Ibeb 34
34
Ukpatu kè Daina mè ebi Sekem
1Usen ge, Daina gwun̄ enenwaan̄ Lia omanbe inyi Jekọp, oneninan̄a ije isibi ibosi ikpọ usini nsabọn ibaan̄ ebi ido Kenan ìluk me ere ya. 2Ogwu enerieen̄ ge ekigwen Sekem, gwun̄ kè Amoru ogwu ubọọn̄ ido ebi Ifi, onenimun̄ Daina, mè itet me unye igọọk ilaak, mè irọ ọmọ inu esip. 3Sekem onenikaan̄ ikpele ulọk me lek kè Daina gwun̄ kè Jekọp, mè ima gwun̄ enenwaan̄ ya enenen, mè isa unin̄i otu itumu ikọ itap me ejit kan̄. 4Inenitumu inyi Amoru ogwu ute ibe isi ido gwun̄ enenwaan̄ ya inyi ọmọ me lek nwa.
5Mgbọ Jekọp onọbe ibe ke Sekem îchaka Daina ogwu gwun̄ mbuban me lek, ebi bọn ebirieen̄ ekup me oron ere ema ekikpukpo anam. Eya orọ, irariaan̄ ere, mè ikup ikikpọ mgbọ ema mêkabe inu. 6Amoru, nte kè Sekem oneninan̄a isi igọọk Jekọp ikpa ukpatu ofolek kè Daina. 7Mgbọ yaage bọn kè Jekọp enọbe inu ya òrọrọ, ema enanan̄a me ere ema ekikpukpo anam ika inu. Ema mîfieek ejit, mè inaan̄ ejit enenen, mije, itetet gwun̄ enenwaan̄ kè Jekọp me unye igọọk ilaak, ike Sekem orọbe, ìre ijo burubut inu me etete ebi Ijeren. Ìkagbe ibe ojelek inu òkup ikeya irọ me etete kiban̄.
8Amoru, nte kè Sekem onenitumu inyi ema ibe, “Sekem gwun̄ n̄a îkaan̄ ikpele ulọk me lek kè Daina gwun̄ kinyi. Soso, ìnye lek ìsa Daina ìnyi Sekem ido me lek nwa. 9Ìchieek si mè eji melek kinyi ekegbaan̄ ebat olom, bọn ebibaan̄ kinyi ekebat bọn ebirieen̄ kiji, mè bọn ebirieen̄ kinyi ekedo si bọn ebibaan̄ kiji. 10Enyi ìgọọk eji ìluk. Ijọn̄ ijọn̄ ire echi! Ere geelek òneneme enyi, ìluk, mè ìkijijen̄e ìkana me inyọn̄ ijọn̄ yi, mè ìbọkọ si ijọn̄ ìkaan̄.”
11Sekem onenitumu inyi nte kè Daina mè ebi ngwan̄ kè Daina ibe, “Soso ìchieek mè ǹdo gwun̄ kinyi me lek nwa, ke mâkpe inu geelek enyi etumube ibe emi m̀kpe. 12Inu geelek enyi eweekbe ibe emi m̀kpe me ibot gwun̄ kinyi, mâkpe, ubọk geelek îminbe ikeke. Gaalek, ìtele mè ǹdo gwun̄ enenwaan̄ ya me lek nwa.”
13Mije Sekem ochakabe mbuban me lek kè Daina, bọn kè Jekọp efọfọọk Amoru mè Sekem ogwu gwun̄ ikọ ya ofiaan̄ ofiaan̄, 14mè itumu inyi ema ibe, “Eji kpebekọt isa gwun̄ kiji iche olom inyi ogwu enerieen̄ ikafieekge afi. Eya ìbore irọrọ eji inu ochak. 15Sabum eji enechieek, ebirieen̄ kinyi geelek mêfieek afi ubọk eji ebi Ijeren ekirọ. 16Mgbọ ya ke eji ebekisa bọn ebibaan̄ kiji iche olom inyi enyi, mè ikibọkọ si bọn ebibaan̄ kinyi ido, mè igọọk enyi igbaan̄ iluk, mè eji agan̄ iba ekana ido ge. 17Ire, ire enyi kpechieek ifefieek afi, ubọk eji etumube, eji mêsa ngwan̄ kiji ifo.”
18Ikọ kiban̄ onenibele Amoru mè Sekem ogwu gwun̄ ejit. 19Sekem osisi irọ inu ya mgbọ yaage, mije, îkaan̄ ulọk me lek kè Daina gwun̄ kè Jekọp enenen. Sekem ìre ogwu otutuuk ebi uwu ogwu ute ekinyi ulibi. 20Amoru mè Sekem enenititiin̄ ebi ama kiban̄ me otunchit ama ya, mè itumu inyi ema ibe, 21“Ife chi ìre ata ife me lek kiji. Înwọn ibe ema egọọk eji eluk me ido kiji, mè ekejijen̄e ekana me inyọn̄ ijọn̄ kiji. Ijọn̄ kiji îmin enenen, môta otutuuk kiji melek kiban̄. Eji ekedo bọn ebibaan̄ kiban̄, mè etele inyi ema ekedo bọn ebibaan̄ kiji. 22Ire, ife chi kpebegọọk eji igbaan̄ iluk, mè igọọk eji igbaan̄ ikana ido ge, îtata otutuuk ebirieen̄ kiji efefieek afi ubọk ema efieekbe. 23Ire eji irọ inu ife chi etumube, otutuuk anam kiban̄, mè inu geelek ema ekaan̄be môkana ire eyi kiji. Eya orọ, eji efieek afi ubọk ife chi etumube, mè ema egọọk eji eluk.”
24Otutuuk ebirieen̄ ebi ìkup me otunchit ama ya echechieek me lek ikọ ya Amoru mè Sekem ogwu gwun̄ etumube. Otutuuk ebirieen̄ ama ya efefieek afi.
25Òso usen ìta, mgbọ ufiak unan ya onin̄be ema lek enenen, bọn ebirieen̄ iba kè Jekọp, Simiọn mè Libai, ebi melek Daina erebe uga ge, ewọwọọk oge akọn̄ kiban̄ isibi, mè ije inin̄ emen ama ya me utelelek, mè ikpan̄ otutuuk ebirieen̄ isan̄a kpai, 26mè ikpan̄ si Amoru mè Sekem ogwu gwun̄, mè itet Daina ngwan̄ kiban̄ me uwu kè Sekem isa isibi ifo. 27Bọn kè Jekọp kechilọ ìsisik ejijibi inin̄ ama ya nkwukwu ene otutọmọbe ijot, mè ifum inu ebi ama ya, mije mbuban echakabe me lek ngwan̄ kiban̄. 28Bọn kè Jekọp mîkpulu arọọn̄ ife cha, mè eriembuuk, mè inyinya akpan, mè inu geelek òkup me emen ama ya, mè echi òkup me uko, 29mè ikpulu si otutuuk inu ubọọn̄ ebi ama ya ekaan̄be, mè otutuuk ebibaan̄ mè asa nsabọn kiban̄, mè inu geelek ema emun̄be me emen uwu geelek me emen ama ya, isa isibi ifon.
30Jekọp onenitumu inyi Simiọn mè Libai ibe, “Enyi mîto ùrioon̄ itoon̄ emi me ibot, mè irọ emi ǹkana ogwu ochicha me etete otutuuk ebi Kenan, mè ebi Pereji ìluk me agan̄ yi. Emi melek ebi n̄a kpewa me otu ifuk. Mgbọ keyi, ire ife chi igbaan̄ ititiin̄ lek, mè ijibi akọn̄ inin̄ emi lek, mêkpan̄ emi mè otutuuk uwu n̄a isan̄a kpai.”
31Ebi bọn cha efọfọọk nte kiban̄ ibe, “Ìre înwọn ubọk ene ya orọbe ngwan̄ kiji kubọk ogwu òje oyet ni?”
Currently Selected:
Ibeb 34: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
