Ibeb 43
43
Ebi ngwan̄ kè Josefu mîsa Benjamin isi Ijipiti
1Akan̄ ya okpọkpọ ikinye enenen ifo isi me ido Kenan. 2Mgbọ Jekọp mè ebi uwu kan̄ eriebe inorie ema elepbe me Ijipiti isan̄a, Jekọp onenitumu inyi ebi bọn ibe, “Ìnikpọk ìsi ìlep sọntiik inorie me Ijipiti ìmọnọ.”
3Juda otutumu inyi nte kiban̄ ibe, “Ogwu enerieen̄ ya ìtataba eji ubọk me utọn̄ ibe mè eji ekaje ìgbet ere ọmọ okupbe, ire eji kpesa ngwan̄ kiji ogwu uchit-owot igbaalek inu. 4Mgbọ keyi, ire ochieek ibe Benjamin ngwan̄ kiji igọọk eji ije, eji mêsi ilep inorie ijet owu.
5“Ire òkachieek, eji kpebekọt isi, mije, ene ya ìbe mè eji ekare ere ọmọ okupbe ire eji kpesa ngwan̄ kiji igbaalek inu.”
6Jekọp ododo ema ibe, “Enyi ejeje itumu inyi ogwu enerieen̄ ya ibe ke enyi mîkaan̄ ofifi ngwan̄ enerieen̄? Ìre keke orọ enyi etapbe emi me emen uyọrọlek òkup ikeyi?”
7Ema efọfọọk ibe, “Ogwu enerieen̄ ya ìkpọkpọ ikido eji owuwa ikọ ofolek ototun̄ ukan̄ kiji, mè ido eji ibe mè ìre nte kiji me ugwem ye, mè ìre eji mîkaan̄ ofifi ngwan̄ enerieen̄ ye? Eji ekekifọọk igọọk me lek ikọ îkido eji. Ìre eji mejeje ikọt iriọọn̄ ibe ke môbe eji esa ngwan̄ kiji enerieen̄ ejet ọmọ?”
8Juda onenitumu inyi Ijeren nte kiban̄ ibe, “Bene gwun̄ ya tap emi me ubọk, mè eji eneje esi elep inorie, inyi eji melek kwun̄ mè nsabọn kiji egat ugwem, mè ekakwaan̄. 9Emi ke ibot gwun̄ ya obokup me ubọk. Ikaan̄ inu òrere lek, emi ke owu obotet. Ire ǹkasa gwun̄ ya ìka ìnu, mè ìsa ìniyaka ìtap owu me ubọk me ògat ugwem, eje kan̄ itoon̄ emi me ibot ire mgbọ geelek. 10Ikarege eji efiatbe mgbọ ikeyi, ike mgbọ keyi, kè eji mîra iyaka ere ya mgbọ iba.”
11Ijeren nte kiban̄ obebe ema, “Înwọn ma. Ire ikeya ke ìbokup, ìneen̄ lek, mè ìtiten̄e mfut uti inyọn̄ ijọn̄ keyi, echi ònwọnwọn ichit, ìtap me akpa kinyi ìsa ìsi ìche ìnyi ogwu ibot mkpulu ya kubọk inyinyi. Ìmọnọ aran̄ igwa lek, mè aran̄ akwọọk, mè esese chieen̄ inwan̄ mè ukwuuk uti ekisa irọ inorie itop, mè aran̄ mâa, mè ichip pisitachio mè ichip alimọn. 12Ìmọnọ ikpoko irek iba ìkaan̄ me ubọk, mè ìsa irek ge ìnyi me useen̄ ikpoko eyakabe itap me otu akpa kinyi mgbọ keyilọ ya. Usini mgbọ, ife cha elọlọ ubọk iben ikpoko cha itap me emen akpa kinyi. 13Ìsa ngwan̄ kinyi ìgbaalek ìsi lek ogwu enerieen̄ ya! Ìbene ije! Ikayaka ìfiat mgbọ ofifi. 14Kè Awaji Ogwu Òkaan̄ Unye Geelek irọ inyi ene ya ikaan̄ ejit nsan me lek kinyi, mè iria ngwan̄ kinyi keyilọ melek Benjamin, inyi egọọk enyi egwu ekom eka. Eyi n̄a, ire nsabọn n̄a ibekwaan̄ itele emi, ekwaan̄ etele emi ma!”
15Bọn kè Ijeren cha enenikpulu inyinyi cha, mè imọnọ ikpoko irek iba ikaan̄ me ubọk, mè isa Benjamin ngwan̄ kiban̄ igbaalek inan̄a isi Ijipiti, mè isi imun̄ Josefu. 16Josefu imumun̄ Benjamin melek bọn nte kan̄, igwegwen ogwu ibot ebi ikwaan̄ uwu kan̄ itumu inyi ibe, “Sa ebirieen̄ chi fo uwu, mè kpan̄ anam, mè bala sa tem inorie, ke ife chi mêgọọk emi irie inorie me ikarek chereyi.”
17Ogwu ibot ikwaan̄ ya orọrọ ike Josefu otumube, mè isa ife cha isi itap me uwu kè Josefu. 18Ukpook otetet ife cha enenen. Ema ekekitumu ibe, “Îre mije ikpoko cha eyi ife chi eyakabe itap me emen akpa kiji me mgbọ keyilọ ya ke etet eji initap me uwu. Ene yi ìkiweek irọrọ eji nnaan̄, mè isa eji irọ ebi usun̄, mè ibọkọ eji inyinya akpan kiji.”
19Eya orọ, ema ejeje isi lek ogwu ibot ikwaan̄ uwu kè Josefu me otu isotu, 20mè itumu inyi ibe, “Ogwu nte, eji mînu ere yi adasi mgbọ inilep inorie. 21Me oniin̄ eji ekije ifo, mgbọ eji erebe ere eji ebelaak iwele egwe, mè ichili otu akpa kiji, eji eyaka inimun̄ ikpoko eji esabe ikpe ewe inorie me otu akpa kiji. Ogwu ichili otu akpa kan̄, òmun̄ otutuuk otu ifuk ikpoko kan̄. Eya orọ, eji mîsa ikpoko ya ikaan̄ me ubọk inu mgbọ keyi ibesa ijet owu. 22Eji kperiọọn̄ ogwu òyayaka ikpoko cha itap me otu akpa kiji. Eyi eji enube yi, eji mîsa si ofifi ikpoko eji ebesa inilep inorie eyi mgbọ keyi ikaan̄ me ubọk inu.”
23Ogwu ibot ikwaan̄ uwu kè Josefu obebe ema, “Esuuk ikup melek kinyi! Ikatet ukpook, mije, môre Awaji kinyi mè Awaji nte kinyi oche ikpoko itap me otu akpa cha inyi enyi. Me atikọ, emi mbọkọ ikpoko enyi esabe ilep inorie me ere yi mgbọ ya.” Ene ya osisi isan̄a Simiọn isibi ijet ema.
24Ogwu ene ya onenisa ema isi itap me uwu kè Josefu, mè inyi ema mun̄ egwọk ukot, mè inyi si inyinya akpan kiban̄ inorie. 25Ema ekekineen̄ inyinyi cha ema esabe inu ibesa iniche inyi Josefu isun̄ iban mgbọ Josefu môkabe me ikarek, mije, ema mînọ ibe ke îre me uwu ya ke ema eberie inorie.
26Mgbọ Josefu okabe, ema esasa inyinyi cha iche inyi, mè itọbọ ibot me ijọn̄ inyi. 27Josefu onenido ema ibe, “Lek kinyi ye? Sà nte kinyi, ogwu ugane ya, ogwu enyi etumube ikọ ofolek mgbọ keyilọ ya ye? Ìre ọmọ òwa si me ugwem?”
28Ema enenigele igwook, mè itọbọ ibot me ijọn̄ inyi ọmọ, mè ifọọk ibe, “Ogwu usun̄ kwun̄, nte kiji, òwa me unye-lek.”
29Josefu onenibene chieen̄ itoon̄ me lek kè Benjamin, gwun̄ nga kan̄, mè inido ema ibe, “Ìre ogwugwu ore ngwan̄ kinyi ogwu ijija ogwu enyi etumube ikọ ofolek inyi emi mgbọ keyilọ ya?” Inenitumu inyi Benjamin ibe, “Gwun̄ n̄a, Awaji ikaan̄ ejit nsan me lek kwun̄.” 30Josefu ìkayaka ìkọt ìtet lek kan̄, mije ngwan̄ kan̄. Igwagwat lek inan̄a ikeke ije inan̄a ifo emen agwut, mè ikup me ere ya ito ito.
31Inenisa mun̄ igwọk isi, mè itet lek inye, mè inan̄a isibi inu, mè ibe esa inorie enu.
32Eneniyik inorie kè Josefu me esese ikasi, mè iyik eyi ebi ngwan̄ kan̄ me esese ikasi, mè iyik si eyi ebi Ijipiti ìgọgọọk ema irie inorie ya esese, mije, ebi Ijipiti kpekigọọk ebi Iburu igbaan̄ irie inorie. Eya ìre mbuban inu me lek ebi Ijipiti. 33Esun̄ ebi ngwan̄ kè Josefu cha me isi kè Josefu me onineen̄, ibene me lek ogwu adasi isi ire lek ogwu mgburudun̄. Mgbọ ema emun̄be inu ya, ikeke ema chieen̄ enenen, ema ekekiriraan̄ chieen̄ ikikpọ lek kiban̄. 34Enenichibi inorie me inyọn̄ ikasi kè Josefu inyi ema. Inorie kè Benjamin îwa mgbọ go igak eyi ebi ngwan̄ geelek. Ema otutuuk efefet lek igọọk Josefu irie mè inwọ ike efuuk kiban̄ okọtbe.
Currently Selected:
Ibeb 43: Obolo
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.
