Susumo 9
9
Dagwi a sira a Nowa
1Dagwi a tɛ̀ a Nowa tanga nèy mɛ nerat, a yang ɛn, “Tɔs in nèy, karak hin, na yin ye ship à jey. 2Mwa ngyāma, na benon, na betɔk yê wok bengyip min, yê sap in. Ma ga tik yɛ̄ mwa e nɛn min. 3Yi a remo ma simo a yin, yin tɔk re nama yɛ̄ ko pyɛ̂ yeneng, na nèy cɔ́gɔt, na hwonong zɔng wɛt. 4Ko pyɛ jining zɔng de yin a rɔda re wɛt, yɛ à nama de ba shushu nemi mo wɛt, yaga neken na sé e ji nemi. 5Be shushu nemî mwasi ko tyɔng wɛt. Gbing-gbing ma rɔda jāma neken yi na kayɛ ngyama kɛ yi na kawɛ mwat de a mɔrɔ mwat. 6Mwa mwat de a mɔrɔ mwat, ba rɔda mɔrɔ hɛ arɔng, yaga Dagwi a yong mwat sede yɛ. 7Ko yin, tɔs in nèy, na yin karak hin, na yere min ye ye ship à jey.”
8Ko Dagwi a yâng Nowa tanga nèy mɛ, 9“Di, ma sé wuna me na sira tanga yin, na yére bama min, 10na kayɛ pyɛ cen: benon, na yas, tanga ngyāma, mwa pyɛ́ de ya nusu yi e ji gwokundung tanga yin. 11Pyɛ ma yemo de ma sé sira a yin: Ma rɔda to ba wey na pyɛ̂ mwa de ya vɔk neken na tɛmɛ-nshi ko tyɔng wɛt, ko tɛmɛ-nshi wa rɔda to wey na jey arɔng wɛt.”
12-13Dagwi a to ye, “Di, pyɛ durâ sira de ma sé wuna na yin na kayɛ pyɛ cen de ya sé tanga yin a yet ngan, yɛ à shatong de ma ga tɛ̀ e larwak. Wô sè pyɛ durâ wuna-na-sira hom e tē hom na jey nesheneshey. 14Kayɛ jeng de mê vey na balê rwak e jey, ka sede shatong wa nusu, 15ko ma rɔda bare na sira hom na yin tanga kayɛ pyɛ cen, nesheneshey, tɛmɛ-nshi wô to wey na mwa neken ko tyɔng wɛt. 16Kayɛ jeng de mê di shatong e bale, ko wô tɛ̀, me bare na sira hom gbak-gbak de ma wuna na kayɛ pyɛ de ya vɔk neken e ji jey.” 17Ko Dagwi a to yâng Nowa, “Pyɛ durâ wuna-na-sira ma yane de ma ga wuna na yin tanga mwa pyɛ́ de ya vɔk neken e ji jey.”
Nowa na nèy mɛ
18Nèy Nowa de na nusu yi e gwokundung, nɛ̀ à Shɛm, na Ham tanga Yafɛt. Ko Ham, yɛ à dâ Kanaan. 19Yi na nèy netat Nowa mo jey mwa ya sila na bemat.
20Nowa á sè mwât cap, ko yɛ wɛ a tānga pɛrɛ how bwî anap. 21E bama de a sɔ nshî anap o, a feng, ko a dyɛng warap e ji buk mɛ. 22Jeng de Ham, dâ Kanaan, a di da mɛ ferem, a nusu wɔ e majey, a ha a begwa mɛ. 23Ko Shɛm tanga Yafɛt ba jut rugû banga, ba gana e ra batô sanat mɛn, ba kyè mɛ̀ rè bama wɔ yel mɛ̀ e ji buk o, ko ba bang da mɛn; yɛn a doyo bayis mɛn wɛt, yaga na be kwon di da mɛn ferem. 24E bama de sefeng sa ga hala Nowa, ko ba ha a yɛ pyɛ de wen mɛ swɛl o a ra a yɛ.
25Ko a ye, “Tik na gawey he hwo e ra Kanaan.
Ê tɛ́ ɛ sam besam begwa mɛ.”
26A to ye, “Tik na be nɔ̂ng Dagwi Darwey,
yɛ Dagwi wo Shɛm nerey,
ko tik na Kanaan e ra a Shɛm fwôm sesam.
27Tik na Dagwi a tɛ̀ Yafɛt a gwɛ̌ hɛ,
na yere mɛ ye vɛ́ wuna sangal tanga ye Shɛm,
ko Kanaan e ra a Yafɛt fwôm sesam.”
28E bamâ tɛmɛ-nshi, Nowa a to ra neshey naga betat na kuru batungun (350), 29ko a ku; yɛ na neshey naga shabetat na kuru batungun (950).
Currently Selected:
Susumo 9: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
