Yod hanr liq 3

Yer suq he lehq Niq kawd der tawd yaw daq che

1Awg yand u ve khuhn, Yud daq chaw teq pa awg khuhn lo awg hox awg nax phehq che, Niq kawd der meh che Phar rir sehd#3:1 Phar rir sehd Yud daq chaw teq pa ve bon hox bon nax teq mor phehq che yaog. Mt 3:7 te ghad cawg che yaog. 2Yawd awr lehr, muhd khax huh#3:2 muhd khax huh Muhd kaw huh Yer suq chehd lo lag tug kuhz cheaq te lehq yaog. Yer suq chehd lo lag lehq koz che, “Rar bid-og, nawg awr lehr Ghig sa chehd lo lag che Sar lar te ghad phehq che haq ngag hehd sir che yaog. Awg lawn ghod ver, nawg te mar che awg hez teq pa awr lehr, Ghig sa yawd awg khuhn chehd che chaw ma hez ver, chaw te ghad-eg liz te maq gha hawg,” lehz yawd haq koz vid che yaog.

3Yer suq kawq koz che, “Ngag nawg haq awg cehg mag koz ax laq, chaw khar ve te ghad lehd ma koz awg suhx te pawz mad kawq pawag ver,#3:3 awg suhx te pawz mad kawq pawag ver Co ha phawd awr awg suhx phehq vehr che haq koz che yaog. Ghig sa ve muhd mig haq maq gha mawg hawg,” lehz yawd haq koz vid che yaog.

4Niq kawd der kawq koz che, “Mawd vehr che chaw te ghad awr lehr, khawd-ehg kheh te kawq pawag gha tuawg le. Yawd ved awr ye ux peg khuhn yawd kawq gehe lehq te pawz kawq pawag gha tuawg la,” lehz yawd haq na ngawx che te yand, 5Yer suq kawq koz che, “Ngag nawg haq awg cehg mag koz ax laq, chaw khar ve te ghad lehd ma koz, a kaz he lehq Awg ha phu#3:5 a kaz he lehq Awg ha phu Yer suq haq yonr lehq baz tiz sar khanr yug che haq koz che yaog. awg khuhn maq pawag ver, Ghig sa ve muhd mig awg khuhn gehe maq gha. 6Awg suhr awg sar geh pawag che ted ceng awr lehr, awg suhr awg sar phehq che yaog. Awg ha phu geh pawag che ted ceng awr lehr, awg ha phehq che yaog.#3:6 awg ha phehq che yaog Ghig sa ve Awg ha phu haq te lehq, co ha phawd awr a saq teq che haq gha che haq koz che yaog. 7Nig hehd awg suhx te pawz gha kawq pawag che yaog lehz ngag nawg haq koz ax che haq ta and. 8Muhd huh awr lehr, khar lo mez veh gad liz mez veh#3:8 Muhd huh … mez veh Muhd huh mez che haq chaw yad tawr lar maq gha che haq koz gad che yaog. lehq, awg khuhd u ve haq nawg kad che yaog. Kheh ma khuhd, khar lo mez lag che lehq nar, khar lo mez veh tug lehq nar, nawg maq sir. Awg ha phu awg khuhn pawag che chaw awg gha lia awr lehr, u ve haq sur daq che yaog,” lehz yawd haq koz vid che yaog.

9Niq kawd der kawq koz che, “Che teq pa khawd-ehg kheh te phehaq gha tuawg le,” lehz yawd haq na ngawx che te yand, 10Yer suq kawq koz che, “Nawg awr lehr Id sar rer laq chaw teq pa awg khuhn lo Sar lar te ghad phehq liz, awg lawn che teq pa haq nawg maq sir la. 11Ngag nawg haq awg cehg mag koz ax laq, ngag hehd sir che awg ceng awg lawn haq ngag hehd koz lehq, ngag hehd mawg che awg ceng awg lawn haq ngag hehd sax khiz khanr che yaog. Kheh ma khuhd, ngag hehd sax khiz khanr che haq nig hehd mad haq yug. 12Mig gig haq caz daq che awg ceng teq pa awg lawn ngag nig hehd haq koz ax vehr che liz nig hehd maq yonr ver, muhd nuh maq haq caz daq che awg ceng awg lawn ngag nig hehd haq koz ax ver, khawd-ehg kheh te lehq nig hehd yonr tuawg le. 13Muhd nuh maq lo yaq che Chaw yad ve Yad phu#3:13 Chaw yad ve Yad phu Yer suq haq koz che yaog. Mk 8:31 ma hez ver, chaw te ghad-eg liz muhd nuh maq lo ma taez jaw.

14Heh pir khuhn lo Mod ser vig haq chid taz che heh,#3:14 vig haq chid taz che heh Heh 21:9 haq ngawx. Chaw yad ve Yad phu haq liz chid taz vid tug yaog. 15Yawd haq kha yonr che chaw awg gha lia co tiq ha tiq gha tug, yawd haq chid taz vid tug yaog.

Ghig sa mig gig yad haq haq jad che

16Awg lawn ghod ver, Ghig sa mig gig yad haq haq jad cheaq te lehq, yawd ved Yad phu tinr-a pehar che yaog. Yad phu haq kha yonr che chaw awg gha lia maq gha lug maq gha sez lehq co tiq ha tiq haq liz gha tug awg pun, Ghig sa yawd ved Yad phu tinr-a pehar che yaog. 17Awg lawn ghod ver, mig gig yad haq suhx jehg tug, Ghig sa yawd ved Yad phu haq mig gig khod-aq lo lag peha che ma hez. Kheh ma khuhd, Yad phu haq te lehq mig gig yad thaer khuhq che haq gha tug yawd lag peha che yaog. 18Yad phu haq yonr che chaw#3:18 yonr che chaw Rm 12:1 awr lehr, Ghig sa ve suhx jehg che haq maq gha khanr. Maq yonr che chaw awr lehr, Ghig sa ve Yad phu tinr-a ve awg meh haq maq yonr che haq te lehq, a meha liz Ghig sa ve suhx jehg suhx taz che haq gha khanr vehr che yaog. 19I hehd suhx jehg suhx taz che che ve haq gha khanr che awr lehr mig gig khod-aq lo awg ghiz gehag vehr liz, mig gig yad teq pa ve kanx teq pa awr lehr haeg cheaq te lehq, awg ghiz haq keh i hehd naz hoq che haq haq che yaog. 20Awg lawn ghod ver, awg haeg teq pa haq te che chaw awr lehr, awg ghiz haq ngawx bawg lehq, yawd te che teq pa maq gha tuhaz tug, awg ghiz geh yawd mad lag. 21Kheh ma khuhd, awg cehg mag cawd che haq te che chaw awr lehr, yawd te che teq pa Ghig sa haq cud lehq te che lehz tuhaz tug, awg ghiz geh yawd lag che yaog,” lehz koz vid che yaog.

Yod hanr Yer suq awg lawn sax khiz khanr che

22U ve awg khaz nuhr Yer suq he lehq yawd ved awg laq ghuhd teq pa Yud daq muhd mig lo kae che yaog. Yawd i hehd geh u huh chehd lehq, su haq baz tiz sar pid chehd che yaog. 23Sar lenr med awg pad huh Ehr nonr lehd koz che ted kag huh a kaz cawg mad che haq te lehq, Yod hanr liz u huh su haq baz tiz sar pid chehd che yaog. Chaw teq pa u huh kae lehq baz tiz sar khanr yug chehd che yaog. 24Awg lawn ghod ver, Yod hanr awr lehr thawnr khuhn maq gha geh ser.

25Awg yand u ve haq, Yod hanr ve awg laq ghuhd ted pehg awr lehr, daq vid kehg vid tug a kaz chuhd che awg lid awg lawn Yud daq chaw te ghad geh tawd ghawg daq chehd che yaog. 26I hehd Yod hanr chehd lo lag lehq koz che, “Rar bid-og, nawg Yawd danr lawg kax ox pax awr lo chehd-ag huh nawg geh chehd jaw lehq, nawg yawd awg lawn haq sax khiz khanr che te ghad#3:26 sax khiz khanr che te ghad Yer suq haq koz che yaog. awr lehr, su haq baz tiz sar pid chehd lehq chaw awg gha lia yawd chehd lo veh chehd che yaog,” lehz yawd haq koz vid che yaog.

27Yod hanr kawq koz che, “Ghig sa yawd haq pid che ted ceng ma hez ver, chaw yad awr lehr ted cear liz maq gha hawg. 28‘Ngag Khreq ma hez. Ngag awr lehr yawd awg ghud suhr lag peha che chaw te ghad phehq che yaog,’ lehz ngag koz che haq nig hehd awg ton ngag awg pun sax khiz khanr gha che yaog. 29Awg phad mawd he tug yad mid hax haq gha che te ghad awr lehr, awg mid ma he che phad#3:29 awg mid ma he che phad Yer suq haq koz che yaog. phehq che yaog. Awg pad huh hox lar lehq awg mid ma he che phad ve awg khuhd haq na che awg chawd te ghad#3:29 awg chawd te ghad Yod hanr A kaz tur var haq koz che yaog. awr lehr, awg mid ma he che phad ve awg khuhd haq gha kad cheaq te lehq ha lehg jad che yaog. U ve heh te lehq, ha lehg che ted ceng ngag awg khuhn lo saw lawq vehr che yaog. 30Yawd awr lehr, gha ir veh muh veh tug yaog. Kheh ma khuhd ngag awr lehr, gha i veh yawnd veh tug yaog,” lehd koz che yaog.

Muhd nuh maq lo yaq che te ghad

31Muhd nuh maq lo yaq che te ghad awr lehr, awg gha lia haq keh ir sehr phad phehq che yaog. Mig gig khod-aq lo ve chaw te ghad#3:31 Mig gig khod-aq lo ve chaw te ghad Yod hanr yawd awg ton haq koz chehd che yaog. awr lehr, mig gig ve chaw phehq lehq mig gig ve awg lawn haq yawd koz che yaog. Muhd nuh maq lo yaq che te ghad awr lehr, awg gha lia haq keh ir sehr phad phehq che yaog. 32Yawd gha mawg gha kad che awg ceng teq pa ve awg lawn haq yawd sax khiz khanr che yaog. Kheh ma khuhd, yawd sax khiz khanr che haq chaw te ghad-eg liz mad haq yug. 33Yawd sax khiz khanr che haq haq yug che chaw te ghad awr lehr, Ghig sa awr lehr awg cehg mag cawd jad che yaog lehd koz cunr dawz lar che yaog. 34Ghig sa peha lar che te ghad#3:34 Ghig sa peha lar che te ghad Yer suq haq koz che yaog. awr lehr, Ghig sa ve tawd khuhd haq yaw che yaog. Awg lawn ghod ver, Ghig sa yawd haq Awg ha phu kha lawq ghad pid che yaog. 35Awr pa awr lehr, Yad phu haq haq lehq, awg ceng awg gha lia yawd ved laq khuhn lo chid aq vid peg che yaog. 36Yad phu haq yonr che chaw awr lehr, co tiq ha tiq cawg che yaog. Yad phu haq mad yonr che chaw awr lehr, co tiq ha tiq haq maq gha mawg. Yawd awg thag huh Ghig sa nez nag che ted ceng#3:36 Ghig sa nez nag che ted ceng Ghig sa cir yanr che haq koz che yaog. cawg lar che yaog.

Currently Selected:

Yod hanr liq 3: lhiNT

Highlight

Copy