Ibeb 39
39
Ukpatu kè Josefu mè nwa kè Pọtifa
1Ebi Isimen cha mîsa Josefu isi ire Ijipiti. Ogwu Ijipiti ge ekigwen Pọtifa, ene ge me lek ebi ibot ikwaan̄ ogwu Fero, obọbọkọ Josefu ilep. Pọtifa ìre ogwu ibot ebi akọn̄ ebi ìkibem ogwu Fero mè uwu kan̄.
2Okumugwem okekeke inyi Josefu, mè irọ inyi inu ije ijaan̄ me lek enenen. Josefu okekiluk me uwu nte uwu kan̄ ogwu Ijipiti ya. 3Nte uwu kan̄ omumun̄ si ibe ke Okumugwem òwa melek kan̄, mè imun̄ si ibe ke Okumugwem îkirọ inyi inu geelek Josefu ochakbe ubọk me lek ikije ijaan̄. 4Mije keya, ugwem kè Josefu onenineme nte uwu kan̄ enenen. Isasa Josefu irọ ogwu ibot ikwaan̄ me uwu kan̄, mè ikana inu geelek îkaan̄be itap Josefu me ubọk ibe ikikpọ chieen̄ me lek. 5Bene me mgbọ îsabe Josefu irọ ogwu ibot ikwaan̄ me uwu kan̄, mè ikana inu geelek îkaan̄be itap me ubọk kè Josefu, Okumugwem ogbagbana uwu ogwu Ijipiti ya mije kè Josefu. Ugbana Okumugwem orere lek otutuuk inu geelek Pọtifa okaan̄be me uwu, mè ire lek otutuuk anam kan̄ mè inu geelek òkup me uko kan̄. 6Mije keyi, Pọtifa okakana otutuuk inu geelek îkaan̄be itap Josefu me ubọk. Ìkayaka ìkisisaak lek me lek inu geege, ilọ me lek inorie otu gaalek.
Josefu îjot isibi me ikeke ebirieen̄, mè ijaan̄ uja. 7Ike mgbọ okije, nwa nte uwu kan̄ ìkayaka ìkọt ìsan̄a ọmọ chieen̄ me lek. Usen ge, ibebe Josefu, “Na gọọk emi laak.”
8Josefu ojijit, mè itumu inyi ibe, “Nte uwu n̄a îtoon̄ emi ejit me lek, mè ikana otutuuk inu geelek òkup me uwu yi itap emi me ubọk ibe emi ǹkemkpọ chieen̄ me lek. 9Isan̄a me lek nte uwu n̄a, kpunu ene geege me uwu yi òmimin kubọk n̄a. Kpunu si inu geege eyi nte uwu n̄a ìkasa ìtap emi me ubọk, ilọ me lek kwun̄ gaalek, mije, owu ìre ogwu nwa. Emi m̀bajeje inirọ inu ikpak òkup ikeya, mè irọ Awaji ijo inu?” 10Ogwu enenwaan̄ yi okpọkpọ ikisisaak Josefu usen geelek. Ire, Josefu ìkachieek igọgọọk ilaak. Ìkachechieek si igọgọọk ọmọ ikup me ere geege, ema ene iba gaalek.
11Usen ge, Josefu ojeje inin̄ uwu ibosi irọ ikwaan̄. Mgbọ ya, uwu înọọn̄. Kpunu ebi ikwaan̄ geege me uwu ya. 12Nwa ogwu ute-uwu ya okakana Josefu itet me lek ofọnti, mè ibe, “Na, na gọọk emi laak.” Ire, Josefu onyinyinyan̄a lek, mè ijene ofọnti kan̄ ibaak ogwu enenwaan̄ ya me ubọk, mè ilibi isibi oyet.
13Mgbọ ogwu enenwaan̄ ya omun̄be ibe ke Josefu îtele ofọnti kan̄ me ubọk kan̄, mè ilibi isibi oyet, 14itataan̄ ukpo igwen bọn uwu kan̄ ibe, “Ìna ìnikpọ! Nlom n̄a îsa ogwu Iburu yi inu me uwu yi, mè ininye chieen̄ inyi eji. Ìnin̄ emen uwu yi iniweek emi ilaak me lek. Ntataan̄ ukpo. 15Inọnọ ida ukpo n̄a, ijujuuk ofọnti kan̄ itele emi me agba lek, mè ilibi isibi oyet.”
16Ogwu enenwaan̄ ya otetet ofọnti kè Josefu ikaan̄ mege ire mgbọ ogwu olom okabe. 17Ogwu olom ikaka, itutumu inyi ibe, “Ogwu usun̄ ogwu Iburu ya owu osabe inu me uwu yi, înin̄ inu me lek n̄a ibonirọ emi inu unyechieen̄. 18Ntataan̄ ukpo. Ijujuuk ofọnti kan̄ itele emi me agba lek, mè ilibi isibi oyet.”
Mîtap Josefu mkpọn
19Mgbọ nte uwu kè Josefu onọbe ikọ yi ogwu nwa otumube ibe ìre inu Josefu ogwu usun̄ kan̄ orọbe ọmọ, inanaan̄ ejit enenen, 20mè itet Josefu inyi etap me uwu mkpọn, ere ekitap ebi mkpọn ogwu Fero. Josefu obabia me uwu mkpọn ya.
21Okumugwem okekeke inyi Josefu me uwu mkpọn ya, mè ikaan̄ ata ejit me lek kan̄, mè irọ si inyi ogwu ibot uwu mkpọn ya ima ọmọ enenen. 22Ogwu ibot uwu mkpọn ya osasa Josefu irọ ogwu ibot me lek otutuuk ebi mkpọn ìkup me uwu mkpọn ya. Ọmọ si okikpọ chieen̄ me lek otutuuk inu geelek ekirọ me uwu mkpọn ya. 23Ogwu ibot uwu mkpọn ya osasan̄a chieen̄ me lek inu geelek îkanabe itap Josefu me ubọk, mije Okumugwem okekebe inyi Josefu, mè ikirọ inyi inu geelek Josefu orọbe ikije ijaan̄.
Currently Selected:
Ibeb 39: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
