Ibeb 42
42
Ebi ngwan̄ kè Josefu mînilep inorie me Ijipiti
1Mgbọ Jekọp onọbe ibe ke akpa òwa me Ijipiti, itutumu inyi bọn kan̄ ibe, “Keke orọ enyi ekpọkpọ ikweek ikibubeek chieen̄ chieen̄ ikana ikikpọ lek kinyi? 2Nnọ ibe ke akpa òwa me Ijipiti. Ìnije ìsi ìlep akpa ìsa ìnu, inyi eji erie, mè uraafiọọn̄ ikakpan̄ eji.”
3Akọp ebi ngwan̄ kè Josefu eneninan̄a ije isi Ijipiti isi ilep inorie. 4Ire, Jekọp ìkachieek ibe Benjamin, ogwu melek Josefu erebe uga ge, igọọk isi ije ya, mije ufieek-owot ibe ke unan môkọt isak me lek me inyọn̄ ije ya. 5Ikeyi ke bọn kè Ijeren egọọk ogbogbo ebi ofifi ife isi Ijipiti isi ilep inorie, mije, akan̄ ya înye enenen me otutuuk ido Kenan.
6Me mgbọ ya, Josefu ore ogwu ibot mkpulu me ido Ijipiti. Ọmọ si ore ogwu òkinyam akpa inyi otutuuk ebi ido ya. Ebi ngwan̄ kè Josefu eneninu, mè igele igwook, mè itọbọ ibot inyi Josefu. 7Mgbọ yaage Josefu omun̄be bọn nte kan̄ cha, irọriọọn̄ ema isi, mè ifiaan̄ ikirọ kubọk ema ìre ebi ofifi ife me lek kan̄. Ikekitumu ikọ me unye ida inyi ema, mè ido ema ibe, “Enyi enan̄a me owa?”
Ema efọfọọk ibe, “Eji enan̄a me ido Kenan, eji ebenigọọk ilep inorie.”
8Josefu îriọọn̄ ebi ngwan̄ isi. Ire, ebi ngwan̄ kpeyaka ikọt iriọọn̄ ọmọ isi. 9Josefu onenisi ikeek ilaak cha geelek îmun̄be ofolek kiban̄, mè inibe ema, “Enyi ìre ebi enun̄unun̄! Enyi enu ibeniriọọn̄ ubọk ido kiji okupbe.”
10Ema efọfọọk ibe, “In̄-in̄, ogwu nte, ìkare ikeya. Eji ebi usun̄ kwun̄ enu ibenilep inorie. 11Eji otutuuk ìre bọn ute ge, eji ìre ebi atikọ! Eji ebi usun̄ kwun̄ kperarak ire ebi enun̄unun̄.”
12Josefu okekitumu inye si ibe, “Ataak! Enyi enu ibenikpọ ubọk ido kiji okupbe.”
13Ema etutumu inyi Josefu ibe, “Eji ebi usun̄ kwun̄ ìre bọn ute ge. Eji eluk me ido Kenan. Nte kiji ìbon eji akọp mè ebirieen̄ iba. Ogwu uchit-owot melek nte kiji ekup me uwu mgbọ keyi. Ene ge me lek kiji îkwu.”
14Ire, Josefu otutumu inyi ema ibe, “Ikọ ya ire eya! Ike ntumube inyi enyi, ikeya ke îkup. Enyi ìre ebi enun̄unun̄! 15Ikeyi ke mbasa iriọọn̄ atikọ kinyi. Nsa me erieen̄ ogwu Fero inyan̄a ibot ibe, îtata mè enyi esasa ogwu uchit-owot kinyi inu me ere yi, enyi kpebenan̄a me ere yi ifo. 16Ìsan̄a ene ge me etete kinyi ìria, mè isi isa ogwu uchit-owot kinyi ya inu. Ebi ìsisik mêkup me uwu mkpọn ire mgbọ ogwu eriabe ije ya môkabe. Mgbọ ya ke mâriọọn̄ atikọ kinyi. Ire enyi kperọ ikeya, me erieen̄ ogwu Fero ke ntumu ibe ke enyi ìre ebi enun̄unun̄.” 17Josefu otetet ebi ngwan̄ kan̄ cha isun̄ usen ita.
18Me òso usen ita, inenitumu inyi ema ibe, “Ìkpọ, emi ìre ogwu òkitet ukpook Awaji. Ìrọ ikeyi, inyi enyi egat ugwem: 19Ire enyi ire ebi atikọ, ene ge me lek kinyi ibia me uwu mkpọn yi etetbe enyi isun̄, mè ebi ìsisik efon, mè esa inorie enyi elepbe ejet ebi ìkup me uwu, inyi uraafiọọn̄ ikakpan̄ ebi kinyi. 20Ikalọlọ isasa ngwan̄ kinyi ogwu uchit-owot ya inu, mè emi ǹsa chieen̄ m̀mun̄. Ikeyi ke mêsa iriọọn̄ atikọ kinyi, inyi enyi ekakwaan̄.” Ebi ngwan̄ cha echechieek.
21Ema ekekitumu me lek kiban̄ ibe, “Me atikọ, awọ òwa me ibot kiji, mije inu ikpak eji erọbe ngwan̄ kiji! Eji mîmun̄ mun̄ ito ufieejit mkpa ngwan̄ kiji. Irariaak eji igak ibe eto ọmọ nsan, eji ekakat ejit ijit. Îre mije keya ke eji ekibọkọ ufialek keyi.”
22Ruben obebe, “Ìin̄-iin̄-ìin̄, ìre ǹkatumu ìnyi enyi ibe enyi ekarọ gwuja ya ijo inu geege me lek? Enyi ejijit ikọ n̄a. Mgbọ keyi, ke mkpukpe eje kan̄ ire eyi òkikeme eji.” 23Otutuuk mgbọ ya, ema kperiọọn̄ ibe ke Josefu òkinọ inu geelek ema ekitumu, mije, îkaan̄ ogwu òkikana usem inyi ọmọ melek kiban̄.
24Josefu ojeje inan̄a me ere ya, mè isi ito ito. Itoto ito iwọ, igwugwu ikom inu me ere ya initumu si ikọ melek kiban̄. Ineninyi ida, etetet Simiọn isibi me etete kiban̄, mè isa olik ibọp me isi otutuuk kiban̄.
25Josefu oneninyi ida ibe etap inorie ejot otutuuk akpa ebi ngwan̄ kan̄ cha, mè eyaka ikpoko ene ge ge osabe inu etap me otu akpa enyi ogwukaan̄, mè enyi si ema inorie eyi môsobe ema me oniin̄ ije kiban̄. Ebi ikwaan̄ kan̄ erọrọ si ikeya. 26Ebi ngwan̄ kè Josefu cha enenibọp akpa inorie kiban̄ cha me inyọn̄ inyinya akpan kiban̄, mè ininan̄a ije inin̄ oniin̄ ifon.
27Ema enenigba ere ema ebelaak iwele egwe. Ene ge me lek kiban̄ osisi itọn̄ọ otu akpa kan̄ ibosan̄a inorie inyi inyinya akpan kan̄, mè inimun̄ ikpoko kan̄ me otu akpa inorie kan̄. 28Itutumu inyi ebi ngwan̄ ibe, “Ìnikpọ, ife cha mîyaka ikpoko nsabe ikpe ewe inorie itap me emen akpa n̄a. Ìnikpọ, ikpoko ire eyi me otu akpa n̄a!”
Ikọ ya ema enọbe osisisik ema lek enenen. Ema ekekiran, mè ikitumu me lek kiban̄ ibe, “Jei, ìre keke ke Awaji orọ eji ikeyi?”
29Mgbọ ema erebe uwu, ema ebeben otutuuk inu cha òsisibi inyi ema me oniin̄ ije ikpa inyi Jekọp nte kiban̄. 30Ema etumu ibe, “Ogwu ibot mkpulu me ido Ijipiti ìkpọkpọ itumu ikọ unye unye inyi eji, mè ibe ke eji enu enun̄unun̄ inenilet ikpọ ubọk ido kiban̄ okupbe. 31Eji efọfọọk ibe ke eji ìre ebi atikọ, ke eji kperarak ire ebi enun̄unun̄, 32ke nte kiji ìbon eji akọp mè ebirieen̄ iba, ke ogwu uchit-owot melek nte kiji ekup me uwu me ido Kenan. Ire, ke ene ge me lek kiji îkwu.
33“Ogwu ibot mkpulu ya onenibe eji, ke ubọk ọmọ obosa iriọọn̄ ibe eji ìre ebi atikọ ìre ikeyi: mè eji etele ngwan̄ kiji ge enyi ọmọ me ere ya, mè esa inorie ejet ebi uwu kiji, inyi uraafiọọn̄ ikakpan̄ ema. 34Ire, mè eji esa ngwan̄ kiji ogwu uchit-owot ejet ọmọ, inyi ọmọ isa iriọọn̄ ibe ke eji ìre ebi atikọ, ke eji kpere ebi enun̄unun̄. Ire eji isisa ogwu uchit-owot kiji ya inu, ke ọmọ môyaka ngwan̄ kiji ogwu ọmọ otetbe ikaan̄ ya inyi eji, mè itele ibe eji ekejijen̄e ekana me ido Ijipiti me utelelek.”
35Me mgbọ ema ekikpọk akpa ije kiban̄ ge ge, ogwu ichili, òmun̄ ikpoko kan̄ me otu akpa kan̄. Ema otutuuk ene emumun̄ efit ikpoko kiban̄ cha. Nte kiban̄ si ogọgọọk imun̄. Ukpook otetet ema enenen. 36Jekọp nte kiban̄ obebe ema, “Jei, enyi mênirọ inyi emi ǹkana ogwu ònan bọn! Josefu ìkayaka ìkup! Simiọn ìkayaka ìkup! Mgbọ keyi, enyi mêyaka inimọnọ si Benjamin! Îre emi ke otutuuk inu chi okirọ ikeme!”
37Ruben obebe ogwu ute, “Bene Benjamin tap emi me ubọk, ke mâyaka isa igwu ikom ika ijet owu me utelelek. Ire ǹkasa ìjet owu, kpan̄ ibot nsabọn iba n̄a me useen̄.”
38Ire, Jekọp ìkachieek. Ìbe, “Gwun̄ n̄a ìkpogọọk enyi isi ere ya! Mije, ogwu ngwan̄ îkwu, ọmọ gaalek oyaka inisik me owot ogwu uga. Ire unan isi isak ọmọ me lek me oniin̄ ije ya, enyi mêrọ emi ǹsa isọọn̄ ibot n̄a m̀fieek ejit ǹkwu m̀fo ama ekwukwu.”
Currently Selected:
Ibeb 42: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
