Ibeb 41
41
Ogwu Fero îmun̄ ilaak
1Mgbọ òjot òjot acha iba orakabe, ogwu Fero onenimumun̄ ilaak ike ọmọ okekebe me agba okwaan̄ Nali, 2mè imun̄ eriembuuk jaaba òmimiin̄ ufuk mè ijaan̄ lek enan̄abe me emen mun̄ me okwaan̄ ya ije isibi, mè ikitaka mbubet me agba okwaan̄ ya. 3Me udun̄ kiban̄, ofifi eriembuuk jaaba oneninan̄a me okwaan̄ Nali ya si isibi, mè iwọlọ lek, mè ikup ukwuuk ukwuuk. Ema enenisi ikeke me agba lek eriembuuk echi òjajaan̄ lek cha me agba okwaan̄ Nali ya. 4Eriembuuk echi òwọwọlọ lek mè ikup ukwuuk ukwuuk cha otataka eriembuuk jaaba echi òmimiin̄ ufuk mè ijaan̄ lek cha imeen̄ isan̄a kpai. Ogwu Fero obobolo chieen̄.
5Ilaak okpọkpọk iben si ọmọ. Imumun̄ ilaak òso mgbọ iba ike akpa jaaba òmimiin̄ mè ijaan̄ lek otibibe isibi me lek uti akpa ge. 6Me udun̄ kiban̄, ofifi nsiik nsiik akpa jaaba, echi efet agan̄ mbum-ura owutbe ichiaak, onenitibi si isibi me lek uti akpa yaage. 7Akpa echi òsisiik lek cha oteteen̄ akpa jaaba echi òmimiin̄ mè ijaan̄ lek cha imeen̄. Ogwu Fero obobolo chieen̄, mè imun̄ ibe ke îre ilaak ke ọmọ okimumun̄.
8Me ewelegwe, ilaak cha osisisik ekwukwu kan̄. Eya orọ, iraria ikwaan̄ igwen otutuuk ebi ìkido ido-inu, mè otutuuk ebi ìriọọn̄ inu ìkup me ido Ijipiti, mè iben ilaak cha ikpa ijeen̄ ema. Ire, kpunu ene geege me etete kiban̄ òkọkọt ibum ibot ilaak cha inyi ogwu Fero.
9Mgbọ ya ke ogwu ibot ebi ìkinyi ogwu Fero miin̄ onitumu inyi ogwu Fero ibe, “Jei, cherekeyi, nkeek ijo inu nrọbe. 10Mgbọ owu ogwu Fero onaan̄be ejit inyi eji ebi ikwaan̄ kwun̄, emi melek ogwu ibot ebi ìkitem inorie, mè inyi ida ibe etet eji ekaan̄ me uwu mkpọn eyi òkup me lek uwu ogwu ibot ebi akọn̄ ìkibem owu, 11eji ene iba mîgbaan̄ imun̄ ilaak me eririeen̄ yaage. Ogwu ikup ìmun̄ chieen̄ ilaak eyi kan̄ esese. Ibot ilaak cha si ìre esese. 12Îkaan̄ gwun̄ nsabọn irieen̄ ge, ogwu Iburu, melek kiji ekupbe me ere ya. Ọmọ ìre ogwu usun̄ ogwu ibot ebi akọn̄ ìkibem owu. Eji eneniben ilaak cha ikpa inyi. Gwun̄ enerieen̄ ya obubum ibot ilaak cha inyi eji, kpa ogwu mè ibot ilaak eyi kan̄. 13Ike îkpabe ibot ilaak cha inyi eji, ikeya si ke îrọ iso. Emi, mîyaka ikwaan̄ n̄a inyi emi. Ogwu melek n̄a ke ejeen̄ ikpan̄.”
14Ogwu Fero oraria ikwaan̄ ibe esi esa Josefu enu. Mgbọ yaage, esasan̄a Josefu isibi me uwu mkpọn irak ijọn̄ ya. Ikwọkwọkọ ifet me otu, mè inwene lek, mè inin̄ inu me isi ogwu Fero.
15Mgbọ înube, ogwu Fero onenitumu inyi ibe, “Mmumun̄ ilaak, ire, kpunu ene geege òkọkọt ibum ibot inyi emi. Ire, nnọ ibe ke ire ikpa ilaak inyi owu, ke owu òkekikọt ibum ibot inyi ene.”
16Josefu ofọfọọk ogwu Fero ibe, “In̄-in̄! Ìkare emi! Awaji môbum ibot ilaak cha inyi owu ogwu Fero, inyi ejit kwun̄ ikup me esuuk.”
17Ogwu Fero onenitumu inyi Josefu ibe, “Me emen ilaak n̄a, emi ǹkeke me agba okwaan̄ Nali, 18mè imun̄ eriembuuk jaaba òmimiin̄ ufuk mè ijaan̄ lek onan̄abe me emen mun̄ me okwaan̄ ya isibi, mè inikitaka mbubet me agba okwaan̄ ya. 19Me udun̄ kiban̄, ofifi eriembuuk jaaba oneninan̄a me okwaan̄ Nali ya si isibi, mè iwọlọ lek, mè isak lek enenen, mè ikup lek ukwuuk ukwuuk. Ǹkararak ìmun̄ ojelek eriembuuk òfieek lek ikeya me otutuuk ido Ijipiti. 20Eriembuuk cha òkup ukwuuk ukwuuk mè isak lek otataka adasi eriembuuk jaaba echi òjajaan̄ lek cha isan̄a kpai. 21Ire, mgbọ ema etakabe isan̄a, ekpọkpọ iwọlọ lek si kubọk ema ekupbe me adasi mgbọ. Kpunu ene geege òbomun̄ ema mgbọ ya, mè ichieek ibe ke îre ema etaka eriembuuk cha. Mmumun̄ ikeya, mbobolo chieen̄ me ilaak.
22“Mgbọ eya orakabe, mkpọkpọk imumun̄ si ofifi ilaak ike akpa jaaba òmimiin̄ mè ijaan̄ lek otibibe isibi me lek uti akpa ge, 23mè iyaka inimun̄ ofifi nsiik nsiik lek akpa jaaba echi efet agan̄ mbum-ura owutbe ichiaak, mè ijijaka isan̄a, otibibe isibi me lek uti akpa yaage. 24Akpa echi òsisiik lek cha oteteen̄ akpa jaaba echi òjajaan̄ lek cha imeen̄ isan̄a. Mben ilaak chi ikpa inyi ebi ìkido ido-inu. Ire, kpunu ene geege me lek kiban̄ òkọkọt ibum ibot ilaak chi inyi emi.”
25Josefu onenitumu inyi ogwu Fero ibe, “Ilaak iba cha owu ogwu Fero omun̄be ìre ilaak yaage. Inu Awaji oborọ ke îkpọk mbum ijeen̄ owu. 26Eriembuuk jaaba cha òjajaan̄ lek ìre acha jaaba. Ikeya si, akpa jaaba cha òjajaan̄ lek ìre acha jaaba. Ilaak iba cha ìre inu ge gaalek. 27Eriembuuk jaaba cha ònanan̄a isibi mgburudun̄, mè ikup lek ukwuuk ukwuuk, mè iwọlọ lek ìre acha jaaba. Ikeya si, akpa jaaba echi òsasak lek cha, efet agan̄ mbum-ura owutbe ichiaak cha, ìre si acha jaaba. Ema inu iba chi ìre acha jaaba mgbọ akan̄ mônin̄be.
28“Îre ike mwuukbe lek itumu inyi owu ogwu Fero ke îkup. Inu Awaji oborọ ke îkpọk mbum ijeen̄ owu ogwu Fero. 29Kpọ, acha jaaba òkinu ìre mgbọ inorie mè anam môsibibe iwa enenen me otutuuk ido Ijipiti. 30Acha jaaba kechi isiraka, acha jaaba echi akan̄ mônenigọọk. Akan̄ yi môjijaka otutuuk ido Ijipiti igwook, ire lek ebi ene kpebeyaka ikọt ikeek acha jaaba cha mgbọ inu onwọnbe. 31Otutuuk ene mêwuuk mgbọ inu onwọnbe, mije, ke akan̄ ya môlobo ejit enenen. 32Ilaak ya owu ogwu Fero omun̄be iso mgbọ iba ìkirọ inye ibe ke Awaji îtumu ifieek ibe ke inu yi ìkpolọlọ irọrọ iso, melek si ke ìkpojọn̄ọ mgbọ Awaji môrọbe inu yi.
33“Eya orọ, mgbọ yi, owu ogwu Fero gobo enerieen̄ ge òkakaan̄ ifuk-ibot, mè ikaan̄ si iriọọn̄-inu sa to me ibot mkpulu me otutuuk ido Ijipiti, 34mè gobo ebi ìbekikpọ chieen̄ me lek ikwaan̄, mè ekebọkọ irek ge me emen irek go me lek otutuuk inu geelek ebi ene ebekirọkọ me uko me otutuuk ido Ijipiti me emen acha jaaba cha, mgbọ inu mônwọnbe. 35Ria ife chi, mè esa unye kwun̄, owu ogwu Fero, eketitiin̄ chieen̄ inorie geelek etap me uwu isun̄-inorie me otutuuk ikpele ama geelek, 36mè esun̄ inorie chi enyi ebi Ijipiti, eban acha jaaba cha mgbọ akan̄ mônube, inyi ebi Ijipiti ekakwaan̄ ìta mije uraafiọọn̄.”
Mîsa Josefu irọ ogwu ibot mkpulu me Ijipiti
37Ifuk-ibot Josefu onyibe ya onenitat me lek ogwu Fero melek otutuuk ebi ibot ikwaan̄ kan̄ cha. 38Ogwu Fero otutumu inyi ebi ibot ikwaan̄ kan̄ cha ibe, “Ìre eji mêkọt iweek ofifi ene òkup kubọk Josefu imun̄, ogwu ekwukwu Awaji okupbe me emen?”
39Ogwu Fero onenitumu inyi Josefu ibe, “Mgbọ Awaji owuwuuk lek irọ inyi owu òriọọn̄ otutuuk inu chi, kpunu ofifi ene òkakaan̄ ifuk-ibot, mè iriọọn̄ inu kire owu. 40Eya orọ, îre owu obore ogwu ibot mkpulu me uwu n̄a. Inu geelek owu obokitọ ke otutuuk ebi n̄a ebekirọ. Ogboon̄ ubọọn̄ gaalek ke emi mbasa imin igak owu.”
41Ogwu Fero onenitumu inyi Josefu ibe, “Kpọ, emi nrọ owu ogwu ibot mkpulu me otutuuk ido Ijipiti.” 42Ogwu Fero owọwọọk mkpọtubọk iman̄ ubọọn̄ òkup me otubọk kan̄ inwaan̄ me otubọk kè Josefu, mè imọnọ ofọnti lilin̄ ebi ubọọn̄ ekitap isibi isa itap Josefu, mè imọnọ akalari alata araran̄ ikwaan̄ ọmọ me ebek, 43mè inyi unye ibe Josefu ikilibi me emen uji ubọọn̄ eyi òso iba, òrere eyi òkigọọk ọmọ ogwu Fero me udun̄. Josefu isikilibi me emen uji akọn̄ ya, ebi ìkibem ogwu ubọọn̄ mîra ikilibi me isi, mè ikitaan̄ ukpo ikibe ebi ene, “Ìgba agan̄, ìgba agan̄.” Ikeyi ke ogwu Fero osa Josefu irọ ogwu ibot mkpulu me otutuuk ido Ijipiti.
44Ogwu Fero onenitumu inyi Josefu ibe, “Emi nre ogwu Fero! Ire, kpunu ene geege me otutuuk ido Ijipiti òborọ inu geege, itata eyi owu otọbe.” 45Ogwu Fero onyinyi Josefu erieen̄, Jefenat Pania,#41:45 Me usem Ijipiti, Jefenat Pania ìsibi ‘Awaji îkitumu ikọ, mè ikup me ugwem.’ mè isa Asenat, gwun̄ kè Pọtifera, inyi Josefu me lek nwa. Pọtifera yi ìre ogwu òban yọk me ama Eliopolis.#41:45 Òrere On me usem Iburu Josefu onanan̄a isibi, mè ibene ije ikijijen̄e ikana otutuuk ido Ijipiti.
46Josefu ìre akọp acha ita mgbọ îbenebe ikisi ikwaan̄ inyi ogwu Fero, òrere ogwu ubọọn̄ ido Ijipiti. Mgbọ Josefu onan̄abe me isi ogwu Fero, ijijijen̄e ikana ikikpọ otutuuk ido Ijipiti. 47Me emen acha jaaba eyi inu okije ijaan̄ cha, ijọn̄ Ijipiti îsibi inu ogbogbo. 48Josefu onyinyi ida, etititiin̄ mfut uko itap ijot uwu isun̄-inorie me emen otutuuk ikpele ama geelek me ido Ijipiti. Me ama geelek, mîtitiin̄ otutuuk esese chieen̄ inorie geelek ònan̄a me uko òkukup ikat ikana ama keya. 49Inorie etitiin̄be isun̄ îwa ikup kubọk okpoon̄ agba awaji. Kpeyaka ikọt itọ iriọọn̄ otu ifuk.
50Sabum acha akan̄ cha onire, Josefu îbon ibot bọn ebirieen̄ iba me owot kè Asenat gwun̄ kè Pọtifera, ogwu òban yọk me Eliopolis. 51Josefu ìgwen adasi gwun̄ kan̄ Manasi,#41:51 Manasi ìsibi ‘irọrọ inyi ewuuk.’ mije, ìbe ke Awaji îrọ inyi ọmọ iwuuk otutuuk ufialek kan̄ mè otutuuk uwu nte kan̄. 52Ogwu òso iba ke îgwen Iferem,#41:52 Iferem ìsibi ‘imumumana mgbọ iba.’ mije, ìbe ke Awaji îrọ inyi ọmọ imumana me ama ufialek kan̄.
53Acha jaaba echi uwa inorie cha oneniraka isan̄a me ido Ijipiti. 54Acha jaaba echi una inorie obebene ikinu, ike Josefu otumube. Akan̄ otetet otutuuk ido geelek, ire, me otutuuk ido Ijipiti, inorie òwa. 55Mgbọ otutuuk ebi Ijipiti ebenebe inọ akan̄ ya me lek, ebi ene etataan̄ ukpo ibe ogwu Fero inyi ema inorie. Ogwu Fero obebe otutuuk ebi Ijipiti, “Ìsi lek kè Josefu. Inu geelek îtumube inyi enyi, ìrọ ikeya.”
56Mgbọ akan̄ ya onin̄be ikana otutuuk Ijipiti, Josefu onenichili uwu isun̄-inorie cha, mè ibene ikinyam inorie inyi ebi Ijipiti. Mije, akan̄ ya înye enenen me ido Ijipiti. 57Ebi ido geelek ekekigbuku inu Ijipiti inilep inorie me ubọk kè Josefu, mije, akan̄ ya înin̄ ikana otutuuk ere, mè igon ikam.
Currently Selected:
Ibeb 41: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
