Susumo 8
8
Yɛnɛ̂ tɛmɛ-nshi
1Ko Dagwi a bare na Nowa, na mwa ngyāma na yas de ya sé tanga yɛ e ji gwokundung o. A tɛ̀ gul gwa pɛl e ra jey, ko nshi na hwo tɛrɛs hɛn. 2A bang jɔ̂t nshî gwogbɔng gworep gwociwil de gwa sé e nɛn vwel, na bapɔk larwak, ko rwak wa ye wang. 3Nshi na tɛrɛs hɛn hywɛ-hywɛ yi e jey. E bamâ nepɔlɔ naga na kuru batungun (150) nshi na tɛt ɛn. 4Ano, e ji pɔlɔ hê kuru na hɛ taama, e ji pwɛl gwô netaama, gwokundung o gwa tumal e ra gwining e ji berakû Ararat. 5Ko nshi na raa ne tɛrɛs hɛn. E tuk pɛrɛ̂ pwɛl gwô kuru, rarak beraku ba nunus.
6E bamâ nepɔlɔ kuru banaas (40), Nowa a wunta repɔk de a kana tɛ̀ e gwokundung o, 7ko a hàla gwohwǎk. Gwɛ kwong gwa kyesem, gwa raa toros hɛ vɔk e jeng de vwel ha hworok. 8Nowa kwong a tomo gwobɔp, a simo a tɔk kɛ nshi na ga gyirik. 9Ko gwobɔp gwa tɔk sɛ̀ kwɔ̂n gyirik wɛt, gwa tó to ɛ vey na Nowa, yaga nshi na rɔngɔl e dyɛngɛ e mwa vwel. Nowa kwong a nára vwɔ mɛ, ko a yel na gwobɔp o e ji gwokundung o. 10A gyeng pɔlɔ taama hak, ko a to tomo gwobɔp o. 11Gwa toyo vey na Nowa e rwa nawiri, ko di, e nû gwɛ gwa vɔk ɛ̀ bwôk rwang bwot de gwa tùt e retîn pwat. Ano de Nowa a tɔk, nshi na ga gyirik e vwel. 12Ko a to ra nepɔlɔ netaama nehak, a to tomo gwobɔp o. Gwɛ kwong gwa pere nàra, gwa to toyo vey na yɛ wɛt.
13E tuk hê mɛsɛng o, e pwɛl gwô pɛrɛ̂ shey, jeng de Nowa a vɔk neshey naga betyiimin na hɛ hining (601), nshi na ga ye jɔng. Nowa a pat pyɛ-bâng gwokundung o, a bɛrɛng, ko a di vwel ha ga hwo hworok. 14E ji nepɔlɔ kuru baba na nɛ netaama, e pwɛl gwo neba, vwel ha ga tɛ́ ɛ hwɔ́k-hwɔk.
15Dagwi kwong a ha a Nowa, a yang ɛ, 16“Nusu hwo yi e ji gwokundung o, hwo na hwā mō, na nèy mō, na behâ nèy mō. 17Pat kayɛ pyɛ cen tanga hwo: benon, na ngyāma mwa, na pyɛ̂ gabaga, yaga na ye bin tɔs nèy, na ye karak, na ye ye ship à jey.” 18Ko Nowa a nusu na nèy mɛ, na hwā mɛ, tanga behâ nèy mɛ, 19na kayɛ yerê ngyama, na kayɛ pyɛ gabaga, na kayɛ yerê benon, kayɛ pyɛ́ de ye kyě kyè e jey, mwa yɛ ya nusu yi e ji gwokundung o e yere mɛn.
Nowa a nára nɔrɔ̂ yas
20E bamâ pyɛ́ yemo mwa, Nowa a yong gàgbang rangâs yas vɔk na Dagwi Darwey, a vɛ́ yi e ji kayɛ yerê ngyama de ya sé ryat, na yi e ji kayɛ yerê benon de ba sé berat, a yɛt, ko a nára mɛ̀ nɔrɔ. 21Jeng de Dagwi Darwey a wok nesang nerat o mo, ko a yâng tó mɛ, “Ma rɔda to me kyini vwel yaga bemasi wɛt, mwa ano de bare na tomong mɛn ba sé ves, yey mɛn ya sé vyes yimo yɛn nèy. Ko ma rɔda to me wey na kayɛ pyɛ cen sede remo de ma ga kana ra wɛt.
22“Gbak de jey ya sé,
jeng bere na jeng bwal,
fes na neceere,
hwos na zɛng,
nagwi na naturuk,
bê yɛnɛ hɛn wɛt.”
Currently Selected:
Susumo 8: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
