìyaka ire echi kiji mè echi bọn kiji. Eya orọ, inu geelek Awaji obe owu òrọ, rọ.”
17Jekọp onenikpulu ebi bọn, mè ebi nwa itoon̄ me inyọn̄ aligọ. 18Îkpulu si otutuuk anam kan̄, mè otutuuk inu geelek îkaan̄be me Padan Aram, isa igbaalek inin̄ oniin̄ ifo igọọk Ajiki ogwu ute me ido Kenan.
19Me mgbọ ya, Leban înan̄a isi ere ekisọp inwọọn̄ me lek arọọn̄ kan̄. Mgbọ înan̄abe me uwu, Rechen ochichiin̄ ebikaan̄ ogwu ute. 20Jekọp ìkatumu ìnyi Leban, ogwu Aram ogwu îgọọkbe iluk, ibe ke ọmọ mônifo. Sa me ikeyi, Jekọp îrọ Leban inu udun̄. 21Jekọp okpukpulu otutuuk inu îkaan̄be isa igbaalek ifo, mè isaba okwaan̄ Yuferetis, mè ikije ifo agan̄ inyọn̄ ogoon̄ òkup me ido Giliadi.
Leban îlibi igọọk Jekọp
22Usen ita îraka sabum Leban oninọ ibe ke Jekọp îlibi ifo. 23Leban onenisa ebi uwu kiban̄ igbaalek ilibi igọọk Jekọp. Me òso usen jaaba, ema enenisoon̄ Jekọp me inyọn̄ ogoon̄ òkup me Giliadi. 24Sabum ema enimun̄ Jekọp, Awaji îtumu inyi Leban ogwu Aram me emen ilaak me eririeen̄ ibe, “Gbala chieen̄ me lek ikọ geelek owu obotumu melek kè Jekọp, mè ìre ata ikọ mè ìre ijo ikọ!”
25Jekọp îgwuun̄ uwu ọfọ kan̄ me inyọn̄ ogoon̄ òkup me ido Giliadi, mè ikweek ikisiki efuuk, sabum Leban mè ebi uwu kiban̄ cha enisoon̄ ema me ere ya. Leban mè ebi melek kan̄ egwugwuun̄ si uwu ọfọ kiban̄ me inyọn̄ ogoon̄ ya. 26Leban onenido Jekọp ibe, “Ìre kpasi inu ke owu orọ emi ikeyi? Owu orọ emi inu udun̄, mè ikpulu bọn ebibaan̄ n̄a isa ilibi ifo kubọk ebi ekpulube me akọn̄. 27Òjeje ilet ilibi ifo, mè ifiaan̄ emi ikeyi? Ìre keke orọ òkatumu ìnyi emi, inyi ǹto ijọk, mè ǹkwak ekpete mè uneen̄ ǹsa m̀fit ifit, mè ǹsa owu m̀ban me ubelejit? 28Òkanyi emi irek mè ǹkat nsabọn n̄a mè bọn bọn n̄a, mè m̀be ema egbala chieen̄. Inu yi owu orọbe ìre inu burubut. 29Kè nkọt nrọ enyi ijo inu, ibe ìkare Awaji kè nte kinyi onitumu inyi emi me emen ilaak me eririeen̄ iyakwut ibe emi m̀gbala chieen̄ me lek ikọ geelek mbatumu melek kwun̄, mè ìre ata ikọ mè ìre ijo ikọ. 30Îre atikọ ibe ke îlọk owu enenen igwugwu ikom ifo uwu nte kwun̄. Ire, ìre keke orọ mè owu òchiin̄ ebikaan̄ n̄a òsa ògbaalek òfo?”
31Jekọp ofọfọọk ibe, “Ǹtet ukpook ibe ke owu môsa me unye ubọk ibọkọ emi bọn ebibaan̄ kwun̄. 32Ire me lek ebikaan̄ kwun̄, na week me emen akpan ije kiji. Ire ikaan̄ ogwu geelek oweekbe imun̄ me ubọk, ebekpakpan̄. Week si, me isi otutuuk ebi kiji chi, mè ìre îkaan̄ inu kwun̄ eji ekpulube. Ire ikaan̄ inu kwun̄ geelek oweekbe imun̄ me ubọk kiji, kpulu sa fo!” Otutuuk mgbọ cha, Jekọp ìkariọọn̄ ibe ke îre Rechen ochiin̄ ebikaan̄ cha.
33Leban oninin̄ emen uwu ọfọ kè Jekọp iweek ebikaan̄ kan̄, ìkamun̄. Inanan̄a isi inin̄ uwu ọfọ kè Lia iweek, ìkamun̄, mè inan̄a isi inin̄ eyi ebi usun̄ ebibaan̄ iba cha iweek, ìkamun̄. Inanan̄a isi inin̄ uwu ọfọ kè Rechen. 34Ire, Rechen îwuuk lek ikpulu ebikaan̄ cha itap me irak inu ikweek-irek òkup me inyọn̄ aligọ kan̄, mè inene inyọn̄ isiki ikweek. Eya orọ, Leban îweek me ere geelek me uwu ọfọ kè Rechen, ìkamun̄ ebikaan̄ cha.
35Rechen otutumu inyi ogwu ute ibe, “Nte n̄a, soso kanaan̄ ejit ìnyi emi! Emi m̀kpakọt inan̄a ikeke me isi kwun̄, mije, ǹkup me ikwaan̄ ebibaan̄.” Eya orọ, Leban îweek ebikaan̄ cha igak, ìkakọt ìweek ìmun̄.
36Jekọp oneninaan̄ ejit inyi Leban, mè ido Leban ibe, “Ìre kpasi ikan ke nrọn̄? Sà ìre kpasi ijo inu ke nrọ, eyi owu okisaka ikana ere efuuk efuuk ikiweek emi ikeyi? 37Mgbọ keyi owu okpọkbe emen otutuuk akpan ije n̄a iwele, ìre kpasi inu kwun̄ ke otet emi me ubọk? San̄a sibi me isi ebi n̄a mè ebi kwun̄ mgbọ keyi, inyi emun̄, mè efieek oyerebet enyi eji ene iba.
38“Me otutuuk akọp acha iba eyi ngọọkbe owu iluk, otutuuk uman arọọn̄ kwun̄ mè uman ebot kwun̄ ekpọkpọ ikimumana, kpunu geege owot osibibe. Otutuuk orie arọọn̄ kwun̄, kubọk ge ikeyi, ǹkatet ìkpan̄ ìtaka. 39Mgbọ geelek unye anam okpan̄be anam kwun̄, ǹkisasa anam eyi n̄a itap ichit, ǹkasa nkwukwu anam ìjet owu. Mgbọ geelek inọ ochiin̄be anam kwun̄, mè ìre ikarek, mè ìre eririeen̄, owu òkitetet emi ibọkọ useen̄. 40Nkwukwulu me lek ikwaan̄ kwun̄. Ikarek, ura òwọp emi, eririeen̄ utọọk ònin̄ emi otu ukwuuk. Ilaak ìkakinin̄ emi chieen̄ mgbọ geege. 41Eyi mè ọmọ, òso akọp acha iba nkwukwulube me uwu kwun̄. Nsi ikwaan̄ inyi owu akọp mè acha ini mije bọn ebibaan̄ iba kwun̄, mè iyaka isi ikwaan̄ inyi owu acha gweregwen, inyi ǹkaan̄ usini me lek anam kwun̄. Owu onwenwene mkpukpe n̄a otuuk kè akọp mgbọ. 42Mebe Awaji ebi nte nte n̄a, òrere Awaji kè Ebereyam, mè Awaji ogwu Ajiki nte n̄a okitet ukpook me lek, ìkakeke ìnyi emi, me atikọ, kè owu òria emi ofo ukpọk ubọk. Ire, Awaji îmun̄ ujaralek n̄a mè otutuuk kwulukwulu nsabe ubọk n̄a ikwukwulu inyi owu, mè ifieek oyerebet inwọn emi me isi kwun̄ me emen ilaak me eririeen̄ iyakwut.”
43Leban onenifọọk ibe, “Ebibaan̄ chi ìre bọn n̄a. Nsabọn chi si, ìre nsabọn n̄a. Otutuuk arọọn̄ chi ìre echi n̄a. Otutuuk inu chi geelek okimun̄ ìre echi n̄a. Ire, chereyi, ìre keke ke mbakọt irọ òfo me lek bọn n̄a chi, melek nsabọn chi ema emaan̄be.#31:43 Ere yi môkọt isibi, ‘Kpunu inu geege eyi mârọbe, eyi unan kposakbe ema me lek.’ 44Eya orọ, mgbọ keyi, eji enenyan̄a ibot, emi melek kwun̄, mè inyan̄a-ibot yi ikup kubọk inu ata-ikọ me etete kwun̄ melek n̄a.”
45Jekọp onenibene ewuuk ge igwuun̄ kubọk atà isasa ikeek inyan̄a-ibot ya, 46mè itumu ibe ebi kan̄ eteen̄ ewuuk etitiin̄ si. Ema eteteen̄ ewuuk ititiin̄ ibene. Ema otutuuk ene enenikup me agba lek èdọ ewuuk ya igbaan̄ irie inorie. 47Leban ogwegwen ere ya Jega Sayaduta.#31:47 Jega Sayaduta me usem Aram ìsibi ‘èdọ eyi ata-ikọ.’ Jekọp oyayaka igwen si ere ya Galedi.#31:47 Galedi me usem Iburu ìsibi si “èdọ eyi ata-ikọ.’
48Leban otutumu inyi Jekọp ibe, “Èdọ ewuuk yi ore inu ata-ikọ inyi owu melek n̄a chereyi.” Mije keyi ke egwen ere ya Galedi, 49mè igwen si Mijipa,#31:49 Mijipa ìsibi ‘ere mbem.’ mije, Leban ìtumu ibe, “Kè Okumugwem ikibem emi melek kwun̄ me mgbọ eji isiyiyala. 50Ire owu otutuku bọn n̄a ebibaan̄, mè ìyaka ire, ire odo ofifi nwa igbaalek bọn n̄a, ubọk geelek kpunube ebi ofifi ene me etete kiji, riọọn̄ ibe ke Awaji ore ogwu ata-ikọ me etete kwun̄ melek n̄a.”
51Leban onenitumu inyi Jekọp ibe, “Kpọ, ke omun̄ èdọ ewuuk yi, melek ewuuk yi eyi mbenebe igwuun̄ kubọk inu ata-ikọ me etete kwun̄ melek n̄a! 52Èdọ ewuuk yi melek atà ewuuk yi ore inu ata-ikọ ibe ke emi m̀kparaka okike ere keyi inirọ owu ijo inu, owu si òkporaka okike ere keyi inu inirọ emi ijo inu. 53Kè Awaji kè Ebereyam mè Nayọ, ogwu òrere si Awaji kè nte kiji, ifieek oyerebet inyi eji agan̄ iba.”
Jekọp onenisa erieen̄ Awaji ogwu Ajiki nte kan̄ okitet ukpook me lek, inyan̄a si ibot, 54mè inigwa ngwugwa me inyọn̄ ogoon̄ ya inyi Okumugwem, mè igwen bọn ebi ulọk ibe enerie inorie. Ema ererie inorie ya, mè ilaak me ere ya iwele egwe.
55Me agan̄ egwe, Leban okakat ebi bọn ebibaan̄, mè ikat si bọn ebi bọn, mè igbana ema, mè igwu ikom ifo, ọmọ mè ebi melek kan̄.
Currently Selected:
Ibeb 31: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
