SURA’ KATOMINAAN 19
19
Penggauran dipamasero
19:1-37
1Ma’kadami tu PUANG lako Musa Nakua:
2Ma’kadako lako mintu’ kasirampunan to Israel sia kuanni kumua: La maserokomi, belanna maseroNa’, te Aku PUANG, Kapenombammi.
3Pantankomi la ungkasiri’ indo’mi sia ambe’mi sia la ungkaritutui tu allo katorroangKu: Akumo tu PUANG, Kapenombammi.
4Da mipennoloi deata sia da migaraga rapang-rapang dipodeata dipati’no’: Akumo tu PUANG, Kapenombammi.
5Iake umpemalarangkomi pemala’ kasalamaran, la mipemalaran susito naalanna penaanNa PUANG.
6Iato allo la minii umpemalaranni sia iake masiangi dio mai la mikandemo to, apa iatu apa torronapa sae lako allo ma’pentallunna, la ditunu mampu’.
7Iake ma’tallung bongimi, mikande bangpi, iamo misa’ apa megi’giran sia tae’ naalai penaanNa PUANG.
8Minda-minda ungkandei, iamo la umpassanni tu kadakena, belanna umpamatuna kamaseroanNa PUANG; tau iato la disabu’i dio mai bangsana.
9Iake unnalakomi bura padangmi, da mipurai tu randanna, sia da mirurukki tu misalanna.
10Da duka mimebua anggoro’ sipenduan sia iatu bua rondonna damo mirurukki, sangadinna la mieloran anna potaai to bongko sia to sae. Akumo PUANG, Kapenombammi.
11Da miboko, da mima’kada tang tongan sia da misipakena len.
12Da mipalao sumpa tang tongan ussa’bu’ sangangKu, belanna iake susito umpamatunakomi sanganNa Kapenombammi. Akumo tu PUANG.
13Da mupandasa padammu ma’rupa tau sia da murampa barang apanna; sia sarona to sumaromu da mupopa’bongii sae lako masiangna.
14Da mutampakki ropu tu to taru sia da mupadioi tingayona to buta tu apa la natodo, sangadi la mataku’ko lako Kapenombammu. Akumo tu PUANG.
15Da mibimbang ma’paolai salu; da mikaturu-turui to baitti’ ba’tu umpelindo to kapua, sangadinna la musanda tonganni tu kara-karana padammu ma’rupa tau.
16Da mumale ma’pakadake lele dio lu bangsamu; sia da mudaka’ lalan la umpatibollo rarana padammu ma’rupa tau. Akumo tu PUANG.
17Da mukabiri’ siulu’mu lan penaammu, sangadinna la mupakanaan ke unnada’ko sangtondokmu, kumua da’mo natete dio tau iato ammu passan kasalan.
18Da mupalan penaai tu la umpabala’i kadake ba’tu untambukan essun sangbangsamu, sangadinna la mukamasei tu padammu ma’rupa tau susi batang kalemu: Akumo tu PUANG.
19La mikaritutui tu aluk Kupondok, da mupasisolai tu patuoammu, ke sisengaranni, da muambo’i banne duang rupa tu pa’lakmu, sia da mupake sampin duang rupa.
20Iake denni misa’ tau sangampa’ misa’ baine, iamotu mai kaunan diben misa’ muane la napogundi’, apa tae’pa nadila’bak ba’tu ditomakakai, la dipakannai ukungan; apa tae’ na la dipatei, belanna tae’pa naditomakakai.
21La napennoloan lako PUANG tu kadiseroian kasalan dio to’ ba’ba Tenda Kasitammuan, iamotu misa’ domba laki la diposuru’ pangakuan sala.
22Sia to minaa la umpadenanni kadiseroian kasalan tete dio domba laki tu diposuru’ pangakuan sala dio oloNa PUANG, napobua’ kasalan napogau’, anna iatu kasalan napogau’ la dipagarri’.
23Iake tamamokomi tondok iato, ammi tanan ma’rupa-rupa garonto’ bua-bua, iatu bua bunga’na la mipa’pemalii; tallung taun la pemali lako kalemi sia tae’ na la dikande.
24Lan taun ma’penna’pa’ iatu mintu’ buanna la dipamaindan, anna dipopemala’ umpudi-pudi PUANG.
25Apa iake taun ma’pellima, ma’dinmo mikande tu buanna, anna rangnganangkomi buanna. Akumo tu PUANG, Kapenombammi.
26Da mikandei tu apa kerarapa; da midaka’ to pakita-kita sia to umpogau’ balik mata.
27Da mima’ku’ku’ ma’soppo kurin sia da miku’ku’i tu randan danggo’mi.
28Da mitori-tori’i tu kalemi belanna kamatean sia da mitoboi passura’ tu kalemi: Akumo tu PUANG.
29Da mupamatunai tu anakmu baine ke mupopa’elo’na bangi lako gau’ sala kumua da nama’gau’ sala tu to ma’tondok sia da naponnoi gau’ mesirisan tu tondok.
30La mikaritutui tu allo katorroan tu mangka Kupondok sia la mikasiri’ tu inan maindanKu, Akumo tu PUANG.
31Da mima’palulako bombo to mate, ba’tu lako to sola-sola bombo; da midaka’i tu tau iato mai la urruttakki kalemi: Akumo tu PUANG, Kapenombammi.
32La ke’de’ko dio tingayona to keuban sia kasiri’i tu to matua sia kataku’i tu Kapenombammu: Akumo tu PUANG.
33Iake denni to sae musisolan lan tondok, da mupandasai.
34Iatu to sae misisolan la mipapada bangsiato ma’tondok dio lu kamu; la mukamasei susi batang kalemu, belanna mangkamokomi to sae lan tondok Mesir; Akumo tu PUANG, Kapenombammi.
35Da mibimbangan tau ke ma’paolai salukomi, ke massuka’komi sia ke ma’timbangkomi sia ke ma’kararoikomi.
36La mipake tu timbangan tongan sia batu petimbang tongan sia epa#19:36 1 epa agi-agi 36 lite’. tongan sia hin#19:36 1 hin agi-agi 6 lite’. tongan: Akumo tu PUANG, Kapenombammi, tu mangkamo ussolangkomi lan mai tondok Mesir.
37Susimoto la mikaritutui tongan tu mintu’ aluk Kupondok sia mintu’ atorangKu: Akumo tu PUANG.
Currently Selected:
SURA’ KATOMINAAN 19: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009