Luka 21

Ichakusopa icha mukolo umufwilwe

(Mlko. 12.41-44)

1U Yesu akenelezya nukwennya abantu abakabi bakusopa ivyabupi vyabo muchakusopelamo mu Nyumba iya Chala, 2akennya sona umukolo umufwilwe umupina akusopa isalabazya zibili. 3Akati, “Naloli inkubabuzya ukuti umukolo umufwilwe umupina uyu, asopa indalama inyinji muchakusopelamo ukuchila abantu bosi abanji. 4Pakuti abanji bosi basopa zizyo basabulapo bulo pa vyabupi vyabo; loli umukolo uyu, nu bupina bwache, asopa vyosi vivyo akaba navyo ukuti vingamusunga.”

U Yesu akunenela zila nizya kumongoliwa kwa Nyumba iya Chala

(Mat. 24.1-2; Mlko. 13.1-2)

5Abamanyili bamo bakanenagha nizya kabonekele akiza aka Nyumba iya Chala, yiyo yikazengiwa na mabwe amiza, sona ni vyabupi vivyo vikabikiwa kwa Chala. U Yesu akati, 6“Akabalilo kakwiza kako vyosi vivyo mukuvyennya vikwiza pakumongoliwa. Nalimolimo ibwe lilyo likwiza pakusyala pamwanya pa lyamwabo, lyosi likwiza pakugumuliwa.”

U Yesu akunenela zila nizya ntamyo nu kuvwimiwa

(Mat. 24.3-14; Mlko. 13.3-13)

7Bakamulalusya bakati, “Wee Mumanyisi, nkimba ivintu vinivi vikwiza pakuboneka liyi? Nkimba choni chicho chikwiza pakuboneka ukulanjizya ukuti akabalilo kali papipi ukuti vinivi vibombiwe?”

8U Yesu akamula akati, “Mubanje maso, ukuti patakabepo nayumo umuntu uwakubazimbula. Pakuti abantu abinji bakwiza pakubombezya itabwa lyane nukuti, ‘Ane ne Kilisitu.’ Bakwiza pakunena sona ukuti, ‘Ubumalilo bwafika.’ Loli mutakabakonke. 9Mutakanyilaye bo mukwivwa nizya nkondo ni vyongo. Ivintu vinivi vibaghiye vibombiwe tasi, loli kute kokuti ubumalilo bwafika.”

10U Yesu akababuzya sona akati, “Ichisu chikwiza pakulwana ni chinji, sona ubumwene bukwiza pakulwana nu bunji. 11Kukwiza pakuba utusenyenta utwakoghofya, ni zala, sona nu bubine posi na posi. Ivintu iviyeni ni vintu ivyakoghofya vikwiza pakuboneka kumwanya. 12Loli bo ivintu vinivi vitabombiwe, bakwiza pakubalema nukubavwima. Bakwiza pakubabika pamaso pa balaghili munyumba izyakwiputilamo, po bakwiza pakubighalila mujele. Pachifukwa icha nene bakwiza pakubasitaka pamaso pa balaghili na pa bamwene. 13Aka kakwiza pakuba kabalilo kinyu akakubikila ubwakaboni nizya ane. 14#Luk. 12.11-12Mutakapasyanje mumoyo ghinyu namumo mukwiza pakwiyimila mwebene, 15pakuti inkwiza pakubapa amazyu na mahala aghakuti nayumo uwa balwani binyu akwiza pakukana pamo ukususya zizyo mukunena. 16Abapapi binyu na bawamwinyu na bakamu binyu na bamanyani binyu bakwiza pakubasambukila. Bamo mumwinyu bakwiza pakughoghiwa. 17Abantu bosi bakwiza pakubabenga pachifukwa icha nene. 18Loli nakamokamo akasisi kumitu yinyu, kako kakwiza pakusobelapo. 19Wime nkani, po ukwiza pakupokela ubumi.

Nizya chinyazu chipalapala chicho chikunangannya

(Mat. 24.15-21; Mlko. 13.14-19)

20“Nanti mukwennya u Yelusalemu azyunguliliwe na balwani, muzimanye ukuti ali papipi pakumongoliwa. 21Po abantu babo bali mu Yudeya bachimbililaye mumaghamba, abantu babo bali mukaya akakulu nkani bepemo, sona na bantu bosi babo bali kuzi kwa kaya batakinjilaye mukaya akakulu nkani. 22#Hos. 9.7Pakuti amasiku ghalaghala gho ghagho u Chala akwiza pakubafunda abantu ukuti vyosi vivyo Amasimbo ghakanena vikwanilisiwe. 23Kukwiza pakuba bupalapala nkani mumasiku ghanagho na bakolo babo bali ni nyanda, sona na ku bamayi babo bakonkezya abana. Ubupalapala ubukulu nkani bukwiza pachisu ichi, ulufundo ulwa Chala lukwiza pa bantu banaba. 24Bamo bakwiza pakughoghiwa pankondo, abanji bakwiza pakusendiwa ngati bo bakayidi pakubuka nabo muvyisu ivinji. Po abantu babo bate ba Yuda bakwiza pakumukanyankila u Yelusalemu mupaka akabalilo akabumalilo bwabo kakwane.

Ukwiza kwa Mwana uwa Muntu

(Mat. 24.29-31; Mlko. 13.24-27)

25 # Yes. 13.10; Ezk. 32.7; Yow. 2.31; Ubv. 6.12-13 “Kukwiza pakuboneka ivintu iviyeni kwizuba na kumwezi, sona na kuntondwa. Pachisu ichapasi, abantu aba inko zyosi bakwiza pakutetema nukuvulungana, bo bennya ukuyingana kwa nyanja na mayigha. 26Abantu bakwiza pakuzilika nu bogha, bo bachili bakulindilila, chicho chikwiza pakuboneka pachisu ichapasi pakuti ivintu ivya maka kumwanya vikwiza pakuyingana. 27#Dan. 7.13; Ubv. 1.7Po abantu bakwiza pakumwennya u Mwana uwa Muntu akwiza mumabingu na maka nu buchindamu ubukulu. 28Bo ivintu vinivi vikwanda pakuboneka, imilila nukwinusya imitu yinyu pakuti ubupoki buli papipi.”

Ichimanyilo icha ikuyu

(Mat. 24.32-35; Mlko. 13.28-31)

29Po u Yesu akababuzya ichili ichi akati, “Ennya ichikuyu na makwi ghosi. 30Nanti mwennya bulo isamba zyache zyanda pakulemba, mukumanya ukuti ichisiku chili papipi. 31Umwakuyana bulo, nanti mukwennya ivintu vinivi vikuboneka, manya bulo ukuti u Chala ali papipi pakwikazya Ubumwene bwache. 32Naloli inkubabuzya ukuti ivintu vyosi vikwiza pakuboneka bo abantu abankulilo iyi batafuye bosi. 33Kumwanya ni chisu ichapasi vikwiza pakumala, loli amazyu ghane ghakwiza pakuba na maka bwila na bwila.”

U Yesu akubasoka abantu ukuti babanje maso

34“Muchebaye ukuti amoyo ghinyu ghatakikolezannyanje nu kulya, nu kukolwa, sona nu kupasya nizya bumi ubu, pamo isiku lila lingiza kukwinyu umwakubachenusya bulo 35ngati cho chipingo. Pakuti isiku lilalila likwiza pakubawila abantu bosi babo bakwikala muchisu ichapasi. 36Mubanje maso nukwiputa akabalilo kosi ukuti mubanje na maka aghakwipokela mwebene muvintu vyosi vivyo vikwiza pakuboneka, sona nukuti mungimilila pamaso pa Mwana uwa Muntu.”

37 # Luk. 19.47 Isiku ni siku u Yesu akamanyizyanga mu Nyumba iya Chala, loli pabusiku akafumaghamo nukubuka kwighamba ilya Misyunguti. 38Indabindabi yosi abantu bosi bakabukagha mu Nyumba iya Chala pakumuteghelezya.

Currently Selected:

Luka 21: LMBNT2016

Highlight

Copy