Ibeb 35
35
Jekọp îka inu Beten
1Awaji onenitumu inyi Jekọp ibe, “Nan̄a, je fo Beten si luk, mè nama ntook me ere ya nyi emi. Emi nre Awaji ogwu òchichichini owu mgbọ owu olibibe inan̄a me lek kè Isọ ngwan̄ kwun̄.”
2Jekọp onenititiin̄ ebi uwu kan̄, mè ebi melek kan̄, mè itumu inyi ema ibe, “Mgbọ keyi, ìsan̄a otutuuk awaji ebi ofifi ido geelek ìsan̄a me etete kinyi, mè ìgwọk lek kinyi, mè ìnwene ofọnti me lek, 3mè ìbem lek, mè eji enenan̄a me ere yi eje esi Beten, inyi ǹsi ǹnama ntook ǹnyi Awaji ogwu ònọ emi ida me usen uyọrọlek n̄a, mè ikup melek n̄a me otutuuk ere geelek nsibe.” 4Ema enenikana otutuuk awaji ebi ofifi ido òkup me ubọk kiban̄, mè otutuuk mkputọn̄ òkup me utọn̄ kiban̄, inyi Jekọp. Ibọbọkọ, mè iben ifuun̄ me irak ebon ilip ge òkup me ama Sekem ya. 5Jekọp mè otutuuk ebi kan̄ ejijibi ije. Awaji oneniria uga ukpook itap me lek otutuuk ebi ama òkukup ikana ere cha. Mije keya, ife cha kpeben akọn̄ geege igọọk Jekọp mè ebi kan̄.
6Jekọp mè otutuuk ebi melek kan̄ ejeje inire ama ekigwen Luju, òrere Beten, me ido Kenan. 7Ineninama ntook me ere ya, mè igwen ere ya Eli Beten,#35:7 Eli Beten ìsibi ‘Awaji òkup me Beten,’ mije, îre ere ya ke Awaji osibi ichichini ọmọ mgbọ îkilibi inwọnọ Isọ ngwan̄ kan̄.
8Dibọra, ogwu enenwaan̄ òkpọkpọ chieen̄ me lek kè Ribeka, onenikwu me ere ya, ebeben ifuun̄ me irak ebon ilip ge òkup me osiki Beten. Eya orọ egwenbe ere ya Alọn Bakut.#35:8 Alọn Bakut ìsibi ‘uti ilip eyi ito.’
9Awaji okpọkpọk isibi ichichini Jekọp mgbọ keyi înan̄abe me Padan Aram igwu ikom ika inire Beten, mè igbana ọmọ, 10mè initumu inyi ọmọ ibe, “Erieen̄ kwun̄ ìre Jekọp. Ire, kpebeyaka ikigwen owu Jekọp ofifi. Erieen̄ kwun̄ ìboyaka inire Ijeren.” Ikeya ke Awaji osa inyi ọmọ erieen̄, Ijeren.
11Awaji onenitumu inyi Jekọp ibe, “Emi nre Awaji Ogwu Òkaan̄ Unye Geelek. Mumana, mè wa me otu ifuk. Bọn kwun̄ mêkana ido, mè ìyaka ire owuwa ido. Owuwa me etete bọn kwun̄ mêre ebi ubọọn̄. 12Ijọn̄ nnyibe nte nte kwun̄ Ebereyam mè nte kwun̄ Ajiki, owu ke mbasa ijọn̄ ya inyi. Owu osikwu, bọn owot iman kwun̄ ere ebi ìbekaan̄ ijọn̄ ya.” 13Mgbọ Awaji otumube ikọ ya isan̄a me ere ya, inanan̄a itele Jekọp.
14Jekọp obebene ewuuk ge igwuun̄ me ere ya Awaji otumube ikọ melek kan̄, mè igwook miin̄ melek aran̄ me lek ewuuk ya. 15Jekọp ogwegwen ere ya Awaji okupbe itumu ikọ melek kan̄, Beten.#35:15 Beten ìsibi ‘uwu Awaji.’
Mkpa kè Rechen
16Ema eneninan̄a me ere ya ikije ifo Efarata. Me oniin̄ ije kiban̄, ema kpejeje igbet Efarata, uman otetet Rechen uyọt uyọt. 17Mgbọ uman ya onyebe enenen, ogwu ofia uman otutumu inyi Rechen ibe, “Kafieek owot, ke îre ofifi gwun̄ enerieen̄ ke owu oboman.” 18Rechen osasa me chieen̄ mkpa iman gwun̄ enerieen̄ ito, mè igwen Benoni.#35:18 Benoni ìsibi ‘gwun̄ ukwook n̄a.’ Ire, ogwu ute ogwegwen gwun̄ ya Benjamin.#35:18 Benjamin ìsibi ‘gwun̄ ubọk agan̄ ulom n̄a.’
19Rechen okwukwu. Ebeben ifuun̄ me agba oniin̄ ekije isi Efarata, òrere Beteleyem. 20Jekọp obeben ewuuk ge igwuun̄ me ere efuun̄be Rechen. Ewuuk ya ke ekisa iriọọn̄ udọn̄-ufuun̄ kè Rechen mege inire chereyi.
21Jekọp, òrere Ijeren, onenije inyi isi, mè iraka Migidan Ederi, mè igwuun̄ uwu ọfọ kan̄, mè iluk. 22Usen ge, mgbọ ema ekupbe me inyọn̄ ijọn̄ ya, Ruben osisi igọọk Biliya, ugan ogwu ute ilaak. Jekọp onọnọ.
Bọn kè Jekọp
(I Mfuf 2:1-2)
Jekọp ìbon akọp mè bọn ebirieen̄ iba.
23Bọn ebirieen̄ Lia omanbe ìre Ruben, adasi gwun̄ kè Jekọp, mè Simiọn, mè Libai, mè Juda, mè Isaka, mè Jebulọn.
24Bọn ebirieen̄ Rechen omanbe ìre Josefu, mè Benjamin.
25Bọn ebirieen̄ Biliya, ogwu usun̄ enenwaan̄ kè Rechen omanbe ìre Dan, mè Nafitali.
26Bọn ebirieen̄ Jilipa ogwu usun̄ enenwaan̄ kè Lia omanbe ìre Gadi, mè Ase.
Ebibi ere bọn ebirieen̄ kè Jekọp ebi emaan̄be inyi Jekọp me Padan Aram.
Mkpa kè Ajiki
27Jekọp onenika igọọk Ajiki ogwu ute me Mamire me ama Kiriat Ariba, òrere Eburọn. Ebereyam îluk me ere yi mgbọ îkupbe me ògat ugwem. Ere yi si ke Ajiki oluk. 28Ajiki îluk ugwem efit acha mè akọp jeeta. 29Ajiki îkan ijaan̄ lek, mè irie ugwem kan̄ ijot, mè inikwu igọọk ebi nte nte kan̄. Ebi bọn, Isọ mè Jekọp, ebeben ọmọ ifuun̄.
Currently Selected:
Ibeb 35: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
